| གཙང ་སྒྲོལ་མ་སྐྱབས།
ང༌།
སེམས་ཀྱི་ན་ཟུག་ཧ་ཅང་བཙན་པས་ལག་པའི་སྨྱུག་ཆུང་འགུལ་ཐེངས་གཅིག །
དཀར་ཞིང་འཇམ་པའི་ཤོག་དཀར་སྟེང་དུ་བྲིས་པའི་ཡི་གེ་ནག་ཆུང་གཉིས། །
ཚིག་གི་སྡེབ་སྦྱོར་ལེགས་པོ་མིན་ཞིང་སྙན་ཆ་མེད་པའི་རྩོམ་སྟངས་གསུམ། །
དམར་ཆུང་སེམས་ཀྱི་སྙིང་གཏམ་དྲོད་མོ་ཁྱོད་ཚོར་ཕན་པའི་སྨོན་ལམ་འདེབས། །
མཐོང༌།
ཁོ་ར་ཁོར་ཡུག་གལ་སྙིགས་མང་ཞིང་ནོར་འཛིན་མ་ཡི་སྒེག་ཉམས་ཤོར། །
ས་འཛིན་དཀར་པོ་ཐན་པའི་གཡོགས་ཤིང་སྔོ་ཞིང་དྭངས་བའི་གནམ་ཟླ་འགྱུར། །
ཁ་བཤད་ཆུ་ཡི་ཝུ་བ་ཡིན་ཞིང་ལག་ལེན་བྱེད་པར་ཨ་ཅང་གལ། །
མཛེ་སཤིང་སྡུག་པའི་སཱ་ལའི་སྨན་ལྗོངས་བདག་སྐྱོང་བྱེད་པར་སྙིང་ནས་གལ། །
རང་བྱུང་ས་ཡི་གཏེར་ཁ་བླངས་ཤིང་གསེར་ལྡན་མ་ཡི་ཉིང་བཅུད་ཤོར། །
རྫ་ཆུ་བསིལ་མའི་བཞུར་སྒྲ་སྙན་ཡང་སྔར་གྱི་དྭངས་གསལ་དེ་ལྟ་མེད། །
དམར་ཆུང་སེམས་ལ་བྲེལ་ཤ་ལངས་ཀྱང་ནུས་བ་ཆུང་བས་ག་ལ་འགྲུབ། །
མང་བོ་བཀྱགས་ན་སྡོང་བོ་ཡང་བས་ཀུན་གྱིས་འདི་ལ་འབད་པར་འཚལ། །
ཤེས་ལྡན་བློ་གྲོས་རྩལ་ལས་ཐོན་པའི་གཅོད་བྱེད་ལ་སོགས་ཤུན་དུ་རྨད། །
ནག་ཅིང་མཐུག་པའི་ནགས་ཚལ་སྟུག་པོ་ཕྲ་ཆུང་མིག་ལམ་ན་འགྲིབ། །
བདེན་དང་བྲལ་བའི་གནས་ལུགས་འོག་ནས་སྐྱོ་བའི་སེམས་པ་འཁྱགས་ཀྱིས་བསྡམས། །
བདེ་ཞིང་སྐྱིད་པའི་ཁྱིམ་གཞིས་དྲོད་མོ་སྲུང་སྐྱོབ་བྱེད་པའི་འདུ་ཤེས་དགོས། །
ཕྱི་སྣོད་འཇིག་རྟེན་མཛེས་སྡུག་ལྡན་ལ་ནང་བཅུད་སེམས་ལ་རིགས་གཟུགས་མང༌། །
ཤེས་ལྡན་མི་ནི་ཡངས་རྩེར་སོན་ལ་རིག་པ་རྣ་ཞིང་ཐབས་ལ་མཁས། །
རྐང་གཉིས་སྲིན་པོའི་བདེ་སྐྱིད་ཆེད་དུ་དབུགས་ཀྱི་སྲོག་ལ་གནོད་པ་བཏང༌། །
