༄༅། །གྲུབ་པའི་མཐའི་རྣམ་པར་བཞག་པ་གསལ་བར་བཤད་པ་ཐུབ་བསྟན་ལྷུན་པོའི་
མཛེས་རྒྱན་ཞེས་བྱ་བ་ལས་སྡེ་ཚན་དང་པོ་བཞུགས་སོ། །
ན་མོ་གུ་རུ་མུ་ནཱིནྡྲཱ་ཡ། གང་ཡང་རྨད་བྱུང་ཡིད་འོང་སྙིང་སྟོབས་ཟད་མི་ཤེས་པའི་སྤྱོད་པའི་རྦ་རླབས་ཆལ་ཆིལ་གཡོ་བས་རྣམ་དཀྲིགས་པ༑ ༑ཚོགས་གཉིས་རྒྱ་མཚོ་ཆེ་ལས་ལེགས་འོངས་ཀུན་རྟོག་སྒྲིབ་པའི་སྤྲིན་བྲལ་ཟབ་ཅིང་རྒྱ་ཆེའི་ལེགས་བཤད་གཟི་འོད་འབར། །སྨྲ་བ་ངན་པའི་མུན་པ་མཐའ་དག་མ་ལུས་འཇིག་རྟེན་རྒུད་པ་ཀུན་དང་ལྷན་ཅིག་དྲུང་ནས་འབྱིན་མཛད་པ། །ཐུབ་དབང་སྨྲ་བའི་ཉི་མ་ཚད་མའི་སྟོན་པ་གང་དེའི་ཞབས་རྡུལ་བདག་གི་གཙུག་ཏུ་ཀུན་ཏུ་མཛེས་གྱུར་ཅིག
།རྒྱལ་བའི་མྱུ་གུ་བྱེ་བའི་དབུས་ན་རྒྱལ་བའི་དམ་ཆོས་འཛིན་པ་ལ། །རྒྱལ་བའི་དབང་པོ་ཀུན་གྱིས་མགྲིན་གཅིག་རྒྱལ་བ་ཉིད་བཞིན་རབ་བསྔགས་པ། །རྒྱལ་བའི་རྒྱལ་ཚབ་མི་ཕམ་མགོན་དང་རྒྱལ་བའི་ཡབ་གཅིག་འཇམ་དཔལ་དབྱངས། །རྒྱལ་བའི་ས་ཆེན་མ་མནན་དེ་སྲིད་རྒྱལ་བ་ཇི་བཞིན་བཤེས་སུ་བསྟེན། །རྟོགས་པར་རབ་དཀའ་ཐུབ་པའི་གསུང་གི་གནད། །རྣམ་པ་གཞན་དུ་འདྲེན་པའི་མཐའ་བཀག་ནས།
།སྒྲུབ་དང་སུན་འབྱིན་རིགས་པས་གསལ་མཛད་པ། །ཀླུ་སྒྲུབ་ཐོགས་མེད་རྗེས་འབྲངས་བཅས་ལ་འདུད། །བདེ་བར་གཤེགས་པའི་གསུང་རབ་བྱེ་བའི་གནད་ལ་ནམ་ཡང་བློ་གྲོས་འཁྲུལ་པའི་དྲི་བྲལ་ཞིང༌། །འཕགས་བོད་མཁས་་གྲུབ་དུ་མའི་བློ་ཡིས་འབད་ཀྱང་མ་ལྕིགས་རིགས་ལམ་སྟོང་གི་སྙིང་ནས་འདུད། །མཉམ་མད་མགོན་པོ་དེ་ཡི་ལེགས་བཤད་ཀྱི། །མ་སྨད་བདུད་རྩི་མཆོག་གི་བགོ་སྐལ་ལ། །ལྷག་རྒྱས་ལས་ཀྱང་རྣམ་པར་སངས་རྒྱས་བློ་བཟང་གྲགས་པར་བྱང་ཆུབ་བར་དུ་སྙིང་ནས་འདུད། །མཉམ་མད་མགོན་པོ་དེ་ཡི་ལེགས་བཤད་ཀྱི། །མ་སྨད་བདུད་རྩི་མཆོག་གི་བགོ་སྐལ་ལ། །ལྷག་པར་སྤྱོད་པས་རྒྱལ་སྲས་དམ་པ་ཡི། །མཆེད་ཟླར་གྱུར་པ་དེ་དག་ཀུན་ལ་འདུད། །བློ་བཟང་རྒྱལ་བའི་ཐུགས་གསང་དཔལ་གྱི་བེའུར་ཡོངས་གཏམས་ལེགས་བཤད་ནོར་བུའི་ཕུང་པོ་ནི། །འགྲོ་ལ་ལྷག་པར་བརྩེ་བའི་འོད་ཞགས་རིང་པོས་གཅིག་ཏུ་བཟླུམས་པའི་ཡ་མཚན་གཟི་འབར་བ། །བཤད་སྒྲུབ་ཆོས་ཀྱི་རྒྱལ་མཚན་རྩེ་མོར་འགོད་མཛད་སྟོབས་བཅུ་མངའ་བའི་ཡེ་ཤེས་ཉི་མའི་དངོས། །དྲི་མེད་ལུགས་བཟང་པདྨ་དཀར་པོའི་ཚལ་འབྱེད་གང་དེར་བདག་ཡིད་དང་བ་ལན་བརྒྱར་འཛིན། །མཁྱེན་དང་བརྩེ་བའི་དཔལ་ནི་རྒྱལ་སྲས་དམ་པ་གཞན་ལས་ཆེས་འཕགས་པས། །སྟོབས་བཅུ་མངའ་བ་རྣམས་ཀྱང་བཏང་སྙོམས་བགྱིད་པའི་ཆེར་སྙིགས་འགྲོ་བ་ལ། །མ་སྨད་སྙིང་སྟོབས་གོ་ཆ་བརྟན་པོས་བདག་ཉིད་མགོན་པོ་ཟླ་མེད་པར། །སྟོན་མཛད་འགྲོ་བའི་བླ་མ་བློ་བཟང་བསྐལ་བཟང་རྒྱ་མཚོར་སྙིང་ནས་འདུད། །རྟེན་འབྲེལ་མ་ལུས་ཆུ་ནང་ཟླ་བའི་སྣང་བརྙན་བཞིན་དུ་མངོན་སུམ་གཟིགས། །བདག་པས་གཞན་གཅེས་བྱང་ཆུབ་ཐུགས་འབྱོངས་ཏིང་འཛིན་མཛོད་ལ་མངའ་བརྙེས་པ༑ ༑རྒྱལ་སྲས་སྤྱོད་པའི་ཕ་རོལ་ཕྱིན་གྱུར་ལེགས་བཤད་རིན་ཆེན་བྱེ་བའི་གཏེར། །མཉམ་མེད་དྲིན་ཅན་ངག་དབང་མཆོག་ལྡན་ཞབས་ཟུང་མགོ་བོས་ལན་བརྒྱར་མཆོད། །ཆེ་བའི་བློས་ཀྱང་བརྒལ་དཀའ་བདེ་བར་གཤེགས་གསུང་རྒྱ་མཚོ་ཆེར། །བདེ་བླག་ཉིད་དུ་འཇུག་བྱེད་རྣམ་དཔྱོད་འཕྲུལ་གྱི་གྲུ་བོ་ཆེ། །བརྩེ་བས་སྦྱིན་པའི་ཐབས་མཁས་མཆོག་གི་བཀའ་དྲིན་སྩོལ་མཛད་པ། །བདག་གི་བཤེས་གཉེན་བཅུ་ཕྲག་ཞབས་ཟུང་སྙིང་གི་པདྨོར་བསྟེན། །སྲིད་པའི་གཅོང་རོང་ཟབ་མོ་རུ། །བྱེ་བ་ཕྲག་བརྒྱའི་ངལ་བ་ཡིས། །རྣམ་པར་གཙེས་པའི་ངང་ཚུལ་ལ། །ལྷག་པར་སུན་པའི་བློ་ལྡན་དག
།འདི་ལས་ཐར་བའི་ཐབས་ནི་ཅི། །ཐབས་མ་ཡིན་པ་གང་ཞིག་ཡིན། །ཡང་དང་ཡང་དུ་སེམས་པ་ནི། །ལས་སུ་བྱ་བ་དམ་པ་ལགས། །ལྟོ་བ་འགེང་བའི་ཆོ་ག་ཙམ། །སྙིང་པོར་རློམ་པའི་བགྱི་བ་ལ། །འབད་པས་བརྩོན་པ་ལྷུར་ལེན་པ། །དེ་དག་ཕྱུགས་དང་བྱེ་བྲག་ཅི། །དེ་ལྟ་ལགས་ན་ལམ་དང་ལམ་མིན་པ། །ཇི་བཞིན་འབྱེད་པ་ཡང་དག་རིགས་པའི་ལམ། །མ་ནོར་ཇི་བཞིན་ཤེས་ལ་རག་ལས་པས། །ཚུལ་འདི་འཆད་ལ་བདག་ནི་སྤྲོ་བར་གྱུར། །སྔོན་དུས་ནོར་འཛིན་བུ་མོའི་ལྟོ་བ་རུ། །མཁས་མཆོག་བྱེ་བའི་བད་ཚལ་བཞད་པའི་ཚེ། །སྐལ་ལྡན་བུང་བའི་ཚོགས་རྣམས་སྤྲོ་བཞིན་དུ། །དེ་དག་འདུན་སར་ལེགས་བཤད་སྦྲང་རྩིས་ངོམས། །ད་ནི་དུས་ཀྱི་འགྱུར་བ་ནི། །སྙིགས་མར་སྤྱོད་པའི་སྲིན་མོ་ཡིས། །ཁྲོས་བའི་བཞད་གད་བསྒྲགས་པ་བཞིན། །བློ་ལྡན་སྙིང་ལ་འཇིགས་སྐྱེད་གྱུར། །དེ་ཕྱིར་བློ་ཡི་ནུས་པ་དམན་པ་དག
།རང་གི་ཉེས་པས་ནོངས་པའི་བཙོག་ཆུ་ཡིས། །དམ་པའི་ལེགས་བཤད་ཡན་ལག་བརྒྱད་ལྡན་ཆབ། །རྣམ་པར་སློད་ལ་རིངས་བ་བཞིན་དུའང་གྱུར། །ཕྱོགས་ལྷུང་འཁྱོག་པོའི་ཡིད་ལྡན་དག
།ཇི་སྲིད་རང་དང་མ་མཐུན་པ། །དེ་སྲིད་དྲང་སྲོང་མཆོག་ཉིད་ཀྱི། །གསུང་ལའང་མོས་པའི་སྐབས་མ་མཆིས། །དེས་ན་ཡང་དག་པ་དང་ལྟར་སྣང་གི༌།དབྱེ་བ་ཇི་བཞིན་ཕྱེད་པ་དཀོན་བསན། །དམ་པ་རྣམས་ཀྱང་བས་མཐའི་ནགས་ཚལ་དུ། །སྙིང་ལས་ཆུང་ངུར་གཞེས་པ་ཉིད་ལ་སྤྲོ། །དེ་ཡི་ཕྱིར་ན་བདག་གིས་འདིར། །གཞན་ལ་ཕན་བསམ་རེ་བ་མེད། །བདག་ཉིད་ལེགས་པར་བཤད་པ་ལ།
།གོམས་པ་ལྷུར་ལེན་ཙམ་དུ་ཟད། །ཅི་སྟེ་རང་གི་སྟོན་དང་བསྟན་པ་ལ། །རིགས་པའི་ལམ་ནས་དྲངས་པའི་དད་པ་ནི། །ཚིག་ཙམ་མིན་པ་སྙིང་ནས་སྐྱེད་འདོད་པའི། །རྣམ་དཔྱོད་ཅན་འགའ་ཡོད་ན་ཚུལ་འདིར་ཉོན། །བདག་ཅག་རྣམས་ཀྱི་སྟོན་པ་ནི། །རྟེན་ཅིང་འབྲེལ་པར་འབྱུང་བའི་གཏམ། །སེང་གེའི་ང་རོས་སྒྲོགས་མཛད་པ། །ཐུབ་པའི་དབང་པོ་ཞེས་བྱར་གྲགས། །མགོན་དེས་གྲོལ་བ་དོན་དུ་གཉེར་རྣམས་ལ། །གང་དུ་ཇི་ལྟར་མནར་བའི་སྡུག་བསྔལ་དང༌། །གང་གིས་དེ་ལྟར་མནར་བའི་དེ་ཡི་རྒྱུ། །ཅི་ཞིག་དེ་ལས་ཐར་བའི་ངོ་བོ་དང༌། །ཅི་ཡིས་དེ་ལས་ཐར་བའི་ཐབས་རྣམས་ནི། །ཡང་དག་རིགས་པའི་ལམ་ནས་འདོམས་མཛད་པས། །ཞི་བའི་ལམ་ནི་དྲང་པོ་རབ་གསལ་བ། །བདག་ཅག་རྣམས་ལ་མངོན་སུམ་བཞིན་དུ་གྱུར། །རྨོངས་པའི་འཁྲུལ་པས་དབྱེན་སྤྱོས་པས། །རང་གི་བློ་གྲོས་ཆེས་འཁྲུལ་བ། །སེར་སྐྱ་གཟེགས་གཟན་རྐང་མིག་སོགས། །ལོག་པའི་འདམ་དུ་བྱིང་བ་ཡི། །སྟོན་པ་དེ་དང་དེ་དག་གི༌།གཞུང་ལུགས་རྣམས་ནི་ཚུལ་འདི་ཡིས། །རྟབ་པར་བསྒྲགས་པའི་ཅ་ཅོ་དང༌། །མཚུངས་པའི་གནས་སུ་གསལ་བར་བཀོད། །དེ་ཆེ་ཚངས་པ་ཡིས་ཀྱང་བསྒྲུན་དཀའ་བའི། །བསོད་ནམས་སྐལ་བར་ལྡན་པའི་སྐྱེ་པོ་རྣམས། །ཐུབ་པའི་ཞལ་གྱི་སྒོ་ལས་ལེགས་འོངས་པའི། །བདུད་རྩི་མཆོག་གི་རོ་ནི་མྱོང་བས་ངོམས། །ནམ་ཞིག་མགོན་པོ་མཆོག་དེ་ནི། །ཞི་བའི་དབྱིངས་སུ་གཟིམས་པ་ན། །དེ་ཡི་བདུང་རྩིས་རབ་བསྐྱངས་པའི། །འཕགས་་པའི་ཚོགས་རྣམས་དེ་དང་དེས། །བསྟན་པ་དམ་པའི་རྒྱལ་མཚན་ནི། །སྐྱེ་བོ་དག་གི་རྩ་ལག་ཏུ། །འགྱེལ་བ་མེད་པར་བཟུང་བ་ཡིས། །ས་འདི་སྐལ་བ་བཟང་པོར་བསྒྲུབས། །གང་ཚེ་སྟོན་པའི་གསུང་ལ་རབ་ཞུགས་ཀྱང༌། །ཐེག་པ་མཆོག་གི་བགོ་སྐལ་དམན་པ་འགས། །ཤིན་ཏུ་ཟབ་པའི་མདོ་དོན་མ་ལྕིག་པར། །བློ་གྲོས་དམན་པས་བཤུང་བ་དེ་ཡི་ཚེ། །རྒྱལ་བ་ཉིད་ཀྱིས་བདག་ཉིད་ཀྱི། །གསུང་རབ་འབྱེད་ལ་ཚད་མའོ་ཞེས། །བསྔགས་པའི་མེ་ཏོག་འཐོར་མཛད་པ། །དཔལ་མགོན་ཀླུ་ཡི་དབང་པོ་ཡིས། །གསུང་རབ་ཀུན་གྱི་དྲང་དང་ངེས་པའི་དོན། །རིགས་ལམ་བྱེ་བའི་སྒོ་ནས་ལེགས་པར་ཕྱེ། །ཡོད་དང་མེད་པའི་མཐའ་བྲལ་ཟབ་མོའི་དོན། །གཞན་དུ་དྲང་དུ་མེད་པའི་བཀའ་དྲིན་མཛད། །དེ་ཆ་རྒྱལ་བ་ཉི་མའི་གཉེན། །རང་གི་བསྟན་ལ་བགྱི་བ་ནི། །སྒྲུབ་ལ་སླར་ཡང་འོངས་པ་བཞིན། །ཐེག་མཆོག་ཚུལ་ནི་གསལ་གྱུར་ཏོ། །དེ་ནས་སྔོན་གྱི་རྒྱལ་བ་ལ། །ལྷག་པར་བྱ་བ་བྱས་པ་ཡིས། །དམ་ཆོས་འཛིན་པའི་སྨན་ལམ་མཐུ། །ཆེས་ཆེར་གྲུབ་པའི་ཐོགས་མེད་ཀྱིས། །རྒྱལ་བའི་གསུང་རབ་ཉིད་ལ་བརྟེན་པ་ཡིས། །རྨད་བྱུང་རིགས་པའི་ལམ་ནི་གཉིས་པ་ཡི། །གཟུང་འཛིན་གཉིས་སུ་མེད་པའི་རྣམ་རིག་གི༌།ཤིང་རྟའི་སྲོལ་ཆེན་ལེགས་པར་ཕྱེ་ཞེས་གྲགས༌།ཉི་མ་ཟླ་བར་རབ་མཚུངས་པའི། །ཤིང་རྟའི་སྲོལ་ཟུང་མཚོ་ཆེན་ལས། །ལེགས་འོངས་པཎ་གྲུབ་པད་དཀར་འཕྲེང༌། །འཕགས་ཡུལ་མཛེས་རྒྱན་ཚར་དུ་དངར། །ནམ་ཞིག་ལུགས་བཟང་འོ་མའི་མཚོ། །ཀཻ་ལ་ཤ་ལྗོངས་རྫིང་བུའི་ངོགས། །སྐལ་ལྡན་བསོད་ནམས་བསེར་བུ་ཡིས། །རྣམ་པར་བསྐྱོད་ཅིང་ལུད་པ་ན། །མཁས་མཆོག་ཞི་བ་སྲུང་བ་དང༌། །གྲུབ་པའི་རྗེ་བ་མཚོ་སྐྱེས་ཞབས། །མི་རྗ་ཟུར་ཕུད་ལྔ་པ་ཡི། །རྣམ་འདྲེན་དད་པའི་དད་དཔོན་གསུམ། །དེར་ནི་སྐལ་ལྡན་བྱེ་བའི་བསོད་ནམས་ཀྱི། །ཀྱོ་བས་ཉེ་བར་བཀུག་བཞིན་ལྷན་ཅིག་གཞེས། །དེ་ལས་དྲང་སྲོང་དམ་པའི་སྤྱོད་ཚུལ་ལ། །རྣམ་པར་གཞོལ་བའི་རྣམ་སད་གཞོན་ནུའི་ཚོགས། །ཇི་ལྟར་ཆོས་བཟང་འདུན་ས་ན། །མི་ཕམ་གསུང་སྐྱེས་དམ་པའི་ཚོགས། །སྙེམས་པས་རོལ་བཞིན་དེ་ན་ཡང༌། །དེ་ལྟའི་དགའ་བས་ཡ་མཚན་འཛིན། །རེ་ཞིག་ཅིག་ན་ཚུལ་དེ་ལ། །རྣམ་པར་འཁུ་བའི་ཡིད་ལྡན་པ། །ཆུ་སྲིན་རྒྱལ་མཚན་གྱིས་མངགས་པའི། །སྐྱེ་བོ་མཁའ་འགྲོའི་གདོང་ཅན་འགས། །དྲང་སྲོང་གསུང་ཉིད་གཞན་དུ་འདྲེན་པ་ཡི། །ལྟ་ངན་མི་གཙང་སྤགས་པའི་མཆུ་རིང་པོ། །མི་རིགས་ཐན་སྐད་སྒྲོགས་བཞིན་ལུགས་བཟད་འདིའི། །ནོར་འཛིན་འགྲམ་པར་ཕྱིས་པས་རྣམ་པར་བསླད། །དེར་ཡང་གངས་ཅན་སྐྱེ་བོ་ཡི། །བསོད་ནམས་རྟ་བདུན་གྱིས་དྲངས་པའི། །པདྨའི་ངང་ཚུལ་ཉིན་བྱེད་ནི། །དེ་ཉིད་བསལ་ཕྱིར་དེར་ནི་ཆས། །རིགས་ཚུལ་རྡོ་རྗེའི་ཚ་ཟེར་གྱིས། །ལོག་སྨྲ་འབྱུང་པོའི་བྱ་ཚོགས་ཀྱི། །ཀླད་པའི་བུམ་པ་དྲལ་བྱས་ཤིང༌། །ཐུབ་བསྟན་འདབ་བརྒྱ་བཞད་པར་མཛད། །དེ་ནས་དུས་རིང་ཞིག་ན་དེ་ལྟའི་ཡ་མཚན་དགེ་ལེགས་ནོར་བུའི་དཔྱ། །སྐྱེས་བུའི་བསོད་ནམས་ཟོང་གིས་འགུགས་པའི་དུས་ཀྱི་དབལ་ནི་རྟུལ་བ་ན། །རིག་པའི་སྔགས་ནི་བརླང་པོར་འཛིན་པའི་སྤྱོད་ཚུལ་དྲི་མའི་ར་རི་ཡིས། །ཡང་དག་ལྟ་སྤྱོད་ཤེལ་གྱི་གོང་བུ་རྙོག་པོར་བགྱིད་ལ་མངོན་དུ་ཕྱོགས། །སླར་ཡང་དུས་དམན་གཤོང་བུ་རུ། །འགྱེལ་བའི་ལུགས་བཟང་ཧ་རིའི་ལྗོན། །གྱེན་དུ་སློང་བའི་རིག་སྔགས་མཁན། །སྨོན་ལམ་མཐུ་གྲུབ་ལྷའི་བླ་མས། །དད་པའི་བ་དན་ཕྱང་ཕྲུལ་ནི། །སྙིང་སྟོབས་བརྟན་པོས་བཟུང་བ་གང༌། །རྣམ་གནོན་ཚུལ་གྱི་ངོས་དག་ཏུ། །ལན་ཅིག་མིན་པར་གཡབས་པ་ལས།
།ལྔ་རིག་ནོར་བུའི་དྲ་བ་བྱང་ཆུབ་ཐུགས་ཀྱི་སྨན་མཆོག་དང༌། །ལྷན་ཅིག་ཐུགས་གསང་དཔལ་གྱི་བེའུར་ཡོངས་གཏམས་ཕུལ་བྱུང་ཞབས། །བདག་གིས་འདིར་ནི་རྒྱལ་བའི་མཛད་པ་ངེས་པར་སྒྲུབ་སྙམ་དུ། །བཀྲ་ཤིས་རྐང་པ་དལ་གྱིས་བགོམས་པས་དེར་ནི་ལྷགས་ཞེས་གྲགས། །ཤིན་ཏུ་ཞི་བའི་སྤྱོད་ཚུལ་གོས། །རྣམ་པར་བགོས་པའི་དམ་པ་དེས། །དྲང་པོར་སྨྲ་བའི་ལམ་གསུམ་འབབ། །ཞལ་གྱི་སྒོ་ལས་རྣམ་པར་སྐྱུགས། །ལོག་པའི་ཚད་ཚིང་དྲུངས་ཕྱུང་ནས། །དྲང་སྲོང་ལམ་བཟང་པདྨའི་ཚལ། །མྱུར་བར་སྐྱེད་བསྲིངས་དགའ་སྟོན་གྱིས། །རྫོགས་ལྡན་དཔལ་མོ་སླར་ཡང་བཀུག
།འཇིག་རྟེན་བླང་དོར་སྟོན་པའི་མིག་གཅིག་པུ། །སྐྱེས་མཆོག་རིན་ཆེན་བཟང་པོའི་དཔལ་མངའ་དང༌། །གསང་བ་བླ་མེད་ཆོས་ཀྱི་རྡོ་རྗེའི་མཛོད། །བློ་གྲོས་སྙིམ་པར་ཐོགས་པའི་སྒྲ་སྒྱུར་སོགས། །འཁོར་ལོ་བཞི་ལྡན་དམ་པ་འགས། །འཕགས་ཡུལ་ཆོས་ཀྱི་བང་མཛོད་ལས། །བློ་ཡི་ནུས་པས་ཅི་ཐེག་གི༌།དམ་ཆོས་ནོར་བུ་རྣམ་པར་བླངས། །ཐུབ་བསྟན་དཔྱིད་ཀྱི་དཔལ་མོ་ནི། །དབུས་འགྱུར་ཚལ་ལས་རྣམ་འཕོས་པ། །ཁ་བ་རི་པའི་ས་ཕྱོགས་སུ། །གཏན་དུ་འཁྱིལ་བའི་རྩེ་དགའ་བཟུང༌། །རྣམ་པར་དགེ་བའི་རྨད་བྱུང་ཟུར་མིག་མ། །ལོག་པར་བགོམས་པའི་སྐྱེས་བུའི་གོམས་སྟབས་ལ། །རངས་པར་མ་གྱུར་ད་ནི་འདི་ཉིད་ལས། །གཞན་དུ་འགྲོ་སྙམ་འཁྱོག་པོར་བགྲོད་པ་ན། །སྟོབས་བཅུ་མངའ་བའི་རྗེ་བོར་གྱུར་པའི་ཡབ་གཅིག་མཁྱེན་པའི་གཏེར་དེ་ནི། །མྱུར་བ་མྱུར་བར་དབང་སྡོན་ཟུར་ཕུད་གསེར་ཞུན་ཁུ་བས་རབ་བྱུགས་ནས། །ཐུབ་བསྟན་མཛེས་དགའ་མ་ཡི་ཡིད་ཀྱི་བརྟན་པ་ཉམས་པར་མི་འགྱུར་སླད། །དག་བའི་ཞིང་གི་མཁའ་ལས་གངས་རིའི་སྨན་ལྗོངས་ངོགས་སུ་ལྡིང་བཞིན་གཤེགས། །གང་གི་མཁྱེན་པའི་ལྷུན་པོ་ཡིས། །ཤེས་བྱའི་དཀྱིལ་འཁོར་མཐའ་དག་ནི། །ཡུངས་འབྲུའི་ཚད་དུ་བྱས་པ་ཡིས། །རྒྱལ་བ་རྣམས་ཀྱང་སྐྱེངས་ཞེས་གྲགས། །བདེ་བར་གཤེགས་གཞུང་ཆུ་ཀླུད་བྱེ་བ་ནི། །དེ་ཡི་བློ་གྲོས་རྫིད་བུ་འགེང་བའི་སླད། །ཉིན་མཚན་ཀུན་ཏུ་འབད་པས་བབས་གྱུར་ཀྱང༌། །གང་ཐུགས་ར་བར་དོག་པའི་སྐབས་མ་མཆིས། །དེ་ཡི་ཞལ་གྱི་པདྨོ་ལས། །ལེགས་འོངས་ལེགས་བཤད་སྦྲང་རྩི་ཡིས། །ངོམས་པའི་མཁས་གྲུབ་རྐང་དྲུག་ཚོགས། །རིགས་པའི་དར་དིར་སྒྲོག་པ་ཡིས། །ཛའ་ཏིའི་རྐང་འཐུང་འཁྲིགས་བ་ནས། །ཆུ་ཡི་མཛོད་འཛིན་སྔོ་སངས་མའི། །རལ་པ་རྣམ་པར་འགོངས་པའི་བར། །བར་མཚམས་མེད་པར་འགེངས་པར་བྱས། །ཅིར་ཡང་མི་སེམས་ཆུ་ཤིང་ལ། །སྙིང་པོར་རེ་བའི་བྱིས་པ་ཡིས། །རང་མཚང་སྒྲོག་པའི་ཅ་ཅོ་རྣམས། །མིང་གི་ལྷག་མ་ཉིད་དུ་གྱུར། །ཐབས་ཤེས་གཤོག་ཟུང་རྣམ་པར་བསྐྱོད་པ་ཡིས། །སྲིད་པའི་རྒྱ་མཚོའི་ཕ་རོལ་ཕྱིན་བྱེད་པ། །རྒྱལ་སྲས་ངང་པའི་ཁྱུ་ཚོགས་འདི་མཐོང་བས། །བདུད་སྡེའི་ཡིད་ལ་མྱ་ངན་དཀའ་ཐུབ་བསྟེན། །ཐུབ་པའི་དབང་པོ་ཀླུ་ཡི་ཞབས། །འཇམ་དཔལ་དབྱངས་ཞེས་གྲགས་རྣམས་ཀྱིས། །གསང་བའི་གཏམ་ནི་མ་ལུས་པ། །འདི་ཉིད་སྲས་དང་བཅས་ལ་བསྟན། །གནའ་དུས་མཁས་གྲུབ་གསེར་རིའི་འཕྲེང༌། །ཡ་མཚན་བརྗིད་བག་ཆེ་རྣམས་ཀྱང༌། །ཉི་མའི་དྲུང་ན་མེ་ཁྱེར་དང༌། །མཚུངས་པའི་གནས་ལ་འདི་ཡིས་བཀོད། །འདུལ་བ་འབུམ་སྡེའི་གཞུང་གི་དོན། །ལག་ཏུ་ལེན་པའི་རིམ་པ་ཡང༌། །འདི་ཉིད་ཁོ་ནའི་བཀའ་དྲིན་གྱིས། །གངས་རིའི་ཁྲོད་དུ་རྫོགས་པར་གསལ། །རིག་པའི་དབང་ཕྱུག་ལས་འོངས་པའི། །རིགས་པའི་གློག་འཕྲེང་སྟོང་དག་ཀྱང༌། །འདི་ཡི་ཞལ་གྱི་ཆུ་འཛིན་ལས། །ཉམས་འགྱུར་བྱེ་བས་རྫོགས་པར་འཁྱུག
།ཕྱི་ནང་གྲུབ་མཐའི་ཁྱད་པར་གྱི། །ཕྲ་བའི་གནས་རྣམས་རེ་རེ་བཞིན། །རིགས་ལམ་བརྒྱ་ལས་ལེགས་དྲངས་པ། །མ་འདྲེས་བཞིན་དུ་གསལ་བར་བཀྲ། །རྒྱལ་ཡུམ་སྦས་དོན་སྙིང་པོའི་བཅུད་བཟང་པོ། །རིམ་པ་བདུན་གྱི་རྒྱ་ཡིས་བཅིངས་པ་ཡང༌། །འདི་ཡིས་དཀའ་བ་མེད་པར་ལེགས་བཀྲོལ་ནས། །བློ་ལྡན་སྙིང་གི་བདུད་རྩི་ཉིད་དུ་མཛད། །མཐའ་དང་བྲལ་བའི་ལྟ་བ་ཟབ་མོ་དང༌། །དཔག་པར་དཀའ་བའི་གསང་སྔགས་བླ་མེད་ཚུལ། །སུས་ཀྱང་གསལ་བར་མ་ནུས་གནས་དེ་ནི། །འདི་ཡིས་མངོན་སུམ་བཞིན་དུ་འགྲོ་ལ་བསྟན། །སྙིགས་མ་ལས་ཀྱང་ཆེས་སྙིགས་མའི། །ངང་ཚུལ་མངོན་པར་བརྟས་གྱུར་ཀྱང༌། །ཐུབ་པའི་གསུང་གི་གསང་བ་ནི། །ད་དུང་མ་ཉམས་འདི་ཡི་དྲིན། །དེ་ཕྱིར་འདི་ཡི་རིང་ལུགས་ནི། །ཐུབ་པའི་གཏམ་གྱི་ཚུལ་ཡིན་ཏེ། །འདི་ལས་གཞན་དུ་གྱུར་པ་དག
