| རྔ་བ་སྐལ་བཟང་སྦྱིན་པ།༼རྨ་ཆུ༽
བླ་མ་དཀོན་མཆོག་གསུམ་ལ་བདག་སྐྱབས་མཆི། །
རང་གཞན་དོན་དུ་བྱང་ཆུབ་མྱུར་འགྲུབ་ཤོག །
བདག་གཞན་ཐམས་ཅད་བདེ་བར་འདོད་རྣམས་ཀྱིས། །
བཟོད་པ་ནད་བརྒྱ་འཇོམས་པའི་སྨན་ལྟར་བསྟེན། །
ཞེ་སྡང་མེ་དཔུང་ཆེན་པོ་གསོད་པ་ལ། །
བཟོད་པ་འཛད་མེད་ཆུ་བོར་ཡང་དག་མཚུངས། །
ཕྲག་དོག་བྲང་འགྲོས་དུག་ཆེན་འཇོམ་པ་ལ། །
བཟོད་པ་མཁའ་ལྡིང་དབང་བོར་ཡང་དག་གཞལ། །
ཚིག་རྩུབ་མཚོན་གྱི་རལ་ཁ་བརླག་པ་ལ། །
བཟོད་པ་གོ་ཆ་བརྟན་པོའི་ཆོས་མཐུན་ཉིད། །
གནོད་སེམས་ཉག་ཕྲན་མདའ་མོ་འགོག་པ་ལ། །
བཟོད་པ་སྲ་བའི་གྲི་ཕུབ་རིགས་སུ་མཐུན། །
ཕ་རོལ་དགྲ་ཡི་བྲག་རི་གཏོར་བ་ལ། །
བཟོད་པ་གནམ་ལྕགས་རྡོ་རྗེའི་དཔེ་རུ་བྱས། །
གཉེན་གྲོགས་ལ་སོགས་མཐུན་པའི་ཐབས་མཆོག་ལ། །
བཟོད་པ་ཤིན་ཏུ་བརྟན་པའི་ཟམ་པ་འདྲ། །
བླ་མ་དགེ་བའི་བཤེས་གཉེན་བསྟེན་པ་ལ། །
བཟོད་པ་དྲི་མེད་དར་དཀར་རིང་མོར་སྨྲ། །
ཕུན་ཚོགས་དགེ་བཅུའི་ལུས་སེམས་བདེ་བ་ལ། །
བཟོད་པ་ཤིན་ཏུ་མཛེས་པའི་གོས་དང་མཚུངས། །
སྦྱིན་སོགས་ཚོགས་གཉིས་བསགས་པའི་བང་མཛོད་ལ། །
བཟོད་པ་དགོས་འདོད་ཀུན་འབྱུང་ནོར་བུ་འདྲ། །
རྒྱལ་སྲས་སྤྱོད་པའི་ལོ་ཏོག་སྨིན་པ་ལ། །
བཟོད་པ་ས་བོན་བཟང་བོ་མཐུན་ཕྱོགས་ཉིད། །
སྟོང་ཉིད་ཟབ་མོའི་ལྟ་བར་སྒོམ་པ་ལ། །
བཟོད་པ་བློ་གཏད་ཆོག་པའི་འཐབ་གྲོགས་བལྟ། །
བཟོད་པ་དཀའ་ཐུབ་ཀུན་གྱི་མཆོག་ཡིན་པས། །
བཟོད་པ་ལྟ་བུའི་རྒྱབ་སྟེན་གཞན་མེད་དོ། །
གནོད་པ་མེད་ན་བཟོད་པའི་ཡུལ་མེད་པས། །
གནོད་ལན་ཕན་པ་བསྒྲུབ་ན་བཟོད་པའི་མཆོག །
དེ་བས་གཞན་གྱི་སྡང་སེམས་ལ། །
བརྟེན་ནས་བཟོད་པ་བསྒོམ་པ་ན། །
དེ་ནི་བཟོད་པ་དམ་པ་ཡི། །
རྒྱུ་ཡིན་དམ་ཆོས་བཞིན་དུ་མཆོད། །
གང་གིས་བཟོད་པ་དམ་པ་བསྒོམ་འདོད་ན། །
ཐོག་མར་ཁྲོ་བའི་སེམས་དེ་མ་བཟློག་ན། །
སེམས་ཡོད་སེམས་མེད་ཐམས་ཅད་དགྲ་ཡིན་སྣང་། །
གཞན་གྱི་ཁྲོ་སེམས་ཚེགས་མེད་བཏུལ་བ་ལ། །
བྱམས་དང་སྙིང་རྗེའི་རྩལ་ལྡན་དཔའ་བོ་ཡིས། །
རང་རྒྱུད་བཏུལ་ན་དགྲ་གཞན་ཡེ་ནས་མེད། །
བཟོད་པ་ཅན་ལ་དགྲ་གཉེན་སུ་ཡིན་གྱིས། །
བཀུར་ཞིང་གཙུག་ཏུ་འཛིན་པའི་ཡུལ་དུ་འགྱུར། །
གནོད་དང་སྡུག་བསྔལ་ཅི་བྱུང་བཟོད་པ་ན། །
དེ་ནི་བཟོད་པ་བླ་ན་མེད་པ་ཡིན། །
བཟོད་པས་དབེན་ན་རྒྱལ་བའི་ཞིང་མི་མཐོང་། །
སངས་རྒྱས་གཟུགས་ཀྱི་སྐུ་མཆོག་འགྲུབ་མི་སྲིད། །
དེས་ན་བཟོད་པའི་ཕ་རོལ་ཕྱིན་པ་ལ། །
འབད་ནས་ཆོས་སྐུའི་ས་བོན་ལེགས་སྨིན་ཤོག །
ཅེས་གནས་མཆོག་སྐུང་གསེར་ཁ་མདོ་ནས་བྲིས།
༢༠༡༢ལོའི<<རྨ་ཆུའི་རླབས་སྒྲ>>ལས།
|