བདེན་ལུགས་སེམས་གཤིས་འཚོལ་བའི་རྒྱལ་ཁམས་པ། །
ཡ་གླིང་རྐང་པས་གཞལ་བའི་རྒྱང་བཞུད་པ། །
སྣ་ཚོགས་རིག་འཕྲུལ་འཛོམས་པའི་བྱེད་པོ་ཁྱེད། །
ས་སྒང་འདི་ཡི་སྐར་མ་འོད་ཆེན་ཡིན། །
ཨ་མདོའི་ཡུལ་ནས་རིག་པའི་རྩལ་ཁ་རྒྱས། །
དབུ་གཙང་ཡུལ་ནས་ལྟ་བའི་རང་གཤིས་རྙེད། །
ཤེས་རྨོངས་གཉིད་དུ་འཐོམ་པའི་གྲོང་གསེབ་ནས། །
ལྟ་བའི་རང་ཚུགས་འཛིན་པའི་དཔའ་བོ་ཡིན། །
རིགས་ལ་བཏགས་པའི་འཁྲེང་ཞེན་ཟླུམ་པོ་དེས། །
བལ་བོད་མཚམས་ནས་བོད་ལ་རྒྱང་ལྟ་བྱེད། །
ལྭ་རིང་གྱོན་པའི་རྐང་ཐང་ཡུལ་གྱལ་བ། །
སེམས་གཤིས་ལྕགས་ལས་གྲུབ་པའི་མི་བུ་ཡིན། །
ས་མཐའ་རིག་པས་བསྐོར་བའི་བསམ་གཞིག་ཁྲོད། །
རིགས་ཞེན་གསེར་གྱི་རི་མོ་མ་ནོག་མོད། །
བསམ་མེད་ཁོག་རུལ་སོང་བའི་མྱི་ཆེན་ཚོས། །
དབུ་ལ་ཞྭ་ནག་བཀབ་པའི་ཉེས་ཅན་ཡིན། །
གཡོ་ཅན་གདོན་གྱིས་བཟུང་བའི་ཡུལ་གྲུ་ན། །
རིག་པའི་གེ་སར་དགོད་པའི་ཁྱེའུ་ཆུང་ལ། །
ལྟས་ངན་འགོང་པོ་ཟེར་བའི་མིང་བཏགས་ནས། །
ལྕགས་མཁར་སྒོ་མེད་ནང་གི་བཙོན་པ་ཡིན། །
དྲང་བདེན་ཐིག་ལ་འདེབས་པའི་སྐྱེས་བུ་ཞིག །
འཁར་བ་ལག་ལ་ཐོགས་ནས་རྒྱལ་ཁམས་ཉུལ། །
དུས་ཀྱི་བདེན་པ་བརྡར་བའི་སོ་ཁ་ན། །
ཁ་ལས་རླུང་རྟ་དར་བའི་སྤྲང་པོ་ཡིན། །
གནས་ལུགས་དོན་གྱིས་མཐོང་བའི་དུས་མཐའ་ན། །
སྐུ་ཉིད་གཞན་དུ་ཕེབས་པའི་རྗེས་ཤུལ་ན། །
གཏམ་རྒྱུད་གསེར་གྱི་ཐང་མ་འོད་དུ་འཚེར། །
ཁྱེད་ནི་དུས་རབས་ཤིག་གི་མཁས་པ་ཡིན། །
༡༡ ༤ ༢༠༡༣