ཁམས་དཀར་མཛེས་སྟོང་སྐོར་དགོན་ནས་འབྱོར་བའི་གསར་འཕྲིན།
ཤེས་ཡོན་ཡར་རྒྱས་དང་སྒྲིག་གཞི་ལེགས་བཅོས་སྐོར་གཏན་འབེབས།
སྟོད་ཆ།
གནས་ཚུལ་བཟང་བོ་ཞིག་ལ་སྤྱི་ལོ ༢༠༡༤ ༩ ༢༥
དེ་རིང་ཉིན་གུང་དུས་ཚོད་༡༢ ༣༠
ཙམ་ལ་ཁམས་སྟོང་སྐོར་དགོན་དུ་སེར་སྨད་དགེ་བཤེས་ཉི་མ་མཆོག་དང་།
དགོན་དཔོན་བསྟན་འཛིན་རབ་རྒྱས་མཆོག་རྣམ་པ་གཉིས་དབུ་བཞུགས་ཆེད་དུ་མགྲོན་འབོད་གནང་བའི་སྟོང་སྐོར་གྲོང་སྡེ་ཉི་ཤུ་ལྷག་གི་འགོ་ཁྲིད་ཁག་དང་།
ཁག་ཐེག་དགེན་རྣམ་པ། ལས་སྣེ་རྣམ་པ།
དགོན་པའི་ལས་བྱེད་རྣམ་པ་བཅས་ཀྱིས་དགོན་པའི་སྒྲིག་གཞི་ལེགས་བཅོས་དང་།
ཤེས་ཡོན་ཡར་རྒྱས་གཏོང་ཕྱོགས་སྐོར་ཚོགས་འདུ་བསྐོང་ཚོགས་གནང་བར་ཧ་ཅང་ཡ་མཚན་པོ་ཞིག་བྱུང་འདུག འོན་ཀྱང་འདས་པའི་ལོ་རྒྱུས་དང་འབྲེལ་བའི་གནས་ཚུལ་ཉུང་ཙམ་ཞིག་བརྗོད་ན།
སྤྱི་ལོ ༢༠༠༡ ལོར་དགོན་དཔོན་རྡོ་རྗེ་ཚེ་རིང་མཆོག་དང་།
མཁན་པོ་རྡོ་རྗེ་ཆོས་དབྱིངས་གཉིས་གཙོས་དགོན་པའི་ལས་སྣེ་རྣམ་པ་དང་།
ཚོང་དཔོན་དཀོན་མཆོག་རབ་བརྟན། དཀོན་མཆོག་ནོར་བུ་ལགས་ཐུན་མོང་གིས་མ་འོངས་རང་དགོན་དུ་ཡོན་ཏན་གྱིས་ཕྱུག་པའི་མི་སྣ་གསོ་སྐྱོང་བྱེད་པར་དམིགས་ཤིང་།
གཡོ་ཟོལ་མེད་པའི་བསམ་པ་ཞིག་གིས་ཀུན་ནས་བསླངས་ཏེ།
རང་དགོན་དུ་གཞུང་ཆེན་མོར་ཐོས་བསམ་སློབ་གཉེར་དགོས་པའི་སྐོར་ཕན་ཚུན་གྲོས་བསྡུར་བྱས་པའི་མཐར་ཐུན་མོང་གིས་སློབ་གྲྭ་འཛུགས་པར་ཐག་ཆོད་བྱས།
དེའི་སྐབས་དམ་པ་དེ་རྣམས་ཀྱིས་སེར་སྨད་ནས་ཕེབས་པའི་དགེན་ཉི་མ་མཆོག་དང་།
དགེན་ཚུལ་ཁྲིམས་འོད་ཟེར་མཆོག་རྣམ་པ་གཉིས་ལ་དགེ་རྒན་བཞུགས་པར་རེ་བ་ཞུས།
དགེན་གཉིས་ཀྱིས་དགོན་གཞུང་གིས་རེ་བའི་མོས་པར་བསྟུན་ཅིང་། མི་རིགས་ཀྱི་ཁྱད་ཆོས་ཕུན་སུམ་ཚོགས་པ་མཚན་ཉིད་རིག་པ་འདི་མུ་མཐུད་རྒྱུན་འཛིན་ཐུབ་པའི་ཆེད་དུ་སྤྱི་ལོ
