སྐྱེས་སྐར་མེད་པའི་འཆི་སྐར་གླེང་བ།
ལམ་སྐྱ་བོ།
རྭ་རྒྱའི་ས་མིང་ཡག་ཚུལ་བཤད་ན།།
རྨ་ཆུའི་བཞུར་རྒྱུན་རིང་ཚུལ་བཤད་ན།།
ཁྱུང་མགོན་བྲག་རི་མཐོ་ཚུལ་བཤད་ན།།
སྐྱེས་སྐར་མེད་པའི་འཆི་སྐར་གླེང་འདོད།།
མི་གླེན་སོང་བའི་ས་དམར་ཁུགས་སུ།།
ཨུ་ཤུ་མིན་པའི་ཤུགས་རིང་འཐེན་ན།།
ཡུན་ཐུང་མི་ཚེའི་ཟིན་ཐོ་ལྷག་མ།།
ལུང་བ་དེ་ནས་འབྲི་མཚམས་ཆད་སོང་།།
རྨི་ལམ་ཁུར་ནས་ལམ་དུ་འགྲོ་རན།།
རེ་བ་རུམ་ནས་སོ་སོར་གྱེས་ཆོག།།
ཟས་རིན་ཤེས་མཁན་ཡོད་པ་བདེན་ཡང་།།
སྐྱེས་སྐར་མེད་པ་ཁྱོད་གཅིག་ཡིན་འདྲ།།
སྟོང་ལོ་བདུན་གྱི་དབྱར་ཟླ་སྐྱིད་ཀྱང་།།
མི་ལོ་བཞི་ཡི་གྲུབ་འབྲས་མ་རྙེད།།
སྒོ་ཆེན་དེ་ནས་ཕྱི་རུ་ཐོན་ན།།
འབྲི་འཕྲོར་ལུས་པ་ཞེ་རེ་ཆགས་ཡོད།།
སྙན་ངག་མིན་པའི་ཚོར་བ་བཞུར་དུས།།
ཚོར་བས་བྱིན་པའི་སྙན་ངག་གྲུབ་བྱུང་།།
སྐྱེས་སྐར་མེད་པའི་འཆི་སྐར་གླེང་དུས།།
རོ་བདག་མེད་པའི་བེམ་པོ་དྲན་གི།།
ཤ་འདང་རུས་འདང་ཁྱོད་ལ་བཟུང་ནས།།
གསེར་ནག་དུས་ཚོད་མང་དུ་བརླགས་ཟིན།།
འཆི་སྐར་མ་གཏོགས་སྐྱེས་སྐར་མེད་ན།།
ཁྱོད་ཀྱིས་ང་ལ་ཁྲེལ་མེད་བྱས་སོང་།།
ད་སྐབས་ང་ཁྱོད་དུང་རབས་བཤད་ན།།
ལོ་ངོ་བདུན་གྱི་ཉི་མའི་རྗེས་རེད།།
ཉི་མ་དྲོ་རུང་དྲོད་ཁོལ་མ་ཤེས།།
དྲོད་ཁོལ་ཤེས་དུས་ཉི་མ་མི་མཐོང་།།
ཆུ་འགྲམ་དེ་ནས་ཁྱོད་ཉིད་བཙལ་བ།།
ང་གཅིག་མ་གཏོགས་སུས་ཀྱང་མི་རྟོགས།།
ཡོད་ཡོད་སྣང་དུས་མེད་པ་མཐོང་བ།།
ཁྱོད་རང་ཀློག་མཁན་ཡིན་ན་ཤེས་ཡོད།།
ཁྱོད་ཉིད་ཤི་རྐྱེན་ང་ཡིས་དཔོག་ན།།
མུག་ནག་ནང་གི་ལག་སྙོབ་རེད་འདུག།།
དེ་རིང་ཁྱོད་ཀྱི་འཆི་སྐར་རོལ་བ།།
ང་ཉིད་བདག་པོ་ཡིན་པ་མཚོན་ཆོག།།
འཆི་སྐར་སེམས་ནས་དུར་ཐང་འཚོལ་ན།།
མྱ་ངན་སྐྱེས་ནས་སྨྲེང་བ་འཁོར་གི།།
ཁྱོད་བཞུད་སྔ་བ་ང་ལུས་འཕྱི་བ།།
ཁྱོད་ལ་སྐྱེས་སྐར་མེད་པས་ལན་སོང་།།
༢༠༡༤/༨/༡༢