།བྱིས་པ་འདྲིད་པའི་ཟློས་གར་ཡིན། །དེ་ལྟ་ལགས་ན་ད་དུང་ཚུལ་འདི་ལ། །ཚུལ་བཞིན་སྤྱོད་པའི་བགོ་སྐལ་སྨོས་ཅི་དགོས། །ལེགས་པར་མོས་པའི་སྐལ་བའང་ཕྲ་བ་རྣམས། །ངེས་པར་རང་གི་ལས་ཀྱིས་ནོངས་ལས་ཅི། །དེ་ཕྱིར་གང་ཞིག་མཁས་པའམ། །འོན་ཏེ་མི་མཁས་པ་ཡང་རུང༌། །རང་རང་ནུས་པ་ཅི་ཡོད་ཀྱིས། །ཚུལ་འདི་ཉིད་ལ་འཇུག་པར་རིགས། །རིགས་པས་ལེགས་པར་གྲུབ་པའི་ལུགས། །བློ་ལྡན་རྣམས་ཀྱི་འཇུག་ངོགས་ཏེ། །མི་རིགས་པའམ་ཐེ་ཚོམ་གྱི། །གནས་ལ་དཔྱོད་ལྡན་སུ་ཞིག་འཇུག
།སྡེ་སྣོད་གསུམ་གྱི་དགོངས་པའི་དོན། །འགལ་བ་མེད་ཅིང་ལེགས་གནས་པ༑ ༑གང་དུ་ངེས་པར་ཡོད་པ་དེ། །དྲང་སྲོང་ཆེན་པོའི་བསྟན་པ་ཡིན། །བསླབ་པ་གསུམ་གྱི་སྒྲུབ་པ་ནི། །སྐྱོན་དང་བྲལ་བར་ལེགས་གནས་པ། །གང་གི་ཕྱོགས་ལ་མཆིས་གྱུར་པ། །དེ་ནི་སངས་རྒྱས་བསྟན་པ་ཡིན། །ཐབས་དང་ཤེས་རབ་ལེགས་འབྲེལ་ཞིང༑ ༑སྟོང་ཉིད་སྙིང་རྗེའི་སྙིང་པོ་ཅན། །གང་དུ་ལེགས་པར་གནས་གྱུར་པ། །དེ་ནི་ཐེག་ཆེན་བསྟན་པ་ཡིན། །མཐའ་དང་བྲལ་བའི་ལྟ་བ་དང༌། །དཔྱད་འཇོག་ཆ་མཉམ་སྒམ་བ་དང༌། །མདོ་སྔགས་བཤད་སྒྲུབ་འགལ་མེད་སྦྱོད། །དེ་ནི་བསྟན་པ་སྐྱོན་མེད་ཡིན། །ཐོས་བསམ་ཕྱོགས་སུ་མ་སོང་ཞིང༌། །གཞུང་ལུགས་གདམས་པར་ཤར་བ་ཡིས། །མཉན་འོས་རིགས་པའི་ལམ་སྨྲ་བ། །དེ་ཉིད་ལ་ནི་མཁས་པ་ཟར། །ཉོན་མོངས་དབལ་ནི་ཆོགས་པ་དང༌། །རང་དང་གཞན་རྒྱུད་འདུལ་བར་ནུས། །ལྟ་སྒོམ་འཁྲུལ་བྲལ་གདངས་ལྡན་པ། །དེ་ཉིད་ལ་ནི་གྲུབ་པ་ཟར། །མཁས་པས་གྲུབ་པ་མ་བཅོམ་ཞིང༌། །གྲུབ་པས་བཙུན་པ་མ་བཅོམ་པར། །བསྟན་ལ་ཕན་པ་སྒྲུབ་པ་ལ། །སྐྱེས་བུ་དམ་པ་ཞེས་ཀྱང་ཟེར། །དེ་ཕྱིར་གང་ལ་འཇུག་པར་བྱ་བའི་གནས། །དེ་ལ་ཇི་ལྟར་འཇུག་པར་བྱ་བའི་ཚུལ། །ཞུགས་ལས་འབྲས་བུ་ཇི་ལྟར་འབྱུང་བ་རྣམས། །མ་ནར་ཤེས་པ་མདུན་མའི་གཙོ་བོ་ཡིན། །དེ་ལྟར་རྒྱལ་བའི་བསྟན་པ་ཡི། །རིམ་པ་ཅུང་ཟད་བརྗོད་པ་འདི། །འཆད་པར་འགྱུར་བའི་བསྟན་བཅོས་ཀྱི། །ངོ་མཚར་གཏམ་གྱི་གླེང་གཞི་ཡིན། །གང་གི་ཟབ་བརླིད་དམ་གནག་བློ་ཡི་རྒྱ་མཚོ་གཏིང་མཐའ་བྲལ་བཞིན་སྣང་བའི་འཇུག་ངགས་སུ། །མཐའ་ཡས་ལེགས་བཤད་བྱ་བའི་ཆུ་ཀླུང་རིགས་ལམ་དབུ་བའི་འཛུམ་པ་ཅི་ཡང་རྒོད་བཞིན་དུ། །རྒྱུན་ཆད་མེད་པར་འབབ་པའི་དགའ་བ་སྙིང་ལ་གནས་པ་དེ་ཡི་ཁ་ཡི་སྒོ་དག་ལས། །དུས་མཐའ་འདིར་ཡང་ལེགས་བཤད་འོད་འཕྲེང་བྱེ་བ་འགྱེད་པའི་ཡ་མཚན་འདི་ལ་ད་ལྟས་ཤིག
།གང་ཡང་བདག་ལགས་སུ་འདོད་པའི་བློ་གྲོས་ཀྱི་ནོར་དང་ལྡན་པ་རྣམས་ནི་ཇི་ལྟར་ན་བདག་ཉིད་སྙིང་དུ་མི་སྡུག་པའི་དངོས་པོ་རྣམ་པ་སྣ་ཚོགས་པ་ཉམས་སུ་མྱོང་བའི་སྲིད་པའི་འབྲོག་དགོན་པ་ཆེན་པོ་འདི་ཉིད་ལས་ཡོངས་སུ་ཐར་བར་འགྱུར་བ་དང༌།
དེའི་ཐབས་ཡང་དག་པ་ནི་གང༌། ཐབས་མ་ཡིན་པ་ནི་གང་སྙམ་དུ་སོ་སོར་རྟོག་ཅིང་དཔྱོད་པ་ལ་འཇུག
པར་རིགས་ཏེ། གྲོལ་བ་དོན་དུ་གཉེར་བ་རྣམས་ཀྱི་ལས་སུ་བྱ་བའི་གཙོ་བོ་ནི་འདི་འབའ་ཞིག་ཏུ་ཟད་པའི་ཕྱིར་རོ། །དེ་བས་ན་ཐུབ་པ་ཉི་མའི་གཉེན་གྱི་བསྟན་པ་ཁོ་ན་ཐར་འདོད་ཀྱི་འཇུག་ངགས་བླ་ན་མེད་པ་ཡིན་པར་ངེས་པ་གཏིང་ནས་རྙེད་པ་ལ་ལུགས་འདི་ཉིད་གང་ལས་ཁྱད་པར་དུ་འཕགས་པའི་གྲུབ་པའི་མཐའ་དག་གི་ཚུལ་དང༌།
དེ་ལས་ཇི་ལྟར་ཁྱད་པར་དུ་འཕགས་པའི་ཚུལ་རྣམས་འོལ་སྤྱི་ཙམ་མ་ཡིན་པར་ཤེས་དགོས་ཏེ། གཞན་དུ་ན་བདག་ཅག་གི་སྟོན་པའི་ལུགས་ནི་ཆེས་ཁྱད་པར་དུ་འཕགས་པའོ་ཞེས་སྨྲས་ཀྱང་ཚིག་ཙམ་དུ་ཟད་པར་འགྱུར་བའི་ཕྱིར་དང༌།
རང་གི་སྟོན་པ་དང་བསྟན་པ་ལའང་རིགས་པའི་ལམ་ནས་དྲངས་པའི་དད་པ་བརྟན་པོ་མི་སྐྱེ་བའི་ཕྱིར་རོ། །དོན་གྱི་དབང་འདི་གཟིགས་ནས་དབུ་མ་རྒྱན་ལས།
བློ་ནོར་ལྡན་པས་ལུགས་གཞན་ལ། །ཇི་ལྟར་སྙིང་པོ་མེད་མཐོང་བ། །དེ་ལྟར་དེ་དག་སྐྱོབ་པ་ལ། །གུས་པ་ཤིན་ཏུ་སྐྱེ་བར་འགྱུར། །ཞེས་དང༌།
ཁྱད་པར་འཕགས་བསྟོད་ལས། མུ་སྟེགས་གཞན་གྱི་གཞུང་ལུགས་ལ། །ཇི་ལྟ་ཇི་ལྟར་རྣམ་བསམས་པ། །དེ་ལྟ་དེ་ལྟར་མགོན་ཁྱོད་ལ། །བདག་གི་ཡིད་ནི་དང་བར་གྱུར། །ཅེས་སོ། །དེས་ན་རང་གཞན་གྱི་གྲུབ་པའི་མཐའ་རྣམས་ཀྱི་རྣམ་པར་བཞག་པ་ཆ་ལོང་ཙམ་ཞིག་འདིར་བྲི་བར་བྱའོ། །དེ་ལ་གཉིས།
སྤྱིའི་རྣམ་པར་བཞག་པ་དང༌། སོ་སོའི་རྣམ་པར་བཞག་པའོ། །དང་པོ་ལ། གྲུབ་མཐའི་སྒྲ་དོན། ངོ་བོ། །ཕྱི་ནང་གི་ཁྱད་པར། མིང་གི་རྣམ་གྲངས།
གྲངས་ངེས་དང་ལྔ། དང་པོ་ནི། སྤྱིར་གྲུབ་མཐའི་ཐ་སྙད་མདོ་ལས་ཀྱང་གསུངས་ཤིང༌། ཞེས་པའི་སྐད་ཀྱི་བྱིངས་ལས་བསྟན་བཅོས་དང་དམ་ཚིག་དང་ཡང་དག་པ་རྟོགས་པ་སོགས་ལ་འཇུག་པར་བཤད་ཀྱང་འདིར་ནི་རང་གི་བློ་ངོར་ཡང་དག་པའི་གནས་ལུགས་སམ་དོན་གྱི་གནས་ཚུལ་ནི་འདི་ཉིད་ལས་གཞན་དུ་མེད་དོ་སྙམ་དུ་རིགས་པས་གྲུབ་པའམ་ཐག་བཅད་པའི་ཆ་ལ་བྱ་སྟེ།
གྲུབ་པ་དང་མཐའ་ཡིན་ནོ། །གཉིས་པ་ནི། རྣམ་རྟོག་གིས་སྒྲོ་བཏགས་པའི་ཆ་གཞན་བཟློག་ནས་རང་གི་བློ་ངོར་རིགས་པས་དོན་གྱི་གནས་ཚུལ་ཡང་དག་པར་གྲུབ་པ་ཉིད་གྲུབ་མཐའི་ངོ་བོའོ། །ཚུལ་དེ་རིགས་པའི་ལམ་ནས་སྨྲ་བས་ན་གྲུབ་མཐའ་སྨྲ་བའོ། །དེ་ཡང་སེམས་ཅན་གྱི་རིགས་ནི་གཉིས་ཏེ། གྲུབ་པའི་མཐའ་ལམ་ཞུགས་པ་དང་ཞུགས་པའོ། །དང་པོ་ནི། །རིགས་པས་སྦྱར་བའི་གཞུང་ལུགས་ལམ་བརྟན་པར་རང་དགར་ཚེ་འདིའི་བདེ་བ་ཙམ་དོན་དུ་གཉེར་བའོ། །ཕྱི་མ་ནི་དེ་ཙམ་གྱིས་ཆོག་པར་མི་འཛིན་པར་རང་གི་བློ་ངོར་འཐད་པས་སྦྱར་བའི་གཞུང་ལུགས་ལ་བརྟེན་ནས་དངོས་པོའི་གནས་ཚུལ་ལ་དཔྱད་ནས་བླང་དོར་བྱེད་པ་རྣམས་ཡིན་ཏེ།
ཕྱི་ནང་གི་གྲུབ་མཐའ་སྨྲ་བ་རྣམས་ཀྱི་ཐ་ཤལ་བ་མུ་སྟེགས་རྒྱང་འཕེན་པས་ཀྱང་ཕྱི་ནང་གི་རྒྱུ་འབྲས་རྣམས་ཡོད་མེད་དཔྱོད་པ་ལ་ཞུགས་ནས་རིགས་པ་ལྟར་སྣང་ལ་ཡང་དག་པའི་རིགས་པར་རློམས་ནས་རང་གི་གཞུང་འཛུགས་པའི་ཕྱིར་རོ། །གསུམ་པ་ནི།
ཕྱི་ནང་གི་ཁྱད་པར་ཙམ་ནི་དཀོན་མཆོག་གསུམ་སྐྱབས་གནས་ཡང་དག་ཏུ་ཁས་ལེན་པ་ལ་ཆོས་འདི་པ་དང་དེ་ལྟར་ཁས་མི་ལེན་པ་ལ་ཆོས་འདེ་པ་མ་ཡིན་པར་འཇོག་པ་ཡིན་ལ། ཁས་ལེན་ཚུལ་ཡང་བྱང་ཆུབ་ལམ་རིམ་ལས་འབྱུང་བ་ལྟར་དཀོན་མཆོག་གསུམ་གྱི་ཡོན་ཏན་ཤེས་པ།
ཁྱད་པར་ཤེས་པ། ཁས་བླངས་པ། གཞན་དུ་མི་སྨྲ་བ་བཞིའི་སྒོ་ནས་སྐྱབས་སུ་འགྲོ་བའོ། །ཕྱི་ནང་གི་ཁྱད་པར་སྐྱབས་འགྲོས་འབྱེད་པ་འདི་ནི་དཔལ་་པ་དང་མཉམ་མེད་ཇོ་བོ་ཆེན་པོ་དང་རྗེ་བདག་ཉིད་ཆེན་པོའི་བཞེད་པ་ཡིན་ཏེ་གནད་ཤིན་ཏུ་ཆེའོ། །འོ་ན་སངས་རྒྱས་འཕགས་པའི་ཐུགས་རྒྱུད་ན་སྐྱབས་སུ་འགྲོ་བའི་བློ་ཡོད་དམ་ཞེ་ན་རང་ཉིད་འཇིགས་པ་མཐའ་དག་ལས་གྲོལ་ཟིན་མོད་ཀྱང་སྤྱིར་མི་གནས་པའི་མྱང་འདས་སྲིད་ཞིའི་འཇིགས་པ་ལས་སྐྱོབ་པའི་སྐྱབས་ཡང་དག་པར་གྲུབ་པའི་ཚད་མ་ནི་ཡོད་པས་མི་འགལ་ལོ། །འོན་ཀྱང་ཕྱི་ནང་གི་གྲུབ་མཐའ་སྨྲ་བའི་ཁྱད་པར་ན་དཀོན་མཆོག་གསུམ་སྐྱབས་གནས་ཡང་དག་ཏུ་ཁས་ལེན་པར་མ་ཟད་ལྟ་བ་བཀར་ བཏགས་ཀྱི་ཕྱག་རྒྱ་བཞི་ཁས་ལེན་པའི་གྲུབ་མཐའ་སྨྲ་བ་ནི་རང་སྡེ་དང༌།
དེ་ལྟར་ཁས་མི་ལེན་པའི་གྲུབ་མཐའ་སྨྲ་བ་ནི་གཞན་སྡེར་འཇོག་པ་ཡིན་ཏེ། རང་སྡེ་གནས་མ་བུ་པས་བརྗོད་དུ་མེད་པའི་གང་ཟག་ཁས་ལེན་ཚུལ་དང༌།
དེ་གྲུབ་མཐའ་གང་དུ་གཏོགས་པའི་ཚུལ་དཔྱད་པ་ནི་འོག་ཏུ་འཆད་པར་འགྱུར་རོ། །གཞན་དག་ན་རེ།
གང་སྐྱབས་སུ་འགྲོ་བ་དེས་ནི་ངེས་པར་ཕྱག་རྒྱ་བཞི་ཁས་ལེན་དགོས་ཏེ། མྱ་ངན་ལས་འདས་པའི་ངོ་བོ་དང་དེ་ཐོབ་བྱེད་ཀྱི་ཐབས་རྣམས་ཚད་མས་ངེས་ནས་སྐྱབས་སུ་འགྲོ་དགོས་པའི་ཕྱིར་རོ། ། དེས་ན་ཁྱད་པར་ཕྱི་མ་སྦྱར་བས་ཅི་ཞིག་བྱ། གང་གསུམ་ལ་སྐྱབས་སུ་འགྲོ་བ་དེ་ནི་གྲུབ་མཐའ་སྨྲ་བ་པོར་ཡང་འགྱུར་བར་དེས་སོ་ཞེ་ན་མ་ཡིན་ཏེ།
དད་པ་ཙམ་གྱི་དབང་དུ་བྱས་ནས་སྐྱབས་སུ་འགྲོ་བ་དང་འཁོར་བ་མཐའ་དག་ལ་ཡིད་འབྱུང་བ་མ་ཡིན་པས་ཀྱང་རང་ཉིད་ངན་འགྲོའི་འཇིགས་པ་ལས་སྐྲག་ནས་སྐྱབས་སུ་འགྲོ་བ་ཙམ་འཛིན་པའི་དགེ་བསྙེན་དུ་གྱུར་པ་ཡོད་པའི་ཕྱིར་དང༌།
ཇི་སྲིད་ཕྱག་རྒྱ་བཞིའི་ཚུལ་རིགས་པའི་ལམ་ནས་སྨྲ་བས་མ་ཡིན་པ་དེ་སྲིད་དུ་ཆོས་འདི་བའི་གྲུབ་མཐའ་སྨྲ་བར་མི་འཇོག་པའི་ཕྱིར་རོ། །ཟུར་ཕྱི་མ་ནི་འཇམ་དཔལ་གྲགས་པས།
བྱེ་བྲག་སྨྲ་དང་མདོ་སྡེ་པ། །རྣལ་འབྱོར་སྤྱོད་པ་དབུམ་པའི། །གྲུབ་མཐའ་གང་ཞིག་ཆོས་སོགས་ཀྱི། །ཆིགས་བཅད་སངས་རྒྱས་ཕྱག་རྒྱས་བཏབ། །ཅེས་སོ། །དེ་བཞིན་དུ་མདོ་རྒྱུད་དུ་མ་ཞིག་ལས་ཕྱི་ནང་གི་གྲུབ་མཐའི་ཁྱད་པར་ལྟ་བས་འབྱད་པར་གསུངས་ཏེ་མ་སྤྲོས་སོ། །བཞི་པ་ནི།
གཞན་སྡེ་དང༌། ཕྱི་རོལ་བ་དང༌། ཆོས་འདི་པ་མ་ཡིན་པ་དང༌། མུ་སྟེགས་བྱེད་རྣམས་ནི་རྣམ་གྲངས་ཏེ།
ཆོས་འདི་པ་དང༌། རང་སྡེ་དང༌། ནང་བ་དང༌། སངས་རྒྱས་པ་རྣམས་ནི་རྣམ་གྲངས་སོ། །མུ་སྟེགས་ཀྱི་སྒྲ་དོན་ནི།
ཁྱད་པར་འཕགས་བསྟོད་ཀྱི་འགྲེལ་པ་ལས། མུ་སྟེགས་ནི་ཐར་པ་དང༌། མཐོ་རིས་ཀྱི་ལམ་སྟེ། དེ་སྟོན་པར་བྱེད་པའི་བསྟན་བཅོས་ལ་མུ་སྟེགས་ཞེས་བྱ་ལ།
དེ་བྱེད་བས་ན་མུ་སྟེགས་བྱེད་དོ། །ཞེས་རང་ངར་ཐར་པ་དང་མཐོ་རིས་ཀྱི་ལམ་མ་མ་འཇུག་དོགས་སམ་ཐབས་སུ་འདུ་ཤེས་པའི་ཚུལ་དེ་སྟོན་པའི་བསྟན་བཅོས་འཛིན་པ་དང་སྤེལ་བ་ལ་མུ་སྟེགས་བྱེད་དུ་བཤད་དེ་སྒྲ་བཤད་པ་ཙམ་ཡིན་གྱི་ཁྱབ་པ་ནི་མིན་ནོ། །ལ་ལ་དག
གཞི་འགྲེལ་ལས། གང་དག་ལ་ཆུ་ཀླུང་དུ་འཇུག་པའི་ཐར་པའི་ལམ་ཡོད་པ་འདི་དག་ནི་མུ་སྟེགས་ཅན་ནོ། །ཞེས་པའི་དོན་དུ་བསམས་ནས།
འཇུག་འགས་ཁྲུས་དང་སྟེགས་བུ་བྱས་ཏེ། དོར་ཞུགས་བ་ཐར་པ་སྟེ་བདེ་འགྲོའི་རྒྱུར་སྨྲ་བ་དེ་བྱེད་པས་མུ་སྟེགས་བྱེད་ཅེས་བྱ་གསུངས་ཀྱང༌། གཞིང་གྲེལ་གྱི་ལུང་དེ་མུ་སྟེགས་ཅན་གྱི་སྒྲ་བཤད་ཡིན་མིན་བརྟག་ཅིང་གང་དག་ཐར་བ་མུ་དང་དེའི་སྟེགས་ཁད་ཉེ་བའི་ལམ་བྱེད་པས་མུ་སྟེགས་བས་ཞེས་ཟེར་བ་ཡང་འཐད་པར་མ་མཐོང་སྟེ།
ཀའི་སྒྲ་འཇུག་དོགས་སུ་འཇུག་པར་སྒྲ་སྦྱོར་བམ་གཉིས་ལས་བཤད་མོད་ཀྱང་དེ་ཙམ་གྱིས་སྒྲ་བཤད་པ་ལ་གོ་དོན་ཅི་ཡང་མེད་དོ། །ལྔ་པ་ནི།
གཞན་སྡེ་ལ་རིག་བའི་དབང་ཕྱུག་གིས། ལོག་པའི་ལམ་ལ་མུ་མེད་ཕྱིར། །ཞེས་གསུངས་བ་ལྟར།
ལམ་དང་ལམ་མ་ཡིན་པ་རྣམ་པར་འབྱེད་པའི་བློ་གྲོས་དང་བྲལ་བ་རྣམས་ཀྱི་ལྟ་བ་ངན་པ་ལ་འདི་འབྱུང་དང་འདི་མི་འབྱུང་ཞེས་པའི་ཁ་ཚོན་གཅོད་དཀའ་བས་མཐའ་ཡས་མོད།
མདོ་སྡེ་ལས་ཡ་མཚན་ཅན་གྱི་ལྟ་བ་དགུ་བཅུ་རྩ་དྲུག་དང༌། ལུང་མ་བསྟན་གྱི་ལྟ་བ་བཅུ་བཞི། ལྟ་ངན་དྲུག་ཅུ་རེ་གཉིས་དང༌།
དམ་པ་མིན་པའི་ལྟ་བ་ཉེར་བརྒྱད་དང༌། ལྟ་ངན་ཉི་ཤུ་སོགས་བཤད་ལ།
སློབ་དཔོན་ལེགས་ལྡན་འབྱེད་ཀྱི་རྟོག་གེ་འབར་བ་ལས། དེ་ཡང་ལྟ་བའི་དབྱེ་བ་བརྒྱ་རྩ་བཅུར་གྱུར་ལ་དེའི་ཐད་ཀྱི་དབྱེ་བ་ནི།
སངས་རྒྱས་པ་དང༌། འཛིན་པ་མེད་པ་དང༌། འཚོ་བ་པ་དང༌། ལོ་མ་ཅན་དང༌། གཙང་སྦྲ་ཅན་དང༌། ཁྱབ་འཇུག་པ་དང༌།
ཁྱབ་འཇུག་སམས་བ་པ་དང༌། དབྱི་གུ་གསུམ་བ་དང༌། ཀོ་ལྤགས་དུམ་བུ་ཅན་དང༌། མཉམ་པར་དཔྱོད་པ་དང༌།
ལྷ་མཆོག་བ་དང༌། ཆོས་ཀྱི་མཆོག་སྦྱིན་ཅན་དང༌། གདུང་བ་ཅན་དང༌། ལག་པ་གདུང་བ་ཅན་དང༌། རྒྱལ་པོར་སྨྲ་བ་དང༌། རྒན་པོར་སྨ་བ་དང༌།
མེ་ཡོ་ཨ་ཏི་རི་དང༌། རིགས་དང་རྗེས་སུ་མཐུན་པ་དང༌། བཅིངས་ནས་འདུག་པ་དང༌། འཁོར་ལོ་སྐྱོང་བ་དང༌།
རལ་གནས་པ་དང༌། རྒྱལ་པོའི་བསོད་སྙོམས་ཅན་དང༌། གླང་པོའི་རྒྱལ་མཚན་ཅན་དང༌། ཀློག་ཅན་དང༌། ནང་ཅན་དང༌།
རྟ་འདུལ་བ་དང༌། ཀ་ལན་ཏ་ཀ་པ་དང༌། སྣོད་གཙང་མ་ཅན་དང༌། སློང་མོས་རྒྱུ་བ་དང༌། ཡན་ལག་ཐམས་ཅད་རལ་ཀའི་ནང་དུ་གཏུམ་པ་དང༌།
སྒྲོན་མ་ལྷག་པ་ཅན་དང༌།
གསེར་ཅན་དང༌། གྲུབ་པར་སྨྲ་བ་དང༌། དབང་པོ་ཆེན་པོ་དང༌།
ཞ་ཉེ་ཅན་དང༌། ནམ་མཁའ་འབྱུང་བ་དང༌། ཤིང་རྟ་མང་པོ་ཅན་དང༌། དོན་ཐམས་ཅད་པ་དང༌། བསམ་གཏན་ལ་དགའ་བ་དང༌།
ཆོས་ཅན་པ་དང༌། ཟས་གྲང་མོ་ཅན་དང༌། ཕྲག་པའི་གོས་
ཅན་དང༌། ཕྲུ་བ་གཅིག་པ་དང༌། བྱང་ཕྱོགས་ཀྱི་འགྲམ་ན་གནས་པ་དང༌།
ལྷོ་ཕྱོགས་ཀྱི་འགྲམ་ན་གནས་པ་དང༌། དུང་གི་སྒྲ་ཅན་དང༌། ལྷ་རྟེན་སྦྱིན་མའི་བུ་དང༌། ལུས་ལ་གནོད་པ་མེད་པ་དང༌།
ཀུན་ཏུ་གནོད་པ་མེད་པ་དང༌། སྣ་ཚོགས་ལྟ་བ་དང༌།
ཀ་ཀན་འདའ་བ་དང༌། གཅོད་པ་བ་དང༌། ལྷའི་གྲོང་བ་དང༌།
གོས་མེད་པ་དང༌། ས་ཁུང་ན་གནས་པ་པ་དང༌། ཟླ་བ་ཕྱེད་པ་པ་དང༌། ཆོས་སེམས་པ་དང༌། མ་ལ་གུས་པ་པ་དང༌།
ཕ་ལ་གུས་པ་པ་དང༌། ཟླ་བ་ཤར་བ་པ་དང༌། ཉི་མ་ཤར་བ་པ་དང༌། ལག
པར་ཟ་བ་པ་དང༌། སྙིང་གིས་འཚོ་བ་དང༌། འདས་པར་གྱུར་པ་པ་དང༌།
ཕུང་པོ་གསུམ་པ་དང༌། གཉིས་པ་དང༌། གསུམ་གྱིས་འཚོ་བ་དང༌། འཇུག་པ་པ་དང༌། གྲངས་ཅན་གྱི་རྣལ་འབྱོར་ཅན་དང༌།
འུག་པ་པ་དང༌། ནགས་ན་གནས་པ་དང༌། བེའི་ཁ་
ནས་པ་དང༌། བ་ལང་ཁྱི་ལུགས་དང༌། ཚངས་པར་སྤྱོད་པ་དང༌།
སྤྱོད་པ་པོ་དང༌། ཕྱུགས་བདག་པ་དང༌། གཽ་ཏམ་པ་དང༌། ཞིབ་མ་ཅན་དང༌། ཤིན་ཏུ་ཁྲུས་བྱས་པ་དང༌།
མཚེའུ་ཡི་འགྲམ་ན་གནས་པ་དང༌། འཚོ་བ་པ་དང༌། འཁོར་བ་ལས་གྲོལ་བ་དང༌།
ཐོག་མ་པ་དང༌། འཐོར་བྱེད་པ་དང༌། བར་དྭ་ཅེ་པ་དང༌།
བ་ཤའི་གྲངས་ཅན་པ་དང༌། བ་དན་འཇའ་བ་པ་དང༌། ལྷ་མཆོད་པ་པ་དང༌། གཞན་ལ་མི་འདུད་པ་དང༌། གོས་ཀྱི་དུམ་བུ་ཅན་དང༌།
འུག་པའི་གཤོག་པ་ཅན་དང༌། ལན་གསུམ་དུ་ཆུར་འཇུག
པ་དང༌། འགལ་བར་མི་བྱེད་པ་དང༌། མེས་པོ་ཅན་དང༌།
མཁའ་ལྡིང་པ་དང༌། ཁྱིམ་གྱི་ར་བ་ན་གནས་པ་པ་དང༌། མཆོག་གིས་མཆོག་པ་དང༌། གཅེར་བུ་གཉེན་གྱི་བུ་པ་དང༌།
འགེངས་བྱེད་པ་དང༌། དགེ་སྦྱོང་བ་དང༌། ཀ་ཏ་ཡའི་བུ་དང༌། ལྷག་སྤྱོད་ཀྱི་བུ་
དང༌། བ་ལང་གི་བརྟུལ་ཞུགས་ཅན་དང༌། རི་དྭགས་ཀྱི་བརྟུལ་ཞུགས་ཅན་དང༌།
རྟའི་བརྟུལ་ཞུགས་ཅན་དང༌། ཁྱིའི་བརྟུལ་ཞུགས་ཅན་དང༌། གསོལ་བ་མི་འདེབས་པའི་བརྟུལ་ཞུགས་ཅན་དང༌།
ཞིབ་མོའི་བརྟུལ་ཞུགས་ཅན་དང༌། མོའི་བརྟུལ་ཞུགས་
ཅན་དང༌། གཞོན་ནུའི་བརྟུལ་ཞུགས་ཅན་དང༌། མཐོང་བའི་ཆོས་ལ་མྱ་ངན་ལས་འདས་པར་སྨྲ་བ་དང༌།
ཆུ་ལས་སྐྱེས་པའི་ཕྲེང་བ་ཅན་དང༌། སོའི་རྟུན་བརྡུངས་ཅན་དང༌། རྡོ་འཐག་པ་པ་དང༌། ཡང་དག་པར་ཁྲུས་བྱེད་པ་དང༌།
ཆུས་ཡང་དག་པར་ལྟ་བ་
དང༌། སྐྱེད་གནས་དག་པ་པ་དང༌། ལས་ཀྱིས་དག་པ་པ་དང༌།
ཆུ་ལ་བྱི་འཛུལ་བྱེད་པ་དང༌། དགོན་པ་པ་དང༌། ས་དང་ཆུ་དང༌། མེ་དང་རླུང་དང༌། ནམ་མཁའ་སེམས་ཡོད་པར་ལྟ་བ་ལ་སོགས་པ་ལྟ་བ་སུམ་བརྒྱ་དྲུག་ཅུ་རྩ་གསུམ་པོ་ཐམས་ཅད་ཀྱང་རྒྱུད་
ནས་འོངས་པ་རྒྱུན་ཅད་པ་མེད་པས་ཐམས་ཅད་ཀྱང་རང་གི་དམ་ཚིག་ལས་གྲགས་པའི་ལུང་གིས་བསྔགས་པར་བརྗོད་པ་ལ་ཤིན་ཏུ་དཔའ་བས་རྒོལ་བར་བྱེད་དོ། །ཞེས་འབྱུང༌།
ལེགས་ལྡན་ཕྱི་མར་གྲགས་པའི་དབུ་མ་རིན་ཆེན་སྒྲོན་མ་ལས་ཀྱང་ལྟ་བའི་དབྱེ་བ་
།སུམ་བརྒྱ་སོགས་ཡོད་ཚུལ་བཤད་མོད། དེ་ཐམས་ཅད་ཀྱང་རྟག་པ་དང་ཆད་པར་སྨྲ་བ་གཉིས་སུ་འདུ་བར་མདོ་རྒྱུད་དུ་མ་ལས་གསུངས་ཤིང་ཤིང་རྟ་ཆེན་པོ་དག་གིས་བཞེད་དོ། །བོད་ཀྱི་མཁས་པ་སྔ་མ་པལ་ཆེ་བའི་གཞུང་