༢༠༠༡ བོད་ཟླ ༣ ཚེས ༨ ཉིན་མཚན་ཉིད་སློབ་གྲྭའི་བྱ་བ་འགོ་བརྩམས་པ་རེད། དེ་ནས་སྤྱི་ལོ
༢༠༠༦ ལོ་བོད་ཟླ ༩ ཚེས ༦ ཉིན་རྐྱེན་ངན་ཞིག་གིས་སྒོ་བརྒྱབ་དགོས་ཐུག་སོང་ནའང་།
ད་ལྟར་གྲྭ་ས་ཁག་ལ་སློབ་སྦྱོང་བྱེད་བཞིན་པའི་སློབ་མ་རྣམས་དང་དགེན་གཉིས་དབུ་བཞུགས་ཐུན་མོང་གིས།
མིག་རྒྱང་རིང་ཙམ་དང་བློ་སྤོབས་ཆེ་ཙམ་བསྐྱེད་དེ།
རང་དགོན་དུ་བསྟན་འགྲོ་ལ་ཕན་ཐོགས་པའི་ཤེས་ལྡན་མི་སྣ་གསོ་སྐྱོང་བྱེད་པའི་ཐབས་སུ་དགོན་པའི་དབུ་འཛིན་པ་རྣམས་ལ་འབོད་སྐུལ་ཞུ་བ་དང་།
སྤྱི་ལོ ༢༠༡༡
གི་ལོར་སྟོང་སྐོར་ཞབས་དྲུང་མཆོག་གིས་ཁ་པར་གྱི་ཐོག་ནས་དགེན་ཉི་མ་མཆོག་ལ་ཁྱོད་ཚོ་རང་དགོན་དུ་ཕེབས་པ་ལ་ཆ་རྐྱེན་ཅི་འདྲ་དགོས།
དོན་ཚན་རྣམས་མདོར་བསྡུས་ཤིག་ཡིག་ཐོག་ཏུ་ཕབ་ནས་སྐུར་ཤོག ཅེས་སྐུལ་མ་གཏོང་བར་བརྟེན།
དོན་ཚན་བཞི་ཅན་གྱི་གྲོས་གཞི་ཞིག་སྙན་ཞུ་ཕུལ་ཀྱང་ཐག་གཅོད་གང་ཡང་མ་བྱུང་། སྤྱི་ལོ
༢༠༡༤ ལོར་སྟོང་སྐོར་ཞབས་དྲུང་མཆོག་དང་། སེར་སྨད་དགེ་བཤེས་ཉི་མ་མཆོག དགོན་དཔོན་བསྟན་འཛིན་རབ་རྒྱས་མཆོག་རྣམ་པ་ཚོས་བཀའ་མོལ་ལྷུག་པོ་གནང་བའི་མཐར།
དགེན་མཆོག་གིས་བཟོས་པའི་གྲོས་གཞི་ལ་མོས་མཐུན་བྱུང་།
དོན་ཚན་བཞི་ཅན་གྱི་གྲོས་གཞི་འདི་ལྟར།
དོན་ཚན་དང་བོ།
དགོན་གཞུང་གིས་སློབ་གྲྭ་ཀུན་ལ་གཟིགས་རྟོག་ནན་མོ་གནང་ཞིང་རྒྱབ་སྐྱོར་ཚུལ་བཞིན་དུ་བྱེད་དགོས།
བྱེ་བྲག་མཚན་ཉིད་སློབ་གྲྭ་བ་ལ་མཚོན་ན། བླ་གྲྭ་གང་ཚོགས་ཀྱང་གུང་གསེང་སྐབས་མ་གཏོགས་གྲོང་ཆོག་འགྲོ་མིན་ལ་རང་དབང་ཡིན་ཞིང་།
གལ་ཏེ་སྦྱིན་བདག་དཀའ་ངལ་ལ་འཕྲད་ཚེ་ཐབས་ཤེས་ཡོད་ཚད་བསྟན་ཀྱང་མེད་ན་མཆོད་གཡོག་དང་དབུ་མཛད་རེ་འགྲོ་དགོས་པ་དམིགས་བསལ་ལོ།།
དོན་ཚན་གཉིས་པ།
དགོན་གཞུང་དང་། གྲྭ་ཚང་།
