༢༠༠༩ལོའི་མགར་སྐོར་ཕུ་ནུ་མཉམ་འདུས་སྐབས་ལྔ་བ་མཚམས་སྦྱོར།
སྤྱི་ལོ་༢༠༠༩ལོའི་ཟླ་༧བའི་ཚེས་༡༥ཉིན་འབོས་ལམ་རིན་རྡོར་གྱིས་རྒྱབ་སྐྱོར་གནང་སྟེ་མགོ་ལོག་རྨ་ཆེན་རྫོང་རྨ་རྒྱལ་སྦོམ་རའི་ཉེ་འདབས་དབྱིག་གི་སེང་གེ་བརྒྱ་འདུས་སུ་མགར་སྐོར་ཕུ་ནུ་མཉམ་འདུས་སྐབས་ལྔ་བ་འཚོགས། ལོ་འདིར་མཁན་ཆེན་འཇིགས་མེད་ཕུན་ཚོགས་འབྱུང་གནས་མཆོག་སྔོན་ཆད་དངོས་སུ་ཕེབས་པའི་དབྱིག་གི་སེང་གེ་བརྒྱ་འདུས་ཀྱི་ཉེ་འདབས་ངང་བའི་ཆུ་མདུད་ཅེས་ཨ་མྱེས་རྨ་ཆེན་སྦོམ་རའི་གངས་མདུན་དེར་མགར་ཚང་གི་བསང་ཁྲི་ཁམས་གསུམ་དབང་སྡུད་དུ་ལྷ་བསང་ཕུལ་ཏེ་རྒྱལ་བསྟན་དར་ཞིང་འགྲོ་ཁམས་སྐྱིད་པའི་ཐུགས་སྨོན་སྤྲོ་ཚོགས་སུ་ཕེབས་པའི་བླ་སྤྲུལ་གང་མང་གིས་གནང་ཞིང་། ཐེག་ཆེན་གསོ་སྦྱོང་དང་སྨྱུང་གནས། ནོར་ལྷ་གཡང་སྒྲུབ་དང་སྒྲོལ་མའི་མནྜལ་སོགས་མ་ཎི་སིདྡྷི་གང་མང་བཏོན། ས་དེར་གཏེར་བུམ་དང་ཁྲི་དར་རྡོ་བརྐོས་ཆོས་ཆེན་བསྒྲུབས། ལོ་འདིའི་སྤྲོ་ཚོགས་ཐོག་ཏུ་ཀན་སུའུ་ཞིང་ཆེན་རྨ་ཆུ་རྫོང་ཉིན་མའི་མགར་སྐོར་གྱི་སྐུ་ཚབ་པ་ཀོ་བྷ་དང་བསམ་ཁོ། བསམ་ཕྲུག ལྷ་མོ་ཚེ་བརྟན། བསྟན་ཁོ། བཀྲ་ཤིས་དབང་རྒྱལ། དཀོན་མཆོག མགར་ཨ་སངས། མགོན་པོ་ནོར་བུ། མགོན་པོ་རིག་འཛིན། རྣམ་རྒྱལ་དབང་ཕྱུག་སོགས་ཡོང་། ཉིན་མའི་མགར་སྐོར་དེ་ཐོག་དང་བོར་མགར་སྐོར་ཕུ་ནུའི་སྤྲོ་ཚོགས་སུ་ཞུགས་པའི་ལེགས་སྐྱེས་ལ་སྒོར་རྐྱང་སྟོང་གཉིས་དང་ཡུམ་དུམ་པ་བཅུ་གཉིས། མགར་ཚང་གི་སྦྲ་ནག་གི་ཧྲག་ཕྱར་བཅས་ཕུལ། ཆུ་ཁ་མའི་མགར་སྐོར་གྱི་ཚེ་རིང་སྒྲོལ་མ་ཡང་ཡོང་། མགར་སྐོར་སེར་སྐྱ་ཕོ་མོ་རྒན་གཞོན་ཡོད་ཚད་མཉམ་འདུས་ཀྱི་འཚོགས་ཐོག་ཏུ་ཀན་སུའུ་རྨ་ཆུའི་གཞོན་ནུ་མགར་ཨ་སངས་ཀྱིས་ཐེངས་རྗེས་མའི་མགར་སྐོར་ཕུ་ནུའི་སྤྲོ་ཚོགས་རྨ་ཆུ་རྫོང་ནས་འཚོགས་དགོས་པའི་རེ་བ་དང་གྲོས་གཞི། མགར་སྤྱིའི་མཐུན་སྒྲིལ་དང་ལ་རྒྱ། མ་འོངས་པའི་འཕེལ་ཕྱོགས་བཅས་ཀྱི་ཐད་རང་གི་བསམ་ཚུལ་དང་སྙིང་གཏམ་གང་མང་གླེང་བས། སྐྱ་སེར་ཚང་མ་སེམས་འགུལ་ཐེབས་ཤིང་མགར་ཨ་སངས་ཀྱིས་ཁྲིད་ཡོང་བའི་ཁོའི་གླུ་གར་ཁམས་གསེང་གླིང་གི་གླུ་བ་གླུ་མ་འགས་ཚོགས་རར་སྤྲོ་སྣང་བསླངས་ཤིང་བརྗེད་མེད་བག་ཆགས་ཟབ་མོ་བཞག