ལས་གྲངས་ཅན་པ། ཕུར་བུ་པ། བྱེ་བྲག་པ། རིག་པ་ཅན་པ།
གཅེར་བུ་པ་སྟེ་རྟག་པར་སྨྲ་བའི་རྟོག་གེའི་སྡེ་ལྔ་དང༌། ཆད་པར་སྨྲ་བ་རྒྱང་འཕེན་པ་སྟེ་སྡེ་དྲུག་ཏུ་བཤད་ལ།
ཁ་ཅིག་ནི་རྒྱང་འཕེན་པ། གྲངས་ཅན་པ། ཁྱབ་འཇུག་པ། དབང་
ཕྱུག་པ། གཅེར་བུ་པ་སྟེ་ལྔར་མུ་སྟེགས་པ་ཀུན་འདུས་སོ་ཞེས་ཟེར་རོ། །ཕྱིས་ཀྱི་རང་རེའི་མཁས་པ་དག་དེ་རྣམས་བཀག་ནས་སྤྱིར་གཞན་སྡེ་ཉེར་ལྔ་ཡོད་པ་དང་བོད་དུ་འགྱུར་བའི་གཞུང་རྣམས་སུ་གསལ་བར་བཤད་པ་བཅུ་གཉིས་སུ་བཞེད་ཅིང༌།
སློབ་དཔོན་ཞི་བ་འཚོའི་ཚད་མའི་དེ་ཁོ་ན་ཉིད་བསྡུས་པ་དང་ཀུན་བཏུས་རྩ་འགྲེལ་སོགས་ལ་བརྟེན་ནས་ཆད་སྨྲ་གཅིག་དང་རྟག་སྨྲ་བཅུ་གཅིག་གི་རྣམ་གཞག་གསུངས་སོ། །སྔོན་དང་ཕྱིས་ཀྱི་མཁས་པ་དེ་དག་ཕལ་མོ་ཆེས་མུ་སྟེགས་པའི་ལུགས་དེ་དག
ཐམས་ཅད་ཀྱི་རྩ་བ་ནི་གྲངས་ཅན་པ་དང་གཞན་རྣམས་དེ་ལས་གྱིས་བར་འདོད་ཅིང་དེ་ཡང་འཇུག་པ་ལས།
ཟ་པོ་རྟག་དངོས་བྱེད་པོ་མིན་པའི་བདག ཡོན་ཏན་བྱ་མེད་མུ་སྟེགས་རྣམས་ཀྱིས་བརྟགས། །དེ་དབྱེ་ཅུང་ཟད་ཅུང་ཟད་ལ་བརྟེན་ནས། །མུ་སྟེགས་
ཅན་རྣམས་ལུགས་ནི་ཐ་དད་འགྱུར། །ཞེས་པ་རྩ་འགྲེལ་གྱི་དགོངས་པར་འདོད་དོ། །འོན་ཀྱང་འཇུག་པ་རྩ་འགྲེལ་གྱི་དོན་ནི་གྲངས་ཅན་པས་བཏགས་པའི་བདག་དེའི་ཁྱད་པར་ཅུང་ཟད་སྣོན་འབྲིའི་ཚུལ་མི་འདྲ་བ་ཐ་དད་པ་ལ་བརྟེན་ནས་མུ་སྟེགས་པ་གཞན་
རྣམས་ཀྱིས་བདག་གི་སྒྲོ་འདོགས་ལུགས་མི་འདྲ་བ་སྣ་ཚོགས་ཡོད་པར་གསུངས་པ་ཡིན་གྱི་གྲངས་ཅན་ལས་མུ་སྟེགས་ཀྱི་ལུགས་གཞན་མཐའ་དག་གྱེས་པར་འཆད་པ་མིན་ལ།
དེ་ཡང་གྲངས་ཅན་གྱིས་བཏགས་པའི་བདག་རིགས་པས་འགོག་ཚུལ་ཤེས་
ན་མུ་སྟེགས་གཞན་རྣམས་ཀྱིས་བདག་གི་ཁྱད་པར་བཏགས་པ་རྣམས་འགོག་ཚུལ་ཤེས་སླ་བར་དགོངས་ནས་དེ་ལྟར་གསུངས་པ་ཡིན་ནོ། །དེ་ཡང་འཇུག་པ་རང་འགྲེལ་ལས།
བདག་གི་ཁྱད་པར་ཅུང་ཟད་ཅུང་ཟད་ལ་བརྟེན་ནས་མུ་སྟེགས་ཅན་རྣམས་ཀྱི་ལུགས་
ཕན་ཚུན་ཐ་དད་པར་འགྱུར་རོ། །ཞེས་གསུངས་པ་དང༌།
རྗེ་བདག་ཉིད་ཆེན་པོས་འཇུག་པའི་རྣམ་བཤད་དུ་རང་འགྲེལ་གྱི་ལུང་དེ་དྲངས་ནས་དེའི་མཇུག་ཐོགས་སུ་ཞེས་གསུངས་པས་གཞུང་དེའི་ལུགས་ཀྱི་གྲངས་ཅན་དེའི་དབྱེ་བ་ལ་བརྟེན་ནས་མུ་སྟེགས་ཀྱི་ལུགས་སོ་སོར་
གྱེས་པར་འཆད་པ་ནི་དོན་མ་གོ་བའོ། །ཞེས་གསུངས་སོ། །དེས་ན་གྲངས་ཅན་གྱི་ལུགས་ལས་མུ་སྟེགས་གཞན་རྣམས་གྱེས་པར་འདོད་པ་འཇུག་པ་རྩ་འགྲེལ་དང༌།
རྗེ་བདག་ཉིད་ཆེན་པོ་ཡབ་སྲས་ཀྱི་དགོངས་པར་འཆད་པ་ནི་ཞིབ་ཏུ་མ་བརྟགས་པའོ། །
འཇུག་པ་རྩ་འགྲེལ་དང་རྗེ་ཡབ་སྲས་ཀྱིས་གྲངས་ཅན་པས་ཤེས་བྱ་ཉེར་ལྔ་འདོད་ཚུལ་བཤད་ཀྱི་མུ་སྟེགས་པའི་ལུགས་ཉེར་ལྔ་ཡོད་པར་མ་བཤད་ལ།
ལང་ཀར་གཤེགས་པའི་མདོ་ལས་གཞན་སྡེ་ཉེར་ལྔར་བཤད་ཅེས་གསུངས་པ་ཡང་མདོ་དེར་མུ་
སྟེགས་པའི་འདོད་པ་བརྗོད་པའི་སྐབས་སུ་ཁ་ཅིག་ཅེས་པ་ཉེར་གཉིས་ལས་མ་བྱུང་ཞིང་དེའི་དང་པོ་ལ་གསུམ་དུ་ཕྱེ་ཡང་ཉེར་ལྔ་མ་ཚང་བར་འདུག་པས་འགིག་དཀའོ། །རྩ་ཤེའི་ཊཱིཀ་ཆེན་དང་སྟོང་ཐུན་ཆེན་མོར་གྲངས་ཅན་ལས་གྱེས་པ་ཉེར་ལྔ་ཡོད་པའི་
ཚིག་གཅིག་བྱུང་མོད་ཀྱང་མུ་སྟེགས་པའི་ལུགས་ཐམས་ཅད་གྲངས་ཅན་ལས་གྱེས་པ་དང་སྤྱིར་མུ་སྟེགས་པའི་ལུགས་ཉེར་ལྔར་གྲངས་ངེས་པར་མ་གསུངས་སོ། །དེས་ན་སྤྱིར་མུ་སྟེགས་པའི་ལུགས་མང་དུ་ཡོད་པ་རྣམས་ཀྱི་གཞུང་
མང་པོ་བོད་དུ་མ་འགྱུར་བ་དང་གོང་དུ་བཤད་པ་ལྟར་ལྟ་བ་ངན་པ་གྲངས་ཀྱིས་མི་ལང་བ་ཡོད་པས་ན་གཞན་སྡེ་ལ་མཐའ་གཅིག་ཏུ་གྲངས་ངེས་ཚུལ་རྗེ་བདག་ཉིད་ཆེན་པོ་ཡབ་སྲས་ཀྱི་གསུང་རབ་རྣམས་སུ་མ་བྱུང་བས་གྲངས་ངེས་གཟུང་དུ་འཆད་པར་མི་འདོད་
ལ༑ མུ་སྟེགས་ཀྱི་ལུགས་བྱུང་བའི་རིམ་པ་ནི་ཁྱད་པར་འཕགས་བསྟོད་ཀྱི་འགྲེལ་པ་ལས་བསྐལ་པ་དང་པོའི་དུས་ཀྱི་ཚེ་ལོ་ཆད་མེད་པ་ན་བྲམ་ཟེ་སེར་སྐྱ་ཞེས་བྱ་བ་ཞིག་གིས་གྲུབ་པའི་མཐའ་རྣམ་པར་བཞག་པའི་བསྟན་བཅོས་བརྩམས་པར་བཤད་པ་
དང༌། སློབ་དཔོན་ལེགས་ལྡན་འབྱེད་ཀྱི་རྟོག་གེ་འབར་བ་ལས།
དེ་ཡང་འདི་སྐད་གྲག་གོ༌།མཆོད་འོས་ཀྱིས་རང་གི་འཁོར་འདུས་ཤིང་ཚོགས་པ་གྲངས་ཅན་ལ་སོགས་པ་མུ་སྟེགས་བྱེད་རྣམས་ལ་རང་གི་བློས་བརྟགས་པའི་གྲུབ་པའི་མཐའ་ཐམས་
ཅད་བྱིན་ཟིན་པ་དང༌། དེ་ནས་ཕྱིས་ཚངས་པ་ཡང་ཕྱིན་པར་གྱུར་པ་ན།
དེས་དེ་ལ་སྨྲས་པ། ཚངས་པ་ཆེན་པོ་བདེ་བར་བྱོན། །ཤིན་ཏུ་འཕྱི་བར་འདིར་འོངས་སོ། །བསྟན་བཅོས་ཐམས་ཅད་བྱིན་ཟིན་པས། །ཁྱོད་ཀྱིས་རིག་བྱེད་འདི་ལོངས་ཤིག
ཅེས་བྱ་བ་དང་ཞེས་གསུངས་པས་སེར་སྐྱ་དང་མཆོད་འོས་ཀྱི་གཞུང་སྔ་བར་མངོན་ཞིང་འོན་ཀྱང་མུ་སྟེགས་གཞན་རྣམས་དེ་དག་ལས་གྱེས་པའི་ཁྱབ་པ་ནི་མེད་དེ།
དྲང་སྲོང་རྣམས་ཀྱིས་རང་རང་གི་བློས་སྙོམས་འཇུག་དང་རྟོག་གེ་ལ་བརྟེན་པའི་གྲུབ་པའི་
མཐའ་སོ་སོར་བཤད་པར་ཤིང་རྟ་ཆེན་པོ་རྣམས་ཀྱི་གཞུང་ལས་འབྱུང་བས་སོ། །བདག་ཅག་གི་སྟོན་པའི་དུས་སུ་ནི།
རེངས་བྱེད་ཀྱི་བུ་ལྷག་སྤྱོད་ལ་སོགས་པ་སྙོམས་འཇུག་པ་དྲུག བྲམ་ཟེ་རྒྱུས་རྒྱལ་ལ་སོགས་པ་རྗེས་སྒྲེག་པ་དྲུག འོད་སྲུངས་
རྫོགས་བྱེད་ལ་སོགས་པ་རྟོག་གེ་པ་དྲུག་སྟེ། མུ་སྟེགས་ཀྱི་སྟོན་པ་བཅོ་བརྒྱད་ཡོད་པར་བཤད་དོ། །དེས་ན་འདིར་ནི་དེ་དག་ལས་གྲགས་ཆེ་བ་རྣམས་ཀྱི་ལུགས་འཕགས་ཡུལ་པཎ་ཆེན་རྣམས་ཀྱིས་འགོག་ཚུལ་མདོ་ཙམ་འཆད་པར་འདོད་པས།
ཆད་
པར་སྨྲ་བ་ནི། རྒྱང་འཕེན་པ་དང༌། རྟག་པར་སྨྲ་བ་ནི་གྲངས་ཅན་པ།
ཚངས་པ་བ། ཁྱབ་འཇུག་པ། དཔྱོད་པ་བ། དབང་ཕྱུག་པ། བྱེ་བྲག་པ། རིག་པ་ཅན་པ། གཅེར་བུ་པ་སྟེ་བརྒྱད་དུ་བསྡུ་བར་བྱ་སྟེ།
གཞུང་ལ་ལར་སེར་སྐྱ་པ་དང་གྲངས་
ཅན་པ་སོ་སོར་བཤད་ཀྱང་ནང་གསེས་ཀྱི་དབྱེ་བ་ཡིན་པས་མི་འགལ་ཞིང་མཁས་པའི་དབང་པོ་ཀ་མ་ལ་ཤཱི་ལ་སོགས་ཀྱིས་དེ་གཉིས་དོན་གཅིག་ཏུ་བཤད་པའི་ཕྱིར་དང༌།
བརྡ་སྤྲོད་པ། རིག་བྱེད་མཐའ་པ། གསང་བ་པ་རྣམས་ནི་ཚངས་པ་པའི་འདོད་
པ་དང་ཕྱོགས་མཐུན་པ་དང་ཚངས་པ་སྟོན་པར་བྱེད་པ་དང་ཚངས་པའི་ལུང་ལ་བརྟེན་པར་མཚུངས་པའི་ཕྱིར་ལོགས་སུ་མ་བགྲང་ངོ། །རང་གི་སྡེ་པ་ནི།
བྱེ་བྲག་སྨྲ་བ་དང༌། མདོ་སྡེ་པ་དང༌། སེམས་ཙམ་པ་དང༌། དབུ་མ་པ་སྟེ་བཞིར་གྲངས་ངེས་པར་
མདོ་རྒྱུད་དུ་མ་ནས་བཤད་ཅིང་ཁྱད་པར་རྡོ་རྗེ་སྙིང་འགྲེལ་ལས།
སངས་རྒྱས་པ་ཡི་བཞི་པ་དང༌། །ལྔ་པ་ཐུབ་པའི་དགོངས་པ་མིན། །ཞེས་གྲངས་ངེས་པར་བཤད་ཅིང་སློབ་དཔོན་འཕགས་པ་ལྷས།
སངས་རྒྱས་ཆོས་ནི་རྣམ་པ་བཞིར། །ཡིད་འདོད་
རྣམས་ཀྱིས་མངོན་མཐོང་སྟེ། །བྱེ་བྲག་སྨྲ་ལ་སོགས་པའི་ལམ། །བཤད་པའི་དེ་ཉིད་སྒྲུབ་པ་པོ། །ཞེས་གསུངས་སོ། །བྱུང་བའི་རིམ་པ་ནི་ལ་ལ་དག་བཀའ་བསྡུ་བ་གསུམ་པའི་རྗེས་སུ་བྱེ་བྲག་སྨྲ་བ་དང་མདོ་སྡེ་པ།
སློབ་
དཔོན་ཀླུ་སྒྲུབ་ཀྱི་དུས་སུ་དབུ་མ་པ། འཕགས་པ་ཐོགས་མེད་ཀྱི་དུས་སུ་སེམས་ཙམ་པ་བྱུང་བ་ཡིན་ལ་དེའི་སྔོན་དུ་གྲུབ་མཐའ་བཞིའི་ཐ་སྙད་མེད་པར་འདོད་པ་ནི་མི་འཐད་དེ།
མཁའ་འགྲོ་རྒྱ་མཚོ།། དགྱེས་རྡོར་གྱི་རྒྱུད་བརྟག་གཉིས། དུས་འཁོར་གྱི་རྒྱུད།
རྡོ་རྗེ་ཨ་ར་ལིའི་རྒྱུད་སོགས་ལས་གྲུབ་མཐའ་བཞིའི་ཐ་སྙད་གསུངས་པའི་ཕྱིར་རོ། །འོན་ཀྱང་གྲུབ་མཐའ་བཞི་གའི་བདག་མེད་ཕྲ་རགས་འདོད་ཚུལ་གྱི་རིམ་པ་དང་མདོ་སྡེའི་དགོངས་པ་ལེན་ཚུལ་སོགས་སངས་རྒྱས་ཞལ་བཞུགས་དུས་ནས་ཡོད་ནའང་གྲུབ་
མཐའི་ནང་གསེས་ཀྱི་འདོད་ཚུལ་ཕྲ་མོ་མང་པོ་ཞིག་ནི་རང་རང་གི་སློབ་དཔོན་རྣམས་ཀྱིས་གཞུང་བརྩམས་པའི་རྗེས་ནས་བྱུང་བར་བྱས་ན་ལེགས་པར་མངོན་ཏེ་ཞིབ་པར་མ་སྤྲོས་སོ། །དེ་ལྟར་གྲུབ་མཐའ་བཞི་ལས་བྱེ་མདོ་གཉིས་ཐེག་དམན་གྲུབ་མཐའ་སྨྲ་
བ་དང༌། དབུ་སེམས་གཉིས་ནི་ཐེག་ཆེན་གྲུབ་མཐའ་སྨྲ་བ་ཡིན་ལ།
བོད་སྔ་མ་ཁ་ཅིག་ཐེག་དམན་གྲུབ་མཐའ་སྨྲ་བ་དང་ཐེག་དམན་གང་ཟག་གཉིས་དོན་གཅིག་པ་དང༌། ཐེག་ཆེན་གྲུབ་མཐའ་སྨྲ་བ་དང་ཐེག་ཆེན་གང་ཟག་གཉིས་དོན་གཅིག་པར་
འདོད་པ་ནི་མི་འཐད་དེ། །ནང་པའི་གྲུབ་མཐའ་སྨྲ་བ་ཡིན་ན་ལམ་ཞུགས་ཀྱི་གང་ཟག་ཡིན་པས་ཁྱབ་པར་ཐལ་བ་དང༌།
ཉན་ཐོས་འཕགས་པ་རྣམས་ཀྱིས་ཀྱང་ཐེག་པ་ཆེན་པོའི་ལམ་དང་འབྲས་བུའི་ཆོས་མང་པོ་ཞིག་ལ་སྐུར་པ་འདེབས་པར་ཐལ་བ་སོགས་
ཉེས་པ་དུ་མ་ཡོད་པའི་ཕྱིར། དེ་ལྟར་གྲུབ་མཐའ་སྨྲ་བ་བཞིར་ངེས་པ་ཡང༌།
སློབ་དཔོན་དང༌། བསྟན་བཅོས་དང༌། བདག་མེད་ཕྲ་རགས་ཀྱི་ལྟ་བ་ཁས་ལེན་ཚུལ་གྱིས་རབ་ཏུ་ཕྱེ་བ་ཡིན་པས་གྲུབ་མཐའ་བཞིར་ངེས་པ་ཡིན་གྱི་ནང་པའི་གྲུབ་མཐའ་སྨྲ་
བའི་གང་ཟག་ཡིན་ན་གྲུབ་མཐའ་སྨྲ་བ་བཞི་པོ་དེ་གང་རུང་ཡིན་པས་མ་ཁྱབ་སྟེ་གྲུབ་མཐའ་སྨྲ་བ་འོག་མ་ཁ་ཅིག་གིས་གྲུབ་མཐའ་གོང་མའི་རིགས་པའི་ཚུལ་ལ་བློ་སྦྱངས་ནས་རང་གི་ཐུན་མོང་མ་ཡིན་པའི་གྲུབ་པའི་མཐའ་ལ་རིགས་པའི་གནོད་པ་འབབ་པར་ཤེས་
ནས་སྔར་གྱི་ངེས་ཤེས་ལོག་ནའང་གྲུབ་མཐའ་གོང་མའི་ལྟ་བ་ལ་ངེས་ཤེས་མ་སྐྱེས་པའི་གནས་སྐབས་ཡོད་པའི་ཕྱིར་རོ། །དེ་ནི་ནང་པའི་གྲུབ་མཐའ་སྨྲ་བའི་གང་ཟག་ནི་ཡིན་ཏེ།
དཀོན་མཆོག་གསུམ་ལ་སྐྱབས་སུ་སོང་ཞིང་ལྟ་བ་བཀར་བཏགས་ཀྱི་ཕྱག་རྒྱ་
བཞི་ཁས་ལེན་པའི་ཕྱིར་རོ། །དེ་ལྟ་ན་ཡང་གྲུབ་མཐའ་བཞིར་མ་ངེས་པར་མི་འགྱུར་ཏེ།
བློ་ཕུང་པོ་གསུམ་པ་ལ་གནས་པའི་གང་ཟག་དེས་གྲུབ་མཐའ་བཞི་པོ་གང་ཡང་མ་ཡིན་པའི་གྲུབ་པའི་མཐའ་གཞན་ཞིག་རང་དབང་དུ་བྱས་ཏེ་དམ་མི་འཆའ་བའི་ཕྱིར་རོ། །
གཉིས་པ་སོ་སོའི་རྣམ་པར་བཞག་པ་ལ་གསུམ། གཞན་སྡེས་བཏགས་པའི་མཐའ་དགག་པ།
རང་སྡེའི་རྣམ་གཞག་སོ་སོར་བཤད་པ། དེ་དག་གི་གྲུབ་པའི་དོན་ནོ། །དང་པོ་ལ་གསུམ། ཆད་སྨྲ་དགག་པ།
རྟག་སྨྲ་དགག་པ། དོན་བསྡུ་བའོ། །
དང་པོ་ལ་འདོད་པ་དགོད་པ་དང༌། དེ་དགག་པ་གཉིས།
དང་པོ་ནི། ཚེ་འདི་ལ་གང་ལེགས་ཙམ་གྱིས་ཆོག་པར་སྨྲ་བས་ཚུ་རོལ་མཛེས་པ་བ། ཤི་བའི་ཚེ་བདག་རྒྱུན་ཆད་པར་སྨྲ་བས་ཆད་སྨྲ་བ།
ལས་འབྲས་མེད་པར་སྨྲ་བས་མེད་སྨྲ་བ། དྲང་སྲོང་ཕུར་
།བུའི་རྗེས་སུ་འབྲངས་པས་ཕུར་བུ་བའམ་ལྷའི་བླ་མ་པ།
ཡང་དག་པའི་ལྟ་བ་ལས་རིང་དུ་སོང་བས་རྒྱང་པན་པ། དངོས་པོ་རྣམས་རྒྱུ་མེད་པར་ངོ་བོ་ཉིད་ལས་བྱུང་བར་སྨྲ་བས་ངོ་བོ་ཉིད་སྨྲ་བའམ་རང་བཞིན་སྨྲ་བ་ཞེས་ཟེར་ལ།
ཕྱི་མ་ཁ་ཅིག་འཇུག་སྟོབས་སྟོན་པར་སྨྲ་བས་འཇུག་སྟབས་ཅན་བ་ཞེས་ཀྱང་གྲགས་སོ། །འདིའི་རྩ་བའི་གྲུབ་མཐའ་ནི་དྲང་སྲོང་འཇིག་རྟེན་མིག་ཅེས་བྱ་བས་གཞུང་ལུགས་འབུམ་ཕྲག་གཅིག་བརྩམས་པ་ལས་བྱུང་བར་སྤྱན་རས་གཟིགས་བརྟུལ་ཞུགས་དང་
བྱང་ཆུབ་བཟང་པོ་སོགས་ཀྱིས་བཤད་དོ། །གྲུབ་མཐའི་དབྱེ་བ་ནི།
སློབ་དཔོན་བྱང་ཆུབ་བཟང་པོས་རྣམ་རྟོག་གི་དབང་དུ་བྱས་པ་དང་གསང་ཚིག་གི་དབང་དུ་བྱས་པ་དང་ཆད་ལྟའི་དབང་དུ་བྱས་པ་གསུམ་བཤད་པའི།
དང་པོ་གཉིས། སྒྲས་བརྗོད་རིགས་
ཀྱིས་བཏགས་པ་ཙམ་ལས་རྒྱང་འཕེན་པ་དངོས་མིན་ལ།
ལང་གཤེགས་ལས་རྒྱང་འཕེན་པ་བཅུ་གཅིག་གསུངས་པ་ཡང་ལྟ་བའི་ཁྱད་པར་ལ་བཏགས་པ་ཙམ་ལས་དངོས་མིན་ནོ། །དེས་ན་ས་སྡེ་ལས་བསམ་གཏན་པ་དང་རྟོག་གེ་བ་གཉིས་བཤད་ལ།
དེ་རེ་རེ་ལའང་སྐྱེ་བ་སྔ་ཕྱི་འདོད་ཀྱང་ལས་འབྲས་མི་འདོད་པའི་ཆད་སྨྲ་གཅིག་དང༌།
སྐྱེ་བ་སྔ་ཕྱི་དང་ལས་འབྲས་གཏན་མི་འདོད་པའི་ཆད་སྨྲ་གཅིག་སྟེ་གཉིས་རེ་ཡོད་དོ། །གྲུབ་མཐའི་འདོད་ཚུལ་ནི།
སྙོམས་འཇུག་པ་དག་གིས་བསམ་གཏན་དང་གཟུགས་
མེད་སོགས་ཐོབ་པ་ན་རང་ཉིད་ལ་དགྲ་བཅོམ་པའི་འདུ་ཤེས་སྐྱེས་ལ་འཆི་བའི་ཚེ་ཏིང་ངེ་འཛིན་ལས་ཉམས་ནས་གནས་འོག་མར་སྐྱེ་བ་མཐོང་བ་ན་རྒྱུ་དེས་འཇིག་རྟེན་ན་དགྲ་བཅོམ་པ་དང་ལམ་མེད་དོ་སྙམ་ནས་སྐུར་པ་འདེབས་ལ།
རྟོག་གེ་པ་དག་ནི་རིགས་པ་
ལྟར་སྣང་ལ་བརྟེན་ནས་མངོན་མཐོ་ངེས་ལེགས་ཀྱི་རྒྱུ་འབྲས་ལ་སྐུར་པ་འདེབས་པར་བྱེད་དེ།
དེ་ཡང་སྲན་མ་ཟླུམ་པ་དང་ཚེར་མ་རྣོ་བ་དང་རྨ་བྱའི་མདོངས་ཀྱི་རྣམ་པ་སྣ་ཚོགས་པ་དག་སུས་ཀྱང་འབད་ནས་བྱེད་པར་མ་མཐོང་བས་དངོས་པོ་འདི་དག་ནི་རང་གི་ངོ་བོ་ཉིད་
ལས་བྱུང་བ་ཡིན་གྱི་རྒྱུ་མེད་པའོ་ཞེས་ཟེར་བ་དང༌།
སེར་སྣ་ཅན་ཁ་ཅིག་ཕྱུག་པ་དང་སྲོག་གཅོད་པ་ཁ་ཅིག་ཚེ་རིང་བ་མཐོང་ནས་ལས་འབྲས་མེད་དོ་ཞེས་སྐུར་པ་འདེབས་པ་དང༌།
སྐྱེ་བ་སྔ་ཕྱི་དག་རང་གི་མངོན་སུམ་གྱིས་མ་གྲུབ་པས་མེད་དོ་ཞེས་སྐུར་པ་འདེབས་
པར་བཤད་ཅིང་ཡང་དེའི་བྱེ་བྲག་ཁ་ཅིག་ནི་འདི་ལྟར་སྨྲ་སྟེ།
གང་ཞིག་ཡོད་པར་མ་དམིགས་པ་དེ་ནི་མེད་པའི་ཐ་སྙད་ཀྱི་ཡུལ་ཡིན་ཏེ། དངོས་པོ་རྣམས་ཀྱི་རྒྱུ་ནི་ཡོད་པར་མ་དམིགས་སོ་ཞེས་པ་དང༌།
གང་ཞིག་རེས་འགའ་བ་དེ་ནི་རྒྱུ་མེད་པར་ངེས་ཏེ། ཚེར་མ་ལ་
སོགས་པའི་རྣོ་བ་ལ་སོགས་པ་ལྟ་བུའོ། །སྡུག་བསྔལ་ལ་སོགས་པ་ཡང་རེས་འགའ་བ་ཉིད་ཡིན་ནོ། །ཞེས་གཏན་ཚིགས་འགོད་པར་བྱེད་དོ། །སྐྱེ་བ་སྔ་ཕྱི་མེད་པར་བསྒྲུབ་པ་ནི།
སྐྱེས་བུའི་རིག་པ་ནི་ལུས་ལས་སྐྱེས་ལ་ལུས་ཀྱང་འབྱུང་བ་ཆེན་པོ་བཞིས་འདུ་
བྱས་པ་ཡིན་པའི་ཕྱིར་སྐྱེ་བ་སྔ་མ་མེད་པ་དང༌།
འཆི་བའི་ཚེ་ནི་ལུས་ནི་འབྱུང་བ་ཆེན་པོ་བཞི་དང་དབང་བ་ནི་ནམ་མཁའི་བག་ལ་ཞི་བར་གྱུར་ཏེ་འཇིག་པའི་ཕྱིར་འཇིག་རྟེན་ཕ་རོལ་ཏུ་འགྲོ་བ་མེད་དོ་ཞེས་སྐྱེ་བ་ཕྱི་མ་འགོག་པར་བྱེད་དོ། །དེ་ལྟར་ཡང་སློབ་དཔོན་
འཕགས་པ་ལྷས། ཡང་གཞན་ཁ་ཅིག་ན་རེ། ཕྱི་ནང་སྐྱེ་མཆེད་ཆོས་རྣམས་ཐམས་ཅད་ནི། །ངོ་བོ་ཉིད་ལས་གྲུབ་པ་གཞན་ལས་མིན། །སྲན་ཟླུམ་སྐྱེར་ཚེར་གཟངས་རིང་རྣོ་བ་དང༌། །རྨ་བྱའི་མཇུག་མ་མགྲིན་པའི་ཚོགས་བཀྲ་དང༌། །ཉི་ཤར་ཆུ་རྣམས་
།ཐུར་དུ་འབབ་པ་རྣམས། །ངོ་བོ་ཉིད་ལས་གྲུབ་སྟེ་རྒྱུ་ཡོད་མིན། །ཞེས་དང༌།
ཡང་ཁ་ཅིག་ན་རེ། མ་ཤི་བར་དུ་བདེ་བར་འཚོ། །ཤི་ནས་དེ་ཡི་སྤྱོད་ཡུལ་མེད། །ལུས་ཀྱང་ཐལ་བ་བཞིན་སོང་ནས། །སླར་འཚོ་བར་ལྟ་
ག་ལ་འགྱུར། །དེ་ཕྱིར་སྔ་ཕྱི་ཡོད་མ་ཡིན། །ཚེ་འདི་ཉིད་ལ་བདེ་བའི་ཕྱིར། །ལྷ་མཆོད་འདྲེ་སྲིན་མནན་བྱས་ན། །བཙན་ཕྱུག་མཐུ་སྟོབས་འགྲུབ་པར་འགྱུར། །ཞེས་པ་དང༌།
དཔལ་ལྡན་ཆོས་ཀྱི་གྲགས་པས་ཀྱང༌། སྐྱེ་བ་ཡོངས་སུ་ལེན་པ་ན། །
འབྱུང་རྡུབ་དབང་པོ་བློ་དག་ནི། །རང་གི་རིགས་ལ་ལྟོས་མེད་པར། །ལུས་ཉིད་འབའ་ཞིག་དག་ལས་སྐྱེས། །ཞེས་དང༌།
ཡང་དགྲ་བཅོམ་པའི་འཆི་སེམས་དཔེར་བཀོད་ནས་འཆི་སེམས་ཡིན་པའི་རྟགས་ཀྱིས་རིག་པ་ཕྱི་མ་འཚམས་མི་སྦྱོར་བར་བསྒྲུབ་
པ་ནི། དེ་ཉིད་ཀྱིས། གང་གང་འཆི་སེམས་དེ་དང་དེ། །སྐྱེ་བ་གཞན་དུ་རྗེས་འགྲོ་མེད། །འཆི་སེམས་ཡིན་པའི་ཕྱིར་ན་དཔེར། །ཉེས་བྲལ་འཆི་ཀའི་རིག་པ་བཞིན། །ཞེས་གསུངས་པ་དང༌།
སྐྱེས་མ་ཐག་པའི་སེམས་ནི་སེམས་མེད་པའི་འབྱུང་བ་ཆེན་
པོ་རྣམས་ལས་སྐྱེས་པ་ཡིན་ཏེ། སྐྱེ་བ་ཅན་ཡིན་པའི་ཕྱིར།