དགེ་རྒན་རྣམ་པའི་བཀའ་མོལ་གནང་ཞིང་གཅིག་མཐུན་གྱིས། མཚན་ཉིད་སློབ་གྲྭ་བ་རྣམས་ལ་རྩོད་རྒྱུགས།
བྲི་རྒྱུགས། བློ་རྒྱུགས་རྣམས་ཞིབ་ཚགས་བླངས་པ་ལ་བརྟེན།
རྒྱུགས་འབྲས་བརྒྱ་ཆ་མ་ཐོབ་པ་རྣམས་ཀྱིས་གར་འཆམ་རིགས་བྱ་དགོས་ཀྱང་།
བརྒྱ་ཆ་ཐོབ་ན་གར་འཆམ་རིགས་གཏན་ནས་བྱ་མི་དགོས་པའི་བྱ་དགའ་ཡོད་དོ།།
དོན་ཚན་གསུམ་པ།
ད་ལྟའི་མི་རིགས་ཀྱི་སྤྱི་ཚོགས་ནང་ཆེས་གལ་འགངས་ཆེ་ཤོས་ཀྱི་སྟོབས་ཤུགས་གཉིས་ནི་དཔལ་འབྱོར་དང་ཡོན་ཏན་ཡིན་པས།
དཔལ་འབྱོར་ལ་མཚོན་ན། དགོན་གཞུང་ནས་མི་གཅིག་དང་།
སློབ་གྲྭ་ནས་མི་གཉིས་བསྐོས་འཇོག་བྱས་ཏེ་ཁོང་རྣམ་གཅིག་མཐུན་གྱིས་ལས་ཀ་ཧུར་ཐག་བྱས་ནས་དཔལ་འབྱོར་བསྒྲུབ་དགོས།
དཔལ་འབྱོར་སྒྲུབ་སྟངས་ཐད་ཁོང་རྣམས་རང་དབང་ཡིན་ཀྱང་།
མ་དངུལ་གཏོང་ས་གང་ཡིན་མིན་དགོན་གཞུང་དང་། གྲྭ་ཚང་།
དགེ་རྒན་བཅས་ལ་བཀའ་མོལ་གནང་སྟེ་གཅིག་མཐུན་གྱིས་ཐག་གཅོད་བྱེད་དགོས།
འོ་ན་རིག་གནས་སློབ་གྲྭ་ཚོ་ཅི་འདྲ་ཞེ་ན། རྩ་བའི་སྐྱིད་སྡུག་གཅིག་པས་སྒྲིག་གཞི་དང་དཔལ་འབྱོར་ཐུན་མོང་ངོ་།།
དོན་ཚན་བཞི་པ།
ཚོགས་དང་ཆོས་གྲྭ་ཚོགས་སྟངས་སྐོར་འདས་པའི་ལོ་རྒྱུས་ལ་ཕྱིར་རྟོག་བྱེད་བཞིན་མ་འོངས་པར་ཇི་ལྟར་འགྱུར་བ་བཏང་དགོས་མིན་དགེ་འདུན་དམངས་ལ་དབང་བས།
དཔེར་ན། ཞོགས་ཆོས་དང་གུང་ཚིགས་ཚོགས་སྟངས་ཐད་སློབ་གཉེར་ཡར་རྒྱས་ལ་ཕན་གནོད་གང་ཡིན་དང་།
འགྱུར་བ་བཏང་དགོས་མིན་དགེ་འདུན་དམངས་ཀྱིས་བཀའ་མོལ་ལྷུག་པོར་གནང་སྟེ་ཐག་གཅོད་བྱེད་དགོས།གྲོས་གཞི་འདི་ནི་སྔར་གསལ་བསྒྲགས་བྱས་མེད་ཀྱང་དེ་རིང་གསལ་བསྒྲགས་བྱེད་པ་དང་འབྲེལ།
སྤྱི་ལོ ༢༠༡༤ ༩ ༢༥ དེ་རིང་གི་ཉིན་ཆེད་དུ་སེར་སྨད་དགེ་བཤེས་ཉི་མ་མཆོག་ཕ་ཡུལ་དུ་ཕེབས་སྐབས།
