བདེན་སྙེགས།༼རྨ་ཆུ།༽
དུ་བའི་ཁ་རླངས་དྲོན་མོ་ཡར་མར་འཁྱིལ།།
གློག་འོད་འཁྱག་པ་མལ་ཁྲིའི་སྒང་དུ་ཉུལ།།
ཕྱི་རོལ་སྒྲ་དང་འུར་ཟིང་ཡོལ་བས་བཅད།།
ཁེར་མོ་ཁ་རོག་བསྡད་ནས་ཅིག་ལ་བསམ།།
བདུད་རྩི་ཆང་གིས་སེམས་པ་གསོ་ཚུལ་ཡིན།།
རོལ་དབྱངས་འཁྱམ་པོ་སྒེའུ་ཁུང་བརྒྱུད་ནས་འགྲོ།།
རླུང་བུ་བདག་མེད་མཚན་མོའི་པང་ན་ངུ་།།
ནམ་མཁའ་སྟོང་བ་མཚོ་མོའི་ངོགས་སུ་འཆར།།
སྐར་མ་འགའ་ཞིག་དེ་ཡི་ནང་དུ་འགུལ།།
རྨི་ལམ་ནང་ནས་ཁྱོད་ལ་འཕྲད་ཚུལ་ཡིན།།
ནམ་ཟླ་དགུན་ལ་ཁ་བ་མར་མར་འབབ།།
ང་ཡི་རྐང་རྗེས་རི་སྒང་ཞིག་ལ་ཕབ།།
ཨང་ཀི་འགའ་ཡི་མགོ་རྐང་ཡང་ཡང་བསྒྲིགས།།
ཁྱོད་ཀྱི་རྒྱབ་གཟུགས་ཙམ་ཞིག་ང་ཡིས་བཙལ།།
ཞེ་འདང་འོ་མའི་ལྟིང་ཀ་རྡོལ་ཚུལ་ཡིན།།
ལས་ཀྱི་རི་མོ་ལོ་ཟླའི་ཁ་ཆུའི་ཟོས།།
ངས་ནི་ཁྱོད་རང་བསྒུགས་ནས་རིང་ཙམ་ལོན།།
གཙང་བོ་ཆུ་ལ་འཁྱག་པའི་འགྲམ་དར་ཆགས།།
གྲམ་པའི་རྡོ་ལ་དཔྱིད་ཉི་ཙམ་ཞིག་ཕོག།
དགའ་སྡུག་མིག་ཆུའི་རྡོག་པ་འགྲིལ་ཚུལ་ཡིན།།
ལུས་ལ་འདོད་པའི་ཤ་ཁྲག་རྒྱས་དང་མཚུངས།།
སེམས་ལ་རྨོངས་པའི་སྡོམ་དྲ་སྤུ་བཞིན་གཟེངས།།
གློ་དང་མཆིན་པའི་གསེང་ལ་མི་ཞིག་སྦས།།
རུས་དང་རྐང་གི་ངོས་སུ་ཚིག་ཅིག་བྲིས།།
མི་རྟག་སྒྱུ་མའི་ནོར་ལ་ཞེན་ཚུལ་ཡིན།།
དཀར་པོ་ཞིག་གི་ནང་ན་དམར་པོ་ཡོད།།
དམར་པོ་དེ་ཡི་དཀྱིལ་ན་སེར་པོ་ཡོད།།
ད་དུང་དེ་ཡི་འཕྲོ་ན་ལྗང་ཁུ་ཡོད།།
དཀར་སེར་དམར་ལྗང་མདོག་གི་ནང་སྙིང་ཅན།།
ང་ཡིས་ཁྱོད་ལ་མིང་ཞིག་འདོགས་ཚུལ་ཡིན།།
གཞན་པ་དེ་ཡི་ཚབ་ལ་སུ་ཞིག་འཇོག།
མེད་པ་ཞིག་གི་དོན་ལ་ཅིའི་ཕྱིར་སྨྲེང་།།
དྲང་མོར་བཤད་ན་ཁྱོད་རང་སུ་ཞིག་ཡིན།།
སྐྱེ་བ་ད་ལན་འུ་གཉིས་ཅི་ཞིག་བྱེད།།
མེ་ལོང་ནང་ནས་རང་ལ་བལྟས་ཚུལ་ཡིན།།
མུན་པའི་ནང་ན་ཡོད་པ་མུན་པ་ཡིན།།
མུན་པའི་གསེང་ན་ཡོད་པ་ཁྱོད་རང་ཡིན།།
ཁྱོད་རང་དྲན་ན་ང་རང་མུན་པ་ཡིན།།
བརྩེ་དུང་རྣལ་མ་མུན་ཁྲོད་སྒྲོན་མེ་ཡིན།།
འཆི་བ་ཁོ་ནའི་ཕྱོགས་སུ་བཅར་ཚུལ་ཡིན།།
11.3.2014 ཉིན།
|