དཔེར་ན་ཆང་ལས་མྱོས་པ་དང་མེ་ཤེལ་ལས་མེ་བཞིན་ཞེས་པའི་རིགས་པ་ཡང་སྨྲ་སྟེ། དབུ་མ་སྙིང་པོ་ལས།
འབྱུང་བ་སེམས་མེད་རྣམས་ལས་ནི། །ཤེས་པ་ཡོད་པ་ཉིད་སྐྱེ་སྟེ། །སྐྱེ་ཅན་
ཡིན་ཕྱིར་མྱོས་མཐུ་དང༌། །མེ་ཤེལ་ལས་ནི་མེ་བཞིན་ནོ། །ཞེས་གསུངས་པ་ལྟར་ཡིན་ལ།
དེ་དག་ལ་ཡང་ལྷ་ལ་སོགས་པའི་འགྲོ་བ་གཞན་རྣམས་ཡོད་ཀྱང་རྒྱུད་གཅིག་པ་མི་སྲིད་པར་འདོད་པ་དང་རྒྱུད་གཅིག་པ་ཡོད་ཀྱང་བདེ་སྡུག་མྱོང་བ་ལ་རྒྱུ་མེད་
པར་སྨྲ་བ་དང༌། སྙོམས་འཇུག་པ་རྣམས་ཀྱང་རང་གི་མངོན་ཤེས་ཀྱིས་བརྟགས་ནས་ཚེ་འདིར་སྦྱིན་པ་བཏང་བ་ཁ་ཅིག་ཚེ་ཕྱི་མར་དབུལ་པོར་གྱུར་པ་མཐོང་ནས་ལས་འབྲས་མེད་པར་སྨྲ་བ་དང༌།
རང་གི་མངོན་ཤེས་ཀྱིས་མ་མཐོང་བའི་དོན་རྣམས་ལ་སྐུར་པ་
འདེབས་པ་སོགས་ཡོད་པར་བཤད་ཅིང་ཚད་མ་ནི་མངོན་སུམ་གཅིག་པུར་འདོད་དེ།
ཇི་ཙམ་དབང་པོའི་སྤྱོད་ཡུལ་བ། །སྐྱེས་བུའང་དེ་ཙམ་ཁོ་ནར་ཟད། །བཟང་མོ་མང་ཐོས་གང་སྨྲ་བ། །དེ་དག་སྤྱང་ཀིའི་རྗེས་དང་འདྲ། །ཞེས་དང༌།
མཛེས་མ་ལེགས་པར་
སྤྱོད་ཅིང་ཟ་བར་གྱིས། །ལུས་མཆོག་འདི་གང་དེ་ཁྱོད་ལ་མི་འབྱུང༌། །ལུས་འདི་འཚོ་བར་གྱུར་པ་ཙམ་ཞིག་སྟེ། །འཇིག་མ་སོང་བ་ལྡོག་པར་མི་འགྱུར་རོ། །ཞེས་སོ། །དེ་ལྟར་ལུས་ཀྱི་འབྱུང་བ་བཞིའི་ཁྱད་པར་ཁོ་ན་ལས་ཡིད་ཤེས་སྐྱེས་ཤིང་ལུས་ཞིག་པ་ན་
དེ་ཡང་འཇིག་པའི་ཕྱིར་སྐྱེ་བ་དུ་མར་ལམ་གོམས་པར་བྱེད་པ་མེད་པས་ཐམས་ཅད་མཁྱེན་པ་མེད་པ་དང་སྡུག་བསྔལ་སོགས་རྒྱུ་མེད་པས་དེ་ལས་གྲོལ་བྱེད་ཀྱི་ལམ་དང་གྲོལ་བ་མེད་ཅེས་ཐར་པ་ལ་སྐུར་པ་འདེབས་པར་བྱེད་དོ། །བློ་ལུས་ལ་བརྟེན་པར་འདོད་པ་ལ་
ཚུལ་གསུམ་བཤད་དེ། ཆང་དང་མྱོས་བྱེད་ཀྱི་ནུས་པ་བཞིན་དུ་ལུས་ཀྱི་བདག་ཉིད་དུ་གྱུར་པ་དང༌།
སྒྲོན་མ་དང་དེའི་འོད་བཞིན་དུ་ལུས་ཀྱི་འབྲས་བུར་གྱུར་པ་དང༌། རྩིག་པ་དང་དེའི་རི་མོ་བཞིན་དུ་ལུས་ཀྱི་ཡོན་ཏན་དུ་གྱུར་པའི་སྒོ་ནས་བརྟེན་པར་འདོད་
པའོ༑ ༑གཉིས་པ་དེ་དགག་པ་ནི། ཐོག་མར་འཇིག་རྟེན་ཕ་རོལ་མེད་པ་དགག་པར་བྱ་སྟེ།
ཁྱོད་ཀྱིས་འཇིག་རྟེན་ཕ་རོལ་མེད་པར་སྨྲ་བ་འདི་ཚད་མ་གང་ལས་ཡིན། རྗེས་དཔག་ནི་ཁྱོད་ཀྱིས་བཀག་པས་མངོན་སུམ་ཡིན་ན་འཇིག་རྟེན་ཕ་རོལ་མེད་པ་
{@16A}༄༅། །མངོན་སུམ་གྱིས་ཇི་ལྟར་འགྲུབ།
འོན་ཏེ་འཇིག་རྟེན་ཕ་རོལ་མངོན་སུམ་དུ་མཐོང་བ་མ་ཡིན་པའི་ཕྱིར་རོ་སྙམ་ན་འཇིག་རྟེན་ཕ་རོལ་མངོན་སུམ་དུ་མ་མཐོང་བ་དེ་མངོན་སུམ་ཡིན་ནམ་མངོན་སུམ་མ་ཡིན་པ་ཞིག་ཡིན། །མངོན་
སུམ་མོ་ཞེ་ན་མངོན་སུམ་དུ་མཐོང་བ་ལོག་པ་མངོན་སུམ་དུ་འདོད་ན་དངོས་པོ་མེད་པ་ཡང་མངོན་སུམ་དུ་མི་འགལ་བར་འགྱུར་རོ། །དེ་ལྟར་ན་དངོས་པོ་མེད་པ་ཡང་དངོས་པོར་ཐལ་བར་འགྱུར་ཏེ།
འཇིག་རྟེན་ཕ་རོལ་མངོན་སུམ་དུ་མཐོང་བ་ལོག་པ་མངོན་
སུམ་གྱི་དངོས་ཀྱི་གཞལ་བྱ་མངོན་སུམ་པ་ཡིན་པའི་ཕྱིར།
དཔེར་ན་དངོས་པོ་བཞིན། དེ་ལྟར་ན་དངོས་པོ་ཡང་མེད་པར་འགྱུར་ཏེ། དངོས་པོ་མེད་པ་མེད་པའི་ཕྱིར།
ཞེས་པ་ནི་དཔལ་ལྡན་ཟླ་བའི་གཞུང་ལས་བྱུང་བའི་རིགས་པ་དང༌། འཇིག་རྟེན་ཕ་
རོལ་མེད་པ་ནི་མངོན་སུམ་གྱིས་རྟོགས་པར་བྱ་བ་མ་ཡིན་ཏེ།
མེད་པའི་ངོ་བོ་ཉིད་ཡིན་པའི་ཕྱིར། དངོས་པོ་མེད་པ་བཞིན་ནོ། །རྗེས་སུ་དཔག་པས་ཀྱང་མ་ཡིན་ཏེ།
ཁྱོད་ཀྱིས་མངོན་སུམ་ཁོ་ན་ཚད་མར་སྨྲས་པའི་ཕྱིར། ཞེས་པ་ནི་ལེགས་ལྡན་འབྱེད་
ཀྱིས་རྟོག་གེ་འབར་བར་བཤད་པའི་རིགས་པའོ། །བློ་ལུས་ཀྱི་ཉེར་ལེན་ཡིན་པ་འགོག་པ་ནི།
ལུས་ཁོ་ན་སེམས་ཀྱི་རྒྱུ་ཡིན་ན་ཤི་བའི་ལུས་ལའང་སེམས་ཡོད་པར་ཐལ་བར་འགྱུར་ཏེ། ལུས་ཡོད་པ་ཙམ་གྱིས་སེམས་ཀྱི་དངོས་རྒྱུ་ཐོགས་པ་མེད་པ་མ་
ཚང་བ་མེད་པའི་ཕྱིར། རྣམ་འགྲེལ་ལས། ལུས་ནི་གནས་པ་ཉིད་ན་སེམས། །ལྡོག་པ་མེད་པ་ཐལ་བར་འགྱུར། །ཞེས་སོགས་ཀྱི་རིགས་པ་དང༌།
བློ་ནི་ལུས་ལ་འབྲས་བུའི་ཚུལ་དུ་བརྟེན་པ་ཡང་མ་ཡིན་ཏེ། ཤེས་རབ་ལ་སོགས་པ་ཕུལ་དུ་བྱུང་བ་
དང་འགྲིབ་པ་ནི་ལུས་ཀྱི་ཕུལ་དུ་བྱུང་བ་དང་འགྲིབ་པ་ལ་ལྟོས་པ་མེད་པའི་ཕྱིར།
བློ་ལུས་ཀྱི་བདག་ཉིད་ཡིན་པའི་ཚུལ་གྱིས་བརྟེན་པ་ཡང་མ་ཡིན་ཏེ། སྐྱེས་བུ་དེའི་བློ་ལ་ཡོད་པའི་ཡོན་ཏན་ཐམས་ཅད་སྐྱེས་བུ་དེའི་ལུས་མཐོང་བའི་དབང་ཤེས་ལ་ཡང་
མངོན་སུམ་དུ་སྣང་བར་ཐལ་བའི་ཕྱིར་རོ། །རྟགས་གྲུབ་སྟེ།
ཁྱོད་ལྟར་ན་ལུས་རྟག་པ་ཡིན་པས་དེ་དང་བློ་རྫས་གཅིག་ཡིན་ན་ཆ་མེད་རྫས་གཅིག་ཡིན་དགོས། དེ་ལྟར་ན་ལུས་སེམས་གཅིག་ཡིན་དགོས་པའི་ཕྱིར་རོ། །འདི་རྣམས་ཀྱང་རྣམ་འགྲེལ་གྱི་
རིགས་པ་ཡིན་ནོ། །སྤྱིར་རྒྱུ་མེད་པར་འདོད་པ་དགག་པ་ནི།
དངོས་པོ་རྣམས་རྟག་ཏུ་ཡོད་པའམ་གཏན་མེད་པའམ་ཐམས་ཅད་ལས་ཐམས་ཅད་སྐྱེ་བར་ཐལ་བར་འགྱུར་ཏེ།
རྒྱུ་མེད་ཅིང་གཞན་ལ་མི་ལྟོས་པའི་ཕྱིར། རྣམ་འགྲེལ་ལས། རྒྱུ་མེད་གཞན་
ལ་མི་ལྟོས་ཕྱིར། །རྟག་ཏུ་ཡོད་པའམ་མེད་པར་འགྱུར། །ཞེས་དང༌།
ཟླ་བའི་ཞབས་ཀྱིས་འཇུག་པ་རྩ་འགྲེལ་ལས་ཀྱང་རིགས་པ་དེས་བཀག་གོ༌།སྐྱེ་བ་སྔ་ཕྱི་ཡོད་པར་སྒྲུབ་པ་ནི་ཐ་མལ་པ་སྐྱེས་མ་ཐག་གི་རིག་པ་དང་པོ་ཆོས་ཅན།
རང་རྒྱུ་རིག་པ་སྔ་
མ་སྔོན་དུ་སོང་སྟེ། རིག་པ་ཡིན་པའི་ཕྱིར། དཔེར་ན་ད་ལྟའི་རིག་པ་འདི་བཞིན།
ཐ་མལ་པ་འཆི་ཁའི་རིག་པ་ཐ་མ་ཆོས་ཅན། རིག་པ་ཕྱི་མ་འཚམས་སྦྱོར་ཏེ། སྲེད་པ་དང་བཅས་པའི་རིག་པ་ཡིན་པའི་ཕྱིར། །ཐ་མལ་པ་འཆི་ཁའི་དབང་པོ་ཐ་མ་
ཆོས་ཅན། དབང་པོ་ཕྱི་མ་འཚམས་སྦྱོར་ཏེ། ལུས་ལ་སྲེད་པ་དང་བཅས་པའི་དབང་པོ་ཡིན་པའི་ཕྱིར།
ཞེས་པ་རྣམས་ཆོས་ཀྱི་གྲགས་པ། ལེགས་ལྡན་འབྱེད། ཞི་འཚོ་རྣམས་ཀྱི་གཞུང་ལས་མཐུན་པར་བྱུང་ཞིང༌།
སློབ་དཔོན་ཀ་མ་ལ་ཤཱི་ལས།
གང་འདོད་ཆགས་དང་བཅས་པའི་སེམས་ཡིན་པ་དེ་ནི།
རང་གིས་ཉེ་བར་བླང་བར་བྱ་བའི་སེམས་གཞན་སྐྱེད་པར་ནུས་པ་ཡིན་ཏེ། །ཆགས་པ་དང་བཅས་པའི་སྔར་གྱི་གནས་སྐབས་ཀྱི་སེམས་བཞིན།
ཐ་མལ་པ་འཆི་བའི་
སེམས་ཀྱང་འདོད་ཆགས་དང་བཅས་པ་ཡིན་ནོ་ཞེས་བྱ་བ་ནི་རང་བཞིན་གྱི་རྟགས་སོ་ཞེས་གསུངས་པ་ལྟར་རོ། །གཏན་ཚིགས་འདི་དག་གི་ཕྱོགས་ཆོས་དང་རྗེས་སུ་འགྲོ་ལྡོག་གི་ཁྱབ་པ་སྒྲུབ་ཚུལ་གྱི་གནད་རྣམས་ཞིབ་ཏུ་ཤེས་ན་སྐྱེ་བ་སྔ་ཕྱི་ཡོད་པ་སོགས་ལ་
ངེས་ཤེས་འདྲེན་པ་ལ་ཁྱད་ཆེ་མོད་ཀྱང་མང་བས་འཇིགས་ནས་མ་བྲིས་ཤིང༌།
དཔྱོད་ལྡན་རྣམས་ཀྱིས་རྣམ་འགྲེལ་ལེའུ་གཉིས་པ་རྩ་འགྲེལ་སོགས་གཞུང་ཆེན་མོ་རྣམས་སུ་བལྟ་བར་བྱའོ། །ཀུན་མཁྱེན་ཡོད་པར་བསྒྲུབ་པ་ནི།
དེ་ལྟར་སྐྱེ་བ་སྔ་ཕྱི་
བསྒྲུབས་པས་ཐམས་ཅད་མཁྱེན་པའང་འགྲུབ་པ་ཡིན་ཏེ།
སྐྱེ་བ་དུ་མར་བརྩེ་བ་དང་ཤེས་རབ་སོགས་གོམས་པར་བྱས་པས་མཐའ་མེད་དུ་འཕེལ་བར་འགྱུར་བའི་ཕྱིར།
རྟགས་གྲུབ་སྟེ། རྟེན་བརྟན་པ་དང་གོམས་ཟིན་འབད་རྩོལ་བསྐྱར་མ་ལ་མི་
ལྟོས་པར་རང་གི་ངང་གིས་འཇུག་པའི་ཕྱིར། རྟེན་བརྟན་པ་ཡིན་ཏེ།
སེམས་ཀྱི་ངོ་བོ་ཉིད་དུ་སྐྱེས་པའི་ཡོན་ཏན་ཡིན་པའི་ཕྱིར། གོམས་པ་ན་རང་གི་ངང་གིས་འཇུག་པར་འགྱུར་ཏེ།
བརྩེ་བ་སོགས་གོམས་པར་བྱས་ན་བློའི་རིགས་འདྲ་རེ་རེ་སྐྱེད་པ་ལ་
སྔར་དང་འདྲ་བའི་འབད་རྩོལ་རེ་རེ་མི་དགོས་པར་རིགས་འདྲ་དུ་མ་རྒྱུན་ལྡན་དུ་སྐྱེ་བའི་སེམས་ཀྱི་ཡོན་ཏན་ཡིན་པའི་ཕྱིར། །དཔེར་ན་མེ་ལ་སོགས་པས་ཤིང་དག་ལ་ཐལ་བར་མ་སོང་གི་བར་དུ་ངང་གིས་འཇུག་པ་བཞིན།
ཞེས་པ་སྟེ་རྒྱས་པར་རྣམ་འགྲེལ་
དང༌། དེའི་འགྲེལ་པ་རྣམས་སུ་བལྟའོ། །གཉིས་པ་རྟག་སྨྲ་དགག་པ་ལ།
གྲངས་ཅན་པ་དགག་པ། ཚངས་པ་བ་དགག་པ། ཁྱབ་འཇུག་པ་དང་སྤྱོད་པ་བ་གཉིས་དགག་པ། དབང་ཕྱུག་བ་བྱེ་བྲག་པ་རིག་པ་ཅན་པ་གསུམ་དགག་པ།
གཅེར་བུ་
པ་དགག་པ་སྟེ་ལྔ་ལས། དང་པོ་ལ་འདོད་པ་བརྗོད་པ་དང༌།
དེ་དགག་པ་གཉིས། དང་པོ་ནི། འདིའི་ལུགས་ཀྱི་སྟོན་པ་ནི། དྲང་སྲོང་སེར་སྐྱ་དང༌། དྲང་སྲོང་མཆོད་འོས།
དབང་ཕྱུག་ཆེན་པོ།། སྟོན་པ་ཆུ་ཀླུང་རྣམས་ཡིན་ལ། དེ་དབང་
ཕྱུག་གིས་རྗེས་སུ་བཟུང་བས་དབང་ཕྱུག་ནག་པོའི་རྒྱུད་སུམ་ཅུ་པ་དང་དྲུག་ཅུ་པ་སོགས་བརྩམས་པར་བཤད་དོ། །མིང་གི་རྣམ་གྲངས་ནི།
དེ་ཉིད་ཉེར་ལྔའི་གྲངས་ཀྱི་མཚན་ཉིད་ཤེས་པ་ལས་གྲོལ་བར་འདོད་པས་གྲངས་ཅན་པ་དང༌། རང་བཞིན་རྒྱུར་
སྨྲ་བས་རང་བཞིན་སྨྲ་བ། སེར་སྐྱ་སྟོན་པར་འཛིན་པས་སེར་སྐྱ་པ།
གཙོ་བོ་རྒྱུར་སྨྲ་བས་གཙོ་བོ་པ་ཞེས་ཟེར་རོ། །སེར་སྐྱ་པ་དང་གྲངས་ཅན་བ་ནི། གཞུང་ཆེན་མོ་འགའ་ཞིག་ཏུ་སོ་སོར་བཤད་ཀྱང་གྲངས་ཅན་གྱི་ནང་ཚན་ཞིག་ལ་སེར་སྐྱ་བར་
བཏགས་པ་ཙམ་ཡིན་ཞིང་དེ་གཉིས་དོན་གཅིག་ཏུ་བཤད་པ་ཡང་མང་ངོ། །དབྱེ་བ་ནི་འབྲས་བུ་རྣམས་རྒྱུ་དུས་ན་ཡོད་པ་རྐྱེན་གྱིས་མངོན་པར་གསལ་བར་སྨྲ་ཞིང་དེ་ཡང་གཙོ་བོ་ཙམ་ལས་འབྱུང་བར་འདོད་པའི་གྲངས་ཅན་ལྷ་མེད་པ་དང༌།
རྒྱུ་འབྲས་རང་
བཞིན་གཅིག་ཀྱང་རྣམ་འགྱུར་ཐ་དད་དུ་གྱུར་བ་ལྷ་ཆེན་དབང་ཕྱུག་གིས་བྱིན་གྱིས་བརླབས་པར་འདོད་པའི་གྲངས་ཅན་ལྷར་བཅས་པ་གཉིས་སོ། །གྲུབ་མཐའི་འདོད་ཚུལ་ལ།
འདིའི་ལུགས་ཀྱི་ཤེས་བྱ་ཉེར་ལྔའི་རྣམ་གཞག་ཤེས་ན་གཏིང་དཔོག་པར་
།སླ་བས་དེ་བཤད་པར་བྱ་སྟེ། གཙོ་བོ་དང༌། ཆེན་པོ་དང༌།
ང་རྒྱལ་དང༌། གཟུགས་སྒྲ་དྲི་རོ་རེག་བྱ་སྟེ་དེ་ཙམ་ལྔ་དང༌། ས་ཆུ་མེ་རླུང་ནམ་མཁའ་སྟེ་འབྱུང་བ་ལྔ་དང༌།
ངག །ལག་པ། རྐང་པ། རྐུབ། འདོམས་ཀྱི་
དབང་པོ་སྟེ་ལས་ཀྱི་དབང་པོ་ལྔ་དང༌། མིག །རྣ་བ།
སྣ། ལྕེ། པགས་པའམ་ལུས་ཀྱི་དབང་པོ་སྟེ་བློའི་དབང་པོ་ལྔ་དང༌། གཉིས་ཀའི་བདག་ཉིད་ཅན་ཡིད་ཀྱི་དབང་པོ་སྟེ།
དབང་པོ་བཅུ་གཅིག་དང༌། བདག་ཤེས་རིག་གི་སྐྱེས་བུ་སྟེ་ཉི་ཤུ་རྩ་
ལྔའོ། །དེ་ལས་གཙོ་བོ་ནི། རང་བཞིན་ཁོ་ན་ཡིན་པ་དང༌།
ཆེན་པོ་དང༌། ང་རྒྱལ་དང་དེ་ཙམ་ལྔ་སྟེ་བདུན་ནི། རང་བཞིན་དང་རྣམ་འགྱུར་གཉིས་ཀ་ཡིན་པ་དང༌།
དབང་པོ་བཅུ་གཅིག་དང་འབྱུང་བ་ལྔ་སྟེ་བཅུ་དྲུག་ནི། རྣམ་འགྱུར་ཁོ་ན་ཡིན་
པ་དང༌། སྐྱེས་བུ་ནི་རང་བཞིན་དང་རྣམ་འགྱུར་གཉིས་ཀ་མ་ཡིན་པའི་མུ་བཞིར་བཤད་དེ།
དབང་ཕྱུག་ནག་པོའི་གཞུང་ལས། རྩ་བའི་རང་བཞིན་རྣམ་པར་འགྱུར་མིན་ལ། །ཆེན་པོ་སོགས་བདུན་རང་བཞིན་རྣམ་འགྱུར་ཞིང༌། །བཅུ་དྲུག་པོ་ནི་
རྣམ་པར་འགྱུར་བ་སྟེ། །སྐྱེས་བུ་རང་བཞིན་མ་ཡིན་རྣམ་འགྱུར་མིན། །ཞེས་སོ། །འདིས་ཤེས་བྱ་ཐམས་ཅད་བེམ་ཤེས་གཉིས་སུ་འདུ་བ་དང༌།
དེ་ཡང་སྐྱེས་བུ་ནི་ཤེས་པ་དང༌། ལྷག་མ་ཉེར་བཞི་བེམ་པོར་འདོད་པས་བློ་ལ་བེམ་པོས་ཁྱབ་པ་དང༌།
ཤེས་པ་ལ་བདག་ཅིག་དགོས་ཞེས་ཟེར་རོ། །གཙོ་བོ་དང་སྐྱེས་བུ་ནི་དོན་དམ་པ་དང་བདེན་པར་འདོད་ཅིང༌།
གཞན་རྣམས་རྫུན་པ་དང་ཀུན་རྫོབ་ཏུ་འདོད་དེ། དྲང་སྲོང་སེར་སྐྱས། ཡོན་ཏན་རྣམས་ཀྱི་རང་བཞིན་མཆོག
།སྣང་བའི་ལམ་དུ་འགྱུར་
མ་ཡིན། །སྣང་བའི་ལམ་དུ་གང་གྱུར་དེ། །སྒྱུ་མ་ལྟ་བུར་ཤིན་ཏུ་གསོབ། །ཅེས་སོ། །དེ་ལ་རྩ་བའི་རང་བཞིན་ནམ་གཙོ་བོ་ནི།
ལས་སོགས་བྱེད་པ་པོ་དང༌། མ་སྐྱེས་པས་རྟག་པ་དང༌། ཆ་མེད་པས་གཅིག་པུ་དང༌། སེམས་མེད་པས་ཡུལ་ཁོ་
ན་དང༌། སྣོད་བཅུད་ཐམས་ཅད་ལ་ཁྱབ་པ་དང༌། ཡོན་ཏན་གསུམ་ཆ་མཉམ་པའི་ཁྱད་ཆས་དྲུག་དང་ལྡན་པའི་ཤེས་བྱ་ཞིག་ལ་འདོད་དོ། །དེ་ལ་ཁ་དོག་དང་ཚད་དང་དབྱིབས་ཀྱི་བྱེ་བྲག་གིས་མངོན་དུ་འགྱུར་བ་མེད་པ་དང༌།
ཡིད་མེད་པ་སོགས་
ཀྱིས་མི་གསལ་བར་འདོད་དོ། །རང་བཞིན་དེ་ཡོད་པའི་སྒྲུབ་བྱེད་ནི།
དངོས་པོ་ཁྱད་པར་བ་རྣམས་ལ་ཚད་ཡོད་པའི་ཕྱིར་དང༌། ཕན་ཚུན་རྗེས་སུ་འགྲོ་བའི་ཕྱིར་དང༌། ནུས་པའི་སྒོ་ནས་འཇུག་པའི་ཕྱིར་དང༌།
རྒྱུ་འབྲས་དབྱེར་ཡོད་པའི་ཕྱིར་དང༌།
འཇིག་རྟེན་གསུམ་རྣམ་པར་དབྱེར་མེད་པའི་ཕྱིར་ཞེས་ཟེར་རོ། །ཡོན་ཏན་གསུམ་ནི་རྡུལ་མུན་སྙིང་སྟོབས་ཀྱི་ཡོན་ཏན་གསུམ་སྟེ།
རྡུལ་ནི་གཡོ་བ་དང་འཇུག་པའི་བདག་ཉིད་ཅན་ཡིན་ལ་སྡུག་བསྔལ་ཞེས་ཀྱང་ཟེར་རོ། །མུན་པ་ནི་ལྕི་བ་དང་གཡོགས་
པའི་བདག་ཉིད་ཅན་ཏེ་གཏི་མུག་ཅེས་ཀྱང་ཟེར་རོ། །སྙིང་སྟོབས་ནི་ཡང་པ་དང་རབ་ཏུ་གསལ་བའི་བདག་ཉིད་ཅན་ཏེ་བདེ་བ་ཞེས་ཀྱང་ཟེར་རོ། །དེ་ལྟར་ཡང༌།
རངས་དང་མགུ་དང་ཀུན་དགའ་དང༌། །བདེ་ཞིང་ཞི་བའི་སེམས་ཉིད་དག །རེས་འགའ་
ཡང་ནི་སྣང་འགྱུར་བ། །དེ་དག་སྙིང་སྟོབས་ཡོན་ཏན་ནོ། །མི་དགའ་ཡོངས་སུ་གདུང་བ་དང༌། །མྱ་ངན་འདོད་དང་མི་བཟོད་དག
།གང་དུ་སྣང་བའི་གཏན་ཚིགས་ཀྱི། །དེ་དག་རྡུལ་ནི་རྟགས་སུ་འདོད། །རྨོངས་དང་དེ་བཞིན་གཏི་མུག་དང༌། །བག་མེད་
།གཉིད་དང་གཡེལ་བ་དག །ལན་འགའ་ཡང་ནི་སྣང་གྱུར་བ། །དེ་དག་མུན་པའི་ཡོན་ཏན་འདོད། །ཅེས་སོ། །སྐྱེས་བུའམ་བདག་ནི།
ཤེས་པའི་ངོ་བོ་ཡིན་པ། རྣམ་འགྱུར་རྣམས་ཀྱི་བྱེད་པ་པོ་མིན་པ། མ་སྐྱེས་པས་རྟག་པ།
བདེ་སྡུག་ལ་ལོངས་སྤྱོད་པས་ཟ་བ་པོ། །ཡོན་ཏན་གསུམ་མེད་པ།
འགྲོ་བ་ཐམས་ཅད་ལ་ཁྱབ་པ། ཆ་ཤས་དང་བྲལ་བས་གཅིག་པུ། ཐོག་མ་དང་ཐ་མ་མེད་པའི་མཚན་ཉིད་ཅན་དུ་འདོད་དོ། །བདག་དེ་གྲོལ་བ་མ་ཐོབ་པར་དུ་སྤྱིའི་གློར་གནས་པ་དང་
གྲོལ་བ་ཐོབ་པའི་ཚེ་ཡན་ག་བར་གནས་ཞེས་ཟེར་རོ། །ཤེས་བྱ་ལྷག་མ་ཉེར་གསུམ་གྱི་སྐྱེ་ཚུལ་ནི།
གང་གི་ཚེ་སྐྱེས་བུ་དེས་སྒྲ་ལ་སོགས་པའི་ཡུལ་ཉེ་བར་ལོངས་སྤྱོད་པའི་འདོད་པ་སྐྱེས་པ་ན་སྐྱེས་བུའུ་འདོད་པ་ཡོངས་སུ་ཤེས་པའི་རང་བཞིན་དང་སྐྱེས་བུ་
སྦྱོར་ཞིང་དེ་ནས་གཙོ་བོས་སྒྲ་ལ་སོགས་པ་འབྱིན་ནོ། །དེའི་ཚུལ་ནི་འདི་ཡིན་ཏེ་རང་བཞིན་ལས་ཆེན་པ་འབྱུང་ལ།
བློ་དང་ཆེན་པོ་ནི་མིང་གི་རྣམ་གྲངས་ཡིན་ཞིང་དེ་ནི་ཡུལ་ངེས་པའི་མཚན་ཉིད་ཅན་མེ་ལོང་ངོས་གཉིས་པ་ལྟར་ཕྱིའི་ཡུལ་དང་ནང་གི་སྐྱེས་བུ་
གཉིས་ཀའི་གཟུགས་བརྙན་འཆར་བའི་བེམ་པོ་ཞིག་གོ༌།དེ་ལས་ང་རྒྱལ་སྐྱེ་ཞིང་ང་རྒྱལ་ནི།
ངར་འཛིན་པའི་རྣམ་པ་ཅན་ཏེ་རྣམ་པར་འགྱུར་བ་ཅན་དང་སྙིང་སྟོབས་ཅན་དང་མུན་པ་ཅན་ཏེ་གསུམ་མོ། །རྣམ་པར་འགྱུར་བའི་ང་རྒྱལ་ལས་ནི།
གཟུགས་སྒྲ་
དྲི་རོ་རེག་བྱ་སྟེ་དེ་ཙམ་ལྔ་སྐྱེ་ཞིང༌། དེ་ལས་ས་ཆུ་མེ་རླུང་ནམ་མཁའ་སྟེ་འབྱུང་བ་ལྔ་སྐྱེའོ། །སྙིང་སྟོབས་ཅན་གྱི་ང་རྒྱལ་ལས་ནི་ལས་ཀྱི་དབང་པོ་ལྔ་དང༌།
བློའི་དབང་པོ་ལྔ་དང་གཉིས་ཀའི་བདག་ཉིད་ཅན་གྱི་ཡིད་དེ་དབང་པོ་བཅུ་གཅིག་སྐྱེའོ། །མུན་པ་ཅན་
གྱི་ང་རྒྱལ་ནི་ང་རྒྱལ་གཞན་གཉིས་ཀའི་འཇུག་པར་བྱེད་པ་ཡིན་ཟེར་རོ། །དེ་དག་ནི་དབང་ཕྱུག་ནག་པོའི་རྒྱུད་ལས།
རང་བཞིན་ལས་ཆེན་དེ་ལས་ང་རྒྱལ་ཏེ། །དེ་ལས་ཚོགས་ནི་རྣམ་པ་བཅུ་དྲུག་པོ། །རང་བཞིན་དང་རྣམ་འགྱུར་གཉིས་ཀ་ཡིན་པ། །
ལྔ་པོ་རྣམས་ལས་འབྱུང་བ་ཆེན་པོ་ལྔ། །ཞེས་བཤད་དོ། །ཡུལ་ལ་ལོངས་སྤྱོད་ཚུལ་ནི།
རྣ་བ་ལ་སོགས་པའི་དབང་པོ་ལྔ་ཡིད་ཀྱིས་བྱིན་གྱིས་བརླབས་པས་ཡོངས་སུ་བཟུང་བའི་ཡུལ་སྒྲ་ལ་སོགས་པ་ལ་བློས་ཞེན་པར་བྱེད་ལ།
དེ་ནས་བློས་ཞེན་