སྟོང་སྐོར་དགོན་པའི་གནད་ཡོད་མི་སྣ་སོགས་ཀྱིས་དགའ་དད་སྤྲོ་གསུམ་གྱིས་ཕེབས་བསུ་གཟབ་རྒྱས་ཞུས་པ་མ་ཟད།
དགོན་པའི་སྒྲིག་གཞི་ལེགས་བཅོས་དང་ཤེས་ཡོན་ཡར་རྒྱས་གཏོང་ཕྱོགས་སྐོར་ཚོགས་འདུ་གཟབ་རྒྱས་ཚོགས། དེའི་སྐོར་མདོར་བསྡུས་ཤིག་བརྗོད་ན།
ཤེས་ཡོན་ཡར་རྒྱས་དང་སྒྲིག་གཞི་ལེགས་བཅོས་སྐོར་གཏན་འབེབས།
སྨད་ཆ།
ཐོག་མར་དགོན་དཔོན་མཆོག་གིས་ཚོགས་འདུ་འགོ་འཛུགས་གནང་རྒྱུ།
བརྗོད་གཞི་དང་བོ།
ཁམས་སྟོང་སྐོར་སྡེ་དགོན་གཉིས་ཀྱི་གནད་ཡོད་མི་སྣ་ཚང་མ་ལ་བཀྲ་ཤིས་བདེ་ལེགས་ཞུ།
དེ་རིང་ཚེས་བཟང་སྐལ་བཟང་གི་ཉིན་མོར་དགེ་འདུན་དམངས་དང་མཉམ་དུ།
གཞིས་བྱེས་མཉམ་འཛོམས་བྱུང་ཐབས་ཀྱི་བརྗོད་གཞི་འདི་ལ་བསམ་བློ་བརྗེ་རེས་བྱེད་པ་འདི་ཧ་ཅང་ལས་དང་བསོད་ནམས་ལྡན་པ་ཞིག་རེད།
ང་རང་གི་ངོས་ནས་བཤད་ན།
སྟོང་སྐོར་དགོན་པའི་གྲྭ་བ་ཞིག་ཡིན་པས་བོད་རང་གི་ཐུན་མོང་མ་ཡིན་པའི་ཆོས་དང་རིག་གཞུང་འདི་དང་།
ལྷག་པར་དུ་དགོན་པ་འདི་ལ་ཕན་བདེ་བསྒྲུབ་རྒྱུ་དེ་རེད། དེའི་སྟབས་ཀྱིས།
ལྷན་རྒྱས་རྣམ་པ་ཚོ་དང་མཉམ་དུ་གཞིས་བྱེས་ལྷན་འཛོམས་འབྱུང་ཐབས་སུ་ཕན་ཚུན་བགྲོ་གླེང་བྱེད་པར་ང་རང་ཤིན་ཏུ་དགའ་པོ་བྱུང་།
ཞེས་པ་ནས་ཁོ་བོའི་དགོན་དཔོན་འགོ་བརྩམས་པ་ནས་བཟུང་དགེ་འདུན་དམངས་ཀྱིས་དམ་ཚིག་ཚུལ་བཞིན་དུ་བསྲུངས་པར་བཀའ་དྲིན་ཆེ་ལུགས་དང་།
མ་འོངས་པར་ཕན་ཚུན་གུས་བཀུར་དང་།
འཆམ་མཐུན་ངང་ནས་འཚོ་གནས་བྱེད་པ་ལ་མིག་དཔེ་ལྟ་ས་ཞིག་ཏུ་འགྱུར་དགོས་པའི་སྐོར་གསུང་བཤད་རྒྱས་པ་གནང་།
བརྗོད་གཞི་གཉིས་པ།
སྔར་སྤྱི་ལོ ༢༠༡༤ ༢
ནང་དགྱ་ནག་ཁྲིན་ཏུའུ་གྲོང་ཁྱེར་དུ་སེར་སྨད་དགེ་བཤེས་ཉི་མ་མཆོག་དང་།
དགོན་དཔོན་ཡེ་ཤེས་རྡོ་རྗེ་མཆོག
ཕྲན་རང་ཉིད་བཅས་ཀྱིས་ནང་ཁུལ་གྱི་རྙོག་གླེང་རྣམས་གཙང་སེལ་ཡོང་ཐབས་གྲོས་བསྡུར་ལྷུག་པོར་གནང་བ་དང་།