ཕྱི་ཉིན་མགར་སྐོར་གྱི་སྐུ་ཚབ་པ་ཚོ་ཕྱིར་རང་ཡུལ་དུ་འགྲོ་གྲབ་བྱེད་ཀྱི་ཡོད་མོད། མགར་ཨ་སངས་མགོ་ལོག་མགར་སྐོར་གྱི་ཨ་ཁུ་ལྷ་མགོན་གཙོ་བྱས་པའི་མགར་གྱི་ཕུ་ནུ་ཚོའི་རེ་བ་ལྟར་རྒྱལ་ཁབ་ཀྱི་བྱ་བ་དང་རང་གིས་གཉེར་བའི་མགར་སྟོང་བཙན་གླུ་གར་ཁམས་གསེང་གླིང་གི་ཚོང་ལས་ཀྱི་བྱ་བ་སོགས་གལ་ཆུང་དུ་བཞག་སྟེ་མགར་སྐོར་གྱི་ཕ་ཆོས་དང་སྤྱི་དོན་གལ་ཆེན་དུ་བརྩིས་ནས་ཡུལ་ལ་མ་ལོག་པར་མགོ་ལོག་ནས་བསྡད། ཐེངས་འདིའི་སྤྲོ་ཚོགས་ཀྱི་སྤྱི་ཁྱབ་བཀོད་འདོམས་པ་མི་བདུན་གྱི་ནང་དུ་ཞུགས་ནས་སྐབས་ལྔ་བའི་མགར་སྐོར་ཕུ་ནུའི་སྤྲོ་ཚོགས་ཀྱི་མགོ་མཇུག་ཚང་མར་ཉིན་གང་མང་ཞིག་གི་དུས་ཚོད་བེད་སྤྱད་དེ་རོགས་རམ་ཅི་ཐུབ་ཅིག་བྱས་པས། མགོ་ལོག་མགར་སྐོར་གྱི་སྤྲུལ་རྡོ་རྗེ་བརྟན་དང་མགར་སྤྲུལ་ཡོན་ཏན་རིན་ཆེན་སོགས་དབུར་བཞུགས་པའི་འགན་འཛིན་པ་ཨ་ཁུ་ལྷ་མགོན་སོགས་ཀྱིས་མགར་ཨ་སངས་ཀྱིས་ཐེངས་རྗེས་མའི་མགར་སྐོར་གྱི་སྤྲོ་ཚོགས་དེ་རྨ་ཆུ་རྫོང་ནས་འཚོགས་པར་རེ་བ་བཏོན་པར་གྲོས་འཆམ་བྱུང་། སྤྲུལ་རྡོ་རྗེ་བརྟན་དང་མགར་སྤྲུལ་ཡོན་ཏན་རིན་ཆེན་སོགས་ཀྱིས་གཞོན་ནུ་མགར་ཨ་སངས་ལོ་ཆུང་ཡང་རང་གི་རུས་ལ་བློ་དཀར་བ་དང་། བསམ་པ་དྲང་ཞིང་སྤོབས་པ་ཡོད་པར་བསྟོད་བསྔགས་ཀྱི་དར་ཁ་འཐེན། སྐབས་དྲུག་པའི་མགར་སྐོར་ཕུ་ནུའི་སྤྲོ་ཚོགས་དེ་གཞོན་ནུ་མགར་ཨ་སངས་ཀྱི་རེ་བ་ལྟར་ཀན་སུའུ་ཞིང་ཆེན་རྨ་ཆུ་རྫོང་ནས་འཚོགས་རྒྱུ་ཐག་བཅད།
༢༠༠༩ལོའི་མགར་སྐོར་ཕུ་ནུ་མཉམ་འདུས་སྐབས་ལྔ་བ།
༢༠༠༩ལོའི་མགར་སྐོར་ཕུ་ནུ་མཉམ་འདུས་སྐབས་ལྔ་བའི་འགན་འཛིན་ཡོངས།
མགར་སྐོར་ཕུ་ནུ་མཉམ་འདུས་ཐེག་ཆེན་གསོ་སྦྱོང་སྨྱུང་གནས་ལ་ཞུགས་པ།
༢༠༠༩ལོའི་མགར་སྐོར་ཕུ་ནུ་མཉམ་འདུས་སྐབས་ལྔ་བ་འཚོགས་སའི་ཡུལ་ངོས།
|