པར་བྱས་པའི་དོན་དེ་ལ་སྐྱེས་བུས་སེམས་པར་བྱེད་པ་ལ་འདོད་དོ། །གྲོལ་བ་ཐོབ་ཚུལ་ནི་གང་གི་ཚེ་སྐྱེས་བུ་དེས་ཡུལ་གྱི་ཉེས་དམིགས་མཐོང་ནས་ཡུལ་ལ་ཆགས་པ་ཆུང་བར་གྱུར་པས་ཆགས་པ་དང་བྲལ་བར་གྱུར་པ་དེའི་ཚེ་བསམ་གཏན་བསྒོམ་ཞིང་དེ་ལ་
བརྟེན་ནས་མིག་གི་མངོན་ཤེས་འཐོབ་པར་འགྱུར་ལ།
མིག་དེའི་སྒོ་ནས་གཙོ་བོ་ལ་བལྟ་བར་བྱེད་པས། དེའི་ཚེ་གཙོ་བོ་དེ་གཞན་གྱི་བུད་མེད་ལྟར་ངོ་ཚ་བས་སྐྱེངས་ཏེ་བདག་ལ་མི་འགྲོ་ཞིང་བྲལ་བར་འགྱུར་རོ། །རྣམ་འགྱུར་གྱི་ཚོགས་ཐམས་ཅད་
ཀྱང་སྐྱེ་བའི་རིམ་པ་ལས་བཟློག་ནས་གཙོ་བོ་དེ་ཉིད་དུ་རབ་ཏུ་ཐིམ་པའི་ཕྱིར་མི་གསལ་བའི་ངོ་བོར་གྱུར་བ་དེའི་ཚེ་སྐྱེས་བུ་ཉག་གཅིག་གནས་པར་འགྱུར་ཏེ།
དེའི་ཕྱིར་གྲོལ་བ་ཞེས་བྱའོ། །བདག་དེ་ནི་རྟག་ཏུ་ཡན་ག་བར་གནས་པའི་ཕྱིར་རྟག་པ་ཁོ་ནའོ་ཞེས་
ཟེར་རོ། །དེ་ལྟར་ཡང༌། དེ་ཉིད་ཉི་ཤུ་ལྔ་ཤེས་ན། །རལ་པའམ་བྱི་བོ་ཅོད་པན་སོགས། །ཆ་ལུགས་གང་གིས་གནས་གྱུར་ཀྱང༌། །གྲོལ་འགྱུར་འདི་ལ་ཐེ་ཚོམ་མེད། །ཅེས་སོ། །གྲངས་ཅན་ལྷར་བཅས་པ་རྣམས་ནི།
རྣམ་འགྱུར་རྣམས་གཙོ་བོ་
འབའ་ཞིག་ལས་འབྱུང་བ་མ་ཡིན་ཏེ་གཙོ་བོ་ལ་སེམས་པ་མེད་པའི་ཕྱིར་དང༌།
སེམས་པ་མེད་ན་བྱིན་གྱིས་རློབ་པ་པོ་མེད་ཅིང༌། དེ་མེད་ན་འབྲས་བུ་རྩོམ་པར་མི་བྱེད་པའི་ཕྱིར།
དེས་ན་དབང་ཕྱུག་ཉིད་གཙོ་བོ་ལ་བལྟོས་ནས་འབྲས་བུ་རྣམས་ཀྱི་བྱེད་པ་པོ་ཡིན་ནོ། །རང་བཞིན་དང་དབང་ཕྱུག་གཉིས་ཀ་རྟག་ཏུ་ཡོད་ཀྱང་འབྲས་བུ་རྣམས་རིམ་གྱིས་འབྱུང་བ་མི་འགལ་ཏེ།
དབང་ཕྱུག་གི་ལྷན་ཅིག་བྱེད་པ་རྡུལ་མུན་སྙིང་སྟོབས་ཀྱི་ཡོན་ཏན་གསུམ་འཕེལ་བ་དང་ལྡན་པའི་དབང་གིས་སྣོད་བཅུད་སྐྱེ་འཇིག་བྱེད་པའི་ཕྱིར། ཞེས་ཟེར་རོ། །གྲངས་ཅན་ལྷར་བཅས་ལྷ་མེད་གཉིས་ཀའི་ལུགས་ལ་ཡང་འབྲས་བུ་རྣམས་རྒྱུ་དང་ངོ་བོ་གཅིག་པ་མི་གསལ་བའི་ཚུལ་གྱིས་ཡོད་པ་རྐྱེན་གྱིས་གསལ་བར་བྱས་པ་ལ་སྐྱེས་པའི་ཐ་སྙད་འདོགས་པའི་ལུགས་གཅིག་དང༌། ཞོའི་རང་བཞིན་གྱི་འོ་མའི་ངོ་བོ་རྐྱེན་གྱིས་ཞོར་འགྱུར་བ་ལྟ་བུ་རྣམ་པར་འགྱུར་བར་སྨྲ་བའི་ལུགས་གཉིས་རེ་ཡོད་པར་གཞུང་ཆེན་མོ་དུ་མ་ཞིག་ལས་འབྱུང་ངོ་། །འདིའི་ལུགས་ཀྱི་ཚད་མ་ལ་མངོན་རྗེས་གཉིས་དང༌།
ལུང་གི་ཚད་མ་གསུམ་དུ་འདོད་ཅེས་སྔ་ཕྱིའི་མཁས་པ་དག་འཆད་མོད་ཀྱང་མངོན་རྗེས་གཉིས་དང་སྒྲ་ལས་བྱུང་བའི་ཚད་མ་གསུམ་དུ་བྱ་སྟེ།
སྒྲ་བྱུང་ཚད་མ་ནི་སྒྲ་ལ་བརྟེན་ནས་ལྐོག་ཏུ་གྱུར་བའི་དོན་འཛིན་པ་ཞིག་ལ་འདོད་ཅིང་དེ་ལ་སྐྱེས་བུས་མ་བྱས་པའི་སྒྲས་བསྐྱེད་པ་དང༌། ཡིད་ཆེས་པའི་སྐྱེས་བུའི་ཚིག་གིས་བསྐྱེད་པ་གཉིས་ཡོད་དོ། །ཚད་མ་འདི་ནི་ལྐོག་ཏུ་གྱུར་བའི་ཡུལ་ཅན་ཡིན་པས་མངོན་སུམ་མ་ཡིན་ལ།
ཚུལ་གསུམ་པའི་རྟགས་ལ་མ་བརྟེན་པས་རྗེས་དཔག་ཀྱང་མ་ཡིན་ནོ་ཞེས་ཟེར་ཏེ། སློབ་དཔོན་ཞི་བ་འཚོས། གཞན་གྱི་སྒྲ་ལས་བྱུང་བ་ཡི། །ཤེས་པས་དོན་རྟོགས་སྒྲ་ལས་བྱུང༌། །ཡང་ན་ཡིད་ཆེས་ཚིག་ཡིན་ཟེར། །འདི་ནི་ལྐོག་ཏུ་གྱུར་པ་ཡི། །ཡུལ་ཅན་ཡིན་ཕྱིར་མངོན་སུམ་མིན། །རྗེས་དཔག་ཏུ་ཡང་མི་འཐད་དེ། །དེ་ཡི་མཚན་ཉིད་བྲལ་ཕྱིར་རོ། །ཞེས་གསུངས་པའི་ཕྱིར་རོ། །གཉིས་པ་དེ་དགག་པ་ནི།
མྱུ་གུ་ལ་སོགས་པའི་སྐྱེ་ལྡན་རྣམས་ཆོས་ཅན། སླར་ཡང་སྐྱེ་བ་དོན་མེད་དེ། རང་གི་བདག་ཉིད་ཐོབ་ཟིན་པའི་ཕྱིར།
མ་ཁྱབ་ན། སྐྱེ་བ་ཐུག་མེད་དུ་ཐལ། སྐྱེས་ཟིན་སླར་ཡང་སྐྱེ་དགོས་པའི་ཕྱིར། འདོད་ན། ས་བོན་ཉིད་བར་མ་ཆད་པར་སྐྱེ་བར་ཐལ་བ་དང༌།
མྱུ་གུ་སྐྱེ་བའི་གོ་སྐབས་མི་རྙེད་པར་ཐལ་ལོ། །གསལ་བར་འདོད་པའི་ཕྱོགས་ལ་ཡང་འདྲ་སྟེ།
གསལ་བ་རྒྱུ་དུས་སུ་ཡོད་ན་ཁས་བླངས་པ་དང་འགལ་ཞིང་མེད་ན་འབྲས་བུགསལ་བ་དང་རྒྱུའི་རང་བཞིན་གཅིག་གམ་ཐ་དད། གཅིག་ན་སྔར་གྱི་རིགས་པས་ཁེགས་ཤིང༌།
ཐ་དད་ན་བདག་གི་བདག་ཉིད་ལས་སྐྱེ་བ་ཉམས་སོ། །ཞེས་པ་ནི་སངས་རྒྱས་བསྐྱངས་དང་ཟླ་བ་གྲགས་པའི་རིགས་པའོ། །སྐྱེ་བར་འདོད་པའི་དངོས་པོ་རྣམས་ཆོས་ཅན། བདག་ཉིད་ལས་མི་སྐྱེ་སྟེ། ཡོད་པའི་ཕྱིར།
དཔེར་ན། ཞོ་ཉིད་ཞོའི་བདག་ཉིད་ལས་མི་སྐྱེ་བ་བཞིན། ཡང་དེ་ཆོས་ཅན། བདག་ལས་མི་སྐྱེ་སྟེ།
དངོས་པོ་ཡིན་པའི་ཕྱིར། ཁྱོད་ཀྱི་འདོད་པའི་སྐྱེས་བུ་བཞིན། ས་བོན་ཆོས་ཅན། མྱུ་གུའི་རྒྱུ་མ་ཡིན་ཏེ། མྱུ་གུ་དང་བདག་ཉིད་གཅིག་པའི་ཕྱིར།
མྱུ་གུ་ཉིད་བཞིན། རྩ་བའི་རང་བཞིན་ཆོས་ཅན། འབྲས་བུ་མི་སྐྱེད་པར་ཐལ། རྟག་པ་ཡིན་པའི་ཕྱིར།
རང་བཞིན་ཆོས་ཅན། ཁྱོད་ཀྱིས་བསྐྱེད་པའི་རྣམ་འགྱུར་རྣམས་ལྡོག་མི་རུང་བར་ཐལ། ཁྱོད་རྟག་ཏུ་མི་ལྡོག་པའི་ཕྱིར། འབྲས་བུ་ཐམས་ཅད་རྒྱུ་དུས་ན་ཡོད་བ་མི་འཐད་དེ།
ཤིང་ནྱཱ་གྲོ་དྷའི་ས་བོན་ཆུང་ངུ་ལ་ནྱཱ་གྲོ་དྷ་ཞེས་བྱ་བའི་སྡོང་པོ་ཡལ་ག་དུ་མས་ཡོངས་སུ་རྒྱས་པའི་ངོ་བོ་མ་དམིགས་པའི་ཕྱིར།
གལ་ཏེ་རྐྱེན་རྣམས་
ལ་འབྲས་བུ་རགས་པ་སྔ་ན་མེད་པ་དག་སྐྱེད་པའི་མཐུ་ཡོད་ན་མིག་གི་རྐྱེན་གྱི་འབྱུང་བ་ཆེན་པོས་ཀྱང་མིག་ལས་གཞན་པ་རྫམ་ལ་སོགས་པ་ཅིའི་ཕྱིར་མི་བྱེད།
ཡང་ན་རྐྱེན་གྱིས་རང་གི་འབྲས་བུ་ཡང་བསྐྱེད་པར་མི་འགྱུར་ཏེ། ཤེས་བྱ་ཡིན་པའི་ཕྱིར། ཁྱོད་
ཀྱིས་འདོད་པའི་སྐྱེས་བུ་བཞིན། ཞེས་པ་རྣམས་སློབ་དཔོན་ལེགས་ལྡན་འབྱེད་ཀྱི་དབུ་མ་སྙིང་པོ་ལས་བཤད་པའི་རིགས་པའོ། །རང་བཞིན་དང་སྐྱེས་བུ་ཆོས་ཅན།
ཆ་མེད་པ་མ་ཡིན་ཏེ། ཀུན་ལ་ཁྱབ་པའི་ཕྱིར། བློ་ཆོས་ཅན། བདེ་སྡུག་མི་མྱོང་བར་ཐལ།
བེམ་པོ་ཡིན་པའི་ཕྱིར། བདེ་སོགས་དང་སྐྱེས་བུ་ཐ་དད་དུ་མངོན་སུམ་གྱིས་ཤེས་པ་ཙམ་གྱིས་འཁོར་བ་ལས་གྲོལ་བར་མི་འགྱུར་བར་ཐལ།
ལམ་མ་སྦྱངས་པའི་བྱིས་པ་རྣམས་ཀྱིས་ཀྱང་རང་གི་དབང་པོ་དང་བདེ་སོགས་ལས་བདག་ཐ་དད་དུ་ཤེས་པའི་ཕྱིར།
དེར་ཐལ། བདག་ཉིད་དོན་དུ་གཉེར་བ་པོར་ཞེན་ནས་དེ་ལྟར་གྱི་དབང་པོ་སོགས་ལས་མཆོག་ཏུ་གྱུར་པའི་དབང་པོ་སོགས་དོན་དུ་གཉེར་བའི་ཕྱིར་དང༌།
རང་ཉིད་སྔ་ཕྱི་གཅིག་ཏུ་བཟུང་ནས་བདེ་སོགས་སྔ་ཕྱི་འཕོས་པའི་སྐྱེ་འཇིག་བྱེད་པར་རྟོགས་པའི་ཕྱིར།
དབང་སོགས་སྡུག་བསྔལ་དུ་བསྒོམས་པས་འཁོར་བ་ལས་གྲོལ་བ་མི་འཐད་དེ།
ད་ལྟར་གྱི་སྡུག་བསྔལ་གྱི་སྡུག་བསྔལ་ལས་ཡིད་འབྱུང་བ་དེ་འདྲ་ཞེ་སྡང་དང་མཚུངས་ལྡན་ཡིན་པའི་ཕྱིར་དང༌།
དེའི་ཚེ་བདག་ལ་ཆགས་པ་ཡོད་པའི་ཕྱིར་དང༌། དེ་བས་ལྷག
པའི་སྐབས་གཞན་འཚོལ་བའི་ཕྱིར། ཞེས་པ་རྣམས་ནི་རྣམ་འགྲེལ་ལས།
མཆོག་གཞན་དོན་དུ་གཉེར་ཕྱིར་དང༌། །སྐྱེ་འཇིག་བློ་ཅན་ཉིད་ཀྱི་ཕྱིར། །སྐྱེ་བོ་འདི་ཡི་དབང་སོགས་ལས། །བདག་ནི་ཐ་དད་གྱུར་པར་ཤེས། །ཞེས་དང༌།
གང་ཞིག་དེ་ལྟར་
སྡུག་བསྔལ་བས། །ཡིད་འབྱུང་དེ་འདྲ་སྡང་ཡིན་གྱི། །ཆགས་བྲལ་མ་ཡིན་དེ་ཚེ་ཡང༌། །ཆགས་ཡོད་སྐབས་གཞན་འཚོལ་ཕྱིར་རོ། །ཞེས་སོགས་ཀྱི་རིགས་པའོ། །གྲུབ་མཐའ་མཁན་པོ་ཁ་ཅིག་གིས།
གྲངས་ཅན་གྱི་ལུགས་འདི་དག་སེམས་ཙམ་རྣམ་རྫུན་
གྱི་ལུགས་དང་ཉེ་བ་དང༌། རྣམ་འགྱུར་རྣམས་རྫུན་པར་འདོད་པ་དངོས་པོའི་གནས་ལུགས་མཐོང་བ་ལ་ཉེ་བར་སོང་བར་འཆད་པ་ནི།
བློ་གྲོས་ཤིན་ཏུ་རྩིང་བར་ཟད་དེ། བདག་རྟག་པར་ཁས་ལེན་པ་དང༌། ཞེ་སྡང་དང་མཚུངས་ལྡན་གྱི་བློ་ཙམ་ཐར་ལམ་དུ་
འཁྲུལ་པ་དང༌། རྒྱུ་འབྲས་ཀྱི་ངོ་བོ་རྣམས་ཕར་ཡིན་ཚུར་ཡིན་དུ་འདོད་པ་སོགས་ཤིན་ཏུ་རྨོངས་པའི་གྲངས་ཅན་པ་དེ་དག་ཕྱུགས་དང་མཚུངས་པར་ཤིང་རྟ་ཆེན་པོ་དག་གིས་ལན་ཅིག་མ་ཡིན་པར་བཤད་པའི་ཕྱིར།
དེས་ན། ཐུབ་བསྟན་འཛིན་པའི་ཁུར་
བསྣམས་པའི་མཁས་པ་ཡིན་ན་འཆད་རྩོད་རྩོམ་པའི་མཛད་པ་རྣམས་རང་གཞན་གྱི་རྒྱུད་ལ་བག་ཆགས་བཟང་པོ་འཇོག་པའི་ཐབས་སུ་འགྱུར་བ་ཞིག་མཛད་དགོས་པར་གདའ་ལགས།
གཉིས་པ་ཚངས་པ་བ་དགག་བ་ལ། འདོད་པ་བརྗོད་པ་དང༌། དེ་
དགག་པའོ། །དང་པོ་ལ། སྟོན་པ་ནི་ཚངས་པ་ཡིན་པར་སྨྲ་ཞིང༌།
མིང་གི་རྣམ་གྲངས་ལ་བྲམ་ཟེ་བ་དང༌། ཚངས་བ་པ་དང༌། རིག་བྱེད་པ་ཞེས་ཟེར་ཞིང༌། བརྡ་སྤྲོད་པ་དང༌།
རིག་བྱེད་མཐའ་པ་དང༌། གསང་བ་པ་རྣམས་ཀྱང་འདིའི་ནང་གསེས་ཀྱི་
དབྱེ་བའི། །འདོད་ཚུལ་ནི། ཚངས་པ་བས་འཇིག་རྟེན་འདི་ཞིག་པའི་དུས་སུ་ཕྱོགས་ཀྱི་ཆ་མེད་པའི་ས་ཆུ་མེ་རླུང་གི་རྡུལ་ཕྲ་རབ་རྟག་པ་དག་སོ་སོར་འཁོད་པ་ལ་ནམ་ཞིག་གི་ཚེ་ལྷ་དབང་ཕྱུག་ཆེན་པོས་སྣོད་བཅུད་འབྱིན་པར་འདོད་པ་
དང་སེམས་ཅན་གྱི་ལས་ཀྱི་མཐུས་དང་པོ་རྡུལ་ཕྲ་རབ་གཉིས་སྦྱར་ཞིང༌།
དེ་ནས་ཡང་རྡུལ་ཕྲ་རབ་གསུམ་པ་ཞིག་དེ་ལ་སྦྱར་བས་རྡུལ་ཕྲ་མོ་གཅིག་ཏུ་གྱུར་ཅིང་དེ་ནས་སེ་གོལ་གཏོགས་པ་ཙམ་གྱིས་རྡུལ་ཕྲ་རབ་རྣམས་འཕྲད་དེ་ཚོགས་ནས་རླུང་གི་དཀྱིལ་འཁོར་ཆེན་
པོ་རྩོམ་པ་གྲུབ་སྟེ། རིམ་པ་དེས་ཆུ་དང་ས་དང་མེའི་ད་ཀྱིལ་འཁོར་གྲུབ་པར་གྱུར་ཅིང་དེའི་དབུས་སུ་ཚངས་པའི་སྒོ་ང་ཆེན་པོ་འོད་འབར་ཞིང་གསལ་བཞིག་གནས་པ་དེ་སྨིན་ཅིང་བརྡོལ་བ་ལས་འཇིག་རྟེན་གྱི་མེས་བོ་ཚངས་པ་ཆེན་པོ་པདྨའི་མདལ་ནས་བྱུང་བ་པདྨ་ལ་
འདུག་པ་གདོང་བཞི་པ་ཞིག་བྱུང་སྟེ་དེས་འཇིག་རྟེན་ཐམས་ཅད་སྤྲུལ་པས་དེ་ལ་འཇིག་རྟེན་མེས་པོ་ཞེས་ཟེར་ཏེ།
ཡང་ཁྱབ་འཇུག་གི་ལྟེ་བའི་པདྨ་དང་དབང་ཕྱུག་གི་བློས་སྤྲུལ་པའི་སྒོ་ང་ལས་སྐྱེས་པའི་ཚུལ་ཡང་བཤད་དོ། །དེ་ལ་བསྐལ་པ་བདུན་དུ་མིང་
བདུན་བྱུང་བར་གྲགས་ཏེ། རིམ་པ་བཞིན་དུ་རང་བྱུང༌།
ཚངས་པ། སྐྱེ་དགུའི་བདག་པོ།། པདྨའི་སྐྱེ་གནས་ཅན། གདོང་བཞི་པ། མེས་པོ།། གསེར་གྱི་སྙིང་པོ་ཅན་ཞེས་བྱའོ། །དེས་འཇིག་རྟེན་གྱི་མ་བརྒྱད་བསྐྱེད་དེ།
ཉི་མའི་མས་ལྷ་དང༌།
སྦྱིན་བྱེད་མའི་མས་ལྷ་མིན་དང༌། ཀླུའི་མས་ཀླུ།
ནམ་མཁའ་ལྡིང་གི་མས་ནམ་མཁའ་ལྡིང༌། ཚངས་པའི་ཁ་ནས་བྲམ་ཟེ། དཔུང་པ་ལས་རྒྱལ་རིགས། བརླ་ལས་རྗེ་རིགས།
རྐང་པའི་མཐིལ་ལས་དམངས་རིགས་རྣམས་བསྐྱེད་དོ་ཞེས་ཟེར་རོ། །
ཡང་ལུགས་གཅིག་ལ་ཚངས་པའི་ཁ་ལས་སྐྱེ་དགུའི་བདག་པོ་སྐྱེས།
དེས་མཆོད་སྦྱིན་བྱེད་པར་ཚངས་པ་སྤྱན་འདྲེན་པའི་བསུ་བར་རང་གི་བུ་མོ་བཏང་བས་དེ་ལ་ཚངས་པ་ཆགས་ཏེ།
ཁུ་བ་ཤོར་བ་བླུགས་གཟར་གྱིས་བླངས་ཏེ་མེར་བསྲེགས་པའི་དབུས་
སུ་དྲང་སྲོང་ངན་སྤོང་དང་ཨཾ་གི་ར་སྐྱེས། ལྷག་མ་དུར་བའི་ནང་དུ་ལུས་པ་ལས་དྲང་སྲོང་ཨ་ཏི་བྱུང༌།
དེས་སྙན་དངགས་དང་སྲིང་སྲུང་གི་རིག་བྱེད་བརྩམས་དྲང་སྲོང་གཞན་གཉིས་ཀྱིས་མཆོད་སྦྱིན་དང་ངས་བརྗོད་བྱས་པས་ཚངས་པའི་བུ་བཞིས་བྱས་པ་
ལ་ཚངས་པས་བྱས་པར་གྲགས་ཞེས་ཟེར་བ་དང༌། ཁ་ཅིག་གིས་དྲང་སྲོང་དེ་དག་གིས་བཏོན་པ་ཙམ་ཡིན་གྱི་བརྩམས་པ་མིན་ཟེར་བ་དང༌།
འདི་དག་ཕལ་ཆེ་བ་ཞིག་གིས་རིག་བྱེད་ནི་སུས་ཀྱང་མ་བྱས་པའི་ཆ་མེད་རྟག་པ་རང་བྱུང་ནམ་མཁའ་ལྟ་བུ་ཡིན་
ཞེས་ཀྱང་ཟེར་ལ། ལུགས་འདི་དག་གིས་རིག་བྱེད་ཁོ་ན་ཚང་མར་འདོད་དོ། །རིག་བྱེད་ཀྱི་སྒྲ་རྣམས་ནི་རང་གི་བརྗོད་བྱ་དོན་ངེས་པ་ཅན་ཡིན་གྱི་འདོད་པའི་དབང་གིས་དོན་གང་ཡང་རུང་བ་ལ་འཇུག་པ་ནི་མ་ཡིན་ཏེ།
ཨགྣི་ཧོ་ཏྲཱཾ་ཛུ་ཧོ། །ཞེས་པའི་རིག་བྱེད་ཀྱི་
ཚིག་དེ་ཉིད་མེ་ལ་སྔགས་ཀྱིས་སྦྱངས་པའི་མར་ལྡུགས་པ་ཁོ་ན་ལ་འཇུག་གི་ཁྱི་ཤ་ཟ་བ་སོགས་གཞན་ལ་འདོད་པའི་དབང་གིས་མི་འཇུག་པ་ལྟ་བུའོ། །དེའི་ཕྱིར་རིག་བྱེད་ཀྱི་སྒྲ་རྣམས་ནི་དོན་བདེན་པ་ཁོ་ན་སྟོན་པ་ཡིན་ཏེ།
སྐྱེས་བུས་མ་བྱས་པའི་དག
ཡིན་པའི་ཕྱིར་རོ། །ཞེས་ཟེར་རོ། །མཐོ་རིས་དང་ཚངས་པ་སྒྲུབ་པའི་ཐབས་ནི་རིག་བྱེད་ཀྱི་གཞུང་ལས་བཤད་པའི་རྟའི་མཆོད་སྦྱིན་དུ་འདོད་དོ། །བརྡ་སྤྲོད་པ་དག་ནི་སྣོད་བཅུད་སྣ་ཚོགས་པ་སྐྱེད་པའི་གཞི་དང༌།
དེ་དག་གི་བདག་ཉིད་དུ་གྱུར་པའི་
སྒྲའི་ཚངས་པ་ཡི་གེ་ཨོཾ་ཞེས་བྱ་བ་སྐྱེ་འཇིག་མེད་པས་རྟག་པ།
ཕྱོགས་དང་དུས་ཀྱི་ཆ་ཤས་མེད་པ། ཕྱི་ནང་གི་ཡུལ་ལ་བདེན་པར་འཇུག་པ། གཅིག་པུའི་རང་བཞིན་དོན་དམ་པར་གནས་པ་ཞིག་ཡོད་དེ།
མ་རིག་པས་
བསླད་པ་རྣམས་ལ་གཟུང་འཛིན་སྣ་ཚོགས་སུ་སྣང་བ་ཡིན་ཞེས་ཟེར་ཞིང༌།
ཐར་པ་ཐོབ་བྱེད་ཀྱི་ལམ་ནི་ཕྱིའི་ཕྱུགས་ཀྱི་མཆོད་སྦྱིན་གྱི་སྦྱིན་སྲེག་དང་ནང་བུད་མེད་ཀྱི་བྷ་གའི་ཐབ་ཏུ་ཁམས་འཛད་བའི་སྦྱིན་སྲེག་བྱེད་པ་ལ་འདོད་ཅིང་ཐར་པ་ནི་དེའི་དུས་
ཀྱི་སྟོང་སང་དང་བདེ་བ་ལ་འདོད་དོ། །རིག་བྱེད་མཐའ་པའམ་བྲམ་ཟེ་མཆོག་རྣམས་ནི།
འདི་ལྟར་སྨྲ་སྟེ། གང་ཞིག་རིག་བྱེད་ལས་མི་སྨྲ། །གང་ཞིག་རིག་བྱེད་ལས་མི་སྣང༌། །ཐམས་ཅད་མེད་པར་བརྗོད་བྱ་སྟེ། །རིག་བྱེད་འདྲ་བའི་ཐོས་པ་
མེད། །ཅེས་པའི་བསྔགས་པ་དང་ལྡན་ཞིང་ཚད་མར་གྱུར་པའི་རིག་བྱེད་ལས་བཤད་པའི་སྐྱེས་བུ་ཞེས་བྱ་བ་གཅིག་པུ་པ།
ནམ་ཡང་མི་ཉམས་པས་རྟག་པ། མྱ་ངན་ལས་འདས་པས་ཚངས་པ། སྐྱེ་དགུ་ཐམས་ཅད་ལ་ཁྱབ་པ། ཐོག་མཐའ་
མེད་པས་འཆི་བ་མེད་པ། ཉི་མའི་མདོག་ཅན། མུན་པའི་དཀྱིལ་འཁོར་ལས་འདས་པ།
ཆེན་པོར་གྱུར་པ། གཉིད་ལོག་པ་ལས་གཞན་ཡིན་པའི་ཕྱིར་སྐྱེས་བུ་ཞེས་བྱ་བ་ཞིག་ཡོད་དེ། ལྟ་ཐམས་ཅད་ཀྱི་བདག་ཉིད་ཡིན་པ་དང༌།
དབང་ཕྱུག་ཆེན་
པོའི་ངོ་བོ་ཡང་འདི་ཡིན་ནོ་ཞེས་ཟེར་ཏེ། །མུན་པ་ལས་གཞན་སྐྱེས་བུ་ནི། །ཆེན་པོར་གྱུར་པ་ཉི་མའི་འོད། །དབང་ཕྱུག་ཆེན་པོ་བདག་དེ་ཉིད། །མཁས་པས་ཤེས་ན་འཆི་མེད་འགྱུར། །ཞེས་སོ། །སྐྱེས་བུ་དེ་ཁོ་ནས་ཁམས་གསུམ་ཐམས་ཅད་དང་
བདེ་བ་དང་སྡུག་བསྔལ་དང་འཆིང་བ་དང་གྲོལ་བ་རྣམས་བྱེད་པ་ཡིན་ཏེ།
འོན་ཀྱང་རང་གི་ངོ་བོ་འགྱུར་བ་མེད་ཅིང་ཟད་བ་མེད་དོ་ཞེས་ཟེར་ཏེ། །སྲིད་པ་སྣ་ཚོགས་དེ་ལས་སྐྱེས། །དར་གྱི་སྲིན་བུས་སྐུད་པ་བཞིན། །ཞེས་སོ། །དུས་ནམ་ཞིག་གི་ཚེ་བསམ་གཏན་
ལ་བརྟེན་ནས་ལྷའི་མིག་གིས་སྐྱེས་བུ་དེ་ལ་བལྟས་པ་ན་སྐྱེས་བུ་དེ་ཉིད་གསེར་གྱི་མདོག་ཅན་དུ་མཐོང་བ་ན་དགེ་སྡིག་འཁོར་འདས་མཉམ་པ་ཉིད་དུ་གྱུར་ནས་གྲོལ་བར་འགྱུར་ཏེ།
སྐྱེས་བུ་དྲང་སྲོང་ཆེན་པོ་ཉི་མའི་མདོག མུན་པ་ལས་གཞན་གྱུར་པ་དེ་རིག
ན། །འཆི་བ་མེད་པར་འགྱུར་ཏེ་བདག་གིས་རྟོགས། །སྐྱེ་མེད་གནས་འགྲོ་བ་ལས་ལམ་གཞན་མེད། །ཅེས་དང༌།
བྱེད་པོ་དབང་ཕྱུག་གསེར་མདོག་ཏུ། །གང་གིས་མཐོང་ཞིང་བལྟ་བ་དེ། །སྡིག་དང་བསོད་ནམས་ལས་འདས་ནས། །མཆོག་ཏུ་ཞི་བ་
ཐོབ་པར་འགྱུར། །ཞེས་སོ། །ལུགས་འདི་འོག་ཏུ་འབྱུང་བའི་དཔྱོད་པ་བ་དང་མི་གཅིག་ཀྱང་རྟོག་གེ་འབར་བ་དང་མཁས་གྲུབ་ཐམས་ཅད་མཁྱེན་པའི་ཊཱིཀ་ཆེན་སོགས་སུ་དཔྱོད་པ་བ་ཞེས་ཀྱང་འབྱུང་ངོ། །གསང་བ་བ་རྣམས་ནི་བདུད་རྩི་ཐིག་ལུང་ཞེས་བྱ་
བའི་རིག་བྱེད་ལ་བརྟེན་ནས་བདག་ཤེས་རིག་རྟག་པ་ཆ་མེད་གཅིག་ཡོད་པར་འདོད་དེ།
ཕལ་ཆེར་སྔར་གྱི་དེ་རྣམས་དང་མཚུངས་ལ་ལུགས་སྔ་མ་དང་དོན་གཅིག་ཏུ་བཤད་པ་ཡང་ཡོད་དོ། །གཉིས་པ་དེ་དགག་པ་ལ།
ཕྱོགས་སྔ་མས། རིག་བྱེད་ནི་
བདེན་པའི་དོན་ཅན་ཡིན་ཏེ། སྐྱེས་བུས་མ་བྱས་པའི་ཕྱིར།