ཤ་ཁྲག་ཟ་བའི་ང་ཚོའི་ལས་འདི་བསམ་ཤིང་བསམས་ཤིང་འཇིགས་སྣང་ཆེ། །
ཐོས།
ཐོན་མའི་དཀའ་སྡུག་ཁྱད་དུ་གསད་ནས་དབྱངས་གསལ་སོ་བཞིའི་རྣམ་བཞག་འདི། །
གོ་ལ་ཟླུམ་པོ་སྙན་གྲགས་ཆེ་ཞིང་ཀུན་གྱིས་འདི་བརྣབ་སེམས་སྐྱེས། །
རང་རིགས་མི་ལ་རྨོངས་དད་ཆེ་ཞིང་ནོར་གྱི་རིན་ཐང་ག་ལ་ཤེས། །
བླ་སྲོག་གྱུར་བའི་ཡིག་ཆུང་ནག་པོ་ཆུ་རྒྱུན་བརྩོན་པའི་བསླབས་པར་འཚལ། །
གནའ་དང་ད་ལྟའི་བར་དུ་བརྒྱུད་པའི་ཕ་སྐད་གཙང་མའི་རང་འདངས་དེ། །
སྐད་་རིགས་སྣ་ཚོགས་མང་དུ་བསྲེས་ནས་རང་སྐད་གཙང་མར་དྲི་མ་གོས། །
ཁ་བ་ཅན་གྱི་དེ་ལ་འབད་དགོས་མ་ཉམས་གོང་སྤེལ་གཏོང་བ་དང༌། །
ང་ཚོ་ཚང་མའི་སྤྱི་སྐད་བཟང་བོ་མགྲིན་པ་གཟེངས་སུ་བསྟོད་དེ། །
ཤ་རིས་གདུང་རྒྱུད་གཅིག་ཏུ་འདིས་ཤིང་དམིགས་འདུན་གཅིག་པའི་སྤུན་ཟླ་ཚོ། །
མི་རིགས་ལ་རྒྱ་གཙུག་ཏུ་བཏེགས་ཏེ་སྤོབས་པའི་དབུ་འཕངས་མཐོ་རུ་འགེང༌། །
མཐུན་སྒྲིལ་ཨ་ལོང་དམ་དུ་སྦྲེལ་ནས་ཡར་རྒྱས་གོང་འཕེལ་ཡོང་བའི་ཆེད། །
རང་རིགས་རིགས་ལ་ཞབས་འདེགས་ཞུ་ན་སྐད་དང་ཡི་གེ་འབད་པར་འཚལ། །
༢ བདག་གི་ཕ་ཡུལ།
སྔོ་ལྗང་ལྗང་བྱེད་པའི་མཐའ་ཡས་ཀྱི་རྩྭ་ཐང་སྟེང༌། །
འོད་ལམ་ལམ་འཕྲོ་པའི་ཉི་འོད་དེ་ཕྱོགས་བཞིར་ཁྱབ། །
སྙན་ལྷང་ལྷང་འབབ་པའི་ཆུ་ཕྲན་གྱི་བཞུར་སྒྲ། །
མགོ་ལྡེམ་ལྡེམ་གཡོ་བའི་མེ་ཏོག་གིས་བྲོ་གར་འཁྲབ། །
སྤྲོ་ལྷང་ལྷང་བྱེད་སའི་སྐྱེད་ཚལ་གྱི་གནས་མཆོག་འདིར། །
ལྗང་ལྡེམ་ལྡེམ་སྣང་བའི་སྔོ་ལྗང་གི་སྡོང་ལོ་དེ། །
ཁད་དལ་དལ་ལྡང་བའི་དྲི་བཞོན་གྱིས་གཡོ་འགུལ་དེ། །
ལུས་བྱིལ་བྱིལ་བྱེད་པའི་ཨ་མ་ཡི་ལག་ཟུང་འདྲ། །
ལྗང་ནེམ་ནེམ་བྱེད་པའི་འཚོ་བཅུད་ཀྱི་རྩྭ་མཆོག་དང༌། །
