༈མཚན་མོའི་ཕྱི་ནང་།
སྙན་ཚོམ།
མགར་མེ་ལྗང་། དཀར་མཛེས།༽
མཚན་ལམ་རིང་མོའི་རྒྱུ་སྐར་ཞིག་གི་ཆེད་དུ
ངས་ད་དུང་ནམ་མཁའ་ལ་ཅེར་ནས་བསྡད
ཟླ་བ་མ་ཤར་བའི་སྔོན་ལ
དྲོད་ལམ་ལམ་གྱི་བརྩེ་བ་དེ་མཐོང་མ་སྲིད
དོ་ནུབ་ང་རང་མཚན་མོ་ལ་ཕྱོགས
བདག་སེམས་རླུང་ལ་བསྐུར
མཁའ་དབྱིངས་ཀྱི་སྐར་ཚོགས་སླར་ཡང་སྤྲིན་ནག་གིས་གཤེར
2017/7/28
མཚན་མོའི་གླུ་སྐད།
ཉི་མ་མཚོ་ཁ་ནས་མར་རུབ་ལ་ཉེ་དུས
བདག་གིས་རྒྱང་རིང་གི་ནམ་མཁའ་ལ་གཏད་ནས
ཞོགས་པ་ཞིག་གི
ཉི་མ་ལ་སྒུག་ཡོད
དོ་ནུབ་ནི་ཤིན་ཏུ་ལྷིང་ཞིང་འཇགས་ལ
སྡུག་བསྔལ་གྱི་རླུང་བུ་དག་ཀྱང་རི་སྒང་ནས་ཡལ་ཟིན
སྐར་ཚོགས་ཀྱི་འོད་མདངས་ས་ལ་འཕྲོས་ཏེ
མཚན་མོ་འདིས་ཉིན་མོའི་རང་བཞིན་གྱི་ཚུལ་བཟུང
བདག་སེམས་ནི་ཁྱོད་སར་ཕྱོགས་ནས་ཙོག་པུར་འདུག
མོའི་རྣ་བ་ལ་བརྩེ་དུང་གི་གླུ་གཞས་གྱེར
དོ་ནུབ་ནི་ཤིན་ཏུ་ལྷིང་ཞིང་འཇགས་ལ
དལ་གྱིས་ལྡང་བའི་རླུང་བུ་མེད་ལ
སིལ་གྱིས་འབབ་པའི་ཆར་བ་ཡང་མེད
ཡོད་ཚད་འཇམ་ཅག་གེར་མཚན་མོ་ལ་ཕྱོགས་ཏེ་གཉིད་དུ་ཡུར
ཟླ་འོད་ཀྱིས་འོད་སྣང་གིས་བཏུམས་པའི་མཚན་མོ་འདི་ནི
ཁྱོད་རང་བཞིན
རྣ་ལ་སྙན་ཅིང ཡིད་དུ་འབབ་བྱུང་།
2017/11/18
ཡིད་བྱུང་གི་གཏམ།
ཁྱེད་དྲན་འོང་དུས
ངའི་སྙིང་ཁ་ནས་འདས་སོང་བའི་གཏམ་རྒྱུད་རེ་རེེས
མེ་སྟག་མཆེད་བཞིན
ཁྱོད་རང་འབོད་ཀྱིན་ཡོད
ཞེ་སེམས་གཉིས་ལ་འདྲེས་ནས་བྱུང་བའི་བརྩེ་དུང་གི་གཏམ་རྒྱུད་འདི་དག
རྒོད་པོ་བཞིན་འཕུར་མྱོང་ལ
ཉི་མ་བཞིན་ཤར་མྱོང
མཚོ་མོ་བཞིན་འཁྱིལ་མྱོང
2017/10/10
ཡོད་ཚད་གཉིད་དུ་ཡུར་བའི་མཚན་མོ་ཞིག་ལ།
མཚན་མོ་དེར
བརྩེ་དུང་གི་གཏམ་རྒྱུད་རེ་རེ་དབྱངས་སུ་བཀུག་ནས
ངུ་ངག་གི་རི་ལུང་ཐང་གསུམ་གཉིད་ལས་དཀྲོག་དུས
དྲན་བྱུང་ངམ
ངའི་སྙིང་ཁ་རུ་སྤུངས་པའི་དྲན་པ་གཉོམ་པོ
འཁྱག་སིབ་སིབ་ཀྱི་ཁ་བའི་འདབ་མ་སར་ལྷུང་ནས
གྲང་ཤུར་ཤུར་གྱི་རླུང་བུ་རེ་རེས་ཤུར་སྒྲ་དབྱངས་སུ་གྱེར་དུས
དྲན་བྱུང་ངམ
ངའི་དྲན་པ་ལ་ཐོགས་པའི་ཡ་ཆུང་གི་རྣམ་ཤེས་འཁྱམས་པོ
འཇམ་ཐིང་ཐིང་གི་མཚན་མོའི་ཡུལ་ལ་ཕྱོགས་ནས
ཁྲ་ཆེམ་ཆེམ་གྱི་ཟླ་བའི་འོད་ཀྱི་གསེབ་ནས
ནག་ཡོར་ཡོར་གྱིས་རི་ཚོགས་ཀྱི་མཐར་རུ་འཇུག་དུས
དྲན་བྱུང་ངམ
ངའི་སྙིང་གཏམ་མངར་མོའི་དྲོད་ཁོལ་གྱི་མེ་ཆེན
མཚན་མོ་དེར
བདག་ལ་ལབ་ཚིག་མེད་ལ
ངག་སྒོ་ཡང་འགག་ཟིན་པའི་མཚན་མོ་དེར་ངས་ཁྱོད་ལ་དགོངས་དག་ཞུ་ཆོག
2017/9/19
རྩོམ་པ་པོའི་ངོ་སྤྲོད།༽མགར་མེ་ལྗང་ནི་༡༩༩༧ ལོར་དཀར་མཛེས་ཉག་རོང་ཐང་སྐྱིད་དུ་སྐྱེས།
གནས་དེ་གའི་མཚན་ཉིད་སློབ་གྲྭ་ནས་བཤད་གྲྭའི་བར་ལོ་ཧྲིལ་བོ་དུ་མར་བོད་ཀྱི་ཐུན་མིན་རིག་གནས་ལ་ས་བཅད་མ་སྟོང་ཁུལ་གྱི་སྦྱངས་འབྲས་ལྷུར་བླངས། ༢༠༡༦ ལོ་ནས་བཟུང་སྙན་ངག་འབྲི་ཀློག་གི་ལས་ལ་དགའ་ཕྱོགས་ལྟར་འབད་མུས་སུ་ཡོད།
ཁོ་བོས་སྙན་ངག་ལ་བཟུང་བའི་རྣམ་འགྱུར་ནི་མིའི་རིགས་ཀྱི་ནང་དོན་ལས་བརྒལ་བའི་ཚེ་སྲོག་གི་གསོན་ཤུགས་ཤིག་སྟེ། ནམ་ཡང་མི་འབྲལ་མར་མེའི་འོད་དང་སྡོང་བུ་བཞིན་སྙན་ངག་དང་མཉམ་འདུན་གྱི་སྤོབས་པ་བཅངས་ཀྱིན་ཡོད།
|