ཞེས་པའི་སྒྲུབ་བྱེད་བཀོད་པ་དགག་པ་ནི། རིག་བྱེད་ཀྱི་ངག་ཆོས་ཅན། ལོག་པའི་དོན་ཅན་ཡིན་པར་ཐལ།
སྐྱེས་བུས་མ་བྱས་པའི་ཕྱིར། ཁྱབ་པ་ཡོད་དེ། དོན་བདེན་པ་སྟོན་པའི་རྒྱུ་ཤེས་
རབ་དང་བརྩེ་བ་ལ་སོགས་པའི་ཡོན་ཏན་དང་བྲལ་བའི་ཕྱིར།
ཡང་དེ་ཆོས་ཅན། སྐྱེས་བུས་བྱས་པ་མིན་ན་ཡང་དོན་ལོག་པར་སྟོན་པ་སྲིད་པར་ཐལ། ཁྱོད་ལས་དོན་ཤེས་ཤིང་གོ་བར་བྱེད་པའི་རྒྱུ་ངག་གི་བརྡ་ནི་སྐྱེས་བུ་ལ་
བརྟེན་པའི་ཕྱིར། ཡང་དེ་ཆོས་ཅན། ཁྱོད་ཀྱི་དོན་འཆད་པ་པོ་མི་མཐུན་པ་གཉིས་ཀྱིས་བཤད་ན་གང་རུང་གཅིག་གིས་ཅི་ཙམ་བཤད་ཀྱང་ཉན་པ་པོས་དོན་གང་ཡང་གོ་བ་མི་སྲིད་པར་ཐལ།
ཁྱོད་ཀྱི་ཚིག་རྣམས་འབྲེལ་པ་རྟག་དངོས་ཀྱི་དབང་གིས་དོན་
རེ་རེ་ཁོ་ན་ལ་རྗོད་བྱེད་དུ་ངེས་པའི་ཕྱིར། ཡང་དེ་ཆོས་ཅན།
ཁྱོད་ཅི་ཙམ་བཤད་ན་ཡང་ཉན་པ་པོས་དོན་གོ་མི་སྲིད་པར་ཐལ། དོན་བྱེད་པས་སྟོངས་པའི་རྟག་པ་ཡིན་པའི་ཕྱིར།
ཡང་ཚིག་གཅིག་བརྗོད་པས་དོན་ཐམས་ཅད་གོ་བར་ཐལ། ཆ་ཤས་
མེད་པའི་གཅིག་པུ་ཡིན་པའི་ཕྱིར། རྐྱེན་གང་གིས་ཀྱང་བརྗོད་དུ་མེད་པར་ཐལ།
འགྱུར་མེད་ཡིན་པའི་ཕྱིར། སྐྱེ་དགུ་ཐམས་ཅད་ཀྱིས་དོན་གོ་བར་ཐལ། ཀུན་ལ་ཁྱབ་པའི་ཕྱིར་ཁྱབ་སྟེ།
རིག་བྱེད་རྟག་པ་དེ་ཀུན་ལ་ཁྱབ་པར་ཡོད་ཅིང་ཆ་མེད་པས་
གོ་བ་དང་མི་གོ་བའི་བདག་ཉིད་སོ་སོར་མི་འཐད་པའི་ཕྱིར།
ཞེས་སོགས་ཏེ། རིག་པའི་དབང་ཕྱུག་གིས། ཚིག་རྣམས་བདེན་པ་ཉིད་ཀྱི་རྒྱུ། །ཡོན་ཏན་སྐྱེས་བུ་ལ་བརྟེན་ཕྱིར། །སྐྱེས་བུས་མ་བྱས་ལོག་པའི་དོན། །ཅིས་མིན་ཞེས་ནི་གཞན་དག་བརྗོད། །
ཅེས་པ་སོགས་རྣམ་འགྲེལ་ལེའུ་དང་པོའི་སྨད་ཀྱི་ཆ་ཕལ་མོ་ཆེར་ཕྱོགས་འདི་དགག་པའི་རིགས་པ་ཤིན་ཏུ་རྒྱས་པར་ཡོད་དོ། །ཡང་སྐྱེས་བུ་ཆོས་ཅན།
བཅིངས་པ་དང་གྲོལ་བར་མི་རིགས་པར་ཐལ། དུས་ཐམས་ཅད་དུ་རྟག་པ་གཅིག་པུ་ཡིན་པའི་ཕྱིར།
{@24B}དེ་ཆོས་ཅན། སྡུག་བསྔལ་ལས་ཐར་པར་མི་འགྱུར་བར་ཐལ།
སྡུག་བསྔལ་དང་བདག་ཉིད་གཅིག་ཏུ་གྲུབ་པའི་ཕྱིར། སྐྱེས་བུ་ཆོས་ཅན། ཀུན་གྱི་བདག་ཉིད་དུ་མི་འགྱུར་ཏེ།
དངོས་པོར་མེད་པའི་ཕྱིར། མོ་གཤམ་གྱི་བུ་མོ་བཞིན། ཡང་སྐྱེས་བུ་
ཆོས་ཅན། མི་འགྱུར་བ་མ་ཡིན་པར་ཐལ། གཅིག་དང་དུ་མ་དང་ཕྲ་བ་དང་རེགས་པར་ཡོད་པའི་ཕྱིར་ཞེས་སོགས་དེ་དག་གིས་འདོད་པའི་སྐྱེས་བུ་འགོག་པའི་རིགས་པའི་རྣམ་གྲངས་དུ་མ་རྟོག་གེ་འབར་བ་ལས་བཤད་པས་དེར་བལྟ་ཞིང༌།
རྗོད་བྱེད་ཀྱི་སྒྲ་ཡུལ་
ལ་དངོས་དབང་གིས་བདེན་པར་འཇུག་པ་འགོག་པའི་རིགས་པ་ནི།
རྣམ་འགྲེལ་ངེས་སུ་རྒྱས་པར་ཡོད་དོ། །ཚངས་པའི་ལུས་གཅིག་ལས་སྐྱེས་པས་མི་རིགས་བཞི་མི་རུང་བར་ཐལ་བ་དང༌།
ཕྱུགས་ཀྱི་མཆོད་སྦྱིན་ཐར་ལམ་ཡིན་པ་འགག་པ་ནི་དུས་འཁོར་
གྱི་སྐོར་ནའང་ཡོད་དོ། །གསུམ་པ་ཁྱབ་འཇུག་པ་དང་དཔྱོད་པ་བ་དགག་པ་ལ་གཉིས།
འདོད་པ་བརྗོད་པ་དང༌། དེ་དགག་པའོ། །དང་པོ་ལ། ཁྱབ་འཇུག་པ་དང༌། དཔྱོད་པ་བ་གཉིས་ལས།
དང་པོ་ལ། སྟོན་པ་ནི་ཁྱབ་འཇུག་སྟེ་འདི་ལ་ནོར་ལྷ་དང༌།
སྲེད་མེད་ཀྱི་བུ་དང༌། གྲོང་འཇོམས་སོགས་མིང་ཤིན་ཏུ་མང་བར་བཤད་ལ།
བླ་མ་ཟླ་བ་དང༌། སྟོན་པ་གཞོན་ནུ་མ་ལེན་སོགས་ཀྱང་ལུགས་འདིའི་སྟོན་པའོ། །མིང་གི་རྣམ་གྲངས་ནི་ཁྱབ་འཇུག་པ།
ཟླ་བ་པ། གླུའི་ཆོས་སྨྲ་བ་རྣམས་སོ། །ལུང་ནི་རྟོག
པ་ལ་ཕན་པའི་ཡལ་ག་དང༌། ཞག་ལྔ་པ། གཡུལ་གྱི་ལས་སྟོན་པའི་ཚིག་ལ་སོགས་པའོ། །དེ་ལ་ཁྱབ་འཇུག་ནི།
རྒྱ་མཚོའི་ནང་ན་གྲོང་ཁྱེར་སྒོ་ལྡན་ཞེས་བྱ་བར་དཔལ་མོ་ལ་སོགས་པའི་ཆུང་མ་ཁྲི་དྲུག་སྟོང་གིས་བསྐོར་ཞིང་གནས་པ་དང༌།
ཚངས་པ་
{@25A}༄༅། །དང༑ བརྒྱ་བྱིན་དང༌། ཉི་མ།
ཟླ་བ། རིག་བྱེད་བཞི། རི་བོ་མཆོག་རབ། འབྱུང་བ་བཞི། བྲམ་ཟེ། སྦྱིན་བྱེད། ཟ་བ་པོ་སོགས་མཐའ་དག་རང་ཉིད་ཡིན་པར་སྨྲ་བའི་མངོན་པའི་ང་རྒྱལ་དང་ལྡན་བཞིག་སྟེ།
ཉི་མའི་ནང་ན་
ང་ཁྱབ་འཇུག སྐར་ནང་འོད་ལྡན་ཟླ་བ་དང༌།
ཞེས་སོགས་སྨྲ་བའི་ཕྱིར་རོ། །དེ་ལ་ཞི་བ་དང་མ་ཞི་བའི་ངོ་བོ་གཉིས་ཡོད་ཅིང༌། ཞི་བ་ནི་ལྷ་རྫས་ཀྱི་ངོ་བོ་ཡོད་མིན་མེད་མིན་གྱི་བདག་ཉིད་འཆི་བ་མེད་པའི་ངོ་བོ་ཡིན་ལ།
དེ་བསྒོམས་པས་ཐར་པ་འཐོབ་པར་
སྨྲ་སྟེ། གང་གིས་ཁྱབ་འཇུག་ཡོན་ཏན་རྣམས། རྟག་ཏུ་བསྒོམས་པས་བདེ་འཐོབ་འགྱུར། །ཞེས་སོ། །མ་ཞི་བ་ནི།
ཉ་ལ་སོགས་པའི་ཁྱབ་འཇུག་གི་འཇུག་པ་བཅུར་བཤད་དེ། དེ་ཡང་ཉའི་གཟུགས་ཀྱིས་རིག་བྱེད་བཞི་རྒྱ་མཚོར་ནུབ་པ་བཏོན་པ་དང༌།
རུས་སྦལ་གྱིས་འཇིག་རྟེན་གཏེག་ནས་རྒྱུན་དུ་གནས་པ་དང༌།
ཕག་རྒོད་ཀྱི་གཟུགས་ཀྱིས་ཚངས་པའི་འཇིག་རྟེན་མན་ཆད་མནན་པ་དང༌། མིའི་སེང་གེའི་གཟུགས་ཀྱིས་ལྷ་མ་ཡིན་གྱི་དབང་པོ་འགྲོ་བ་སྐྱོང་གསེར་ཅན་བསད་པ་དང༌།
མིའུ་ཐུང་གི་གཟུགས་ཀྱིས་
ལྷ་མ་ཡིན་སྟོབས་ལྡན་ལས་གོམ་པ་གསུམ་གྱི་ས་བསླང་ཞེས་བསླུས་པ་དང༌།
ཤིང་རྟ་བཅུ་པའི་བུར་མ་ཎར་སྤྲུལ་ནས་རང་གི་ཆུང་མ་སྲིན་པོ་ལངྐ་མགྲིན་བཅུས་ཕྲོགས་པ་ལ་སྤྲེའུ་ཧ་ནུ་མནྠ་ལ་གྲོགས་བཅོལ་ཏེ་སྲིན་པོ་དེ་བསད་པ་དང༌།
ཛ་མཱད་ཨགྣིའི་བུ་ར་མ་ཎར་
སྤྲུལ་ནས་སྲིད་སྒྲུབ་ལ་སོགས་པ་བསད་དེ་རྒྱལ་རིགས་བཅད་པ་དང༌།
ནག་པར་སྤྲུལ་ནས་ཆུ་བོ་བཞི་ཕྱོགས་ཀུན་ཏུ་དྲངས་ཤིང་རྩོང་དུལ་གྱི་སེམས་ཅན་ལ་ཕན་པར་བྱས་པ་དང༌།
སངས་རྒྱས་ཤཱཀྱ་ཐུབ་ཏུ་སྤྲུལ་ནས་སྔོན་གྱི་སྡིག་པ་སྦྱངས་པ་དང༌། རིགས་
{@25B}ལྡན་བྲམ་ཟེའི་བུ་ཀརྐི་རྩེ་ཞེས་བྱ་བ་མ་འོངས་པ་ན་འབྱུང་བས་སེམས་ཅན་མང་པོ་འདུལ་བར་འདོད་ཅིང༌།
དེའི་དང་པོ་གསུམ་ལ་འཐད་པ་མེད་ཀྱང་གཏམ་རྒྱུད་རྙིང་པ་ལ་བརྟེན་པ་དང༌། ཕྱི་མ་རྣམས་དྲང་སྲོང་གདུག་པས་ངོ་མཚར་ཆེ་ཆེ་རྣམས་ཁྱབ་འཇུག་གི་ཡོན་
ཏན་དུ་བྱས་པར་དུས་འཁོར་གྱི་སྐོར་ནས་བཤད་དོ། །ལུགས་འདིས་ཀྱང་རྟག་པ་ཆ་མེད་ཀྱི་བདག་ཁས་ལེན་པ་དང༌།
གྲོལ་བྱེད་ཀྱི་ལམ་ནི་ཡི་གེ་ཨོཾ་བསྒོམ་པ་དང༌། རླུང་བུམ་པ་ཅན་བསྒོམ་པ་སོགས་ཡོད་པར་བཤད་ལ།
འདིའི་རླུང་གི་རྣལ་འབྱོར་ལ་ཡན་
ལག་དྲུག་བརྩི་ཚུལ་ཞིག་བཤད་མོད་ཀྱང་རང་རེའི་ཡན་ལག་དྲུག་དང་མི་འདྲ་སྟེ་སློབ་དཔོན་བྱང་ཆུབ་བཟང་པོས།
འདི་དག་ལ་ནི་དགག་པ་ཙམ་ལས་ཡན་ལག་དྲུག་པའི་རླུང་གི་ཏིང་ངེ་འཛིན་ནི་མེད་དོ། །ཞེས་གསུངས་པའི་ཕྱིར།
ལུགས་འདིས་འཁོར་བ་ཟད་མཐའ་
ཅན་དུ་འདོད་ཅིང༌། སྔར་བཤད་པའི་རིག་བྱེད་མཐའ་བ་སོགས་ལས་ཕལ་མོ་ཆེ་ཞིག་ནི་འདིའི་རྗེས་འབྲང་དུ་རྒྱ་གཞུང་དག་ལས་ཀྱང་བཤད་དོ། །གཉིས་པ་དཔྱོད་པ་པའམ་རྒྱལ་དཔོག་པ་ནི།
རྒྱལ་དཔོག་པ་སྟོན་པར་འདོད་ཅིང་གྲུབ་མཐའི་འདོད་ཚུལ་ལ། བདག་ནི་
བློའི་ངོ་བོ་སེམས་པ་ཅན་དང༌། བེམ་པོ་མ་ཡིན་པ།
ཤེས་རིག་གི་རང་བཞིན། རྟག་པའི་ངོ་བོ།། ཡན་གར་བའི་རྫས་ཡོད། ཆ་ཤས་མེད་པ་ཞིག་ཏུ་འདོད་དོ། །རིག་བྱེད་ཚད་མར་འདོད་ཚུལ་ནི་སྔ་མ་རྣམས་དང་འདྲ།
མཐོ་རིས་ཀྱི་ཚངས་པ་ལྟ་བུ་ངན་འགྲོ་
ལས་གྲོལ་བའི་ཕྱིར་ཐར་པ་ཡིན་གྱི་དྲི་མ་སེམས་ཀྱི་རང་བཞིན་ལ་ཞུགས་པ་ཡིན་པའི་ཕྱིར་ཉེས་ཟད་ཀྱི་སྐྱེས་བུ་མེད་པ་དང་ཤེས་བྱ་མཐའ་ཡས་པའི་ཕྱིར།
ཀུན་མཁྱེན་པའི་སྐྱེས་བུ་མེད་པ་དང༌། དེ་བས་ན་བདེན་པའི་དག་ཀྱང་མེད་དོ་ཞེས་སྨྲའོ། །ཚད་མ་ཅི་མངོན་
{@026A}༄༅། །རྗེས་གཉིས། སྒྲ་ལས་བྱུང་བ།
དཔེ་ཉེར་འཇལ། དོན་གྱིས་གོ་བ། དངོས་པོ་མེད་པའི་ཚད་མ་དང་དྲུག་ཏུ་འདོད་ཅིང༌། འདིའི་སྒྲ་བྱུང་ནི་གྲངས་ཅན་དང་འདྲ།
དཔེ་ཉེར་འཇལ་ནི། བ་མེན་མཐོང་བ་ལས་ལྐོག་ཏུ་གྱུར་པའི་བ་
ལང་ལ་འདྲ་བར་དཔོག་པ་དང༌། དོན་གྱིས་གོ་བ་ནི།
ལྷས་བྱིན་གསོན་པོ་ཁྱིམ་ན་མེད་པས་ཕྱི་རོལ་ན་ཡོད་པར་རྟོགས་པ་ལྟ་བུ་དང༌། དངོས་པོ་མེད་པའི་ཚད་མ་ནི།
ཚད་མ་གཞན་ལྔ་པོ་གང་ཡང་འཇལ་བྱེད་དུ་མ་སྐྱེས་པའི་ཡུལ་རྟོགས་པ་ལ་འདོད་ཅིང༌། ཕྱི་
མ་འདིའི་ཡུལ་ལ་ཡང་འོ་མ་ལ་ཞོ་མེད་པ་ལྟ་བུ་སྔ་ན་མེད་པ།
ཞོ་ལ་འོ་མ་མེད་པ་ལྟ་བུ་ཞིག་ནས་མེད་པ། བ་ལང་རྟ་མེད་པ་ལྟ་བུ་ཕན་ཚུན་མེད་པ། རི་བོང་གི་རྭ་མེད་པ་ལྟ་བུ་ཤིན་ཏུ་མེད་པ་སྟེ་བཞིར་འདོད་ཅིང༌།
ཞོ་ལ་འོ་མ་མེད་པའི་ཆ་ལྟ་བུ་ཡང་དངོས་པོར་
འདོད་དོ། །དེའི་ནང་ཚན་ཙཱ་ར་ཀ་པ་རྣམས་ནི།
ཚད་མ་དེ་དྲུག་གི་སྟེང་དུ་རྒྱུ་ལས་འབྲས་བུ་རྟོགས་པ་ལྟ་བུ་རིགས་པའི་ཚད་མ། ཡུལ་དེ་དམིགས་པ་མེད་པས་མེད་པར་རྟོགས་པ་མ་དམིགས་པའི་ཚད་མ།
སྨྲ་བ་པོ་སྔ་མ་དག་གིས་བསྟན་པའི་གྲགས་པ་རྒྱུད་པའི་
ཞེས་གྲགས་ཀྱི་ཚད་མ། ཚོགས་པ་ཡོད་པར་རྟོགས་བ་ན་ཚོགས་པ་ཅན་ཡོད་པར་རྟོགས་པ་སྲིད་པའི་ཚད་མ།
འདི་ལྟ་བུ་འབྱུང་ངོ་སྙམ་དུ་སེམས་པ་ལས་དེ་ལྟར་བྱུང་བ་སྙམ་སེམས་པའི་ཚད་མ་སྟེ་ཚད་མ་བཅུ་གཅིག་ཏུ་འདོད་དོ། །འདི་དག་གིས་འདོད་པའི་
བྱས་ཤུགས་བཞི་བཅུ་ཞེ་བརྒྱད་སོགས་ནི་མངས་ཀྱིས་དོགས་ནས་མ་བྲིས་ལ་ཤེས་པར་འདོད་ན་རྟོག་གེ་འབར་བ་ན་རྒྱས་པར་ཡོད་པས་དེར་ལྟོས་ཤིག
།གཉིས་པ་དེ་དག་དགག་པ་ནི། སྣོད་བཅུད་ཐམས་ཅད་ཀྱི་གཙོ་བོ་ཁྱབ་འཇུག་ཡིན་པ་དང༌། ཁྱབ་འཇུག་གིས་
{@026B}ཀུན་ལ་ཁྱབ་པར་འདོད་བཞིན་དུ་ཁྱབ་འཇུག་གིས་གཞན་བསད་པ་དང༌།
ཁྱབ་འཇུག་རང་ཉིད་བྲོས་པར་བཤད་པ་རྣམས་ནང་འགལ་དང༌། ཁྱབ་འཇུག་ཆུ་ཡིན་པ་དང༌། ཆུ་ནང་དུ་བྱིང་བ་ཁྱབ་འཇུག་གིས་བཏེག་པ་དང༌།
རང་གི་ལྟོ་བར་སྲིད་གསུམ་གནས་པ་
དང༑ རང་གི་ཆུང་མ་གཞན་གྱིས་ཕྲོགས་པ་སོགས་ཀྱང་འགལ་ཞིང༌།
དེ་བཞིན་དུ་རིག་བྱེད་ལས་བཤད་པའི་གཏམ་རྒྱུད་རྣམས་ལ་ཡང་འགལ་འདུ་མང་དུ་ཡོད་པ་དགག་པར་སླ་ཞིང༌།
དུས་འཁོར་གྱི་སྐོར་དང༌། དབུ་མ་སྙིང་པོ་རྩ་འགྲེལ་དང༌། བསྟོད་
ཚོགས་སོགས་སུ་རྒྱས་པར་ཡོད་དོ། །ཉེས་ཟད་ཀྱི་སྐྱེས་བུ་མི་སྲིད་པར་འདོད་པ་དགག་པ་ནི།
ཆགས་སོགས་རྟག་པ་ཡིན་པའི་ཕྱིར་ཟེར་རམ། མི་རྟག་ཀྱང་ད་སྤོང་བའི་ཐབས་མེད་པའི་ཕྱིར་ཟེར་རམ།
ཐབས་ཡོད་ཀྱང་དེ་སུས་མི་ཤེས་པའི་ཕྱིར་ཟེར་རམ། བསླབས་
ན་ཤེས་ནུས་ཀྱང་དོན་དུ་གཉེར་བ་མེད་པའི་ཕྱིར་ཟེར་རམ།
དོན་དུ་གཉེར་བ་ཡོད་ཀྱང་སྟོན་པར་བྱེད་པ་མི་སྲིད་པའི་ཕྱིར་སྐྱོན་ཟད་པ་མད་དོ་ཞེས་སྨྲ།
དེ་ལ་ཆགས་སོགས་རྟག་པ་མ་ཡིན་ཏེ། རྒྱུ་ཡོད་པའི་ཕྱིར། སྤོང་བའི་ཐབས་མེད་པ་མ་ཡིན་ཏེ། རྒྱུའི་གཉེན་པོ་གོམས་པས་མ་ལུས་པར་འཛད་པའི་ཕྱིར། ཐབས་ཡོད་ཀྱང་མི་ཤེས་པ་མ་ཡིན་ཏེ།
རྒྱུའི་རང་བཞིན་ཤེས་པས་དེའི་གཉེན་པོ་ཤེས་པའང་འགྲུབ་པའི་ཕྱིར། དོན་དུ་གཉེར་བ་མེད་པ་མ་ཡིན་ཏེ།
རང་ཉིད་སྡུག་བསྔལ་གྱིས་མནར་བར་མཐོང་ནས་དེ་ལ་སྐྱོ་བ་ དང༌། སྡུག་བསྔལ་དེ་ལ་རྒྱུ་ཡོད་པར་ཤས་ཤིང་དེའི་གཉེན་པོ་ཡོད་པར་ཤེས་པ་ན།
སྡུག་བསྔལ་གྱི་རྒྱུ་བཟློག་པའི་ཐབས་ལ་འཇུག་པར་འགྱུར་བའི་ཕྱིར། ཐབས་སྟོན་པ་མེད་པ་མ་ཡིན་ཏེ།
རང་ཉིད་ཐར་ལམ་གཟིགས་པ་མཐར་ཕྱིན་པའི་གང་ཟག་གིས་ལན་
{@027A}༄༅། །ལ་རེ་བ་མེད་པར་གཞན་ལ་ལམ་ཕྱིན་ཅི་མ་ལོག་པར་སྟོན་པར་བྱེད་པའི་ཕྱིར།
རིགས་པ་འདི་དག་ནི། རིག་པའི་དབང་ཕྱུག་གིས། རྒྱུ་ཡོད་ཕྱིར་དང་རྒྱུ་ཡི་ནི། །གཉེན་པོ་གོམས་པས་ཟད་ཕྱིར་རོ། །ཞེས་སོགས་ཀྱི་སྐབས་ནས་བསྟན་པའི་རིགས་པ་ཡིན་ལ། སེམས་ཀྱི་རང་བཞིན་འོད་གསལ་བ་དང༌།
དྲི་མ་གློ་བུར་བ་ཡིན་པའི་ཕྱིར། དྲི་མ་སེམས་ཀྱི་རང་བཞིན་ལ་ཞུགས་པ་མི་འཐད་པ་སོགས་ཀྱང་ཤེས་པར་བྱའོ། །བཞི་པ་དབང་ཕྱུག་པ་སོགས་གསུམ་དགག་པ་ལ་གཉིས།
འདོད་པ་བརྗོད་པ་དང་དེ་དགག་པའོ། །དང་པོ་ལ་གཉིས་ལས།
དང་པོ་དབང་ཕྱུག་པའི་འདོད་པ་བརྗོད་པ་ལ། སྟོན་པ་ནི་ལྷ་ཆེན་དབང་ཕྱུག་དང༌། དྲང་སྲོང་རྐང་མིག།
གཟེགས་གཟན་སོགས་སོ།། མིང་གི་རྣམ་གྲངས་ལ་དབང་ཕྱུག་པ། ཞི་བ་པ། ཡེ་སྲིད་པ༑ རྐང་མིག་པ་རྣམས་སོ། །འདིའི་ཞི་བ་དང༌།
ཡེ་སྲིད་ནི་དབང་ཕྱུག་གི་མིང་ཡིན་ལ། རྐང་མིག་ནི་དྲང་སྲོང་མཛེས་པ་ཞེས་བྱ་བའི་མིང་ཡིན་ཏེ།
ལྷ་ཆེན་གྱིས་ཨུ་མའི་སྲུང་མ་ལ་དྲང་སྲོང་དེ་བཞག་པའི་ཚེ་དེ་ལ་ཨུ་མ་ཆགས་ནས་མདུན་དུ་འདུགསྟེ༑ རྣམ་འགྱུར་དུ་མ་བསྟན་ཀྱང་དྲང་སྲོང་དེས་རྐང་པར་མིག་ཕབ་སྟེ་བརྟུལ་ཞུགས་བསྲུངས་པས་ལྷ་ཆེན་མཉེས་ནས་གཞུང་རྩོམ་པ་ལ་དབང་བསྐུར་བས་དྲང་སྲོང་རྐང་མིག་ཞེས་གྲགས་ལ།
དེའི་རྗེས་སུ་འབྲངས་པ་རྣམས་ལ་རྐང་མིག་པ་ཞེས་གྲགས་སོ། །
དབྱེ་བ་ལ་སྤྱིར་ལྷ་ཆེན་དབང་ཕྱུག་སྟོན་པར་འཛིན་པའི།
གྲངས་ཅན་པ། བྱེ་བྲག་པ། རིག་པ་ཅན་པ་གསུམ་ཡང་ཡོད་པར་ཞི་འཚོ་ཡབ་སྲས་དང༌། རྒྱལ་ཚབ་ཐམས་ཅད་མཁྱེན་པ་རྣམས་ཀྱིས་གསུངས་ཤིང༌།
བྱེ་རིག་གཉིས་ལ་ཚངས་པ་དང༌། ཁྱབ་འཇུག་གཉིས་ལྷར་འཛིན་པ་ཡང་ཡོད་པས་གཞུང་ཆེན་མོ་རྣམས་སུ་དེ་གཉིས་ལ་ཚངས་པ་པ་དང་ཁྱབ་འཇུག་པའི་ཐ་སྙད་ཀྱིས་ཀྱང་གསུངས་སོ། །དེས་ན་དེ་དག་ལ་ལུགས་འདིའི་བྱེ་བྲག་ཏུ་གྱུར་པའང་ཡོད་མོད་ཀྱི་རང་རང་གི་གྲུབ་མཐའི་ཁྱད་པར་མི་འདྲ་བ་དགགསལ་བར་བྱ་བའི་ཕྱིར་ཕྱིས་ཀྱི་མཁས་པ་དག་གིས་ལོགས་སུ་བཤད་པ་བཞིན་འདིར་ཡང་འཆད་པས་ན་དངོས་ཀྱི་དབྱེ་བ་ནི།
གསལ་བྱེད་པ་དང་རྣ་བ་མ་ཕུག་པ་གཉིས་སུ་བྱའོ། །ལུང་ནི་དབང་ཕྱུག་སྒྲ་བསྒྲགས་ཀྱི་རྒྱུད་དང༌།
སྨེ་བ་བརྩེགས་པའི་རྒྱུད་ཅེས་བྱ་བ་རྣམས་སོ། །འདོད་ཚུལ་ལ་ལྷ་དབང་ཕྱུག་ཆེན་པོ་ནི།
གངས་རི་ཆེན་པོ་ཏེ་སེ་ན་བཙུན་མོ་ཨུ་མ་དང་སྲས་ཚོགས་བདག་དང་གདོང་དྲུག་སོགས་འཁོར་གྱི་ཚོགས་སྟོང་གིས་བསྐོར་ཞིང་གནས་པར་སློབ་དཔོན་ཤེས་རབ་གོ་ཆས་བཤད་དོ། །དབང་ཕྱུག་གི་ཡོན་ཏན་བརྒྱད་ནི། དབང་ཕྱུག་གིས་སེམས་ཅན་གྱི་འཇིག་རྟེན་སྐྱེ་འཇིག་བྱེད་པ་ཕྲ་བ་དང༌།
སྣོད་ཀྱི་འཇིག་རྟེན་སྐྱེ་འཇིག་བྱེད་པ་ཡང་བ་དང༌། དེ་གཉིས་ཀ་སྐྱེ་འཇིག་བྱེད་པ་བདག་པོར་གྱུར་པ་དང༌།
སེམས་ཅན་རྣམས་ལ་ཚར་གཅོད་རྗེས་འཛིན་གྱི་དབང་ཡོད་པས་དབང་དུ་གྱུར་པ་དང༌། ཡིད་ཀྱིས་གང་བསམ་པར་ཕྱིན་པས་གར་ཡང་ཁྱབ་པ་དང༌།
འབྱུང་པོ་ཀུན་གྱིས་མཆོད་པར་གྱུར་པ་དང༌། ཡོན་ཏན་གསུམ་ལ་འདོད་དགུར་དབང་བསྒྱུར་བས་འདོད་དགུར་ལྡན་པ་དང༌།
ཐར་པ་དང་ལྷའི་ལུས་སོགས་གང་འདོད་ཐོབ་པས་དགའ་མགུར་གནས་པ་སྟེ་འགྲེལ་བཤད་སྤྱན་རས་གཟིགས་བརྟུལ་ཞུགས་ལས་བཤད་དོ། །གྲུབ་མཐའི་འདོད་ཚུལ་ནི།
སྣོད་བཅུད་ཀྱི་འཇིག་རྟེན་རྣམས་ཆོས་ཅན། དབང་ཕྱུག་གིས་བློ་སྔོན་དུ་བཏང་ནས་བྱས་པ་ཡིན་ཏེ།
སྡོད་ཅིང་ལས་ལ་ འཇུག་བའི་ཕྱིར་སྟེའུ་བཞིན། དབྱིབས་ཀྱི་ཁྱད་པར་དང་ལྡན་པའི་ཕྱིར་བུམ་སོགས་བཞིན།
དོན་བྱེད་ནུས་པའི་ཕྱིར་དགྲ་སྟ་བཞིན། དེས་ན་དབང་ཕྱུག་ནི་ཀུན་མཁྱེན་པ་ཡིན་ཏེ། སྣོད་བཅུད་ཐམས་ཅད་བྱེད་ཤེས་པའི་ཕྱིར་ཞེས་ཟེར་རོ། །ལམ་ནི་བུམ་པ་ཅན་གྱི་རླུང་སྦྱོར་དང༌།
དབང་ཕྱུག་གི་ལིངྒའི་རྩེ་ནས་དབང་བསྐུར་བ་དང༌། བུད་མེད་དང་སྦྱར་ནས་ཁམས་འཇག་པའི་བདེ་བ་རྣམས་ཡིན་པར་སྨྲ་ཞིང༌།
ཐར་པ་ནི་ཁམས་འཛག་པའི་བདེ་བ་ལས་འཁྲིག་བདེའི་ཡེ་ཤེས་སྐྱེས་པ་ལ་འདོད་དོ། །