སྒྲ་ཤག་ཤག་བཞུར་བའི་དྭངས་གསལ་གྱི་རྫ་ཆུ་དེ། །
སོས་དལ་དལ་རྒྱུ་བའི་རི་དྭགས་ཀྱིས་ལོངས་སུ་སྤྱོད། །
ཨ་ལ་ལ་འདི་ནི་མི་ཡུལ་གྱི་དག་ཞིང་རེད། །
ནེམ་ལྷོད་ལྷོད་བྱེད་པའི་རྩྭ་ལྗང་གིས་ས་ཤུན་བརྟོལ། །
ཆི་ལུ་ལུ་འཐུལ་བའི་མེ་ཏོག་དྲི་བསུང་ཞིམ། །
སྙན་ཀྱུར་ཀྱུར་སྒྲོག་པའི་ཁུ་བྱུག་གི་གདངས་དབྱངས་སྙན། །
སྒྲ་ཐག་ཐག་གྲགས་པའི་རྟ་ཕོ་ཡིས་བང་རྩལ་ངོམ། །
དུ་ལང་ལོང་རྒྱུ་བའི་མཐིང་སྨུག་གི་སྦྲ་ཆུང་འདབས། །
དགའ་སྤྲོ་སྤྲོ་རོལ་བའི་བྱུས་པ་ཚོ་རྩེད་དགའ་རོལ། །
འཛུམ་དམུལ་དམུལ་བཞད་པའི་ཕ་མ་ཡི་བཞིན་རིས་དེ། །
འབད་དུངས་དུངས་བྱེད་པའི་བུ་ཆུང་གི་མིག་ན་གསལ། །
༣ སློབ་གྲོགས་དྲན་གླུ
དུང་སེམས་འོ་མ་དཀར་བའི་མཚོ་ཀློང་གི་ཁྲོད་ན། །
གསེར་མིག་ཉ་མོ་ཁྱུ་གཅིག་གང་འགར་དུ་རྩེན་པ། །
ད་ལྟ་གྱེས་པའི་ཉིན་མོ་ཇེ་ཉེ་ནས་ཇེ་ཉེ། །
བདག་གི་དམར་ཆུང་སེམས་པ་་འཁྱགས་རོམ་གྱིས་བསྡམས་སོང༌། །
ད་ལྟ་ཕ་ཡུལ་ཉེ་དུ་གང་མང་ཞིག་ཡོད་ཀྱང༌། །
ཁྱོད་རང་དྲན་པའི་འདུན་པ་འགོག་ཐབས་རང་མི་འདུག །
བྱ་བྱེའུ་སྐད་སྙན་ཡག་པོ་གང་མང་ཞིག་སྒྲོག་ཀྱང༌། །
དཔྱིད་ཀྱི་ཕོ་ཉའི་གདངས་ལ་འགྲན་ནུས་ཞིག་ཡོད་དམ། །
ལམ་ཐག་ཧ་ལམ་རི་ཆུ་སྟོང་ཕྲག་གིས་བཅད་ཀྱང༌། །
སེམས་པ་གཤོག་ཐོགས་ནམ་ཡང་ཁྱེད་ཉིད་ལ་འཁོར་ཡོད། །
དྲི་ལྡན་མེ་ཏོག་རྒྱང་རིང་རྗིང་བུ་ན་ཡོད་ཀྱང༌། །
རྐང་དྲུག་མགྲིན་དབྱངས་འཐེན་བཞིན་ཁྱེད་ཉིད་ལ་གཟས་ཡོང༌། །
མཚན་མོ་ཟླ་འོད་སྒེའུ་ཁུང་ལ་ཤར་ལ་དུས།།
སྐྱིད་པའི་རྨི་ལམ་འོད་ཀྱི་ཐིག་ལེ་ཡིས་འཕྲོག་ལ།།
ཕྱིར་དྲན་སེམས་ཀྱི་བག་ཆགས་བློ་ཁ་རུ་ཤར་དུས།།
དགུན་ཁའི་མཚན་ལྗོངས་རིང་མོ་རྫོགས་ཐབས་རང་མི་འདུག།
