| རྨ་ཆུའི་བློ་བཟང༌། རྨ་ཆུ།
མི་ཡུལ་ནས་མི་ཡུལ་ལ་འཁྱམས་པའི་དུང་ཆུང༌།
ཞིག་རལ་གྱི་འཚོ་བའི་ཁྲོད་ནས་རྒྱང་རིང་ནས་རྒྱང་རིང་ལ་བོས།
རིགས་ཞེན་གྱི་གདུང་བས་མནན་ཏེ་འདུན་ལམ་ལ་གས་ཆག་ཤོར།
ཕུགས་བསམ་གྱི་གསེར་བུམ་ཁྱེར་ནས།
ལྷོ་རྒྱུད་ཀྱི་འཛིན་མར་ཤུགས་ཀྱིས་སླེབས།
ནག་ནོག་གིས་མ་གོས་པའི་དུང་ཆུང་ལ་ད་དུང་སྙན་ཆ་ལྡན།
ཡུན་རིང་དུ་སྲུང་བའི་དུང་ཆུང་ལ་མཛེས་སྡུག་རྫོགས།
ནུབ་ཕྱོགས་ནས་སྤྲིན་ནག་འཁྲུགས་ཤིང༌།
སྤྲིན་གསེབ་ནས་དྲག་ཆར་བབས།
ཆར་རླུང་གི་ངར་ཁས་དུང་ཆུང་གི་ཕྱི་ནང་ལ་ནག་ཐིག་ཕབ།
དུས་དེ་ནས་བཟུང་དུང་ཆུང་དེའི།
ནང་འཁྲོལ་གྱི་དམ་བཅའི་ཁང་བཟང་ཞིག་སོང༌།
ལོ་མང་ལ་བསགས་པའི་མུ་ཏིག་ས་གཞི་ལ་འཐིམས།
རྩ་གསུམ་གྱི་ལྷ་མཆོག་ལ་རྡོག་པས་བརྫིས།
མཛའ་གཅུགས་ཀྱི་གྲོགས་པོ་ཚོར་བསམ་གཞིགས་ཀྱི་འཕྲིན་ཡིག་བསྐུར།
ཁེར་རྐྱང་དུ་འཚོ་བའི་དུང་ཆུང༌།
མི་ཡུལ་གྱི་འདྲེ་རུ་གྱུར།
གུ་དོག་པའི་ཁོར་ཡུག་འདི་ནས་སེམས་གདུང་བའི་ལྟད་མོ་མཐོང༌།
མདོག་བསྒྱུར་བའི་ཚོན་མདངས་ངོགས་ན།
སེམས་འཁྲིགས་པའི་གཟུགས་རིས་མོད།
ཉམ་ང་བའི་མི་རིགས་འདིའི་ཆག་འཇིག་བཙོང་ནས།
ཁྲེལ་མེད་པའི་མི་རྐྱང་འགས་བདེ་སྐྱིད་བསྐྲུན།
འཚོ་བ་རྒྱས་སོང༌། མི་རིགས་ཤིག་གི་ཟུངས་ཁྲག་ཁྱེར་ནས།
སྲིན་པོ་ཅིག་གི་ལུས་སྟོབས་གསོས།
རྟོགས་དཀའ་བའི་གསང་བ་འདིས་བརྗེད་དཀའ་བའི་ལོ་རྒྱུས་བཞག
མི་མངོན་པའི་ཀློང་ན་འཚོ་བའི་ཆོམ་རྐུན་དེའི།
སྨྲ་སྒོ་ཁྲག་གིས་གང་བཞིན་སྲིན་པོའི་བརྟུལ་ཞུགས་བླངས།
འཇིགས་སྣང་དང་སྐྲག་སྣང་མེད་པར།
མི་ཡུལ་ནས་ཁེངས་དྲེག་གིས་འཚོ་བ།
ཁྱོད་ཀྱི་ཟུངས་ཁྲག་འཇིབ་པའི་གཤིན་པོ་ཚོས།
དུས་ནམ་ཞིག་ཁྱེད་ལ་འཁོན་ལན་སློག་ངེས།
ཁྱོད་ཀྱིས་རླུང་རྟ་དར་བའི་རྒྱུ་ནོར་དེས།
དུས་ནམ་ཞིག་ཁྱེད་ཀྱི་མཚན་སྙན་གྱི་བ་དན་དཀར་བོ་རལ་ངེས།
༢༠༡༠ལོའི་རིག་གནས་ཡར་སྤེལ་ལས།
|