དུས་འཁོར་གྱི་སྐོར་ནས་དབང་ཕྱུག་པའི་འདོད་པ་མི་འདྲ་བ་ཞིག་བཤད་པ་ནི་འདིར་མ་བྲིས་ཏེ་གཞན་དུ་བལྟ་བར་བྱའོ། །གཉིས་པ་བྱེ་བྲག་པ་དང་རིག་པ་ཅན་པའི་འདོད་པ་བརྗོད་པ་ལ།
འུག་པ་ལ་ལྷར་འཁྲུལ་ནས་ཚིག་དོན་དྲུག་རྙེད་པར་རློམ་པའི་དྲང་སྲོང་འུག་པ་དང་། གཞན་གྱིས་བོར་བའི་གཟེགས་མ་ཟ་ཞིང་བརྟུལ་ཞུགས་སྤྱོད་པའི་དྲང་སྲོང་གཟེགས་གཟན་གཉིས་ཀྱི་རྗེས་སུ་འབྲངས་པས་བྱེ་བྲག་པ་ལ་གཟེགས་གཟན་པ་དང་འུག་པ་པ་ཞེས་ཟེར་བ་དང༌།
བྲམ་ཟེ་རྐང་མིག་ནི་རིག་པ་ཅན་པའི་སྟོན་པ་ཡིན་པར་རྒྱལ་ཚབ་ཐམས་ཅད་མཁྱེན་པ་དང་མཁས་གྲུབ་སྨྲ་བའི་ཉི་མ་གཉིས་ཀས་བཤད་ལ།
ཞི་བ་འཚོ་ཡབ་སྲས་ཀྱི་བཞེད་པར་ཡང་སྣང་ངོ། །དེས་ན་འདི་གཉིས་ལ་ཚིག་དོན་དྲུག་གི་སྦྱི་བྱེ་བྲག་གི་ཁྱད་པར་མང་དུ་སྨྲ་བས་བྱེ་བྲག་པ་དང༌།
རྐང་མིག་གིས་བྱས་པའི་རིག་པའི་ལྟ་བའི་རྗེས་སུ་འབྲངས་བས་ན་རིག་པ་ཅན་པ་ཞེས་གྲགས་སོ། །ཚད་མ་ནི་མངོན་རྗེས་ལུང་གི་ཚད་མ་གསམ་དུ་བྱེ་བྲག་པ་འདོད་ཅིང༌།
རིག་པ་ཅན་པས་དེ་གསུམ་དང་དཔེ་ཉེར་འཇལ་གྱི་ཚད་མ་སྟེ་བཞིར་འདོད་དོ། །གཉིས་ཀས་ཀྱང་རྗེས་དཔག་ལ་རྒྱུ་ལས་འབྲས་བུ་དཔོག པའི་སྔ་མ་ཅན། འབྲས་བུ་ལས་རྒྱུ་དཔོག་པའི་ལྷག་ལྡན་དང༌།
ཆོས་གཅིག་མཐོང་བ་ལས་ཤིན་ཏུ་ལྐོག་གྱུར་གཞན་ཤེས་པ་སྤྱིར་མཐོང་ཅན་ཏེ་གསུམ་དང༌། དེ་དག་གི་རྟེན་དུ་གྱུར་པའི་རྟགས་ཡང་དག་གསུམ་དང༌།
འབྲེལ་བ་མེད་པ། མ་ངེས་པ། ཐེ་ཚོམ་ཅན་ཏེ་རྟགས་ལྟར་སྣང་གསུམ་དུ་འདོད་དོ། །རྟོག་གེའི་ཚིག་དོན་བཅུ་དྲུག་ནི།
ཚད་མ་དང༌། གཞལ་བྱ་དང༌། ཐེ་ཚོམ་དང༌། དགོས་པ་དང༌། དཔེ་དང༌། གྲུབ་པའི་མཐའ་དང༌། ཡན་ལག་དང༌།
རྟོག་གེ་དང༌། གཏན་ལ་ཕབ་པ་དང༌། རྩོད་པ་ དང༌། བརྗོད་པ་དང༌། སུན་ཅི་ཕྱིན་དུ་རྒོལ་བ་དང༌།
གཏན་ཚིགས་ལྟར་སྣང་དང༌། ཚིག་ངོར་དང༌། ལྟག་ཆོད་དང༌། ཚར་བཅད་པའི་གནས་རྣམས་སོ། ཚིག་དོན་དྲུག་གི་འདོད་ཚུལ་ནི།
འདི་གཉིས་ཀྱི་འདོད་པ་ཕལ་ཆེར་འདྲ་བས་ཐུན་མོང་དུ་བཤད་པར་བྱ་སྟེ། རྫས་དང་ཡོན་ཏན་ལས་དང་སྤྱི། བྱེ་བྲག་འདུ་བ་རྣམ་པ་དྲུག།
ཅེས་པ་ལྟར་དྲུག་ལས། རྫས་ཀྱི་མཚན་ཉིད་ནི་བྱ་བ་དང་ལྡན་པ། ཡོན་ཏན་དང་ལྡན་པ། འདུ་བའི་རྒྱུར་གྱུར་པ་སྟེ་གསུམ་མོ། །དབྱེ་བ་ནི་དགུ་སྟེ་ས་ཆུ་མེ་རླུང་ནམ་མཁའ་དུས་ཕྱོགས་བདག་ཡིད་ཅེས་བྱ་བ་རྣམས་སོ། །ཅིའི་ཕྱིར་རྫས་ཞེས་བྱ་ཞེ་ན།
བདག་ཉིད་རང་རྐྱ་བར་གྲུབ་ཅིང་ཆོས་གཞན་གྱི་རྟེན་བྱེད་པའི་ཕྱིར་རོ། །ནམ་མཁའ་ལ་སོགས་པ་ལྔ་ནི།
རྟག་པ་དང་ཐམས་ཅད་དུ་སོང་བའི་རྫས་ཞེས་བྱ་ལ། ས་ལ་སོགས་པ་བཞི་ནི་ཐམས་ཅད་དུ་སོང་བ་མ་ཡིན་པའི་རྫས་ཞེས་བྱ་ཞིང་དེ་བཞིའི་རྡུལ་ཕྲན་རྣམས་ནི་རྟག་པ་དང༌།
རྡུལ་ཕྲན་གྱིས་བརྩམས་པའི་རིགས་པ་རྣམས་ནི་མི་རྟག་པར་འདོད་དེ། །དེ་ཡང་རིགས་པ་རྩོམ་ཚུལ་ནི་འབྱུང་བཞིའི་རྡུལ་ཕྲ་རབ་རིགས་མི་མཐུན་རྣམས་ཕན་ཚུན་འཕྲད་པས་ལྡན་པ་ཙམ་བསྐྱེད་ཀྱི་རྫས་མི་བསྐྱེད་ལ།
བུམ་པ་ལྟ་བུའི་ཡན་ལག་ཅན་གཅིག་ལ་འབྱུང་བཞི་རགས་པའི་རྫས་བཞི་ཡོད་ཅིང་དེའི་སའི་རྫས་ནི་སའི་རྡུལ་ཕྲ་རབ་ཁོ་ནས་བརྩམས་བ་སོགས་སུ་ཤེས་པར་བྱའོ། །རྡུལ་རིགས་མཐུན་རྫས་ཐ་དད་ཕན་ཚུན་འཕྲད་པ་ལས་ལྡན་པ་ཞེས་བྱ་བའི་རྫས་དོན་གཞན་གཅིག་བསྐྱེད་ཅིང་དེ་ནི་འཕྲད་པ་ཞེས་བྱ་བའི་ཐ་སྙད་ཀྱི་རྒྱུར་འགྱུར་རོ། །ཡན་ལག་རྣམས་ཚོགས་པ་ལས་ཡན་ལག་ཅན་གྱི་རྫས་དོན་གཞན་བསྐྱེད་ཅིང་དེ་ནི་མངོན་སུམ་གྱི་ཡུལ་ཡིན་པས་རགས་པ་ཞེས་བྱའོ། །བདག་ནི་ལུས་དབང་བློ་གསུམ་ལས་དོན་གཞན་དུ་གྱུར་བའི་རྫས།
བློ་ལ་སོགས་པའི་ཡོན་ཏན་དེ་རྣམས་ཀྱི་རྟེན་དུ་གྱུར་ཅིང་ཡོན་ཏན་དེ་རྣམས་རང་ལ་འདུ་བའི་རྒྱུ་བྱེད་པ།
སེམས་མ་ཡིན་པའི་ངོ་བོ།། མི་འཇིག་པ་ཐམས་ཅད་ དུ་ཁྱབ་པར་འདོད་ལ། །སྐྱེས་བུ་དང་གང་ཟག་ཀྱང་དེའི་རྣམ་གྲངས་སོ། །གཉིས་པ་ཡོན་ཏན་ལ་མཚན་ཉིད་ནི།
རྫས་ལ་བརྟེན་པ། ཡོན་ཏན་གཞན་དང་མི་ལྡན་པ། འདུ་བའི་རྒྱུ་མི་བྱེད་པ། ལྟོས་པ་མེད་པའོ། །དབྱེ་བ་ནི་ཉི་ཤུ་རྩ་བཞི་སྟེ།
རྐང་མིག་གི་མདོ་ལས། གཟུགས་དང༌། རོ་དང༌། དྲི་དང༌། རེག་པ་རྣམས་དང༌། གྲངས་དང༌།
ཚད་དང༌། སོ་སོ་བ་དང༌། ལྡན་པ་དང༌། རྣམ་པར་དབྱེ་བ་དང༌། གཞན་དང་གཞན་མ་ཡིན་པ་ཉིད་དང༌། བློ་རྣམས་དང༌།
བདེ་བ་དང༌། སྡུག་བསྔལ་དག་དང༌། འདོད་པ་དང༌། སྡང་བ་དག་དང༌། འབད་པ་ནི་ཡོན་ཏན་དག་གོ༌།ཞེས་འབྱུང་ཞིང༌།
སློབ་དཔོན་ཀ་མ་ལ་ཤཱི་ལས། དང་གི་སྒྲ་ལས་ལྕི་བ་དང༌། སྣུམ་པ་དང༌། འདུས་བྱས་པ་དང༌། ཆོས་དང༌།
ཆོས་མ་ཡིན་པ་དང༌། སྒྲ་རྣམས་གཟུང་ངོ། །ཞེས་གསུངས་ཤིང༌། སྐབས་གཞན་དུ་དྲོ་བ་དང་གཤེར་བ་ཡང་ཡོན་ཏན་དུ་བཤད་པས་དེ་ལྟར་ཉི་ཤུ་རྩ་བཞིའོ། །དེ་ལས་གཟུགས་དྲི་རོ་རེག་བཞི་ནི་འབྱུང་བ་བཞིའི་ཡོན་ཏན་ནོ། །སྒྲ་ནི་ནམ་མཁའི་ཡོན་ཏན་ནོ། །གྲངས་ནས་གཞན་མ་ཡིན་པའི་བར་བདུན་ནི་དུས་དང་ཕྱོགས་ཀྱི་ཡོན་ཏན་ནོ། །བློ་ནས་འབད་པའི་བར་དྲུག་དང༌།
ཆོས་ཆོས་མིན་གཉིས། །འདུས་བྱས་དང་དགུ་ནི་བདག་གི་ཡོན་ཏན་ནོ། །ལྕི་སྣུམ་དྲོ་གཤེར་རྣམས་ནི་རིགས་པའི་རྫས་འགའ་ཞིག་གི་ཡོན་ཏན་ནོ། །དེ་ལ་གཟུགས་རོ་དྲི་རེག་ནི་རིམ་པ་བཞིན་མིག་ལྕེ་སྣ་ ལུས་ཀྱི་གཟུང་བྱ་སྟེ་ས་སོགས་ཀྱི་ཡོན་ཏན་ནོ། །གྲངས་ནི་གཅིག་ལ་སོགས་པའི་ཐ་སྙད་ཀྱི་རྒྱུར་གྱུར་པ་དང༌།
ཚད་ནི་ཆེན་པོ་ལ་སོགས་པའི་ཐ་སྙད་ཀྱི་རྒྱུར་གྱུར་པ་དང༌། སོ་སོ་པ་ནི་གཉིས་ཆོས་རྣམས་ལ་ཡོད་པའི་སོ་སོ་བའི་ཐ་སྙད་ཀྱི་ཡུལ་དང༌།
ལྡན་པ་ ནི་འཕྲད་པ་དང་བར་མེད་པར་བརྗོད་བའི་ཡུལ་དུ་གྱུར་པའོ། །རྣམ་དབྱེ་ནི་འཕྲད་བ་ཞིག་པའམ་ཕན་ཚུན་ཕྱེ་བར་འཛིན་པའི་ཤེས་པའི་སྣང་ཡུལ་དུ་གྱུར་པ་དང༌།
གཞན་ནི་ལྷན་ཅིག་གནས་པའི་ཀ་བུམ་ལྟ་བུ་ལ་ཀ་བ་བུམ་པ་ལས་གཞན་དུ་འཛིན་པའི་ཤེས་པའི་རྒྱུ་དང༌། གཞན་མ་ཡིན་པ་ཉིད་ནི་བུམ་པ་ཉིད་བུམ་པ་ལས་གཞན་མ་ཡིན་པར་འཛིན་པའི་ཤེས་པའི་རྒྱུ་དང༌།
བློ་ནི་ཤེས་པ་དང༌། བདེ་བ་ནི་སིམ་པ་དང༌། སྡུག་བསྔལ་ནི་གདུང་བ་དང༌། འདོད་པ་ནི་ཆགས་པ་དང༌།
སྡང་བ་ནི་ཞེ་སྡང་དང༌། འབད་པ་ནི་རྩོལ་བ་སྟེ་བདེ་བ་མན་ཆད་འདི་དག་ཀྱང་བེམ་པོར་འདོད་དོ། །ལྕི་བ་ནི་ཐུར་དུ་འདྲེན་པའི་རྒྱུ་དང༌།
གཤེར་བ་ནི་རླན་པའི་ངོ་བོའི་རྒྱུའི་ཡོན་ཏན་དང༌། དྲོ་བ་ནི་མེའི་ཡོན་ཏན་དང༌། སྣུམ་པ་ནི་མར་ལ་སོགས་པའི་ས་ཆུ་འཕྲད་པའི་རྫས་འགའ་ཞིག་གི་ཡོན་ཏན་དང༌། འདུས་བྱས་པ་ནི་ཤུགས་དང་བག་ཆགས་དང་གནས་པ་འཇིག་པ་གསུམ་སྟེ།
ཤུགས་ནི་དཔེར་ན་མདའ་འཕངས་པ་མི་ལྟུང་བར་བྱེད་པའི་རྒྱུ་ལྟ་བུ་དང༌། བག་ཆགས་ནི་རྒྱུ་ཤེས་པ་ལས་སྐྱེས་ཤིང་འབྲས་བུ་ཤེས་པ་བསྐྱེད་པའི་ནུས་པའི་ངོ་བོར་གྱུར་པ་དང༌། གནས་པ་འཇིག་པ་ནི་ལུས་ཅན་གྱི་རྫས་ཀྱི་ཡོན་ཏན་གང་ཞིག་འབད་པས་གཞན་དུ་གནས་པར་བྱེད་ཀྱང་འབད་པ་བཏང་བ་ན་སྔ་མ་ཇི་ལྟ་བ་བཞིན་དུ་གནས་པར་བྱེད་པ་དང༌།
ཆོས་ནི་ཁྲུས་དང་དབང་བསྐུར་བ་སོགས་མ་མཐོང་བའི་འབྲས་བུ་བདེ་བ་སྟེར་བའི་ལས་དང༌། ཆོས་མ་ཡིན་པ་ནི་དེ་ལས་ལྡོག་པ་མ་མཐོང་བའི་འབྲས་བུ་སྡུག་བསྔལ་སྟེར་བའི་ལས་ཏེ།
ཡོན་ཏན་དེ་དག་ཀྱང་ཡོན་ཏན་ཅན་ལས་དོན་གཞན་དུ་གྱུར་པའི་དངས་པོ་འབའ་ཞིག་ཏུ་འདོད་དོ། །གསུམ་པ་ལས་ནི། འདེགས་པ་དང༌། འཇོག་པ་དང༌། བརྐྱང་བ་དང༌།
བསྐུམ་པ་དང༌། འགྲོ་བ་སྟེ་ལྔའོ། །དེ་ཡང་འདེགས་པ་ལ་མཚོན་ན་སྟེང་ཕྱོགས་ཀྱི་ལྡན་པ་དང་འོག་ཕྱོགས་ཀྱི་རྣམ་དབྱེ་ལས་སྐྱེས་ཤིང༌།
འོག་ནས་སྟེང་དུ་འདྲེན་པའི་བྱ་བ། འདེགས་བྱ་འདེགས་བྱེད་གཉིས་ཀ་ལས་རྫས་ཐ་དད་དུ་གྱུར་པ་ཞིག་སྟེ་དེས་གཞན་ཡང་མཚོན་ནོ། །བཞི་པ་སྤྱི་ནི།
གང་ལ་རང་ཉིད་རྗེས་སུ་འགྲོ་བའི་ཆོས་དེ་ལ་ཐུན་མོང་གི་སྒྲ་བློ་འཇུག་པའི་རྒྱུར་གྱུར་པ་སྟེ་དེ་ལ་ཡང་ཁྱབ་པའི་སྤྱི་དང་ཉི་ཚེ་བའི་སྦྱི་གཉིས་སོ། །དང་པོ་ནི་ཡོད་པ་ཉིད་ཅེས་བྱ་བ་ལྟ་བུའོ། །གཉིས་པ་ནི་བ་ལང་ཉིད་དང་ཤིང་ཉིད་ཅེས་པ་ལྟ་བུ་སྟེ་དེ་ཡང་རྟག་པར་འདོད་དོ། །ལྔ་པ་བྱེ་བྲག་ནི།
ཆོས་གང་གིས་རང་གི་རྟེན་དེ་གཞན་ལས་ཁྱད་པར་དུ་གོ་བར་བྱེད་པའི་ཆོས་དང༌། དྲུག་པ་འདུ་བ་ནི་ཡུལ་སོ་སོ་མ་ཡིན་པར་གྲུབ་པའི་རྟེན་དང་བརྟེན་པའི་ཆོས་རྣམས་ལ་དམིགས་ནས་འདི་ལ་འདི་ཡོད་བའོ་སྙམ་དུ་འཛིན་པའི་ཤེས་པའི་གཟུང་ཡུལ་དུ་གྱུར་ཅིང༌།
རྟེན་རྫས་སོགས་དང་བརྟེན་པ་ཡོན་ཏན་གཉིས་ཕྲད་ཅིང་འབྲེལ་བའི་ཆར་གྱུར་པའི་ཆོས་རྟེན་དང་བརྟེན་པ་དེ་གཉིས་ཀ་ལས་རྫས་ཐ་དད་དུ་གྱུར་པའོ། །གཞན་ཡང་ཡོན་ཏན་ལ་ཡོན་ཏན་གཉིས་པ་མེད།
རྫས་ལས་གཞན་ལ་ཡོན་ཏན་མི་བརྟེན། སྤྱི་ལ་སྤྱི་གཉིས་པ་རྗེས་སུ་མི་འགྲོ། ལས་ནི་མི་རྟག །
བྱེ་བྲག་དང་འདུ་བ་ནི་རྟག་པར་འདོད་དེ། །ལུགས་འདིས་ཐར་པ་ཐོབ་བྱེད་ཀྱི་ལམ་ནི། ཁྲུས་དང༌། དབང་བསྐུར་བ་དང༌།
སྨྱུང་བར་གནས་པ་དང༌། བླ་མའི་ཁྱིམ་དུ་གནས་པས་ཚངས་པར་སྤྱད་པ་་ནགས་སུ་གནས་པ་དང༌། མཆོད་སྦྱིན་དང༌།
སྦྱིན་པ་ལ་སོགས་པ་ཡིན་ཞིང་ནམ་ཞིག་བླ་མའི་མན་ངན་ལས་རྣལ་འབྱོར་བསྒོམས་ཏེ། བདག་དབང་སོགས་རྣམས་ལས་དོན་གཞན་དུ་ཤེས་ནས་བདག་གི་དེ་ཁོ་ན་ཉིད་མཐོང་ཞིང་ཚིག་གི་དོན་དྲུག་གི་རང་བཞིན་ཁོང་དུ་ཆུད་པ་ན།
བདག་ནི་ཁྱབ་པའི་རང་བཞིན་ཡིན་ཡང་བྱེད་པ་མེད་པར་ཤེས་ཏེ། ཆས་དང་ཆོས་མ་ཡིན་པའི་ལས་གང་ཡང་གསོག་པར་མི་བྱེད།
ལས་གསར་པ་མ་བསགས་ཤིང་རྙིད་པ་ཟད་པས་སྔར་བླངས་པའི་ལུས་དང་དབང་པོ་དང་བློ་དང་བདེ་སྡུག་འདོད་སྡང་སོགས་བདག་དང་བྲལ་ཞིང༌།
གསར་པའི་ལུས་དང་དབགན་པོ་བླངས་པས། བུད་ཤིང་ཟད་པའི་
མེ་བཞིན་དུ་སྐྱེ་བའི་རྒྱུན་ཆད་དེ་བདག་འབའ་ཞིག་ཏུ་གནས་པར་གྱུར་པ་ན་ཐར་པ་ཐོབ་པ་ཡིན་ཞེས་ཟེར་རོ། །དེ་ལྟར་ན་སྤྱིར་མུ་སྟེགས་ཀྱི་གྲུབ་མཐའ་འདི་རྣམས་ལས་གྲངས་ཅན་པ་དང༌།
བྱེ་བྲག་པ། ཞིང༌།
ཁྱད་པར་དུ་ཚད་མ་སྡེ་བདུན་སོགས་འཕགས་ཡུལ་གྱི་ཤིང་རྟ་ཆེན་པོའི་གཞུང་རྣམས་སུ་འདི་དག་གི་འདོད་པ་འགོག་པའི་རིགས་པ་མང་དུ་གསུངས་པ་རྣམས་ཀྱི་ཕྱོགས་སྔ་མ་ལེགས་པར་མ་ཤེས་ན།
དེ་འགོག་པའི་རིགས་པའི་གནོད་པ་འབབ་ཚུལ་ཀྱང་ཤེས་པར་དཀའ་བས་བདག་གིས་འདིར་ཅུང་ཟད་ཕྱེ་སྟེ་བཤད་པ་ཡིན་ཞིང༌།
ད་དུང་ཞིག་པར་ཤེས་འདོད་ན་འཕགས་ཡུལ་མཁས་པའི་གཞུང་དང༌། རྗེ་བདག་ཉིད་ཆེན་པོའི་སྲས་ཀྱི་ཐུ་བོ་རྣམ་གཉིས་ཀྱིས་མཛད་པའི་རྣམ་འགྲེལ་ངེས་ཀྱི་ཊཱིཀྐ་ཆེན་མོ་རྣམས་སུ་བལྟ་བར་བྱའོ། །གཉིས་པ་དེ་དགག་པ་ནི།
ཁྱོད་ཀྱི་འཇིག་རྟེན་གྱི་གནས་ལུས་ལོངས་སྤྱོད་རྣམས་སྤྱིར་བློ་སྔོན་དུ་སོང་བ་ཙམ་དུ་སྒྲུབ་པ་ཡིན་ནམ།
བློ་རྟག་པ་ཞིག་གིས་བྱས་པར་སྒྲུབ་པ་ཡིན་ནམ། །བྱེད་པ་པོ་དབང་ཕྱུག་སྔོན་དུ་སོང་བ་ཉིད་དུ་སྒྲུབ་པ་ཡིན་གྲང༌།
དང་པོ་ལྟར་ན་གྲུབ་པ་ལ་སྒྲུབ་པ་ཉིད་དུ་གྱུར་ཏེ། རང་རྒྱུ་སེམས་པའི་ལས་ལས་སྐྱེས་པར་སངས་རྒྱས་པས་གྲུབ་ཟིན་པའི་ཕྱིར།
གཉིས་པ་ལྟར་ན་རྟགས་ཆོས་གཉིས་ལྡན་གྱི་དཔེ་མ་གྲུབ་སྟེ། བློ་རྟག་པ་ཡིན་པ་མི་སྲིད་པའི་ཕྱིར།
གསུམ་པ་ལྟར་ན་དབང་ཕྱུག་ཉིད་ཀྱིས་མ་ངེས་ཏེ། འདི་ལྟར་དབང་ཕྱུག་ཆོས་ཅན། བྱེད་པ་པོ་གཞན་སྔོན་དུ་སོང་བར་ཐལ།
སྡོད་ཅིང་འཇུག་པའི་ཕྱིར། ཞེས་བྱ་བ་ལ་སོགས་པ་ཁྱོད་ལ་ཡང་མཚུངས་པའི་ཕྱིར། དེ་ལ་འདོད་ན།
དབང་ཕྱུག
རྟག་པ་མ་ཡིན་པར་ཐལ་ལོ། །དབང་ཕྱུག་བྱེད་པ་པོར་སྒྲུབ་པ་ལ་དབྱིབས་ཀྱི་དོན་རྟགས་སུ་མི་རུང་སྟེ།
དབྱིབས་ཁྱད་པར་ཅན་ཡང་མི་རུང༌། དབྱིབས་ཙམ་ཡང་མི་རུང་བའི་ཕྱིར། དང་པོ་དེར་ཐལ། རང་བྱིན་གྱིས་རློབ་པའི་སྐྱེས་བུ་ཕན་བྱེད་དུ་ཡོད་མེད་ཀྱི་རྗེས་སུ་འཇུག་པ་ཅན་གྱི་དབྱིབས་ལྡན་དེ་དག་དཔེ་བུམ་སོགས་ཇི་འདྲ་བ་དེ་ལྟར་རབ་ཏུ་མ་གྲུབ་པས་ཕྱོགས་ཀྱི་ཆོས་མ་གྲུབ་པའི་ཕྱིར།
གཉིས་པ་དེར་ཐལ། དེ་དག་གི་དབྱིབས་སྐྱེས་བུས་བྱས་པའི་དབྱིབས་དང་རྒྱུ་རིགས་ཐ་དད་པའི་དངོས་པོ་ལས་སྐྱེས་པར་རབ་ཏུ་གྲུབ་པའི་ཕྱིར།
དེས་ན་དབྱིབས་ཙམ་དུ་མཚུངས་པས་དེ་ལྟར་སྒྲུབ་མི་ནུས་ཏེ། སྐྱ་བོའི་རྫས་ལས་རང་ཡོད་པའི་གཞིར་མེ་དཔོག་པ་བཞིན་ནོ། །གཞན་དུ་ན་གྲོག་མཁར་ཡང་རྫ་མཁན་དེས་བྱས་པར་ཐལ།
དེ་དང་རྫ་མཁན་གྱིས་བྱས་པའི་བུམ་པ་ལ་སོགས་པ་འཇིམ་པའི་རྣམ་འགྱུར་འགའ་ཞིག་མཚུངས་པའི་ཕྱིར། དབང་ཕྱུག་ཆོས་ཅན།
མྱུ་གུའི་རྒྱུ་དང་རྒྱུ་མ་ཡིན་པ་གཉིས་ཀ་ཡིན་པར་ཐལ། དབང་ཕྱུག་མྱུ་གུའི་རྒྱུ་ཡིན་པའི་རང་བཞིན་ལས་མ་འཕོས་བཞིན་དུ་སྐབས་ལ་ལར་དེའི་རྒྱུ་མ་ཡིན་པའི་རང་བཞིན་དུ་འདོད་པའི་ཕྱིར།
ཁྱབ་པ་མེད་ན་འབྲེལ་མེད་ཀྱི་སྡོང་དུམ་ཡང་རྨ་སོས་པ་ལ་སོགས་པའི་རྒྱུར་རྟོགས་རིགས་པར་ཐལ་ལོ། །ཞེས་པ་ནི་རིག་པའི་དབང་ཕྱུག་གིས།
སྡོད་འཇུག་དབྱིབས་ཀྱི་ཁྱད་པར་དང༌། དོན་བྱེད་པ་ལ་སོགས་པ་དག །འདོད་པ་གྲུབ་པའམ་དཔེ་མ་གྲུབ། །ཡང་ན་ཐེ་ཚོམ་ཟ་བ་ཡིན། །ཞེས་སོགས་ཀྱིས་བསྟན་པའི་རིགས་པའོ། །དབང་ཕྱུག་ཆོས་ཅན།
ཀུན་ལམ་ཁྱབ་པར་ཐལ། ཆ་མེད་པའི་གཅིག་པུ་ཡིན་པའི་ཕྱིར། སྣོད་བཅུད་མཐའ་དག་ཆོས་ཅན། དུས་རྟག་ཏུ་སྐྱེ་བ་ཁོ་ནར་འགྱུར་བར་ཐལ།
ཁྱོད་ཀྱི་རྒྱུ་དབང་ཕྱུག་རྟག་པ་དུས་རྟག་ཏུ་གནས་པའི་ཕྱིར། དབང་ཕྱུག་ཆོས་ཅན། སྣོད་བཅུད་ཐམས་ཅད་དུས་རྟག་ཏུ་བསྐྱེད་པའམ་ཡང་ན་ནམ་ཡང་མི་བསྐྱེད་པ་ཉིད་ཡིན་པར་ཐལ།
ཁྱོད་ཀྱི་རང་བཞིན་ནམ་ཡང་འགྱུར་བ་མེད་པའི་ཕྱིར། ཞེས་པ་རྣམས་ནི་གཞུང་ཆེན་མོ་ཕལ་ཆེ་བ་ལས་འབྱུང་ངོ་། །
དབང་ཕྱུག་གི་ལུང་ལས་བཤད་པའི་དབང་བསྐུར་གྱི་ཆོ་ག་ཆོས་ཅན། །སྲིད་པ་ལས་གྲོལ་བའི་ལམ་མིན་ཏེ།
ཁྱོད་ཀྱིས་སྲིད་པར་སྐྱེ་བའི་རྒྱུ་ཕུང་པོ་ལ་ཆགས་པའི་སྲེད་པ་སོགས་གང་ཡང་ཉམས་པ་མེད་པའི་ཕྱིར།
གཞན་དུ་ན།དབང་བསྐུར་ཐོབ་པའི་སྐྱེས་བུ་དེ་དག་ཆོས་ཅན།
དབང་བསྐུར་ཐོབ་མ་ཐག་རང་རྒྱུད་ཀྱི་སེམས་པའི་དབང་གིས་མིག་སོགས་ཡུལ་ལ་འཇུག་པའི་བྱ་བ་རྣམས་རྒྱུན་འཆད་པར་འགྱུར་བར་ཐལ།
དེ་ལྟར་བྱེད་པའི་སེམས་པའི་ནུས་པ་དབང་བསྐུར་གྱིས་བཅོམ་པའི་ཕྱིར། ཅི་སྟེ་དབང་བསྐུར་ཐོབ་པ་རྣམས་ཤི་བའི་ཚེ་བློ་མེད་པའི་ཕྱིར་དེ་དག་རྒྱུན་འཆད་པར་འགྱུར་རོ་ཞེ་ན།
དེ་འདྲའི་འཆི་ཁ་མའི་གང་ཟག་གི་རྒྱུད་ཀྱི་དྲི་མ་རྣམས་ཆོས་ཅན། རིགས་འདྲ་ཕྱི་མ་འཚམས་སྦྱོར་ཏེ།
དེའི་དངོས་རྒྱུ་ནུས་པ་ཐོགས་མེད་ཚང་བའི་ཕྱིར། བདག་རྟག་པར་སྨྲ་བ་ཁྱེད་རྣམས་ལ་བཅིང་གྲོལ་གང་ཡང་མི་འཐད་དེ།
རྟག་པ་ནི་རང་བཞིན་འགྱུར་བ་མེད་པས་རྐྱེན་ལ་ལྟོས་པ་མེད་པའི་ཕྱིར། རྒྱུ་དང་འབྲས་བུའང་གཅིག་པར་འགྱུར་བར་ཐལ།
བདག་རྟག་པ་དེ་ཉིད་ལས་གསོག་པ་པོ་དང་འབྲས་བུ་མྱོང་བ་པོ་ཡིན་པའི་ཕྱིར། ཅི་སྟེ་རྒྱུ་འབྲས་དེ་དག་བདག་ལས་ཐ་དད་པས་སྐྱོན་མེད་དོ་ཞེ་ན།
བདག་རྟག་པ་དེ་ཆོས་ཅན། རྒྱུ་འབྲས་དེ་དག་བྱེད་པ་པོ་དང་ཟ་བ་པོ་མ་ཡིན་པར་ཐལ། ཁྱོད་དེ་དག་ལས་བདག་ཉིད་འབྲེལ་བ་མེད་པའི་ཐ་དད་ཡིན་པའི་ཕྱིར།