སྤྲོ་སྐྱིད་དཔལ་ལ་རོལ་བའི་དབྱར་ཁ་དེ་སླེབས་བྱུང༌།།
འུ་ཅག་འཛོམས་པའི་ཉིན་མོ་རིང་བོ་ཞིག་མེད་པས།།
སེམས་ཀྱི་ན་ཟུག་སྐད་ཅིག་སྐད་ཅིག་ཏུ་འཛོམས་ལ།།
ལྷན་འཛོམས་བྱུང་ཉིན་བཟང་སྐར་བཟང་ལ་སྒུག་ཡོད།།
༤ གངས་ལྗོངས་ཤེས་རིག་ནོར་བུའི་སློབ་གླིང་བསྟོད་པ།
ཁྲིད་བྱ་མཐའ་དག་ཕྱོགས་རིས་མེད་པར་རྒྱུན་ཆགས་བརྩོན་པ་རིང་དུ་བསྲིངས། །
ང་རྒྱལ་ཕྲག་དོག་རིང་བོར་སྤངས་ཏེ་མཐུན་སྒྲིལ་ཨ་ལོང་དམ་དུ་སྤྲེལ། །
བཤེས་བཉེན་དམ་པ་གཙུག་ཏུ་བཀུར་ཏེ་ཤེས་བྱ་ཡོན་ཏན་ཚིམས་མེད་འགངས། །
མི་རིགས་ལ་རྒྱ་སེམས་ལ་བཅངས་ཏེ་རང་ནུས་ཅི་ལྕོག་ཞབས་འདེགས་ཞུས། །
ཕ་སྐད་གཙང་མའི་རང་འདངས་མ་ཤོར་གངས་རི་བཞིན་དུ་དཀར་ཞིང་དག །
རང་རེའི་སྲོལ་རྒྱུན་དྲི་མའི་མ་གོས་རྫ་ཆུ་བཞིན་དུ་དྭངས་ཤིང་གཙང༌། །
དབྱངས་གསལ་སོ་བཞིའི་དབྱངས་རྟ་མ་ཉམས་ཡར་ངོས་ཟླ་བཞིན་དུ་གསོས། །
སྐད་གཉིས་སློབ་སའི་གནས་མཆོག་བཟང་བོ་ལས་དབང་མེད་པ་བདག་གི་གྱོང༌། །
ལྔ་ཟུང་ཤེས་བྱ་ཁོང་དུ་ཆུད་ཅིང་འཆད་རྩོད་རྩོམ་གསུམ་གཟི་འོད་འབར། །
བྱམས་དང་སྙིང་བརྗེ་སེམས་ན་གནས་ཤིང་ལྷག་བསམ་འོ་མ་བཞིན་དུ་དཀར། །
རྣམ་དཀར་ལས་ལ་འཇུག་པ་ཡངས་ཤིང་རང་རའི་རིགས་ལ་བྱས་རྗེས་ཆེ། །
དགེ་བའི་བཤེས་གཉེན་དམ་པ་འདི་ལ་རང་དབང་མེད་པར་དད་མོས་སྐྱེས། །
བླ་གསལ་དོན་གཉེར་མང་དུ་བྱོན་ཞིང་བསམ་པའི་འདུ་ཤེས་ཁྱད་དུ་འཕགས། །
ཕྱི་ནང་ཁོར་ཡུག་གཙང་སྦྲ་བཟང་ཞིང་སློབ་སྦྱོང་དབྱར་མཚོ་བཞིན་དུ་རྒྱས། །
རང་རེའི་རིགས་ལ་ཞེན་པ་དཀར་ཞིང་ཞབས་འདེགས་ཞུ་བའི་ཀུན་སློང་གཙང༌། །
ཁྱད་དུ་འཕགས་པའི་སློབ་གླིང་འདི་ནི་གོ་ལ་ཟླུམ་པའི་རྒྱན་ཞིག་རེད། །
ངེད་དྲ་བ།
|