ཞེས་པ་རྣམས་ནི་རྣམ་འགྲེལ་ལས། ལུང་ཙམ་གྱིས་ནི་གྲོལ་བར་ཡང༌། །སྨྲ་བ་ཡོངས་སུ་མགུ་བྱེད་མིན། །ཞེས་སོགས་ཀྱིས་བསྟན་པའི་རིགས་པའོ། །གསལ་བྱེད་དངོས་པོ་ལས་རྫས་ཐ་དད་པའི་རིགས་སོགས་ཡོད་པ་མི་འཐད་དེ་མངོན་སུམ་གྱི་ཚད་མས་མ་མཐོང་བའི་ཕྱིར་དང༌།
རྗེས་དཔག་གི་རྟེན་དུ་གྱུར་བའི་རྟགས་ཡང་དག་མེད་པའི་ཕྱིར། ཕྱི་མ་དེར་ཐལ། དེ་སྒྲུབ་ཀྱི་མཐུན་དཔེ་མེད་པའི་ཕྱིར།
གལ་ཏེ་དཔེ་མེད་པ་མ་གྲུབ་སྟེ། སྐྱེས་བུ་དབྱུག་པ་ཅན་ཞེས་པའི་སྒྲ་ནི་སྐྱེས་བུ་ལས་དོན་གཞན་དུ་གྱུར་བའི་
དབྱུག་པ་ཁོ་ན་རྒྱུར་གྱུར་བའི་ཕྱིར། ཞེ་ན། མི་འཐད་དེ།
དབྱུག་པ་ཅན་ཞེས་པ་ནི་སྐྱེས་བུ་དང་དབྱུག་པའི་འབྲེལ་བ་ཀུན་རྫོབ་པ་ལས་ཐ་སྙད་འདོགས་པ་ཡིན་གྱི་དབྱུག་པ་ཁོ་ནའི་རྒྱུ་མཚན་གྱིས་མ་ཡིན་པའི་ཕྱིར།
གཞན་དུ་ན་དབྱུག་པ་ཡིན་གར་བ་ལ་ཡང་དབྱུག་པ་ཅན་དུ་ཤེས་པར་ཐལ་ལོ། །དུ་མ་ལ་སྒྲ་གཅིག་འཇུག་པ་རྒྱུ་མཚན་དོན་གཞན་གྱིས་ཁྱབ་པ་ཡང་མི་འཐད་དེ།
ཚིག་གི་དོན་དྲུག་ལ་དངོས་པོ་ཞེས་པའི་སྒྲ་གཅིག་འཇུག་པ་ཡང་ཚིག་གི་དོན་དྲུག་ལས་གཞན་པའི་དངོས་པོ་ལ་བལྟོས་པར་ཐལ་བར་འགྱུར་བའི་ཕྱིར།
ཅི་སྟེ་དེ་ཡང་ཡོད་དོ་ཞེ་ན། ཚིག་གི་དོན་དྲུག་ལས་གཞན་པའི་ཤེས་བྱ་མེད་པར་སྨྲས་པ་མི་འཐད་པར་འགྱུར་རོ། །འདི་ནི་རྣམ་འགྲེལ་ལེའུ་གསུམ་པའི་རིགས་པའོ། །ལྔ་པ་གཅེར་བུ་པ་དགག་པ་ལ།
འདོད་པ་བརྗོད་པ་དང༌།
དེ་དགག་པ་གཉིས། དང་པོ་ལ། སྟོན་པ་ནི་རྒྱལ་བ་དམ་པ་དང༌།
དྲང་སྲོང་མཆོད་འོས་དང༌། ཁྱུ་མཆོག་དང༌། འཕེལ་བ་སོགས་སྟོན་པ་ཉིད་ཤུ་རྩ་ལྔ་ཡོད་པར་བཤད་དོ། །མིང་གི་རྣམ་གྲངས་ནི་གོས་མེད་པས་གཅེར་བུ་པ་དང༌།
ཕྱོགས་ཀྱི་གོས་ཅན་དང༌། ནམ་མཁའི་གོས་ཅན་དང༌། དཀའ་ཐུབ་ཀྱིས་སྡིག་པ་ཟད་པར་འདོད་པས་ཟད་པ་དང༌།
རྒྱལ་བ་དམ་པའི་རྗེས་སུ་འབྲངས་པས་རྐྱལ་བ་པ། མཆོད་པས་སྟོན་པར་འཛིན་པས་མཆོད་འོས་པ། སྲོག་བདག་ཏུ་སྨྲ་བས་འཚོ་བ་པ།
གཅེར་བུ་ལ་ངོ་ཚར་མི་འཛིན་པས་འཛེམ་མེད་པ་དང་ཐལ་བ་པ། ཕྱོགས་སུ་ལྡོམ་བུ་བྱེད་པས་ཀུན་ཏུ་རྒྱུ་ཞེས་གྲགས་སོ། །ལུང་ནི་རྒྱས་བྱེད་སྐར་མའི་བསྟན་བཅོས་ལ་སོགས་པའོ། །འདོད་ཚུལ་ལ་འདས་འདོད་པའི་ཚིག་གི་དོན་དགུ་ནི།
སྲོག །ཟག་པ།སྡོམ་པ། ངེས་པར་རྒ་བ། འཆིང་བ། ལས། སྡིག་པ།
བསོད་ནམས། ཐར་པ་རྣམས་སོ། །དུས་འཁོར་ལས་ནི། སྲོག་ལྡན། སྲོག་ལྡན་མ་ཡིན་པ། ཟག་པ།
སྡོམ་པ། སྤང་བ། བཅིངས་པ། འཕར་བ། འགྲོ་བ། འོང་བ་སྟེ་དགུར་འདོད་པར་བཤད་ལ། དེ་ལས་སྔ་མ་འཕགས་ཡུལ་གྱི་གཅེར་བུ་པ་དང་ཕྱི་མ་ཤམྦྷ་ལའི་གཅེར་བུ་པའི་ལུགས་སུ་མཁས་པ་དག་བཞེད་དོ། །རྫས་དང་རྣམ་གྲངས་ཀྱི་འདོད་ཚུལ་ནི་སྲོག་ལྟ་བུ་དེ་དག་ཕལ་ཆེར་གྱི་རྫས་དང་རྣམ་གྲངས་གཉིས་གཅིག་པ་དང་ཐ་དད་པའི་ཚུལ་ཡོད་དེ།
དེ་གཉིས་ཡུལ་དུས་རང་བཞིན་ཐ་མི་དད་པས་དེའི་སྒོ་ནས་རྫས་གཅིག་དང་གྲངས་དང་མིང་གི་རྣམ་གྲངས་ཐ་དད་པའི་སྒོ་ནས་རྣམ་གྲངས་ཐ་དད་པར་བཞག་པའི་ཕྱིར།
དཔེར་ན་གཟུགས་ལ་སོགས་པ་དག་བུམ་པ་ལས་ཡུལ་དུས་རང་བཞིན་ཐ་མི་དད་པས་རྫས་གཅིག་ཡིན་ལ། བུམ་པ་ནི་གཅིགདང་གཟུགས་ལ་སོགས་པ་ནི་མང་པོ་ཡིན་པས་གྲངས་ཀྱིས་ཐ་དད་པར་འཇོག་པ་བཞིན་ནོ། །དེ་ཡང་རྫས་ནི་ནམ་ཡང་མི་འཇིག་པར་རྗེས་སུ་འགྲོ་བས་རྟག་པ་ཡིན་ལ།
རྣམ་གྲངས་ནི་རྗེས་སུ་འགྲོ་བ་མེད་པའི་སྒོ་ནས་ལྡོག་པས་མི་རྟག་པའོ་ཞེས་ཟེར་རོ། །དེ་ལ་སྲོག་ནི།
བདག ་ཡིན་ལ། དེ་ཡང་སྐྱེས་བུ་རྣམས་ཀྱི་ལུས་ཀྱི་ཚད་ཇི་ལྟ་བ་བཞིན་དུ་ཡོད་པ་ཤེས་པ་ཡིན་ལ།
ངོ་བོ་རྟག་པས་དུས་ཐམས་ཅད་དུ་རྗེས་སུ་འགྲོ་བའམ་འཇུག་པ་ཅན་དང༌། རྣམ་གྲངས་མི་རྟག་པས་གནས་སྐབས་ལྡོག་པའི་མཚན་ཉིད་ཅན་ཡིན་ནོ། །ཞེས་སྨྲའོ། །གཞན་ཡང་་དུས་ནི་གསུམ་སྟེ།
འདས་པ་དང་མ་འོངས་པ་དང་ད་ལྟར་བ་རྫས་སུ་ཡོད་པ་རྟག་པའོ། །རྫས་ནི་དྲུག་སྟེ། གྲོག་དང༌།
གང་ཟག་དང༌། དུས་དང༌། ནམ་མཁའ་དང༌། བསོད་ནམས་དང༌། སྡིག་པའོ། །སྲོག་ཅན་གྱི་སྡེ་ནི་དགུ་སྟེ།
དེ་ལས་དང༌། ཆུ་དང༌། ཤིང་དང༌། མེ་དང༌།རླུང་དང༌། སྲིན་བུ་དང༌། གྲོག་མ་དང༌། བུང་བ་དང༌།
མི་རྣམས་སོ། །དེ་ལས་སོགས་ལྔ་ནི་དབང་པོ་གཅིག་ལྡན་ཏེ། རེག་པའི་དབང་པོ་དང་ལྡན་པའི་ཕྱིར་རོ། །སྲིན་བུ་དང༌།
བུང་བ་དང་ཉ་ལྕིབས་དང་སྲིན་བུ་པདྨ་ལ་སོགས་པ་ནི་དབང་པོ་གཉིས་ལྡན་ཏེ། རེག་པ་དང་རོའི་དབང་པོ་དང་ལྡན་པའི་ཕྱིར་རོ། །གྲོག་མ་དང་སྲིན་གྱི་མེ་ལ་སོགས་པ་ནི་དབང་པོ་གསུམ་ལྡན་ཏེ།
རེག་པ་དང་རོ་དང་སྣའི་དབང་པོ་དང་ལྡན་པའི་ཕྱིར། སྦྲང་བུ་མཆུ་རིང་ལ་སོགས་པ་ནི་དབང་པོ་བཞི་ལྡན་ཏེ།
རེག་པ་རོ་སྣ་མིག་གི་དབང་པོ་དང་ལྡན་པའི་ཕྱིར་རོ། །མ་དང་རྐང་བཞི་པ་དང་བྱ་ལ་སོགས་པ་ནི་དབང་པོ་ལྔ་སྟེ། རེག་པ་དང༌།
རོ་དང་སྣ་དང་མིག་དང་རྣ་བའི་དབང་པོ་དང་ལྡན་པའི་ཕྱིར། ཞེས་ཟེར་རོ། །དུས་འཁོར་ནས་སྲོག་ཅན་གྱི་སྡེ་དྲུག་ཏུ་འདོད་པར་ཡང་བཤད་དོ། །ཟག་པ་ནི་དགེ་བ་དང་མི་དགེ་བའི་ལས་ཀྱིས་ཟག་པར་བྱེད་པའོ། །སྡོམ་པ་ནི་ཟག་པ་འགོག་པ་ཉིད་དེ། ལས་གསར་དུ་མི་གསོག་པའི་ཕྱིར་རོ། །ངེས་པར་རྒ་བ་ནི་སྡོམ་པ་དེ་ཉིད་དང༌།
ཟས་མི་ཟ་བ་དང༌། སྐོམ་མི་འཐུང་བ་དང༌། བསམ་གཏན་ལ་སོགས་པ་དཀའ་ཐུབ་དང་བཅས་པས་སྔོན་ཉེ་བར་བསགས་པའི་ལས་རྣམས་ཟད་པར་བྱེད་པའོ།།
འཆིང་བ་ནི་ཉེས་པར་སྨྲ་བ་དག་གིས་བརྟགས་པའི་ལོག་པར་ལྟ་བའོ། །ལས་ནི་ཕྱིས་མྱོང་བར་འགྱུར་བ་ལ་སོགས་པའོ། །སྡིག་པ་ནི་ཆོས་མ་ཡིན་པའོ། །བསོད་ནམས་ནི་ཆོས་སོ། །ཐར་བ་ནི་ལུས་གཅེར་བུ་དང་ངག་མི་སྨྲ་བ་ལ་སོགས་པའི་སྡོམ་པ་དང༌།
མི་འཚེ་བ་དང་བདེན་སྨྲ་སོགས་བརྟུལ་ཞུགས་དང༌། བློ་གྲོས་དང་ཐོས་པ་སོགས་ཡེ་ཤེས་དང༌། མེ་ལྔ་བསྟེན་པ་ལ་སོགས་པའི་དཀའ་ཐུབ་ཀྱི་སྤྱོད་པ་ལ་བརྟེན་ནས་ལས་ཐམས་ཅད་ཟད་པ་ན་འཇིག་རྟེན་ཐམས་ཅད་ཀྱི་སྟེང་ན་ཁམས་གསུམ་ལས་འདས་པ་དབྱིབས་གདུགས་དཀར་པོ་གྱེན་ལ་བསླང་བ་ལྟ་བུ།
ཁ་དོག་ཀུ་མུད་ཀྱི་མདོག་ཅན་དཀར་པོ། །ཆད་དཔག་ཚད་འབུམ་ཕྲག་ཞེ་ལྔ་ཡོད་པ་འཇིག་རྟེན་འདུས་པ་ཞེས་བྱ་བ་སྲོག་ཡོད་པས་དངོས་པོ་ཡིན་པ་འཁོར་བ་ལས་གྲོལ་བས་དངོས་པོ་མེད་པ་ཡང་ཡིན་པ་དེར་འགྲོ་སྟེ།
གནས་དེ་ལ་ནི་ཐར་པའི་འགྲོ་བ་ཞེས་བྱའོ། །དེ་ལྟར་ཡང་རྒྱལ་བ་དམ་པས། ཁ་བ་རྒྱ་སྤས་མེ་ཏོག་མདོག
།བ་ཞོ་བ་མ་མུ་ཏིག་མདག །གདུགས་བཀན་བཟུང་བའི་དབྱིབས་འདྲ་བ། །ཐར་པ་ཡིན་པར་རྒྱལ་བས་བཤད། །ཅེས་སོ། །དངོས་པོ་རྣམས་ཀྱི་རྒྱུ་འབྲས་ནི། རང་བཞིན་གཅིག་ཅིང་གནས་སྐབས་ཐ་དད་པས་འབྲས་བུ་ཐམས་ཅད་བདག་གཞན་གཉིས་ཀ་ལས་སྐྱེ་བ་ཡིན་ནོ། །ཞེས་ཟེར་རོ། །འདོད་པ་རྣམས་སྒྲུབ་བྱེད་ཀྱི་རིགས་པ་ནི།
ལྗོན་ཤིང་ཆོས་ཅན། སེམས་ཡོད་དེ། མཐུན་པ་ལས་སྐྱེ་པའི་ཕྱིར། དཔེར་ན་རྟ་ལས་རྟ་སྐྱེ་བ་བཞིན་དང༌།
དུས་སུ་ལྡན་པ་ལས་སྐྱེ་བའི་ཕྱིར། དཔེར་ན་རྟ་སོགས་དཔྱིད་དུས་དང་ཁྱི་སོགས་སྟོན་ཀ་སྐྱེ་བ་བཞིན་དང༌།
དགུན་དུས་གཉིད་ལག་ཅིང་དབྱར་དུས་སྨྱོ་བའི་ཕྱིར། རྐྱང་ལ་སོགས་པ་བཞིན། ཞེས་སོགས་ཟེར་ཞིང༌།
འཇིག་རྟེན་ལ་ཆོས་ཀུན་མཁྱེན་པ་མེད་དེ། གཅིག་གིས་ཀུན་མཁྱེན་པ་ཚད་མས་མ་གྲུབ་པའི་ཕྱིར་དང༌།
སྟོན་པ་སངས་རྒྱས་ནི་ཀུན་མཁྱེན་མ་ཡིན་ཏེ། སྐར་མའི་བསྟན་བཅོས་སོགས་མ་བརྩམས་པའི་ཕྱིར་དང༌།
དེ་ནས་བཤད་པ་སུན་འབྱིན་པའི་ཕྱིར་དང༌། དངོས་པོ་བཅུ་བཞི་ལུང་མ་བསྟན་པའི་ཕྱིར་དང༌། འཁོར་བའི་ཐོག་མའི་མཐའ་མ་ཤེས་པའི་ཕྱིར།
ཞེས་སོགས་མང་དུ་སྨྲའོ། །དེ་དག་རྒྱས་པར་མངས་པས་དོགས་ནས་མ་བྲིས་ཏེ། རྟོག་གེ་འབར་བར་བལྟ་བར་བྱའོ། །གཉིས་པ་དེ་དགག་པ་ནི།
རྒྱུ་འབྲས་རང་བཞིན་གཅིག་པ་མི་འཐད་དེ། དོན་ལ་འཇུག་པ་འཆོལ་བར་ཐལ་བའི་ཕྱིར། གཞན་དུ་ན་ཞོ་འཐུང་བ་དོན་དུ་གཉེར་བས་རྔ་མོ་འཐུང་བ་ལ་འཇུག་པར་རིགས་ཏེ།
རྒྱུ་དང་འབྲས་བུའི་རང་བཞིན་དབྱེར་མེད་པའི་ཕྱིར་རོ། །ཅི་སྟེ་ཞོ་ལ་རྔ་མོ་ལས་ཕུལ་དུ་གྱུར་པའི་ཁྱད་པར་ཡོད་པས་སྐྱོན་མེད་དོ་ཞེ་ན།
འོ་མའི་རྣམ་འགྱུར་གྱི་ཁྱད་པར་གང་ལ་ཡོད་པ་དེ་ཉིད་ཁོ་ན་ཞོ་ཡིན་དགོས་པས་འོ་མའི་རྣམ་འགྱུར་དེ་རྔ་མོ་ལ་མེད་པའི་ཕྱིར།
རྔ་མོ་ནི་ཞོ་རྔ་གཉིས་ཀ་མིན་གྱི་ཞོ་ལས་གཞན་ཡིན་པར་ཐལ་ལོ། །འདོད་ན། རང་བཞིན་གཅིག་པ་ཉིད་ཉམས་སོ། །གཞན་ཡང་དངོས་པོ་རྣམས་ལ་སྒྲ་བློ་ཐ་དད་པ་འཇུགཔར་མི་འགྱུར་བར་ཐལ། དངོས་པོ་ཐམས་ཅད་རང་དང་རང་མ་ཡིན་པ་ཀུན་གྱི་བདག་ཉིད་ཡིན་པའི་ཕྱིར།
འདོད་ན། ཐ་དད་པ་དུ་མ་གཅིག་ཏུ་འདུས་པ་མ་སྲིད་པར་ཐལ་ལོ། །ཞེས་པ་ནི་རིག་པའི་དབང་ཕྱུག་གིས།
ཐམས་ཅད་གཉིས་ཀའི་ངོ་བོ་ཉིད། །དེ་ཡི་ཁྱད་པར་བསལ་བའི་ཕྱིར། །ཞོ་འཐུང་ཞེས་ནི་བསྐུལ་བ་ན། །ཅིའི་ཕྱིར་རྔ་མོ་ལ་མི་འཇུག
།ཅེས་སོགས་ཀྱི་རིགས་པའི། །གཞན་ཡང་སྲོག་སོགས་མི་འཇིག་ཀྱང་འཇིག་པ་ཅན་ཡིན་པར་འདོད་ཅིང༌།
བདག་དེའི་བདག་ཉིད་གང་ཡིན་པའི་རྫས་དེ་རྣམ་གྲངས་འབྲེལ་བར་འདོད་པ་མི་འཐད་པར་ཐལ་སྔར་ཡོད་མ་དར་བའི་རང་གི་ངོ་བོ་དང་འབྲེལ་ན་ཡང་མི་འཐད།
སྔར་གྱི་ངོ་བོ་དོར་བ་དང་འབྲེལ་ན་ཡང་མི་འཐད་པའི་ཕྱིར། དང་པོ་མ་གྲུབ་ན། བདག་གམ་སེམས་པ་ཅན་ཆོས་ཅན།
འཇིག་པ་ཅན་མ་ཡིན་པར་ཐལ། སྔ་ཕྱིའི་གནས་སྐབས་ལ་ཁྱད་པར་འགྱུར་བ་མེད་པའི་ཕྱིར། ཕྱི་མ་མ་གྲུབ་ན།
དེ་རྟག་པ་མ་ཡིན་པར་ཐལ། སྔར་གྱི་རང་གི་ངོ་བོ་དོར་བའི་ཕྱིར། ཅི་སྟེ་རྫས་གཅིག་པས་སྐྱོན་མེད་བྱས་ན།
དེ་གཉིས་ལ་འཇིག་མི་འཇིག་གི་ཁྱད་པར་མེད་པར་ཐལ། རང་བཞིན་ཆ་མེད་གཅིག་ཡིན་པའི་ཕྱིར། འདོད་ན་མཚན་ཉིད་ཐ་དད་པ་ཉམས་སོ༑ ༑ཞེས་པ་ནི་ཚད་མའི་དེ་ཁོ་ན་ཉིད་བསྡུས་པ་ལས་བཤད་པའི་རིགས་པའོ། །ཤིང་རྣམས་ལ་དབང་པོ་ཡོད་པའི་སྒྲུབ་བྱེད་རྣམས་ཀྱང་མ་ངས་ཏེ།
དབང་པོ་མེད་ཀྱང་ཡུལ་ལ་ཉེ་བར་དམིགས་པ་འཁྲུལ་པ་འབྱུང་བའི་ཕྱིར། དཔེར་ན་ཁབ་ལེན་གྱི་རྡོ་དང་ཉེ་བ་ལས་ལྕགས་གཡོ་བ་བཞིན།
ལྗོན་ཤིང་ཆོས་ཅན། སེམས་ལྡན་མ་ཡིན་ཏེ། སྐྱེ་གནས་བཞིས་མ་བསྡུས་པའི་ཕྱིར་དང༌།དཀྱིལ་དུ་བཅད་ཀྱང་བཟོད་པའི་ཕྱིར།
ཕག་དུམ་བཞིན། དུས་སུ་སྐྱེ་བ་དང༌།ཕན་པ་དང༌།གནོད་པ་ལ་སོགས་པའི་རྟགས་ཀྱང་སེམས་ལྡན་དུ་བསྒྲུབ་པ་ལ་མ་ངེས་པ་ཡིན་ཏེ།སེམས་དང་མི་ལྡན་ཡང་རིགས་མཐུན་པ་ལས་འབྲས་བུ་སྣ་ཚོགས་པ་མཐོང་བའི་ཕྱིར།
གྲོག་མཁར་དང༌། བྱི་རུ་དང༌། གསེར་གྱི་མྱུ་གུ་ལ་སོགས་པ་བཞིན་ནོ། །ཞེས་པ་རྣམས་ནི་སློབ་དཔོན་ལེགས་ལྡན་གྱི་གཞུང་ལས་བྱུང་བའི་རིགས་པའོ། །ཀུན་མཁྱེན་ཀུན་མཁྱེན་མ་ཡིན་པར་སྒྲུབ་པའི་རིགས་པ་རྣམས་ཀྱང་རིགས་པ་ལྟར་སྣང་འབའ་ཞིག་སྟེ།སྐར་རྩིས་ཀྱི་བསྟན་བཅོས་ལ་སོགས་པ་ནི་གྲོལ་བ་དོན་དུ་གཉེར་བ་རྣམས་ལ་དགོས་པའི་གཙོ་བོ་མ་ཡིན་པའི་ཕྱིར།ཐུན་མོང་གི་བསྟན་བཅོས་སུ་མ་གསུངས་པ་དང༌།
ལུང་མ་བསྟན་གྱི་ལྟ་བ་བཅུ་བཞི་མཁྱེན་ཀྱང་བསྟན་ན་དོན་མ་ཡིན་པ་ཆེན་པོ་བསྐྱེད་པར་དགོངས་ནས་མ་གསུངས་པ་དང༌།
འཁོར་བ་ལ་ཐོག་མའི་མཐའ་མེད་པས་གནས་ཚུལ་ཇི་ལྟ་བ་བཞིན་དུ་མཁྱེན་ནས་གསུངས་པ་ཡིན་པ་སོགས་ཁྱོད་ཀྱིས་སྐྱོན་དུ་གང་སྨྲས་པ་ཐམས་ཅད་སྟོན་པ་སངས་རྒྱས་ཀྱིས་གདུལ་བྱའི་ཁམས་དང་བསམ་པ་དང་བག་ལ་ཉལ་ཇི་ལྟ་བ་བཞིན་མཁྱེན་ནས་གདུལ་བྱ་འདུལ་བའི་ཕྱིར་དུ་བསྟན་པའི་མཛད་པའི་རྣམ་གྲངས་ཁོ་ན་ཡིན་པས་ཀུན་མཁྱེན་ཉིད་དུ་བསྒྲུབ་པ་ལ་གཏན་ཚིགས་སུ་འགྱུར་གྱི་མ་ཡིན་པར་བསྒྲུབ་པ་ལམ་ཡིན་པའི་ཕྱིར་རོ། །འདི་དག་ཀྱང་རྒྱས་པར་དབུ་མ་སྙིང་པོ་རྩ་འགྲེལ་སོགས་སུ་བལྟ་བར་བྱའོ། །གསུམ་པ་དེ་དག་གི་དོན་བསྡུ་བ་ནི།
དེ་ལྟར་མུ་སྟེགས་རྣམས་ཀྱིས་ཀུན་ཏུ་བརྟགས་པའི་རྟག་པ་དང་ཆད་པའི་མཐའ་ཐམས་ཅད་དངོས་པོ་སྟོབས་ཞུགས་ཀྱི་རིགས་པ་དྲི་མ་མེད་པ་དག་གིས་འགོག་པའི་ཚུལ་རྒྱལ་བའི་གདུང་འཚོ་བ་ཤིང་རྟ་ཆེན་པ་དག་གི་གཞུང་ལས་མང་དུ་འབྱུང་བ་ནི་དགོས་པ་ཁྱད་པར་ཅན་དུ་མ་དང་ལྡན་ཏེ།
སྙིང་ནས་གྲོལ་བ་དོན་དུ་གཉེར་བ་རྣམས་ཀྱིས་རང་གི་ལུགས་ཀྱི་བསྟན་པ་དང་སྟན་པ་སྐྱོན་མེད་པ་ལ་རིགས་པའི་ལམ་ནས་དྲངས་པའི་དད་པ་བཅས་མ་མ་ཡིན་པ་བསྐྱེད་པར་བྱ་བའི་ཕྱིར་དང༌།
འཁོར་བ་ལས་གྲོལ་བར་བྱེད་པའི་ལམ་ཡང་དག་པ་སྐྱེ་བའི་བགེགས་ཀྱི་གཙོ་བོ་སྡུག་བསྔལ་ལ་རྒྱུ་མེད་པར་འཛིན་པ་དང༌།
རྒྱུ་ཡོད་ཀྱང་གཙོ་བོ་དང་དབང་ཕྱུག་ལ་སོགས་པ་མི་མཐུན་པའི་རྒྱུ་ལས་འབྱུང་བར་འཛིན་པ་དང༌།
དོན་མ་ཡིན་པའི་དཀའ་ཐུབ་དང་དབང་ཕྱུག་གིས་དབང་བསྐུར་བ་ལ་སགས་པ་ལམ་མ་ཡིན་པ་ལ་ལམ་དུ་འཛིན་པ་དང༌།
ཐར་པ་མ་ཡིན་པ་ལ་ཐར་པར་འཛིན་པ་ལ་སོགས་པའི་ལོག་པར་རྟོག་པ་མཐའ་དག་དྲུངས་ནས་འབྱིན་པའི་ཕྱིར་དང༌།
གཞན་ཡང་སྐྱེ་བ་གཞན་དག་ཏུ་རྒྱང་འཕེན་སོགས་ཀྱི་གྲུབ་པའི་མཐའ་དང་གཞུང་ལུགས་ཐོས་པའི་སྟོབས་ཀྱིས་བག་ཆགས་བཞག་པ་རྣམས་ཀྱི་ས་བོན་ཉམས་སྨད་པར་བྱ་བའི་ཕྱིར་དང༌།
སྐྱེ་བ་ཕྱི་མ་རྣམས་སུ་ཡང་ལག་པར་ལྟ་བ་མཐའ་དག་ལས་ལྡོག་པའི་ཕྱིར་དང༌། ཡང་དག་པའི་ལྟ་བ་མྱུར་བ་མྱུར་བར་སྐྱེ་བའི་བག་ཆགས་བརྟན་པོ་བཞག་པར་བྱ་བའི་ཕྱིར་དུ་དགག་སྒྲུབ་ཀྱི་རྣམ་པར་བཞག་པ་དུ་མ་མཛད་པ་ཡིན་པའི་ཕྱིར་རོ། །དེས་ན་བདག་ལེགས་སུ་འདོད་པ་རྣམས་ཀྱིས་ཡང་དག་པའི་རིགས་པའི་གཞུང་ལུགས་ཆེན་མོ་རྣམས་ལ་བཤད་ཆོས་ཙམ་དང་ཕྱིའི་གོ་རྒྱ་གཅོད་པའི་ཡན་ལག་ཙམ་ཡི་གྱི་སྒྲུབ་པ་ཉམས་ལེན་བྱེད་པ་ལ་མི་མཁོའོ་སྙམ་པའི་ལྟ་བ་ངན་པ་དང༌།
གཞན་དང་གཤགས་བྱེད་པ་ཙམ་གྱི་ཕྱིར་དང༌། རྙེད་བཀུར་སོགས་འཐོབ་ཏུ་རེ་བའི་ཀུན་སློང་ངན་པ་མཐའ་དག་རྒྱང་རིང་དུ་བསྲིངས་ཏེ་གུས་སྦྱོར་དང་རྟག་སྦྱར་གྱི་བརྩོན་པས་ཐོས་པ་དང༌།བསམ་པ་ལྷུར་ལེན་པ་གནོད་ཀྱི་དོན་པོ་ཡིན་ནོ། །དོན་གྱི་དབང་འདི་གཟིགས་ནས་བདག་ཅག་རྣམས་ཀྱི་འདྲེན་པ་དམ་པ་རྒྱལ་བའི་གདུང་འཚོབ་ཆེན་པོ་རྒྱལ་བ་གཉིས་པས།
སྨྲ་བའི་ཁྱུ་མཆོག་འཕགས་པ་ཡབ་སྲས་དང༌། །ལོག་སྨྲ་ཚར་གཅོད་ཕྱོགས་གླང་གྲགས་པ་ལས། །ལེགས་པར་འོངས་པའི་རིགས་ལམ་བདུད་རྩིའི་ཆུས། །བློ་མིག་དྲི་མ་ཡང་ཡང་མ་བཀྲུས་ན། །ཤིན་ཏུ་ཟབ་གནས་མཐོང་བ་སྨོས་ཅི་དགོས། །རགས་པའི་ལུང་དོན་ལ་ཡང་དཔྱོད་པ་ན། །ཕལ་ཆེར་ལོག་པར་རྟོག་པ་འཕེལ་འགྱུར་ཞིང༌། །གལ་ཏེ་ཡང་དག་དམ་བཅའ་ཙམ་ཞིག་གི༌།ངེས་པ་རྙེད་ཀྱང་སྒྲུབ་དང་སུན་འབྱིན་གྱི། །ཚད་མའི་སྟོབས་ཀྱིས་ཐེ་ཚོམ་མ་ཆོད་ཕྱིར། །འདམ་ལ་བཏབ་པའི་ཕུར་པ་བཞིན་འགྱུར་བས། །ཡང་དག་བག་ཆགས་བརྟན་པོ་འཇོག་མི་ནུས། །ཞེས་དང༌།དེ་ཕྱིར་བློ་གྲོས་ཕྲ་ཞིང་མཛངས་པ་དང༌། །ཀུ་ཤའི་རྩེ་ལྟར་མ་གྱུར་དེ་སྲིད་དུ། །ངོམས་མི་སླ་བར་རིགས་པའི་གཞུང་ལུགས་ལ། །མཁས་པའི་བཤེས་ལ་བརྟེན་ཏེ་ལེགས་པར་སྦྱངས། །ཞེས་གསུངས་པ་ཡིན་ནོ། །
|