ལྷག་པར་དུ་ཞབས་དྲུང་རིན་པོ་ཆེ་ལ་ཁ་པར་གྱི་ཐོག་ནས་དགེ་བཤེས་མཆོག་གིས་བཀའ་མོལ་ལྷུག་པོར་གནང་ཡོད་པར་བརྟེན།
དགེ་བཤེས་མཆོག་གིས་དོན་ཚན་བཞི་ཅན་གྱི་གྲོས་གཞི་འདི་གསར་དུ་བཟོས།
ཞབས་དྲུང་མཆོག་གིས། དོན་ཚན་བཞི་ཅན་གྱི་གྲོས་གཞི་འདི་ལ་སྐྱོན་ཆ་མ་མཐོང་བས།
ཕྱོགས་ཀུན་གྱིས་མོས་མཐུན་གྱིས་ནང་ཁུལ་རང་ནས་འགྲིག་པ་བྱུང་ཡོད། ཅེས་གསུངས། དེས་ན།
སྟོང་སྐོར་སྡེ་དགོན་གཉིས་ཀྱི་གནད་ཡོད་མི་སྣ་ཡོངས་ཀྱིས་དོན་ཚན་བཞི་ཅན་གྱི་གྲོས་གཞི་འདི་ལ་འཐད་པ་ཡོད་ན་རྒྱབ་སྐྱོར་དང་།
མི་འཐད་ན་དགག་བྱ་བྱས་ན་ཆོག མདོར་ན།
ཚོགས་མི་ཡོངས་ཀྱིས་རྒྱབ་སྐྱོར་ཐོབ་ན་གཏན་ཁེལ་བྱ་རྒྱུ་ཡིན་པའི་སྐོར་གསུང་འདུག
བརྗོད་གཞི་གསུམ་པ།
དེ་རིང་གི་ཚོགས་འདུའི་ཐོག་དམ་པ་ཁོང་གཉིས་ཀྱི་བཀའ་དགོངས་གཞི་བཟུང་ལྟར་དོན་ཚན་བཞི་ཅན་གྱི་གྲོས་གཞི་འདི་ལ་ཚོགས་མི་ཡོངས་ཀྱིས་རྒྱབ་སྐྱོར་ཐོབ་པས།
མཐའ་མའི་ཐག་གཅོད་མ་འོངས་སྟོང་སྐོར་དགོན་གྱི་སློབ་གྲྭ་ཀུན་ལ་དཀའ་ངལ་འཕྲད་མི་སྲིད་པའམ་འགྱུར་བ་མེད་པ་ཞིག་གཏན་འཁེལ་བྱ་རྒྱུ་ཡིན་པའི་སྐོར་གསུང་བཤད་རྒྱས་པར་གནང་།
སེར་སྨད་དགེ་བཤེས་ཉི་མ་མཆོག་གིས། ལེགས་ཚོགས་ཀུན་གྱི་རྩ་བ་ཤེས་ཡོན་དང་།
མཐུན་སྒྲིལ་ཡིན་པའི་སྐོར་བཀའ་སློབ་གནང་བ་ལ་ཚོགས་མི་ཡོངས་ཀྱིས་དགའ་བསུ་ཚད་མེད་བྱས་ཡོད་པ་དང་།
སྟོང་སྐོར་དགོན་གཞུང་གིས་གོ་སྒྲིག་ཞུས་པ་ལྟར།
སྒྲིག་གཞི་ལེགས་བཅོས་དང་ཤེས་ཡོན་ཡར་རྒྱས་གཏོང་ཕྱོགས་སྐོར།
སྟོང་སྐོར་སྡེ་དགོན་གཉིས་ཀྱི་གནད་ཡོད་མི་སྣ་རྣམས་དང་དགེ་འདུན་དམངས་ཀྱིས་ཚོགས་འདུ་གཟབ་རྒྱས་ཚོགས་པར་བརྟེན་དོན་ཚན་བཞི་ཅན་གྱི་གྲོས་གཞི་འདི་ལ་ཚོགས་ཞུགས་མི་སྣ་ཀུན་གྱིས་རྒྱབ་སྐྱོར་ཐོབ་པས་སྒྲིག་གཞི་ལེགས་བཅོས་དང་།
གཞིས་བྱེས་ལྷན་འཛོམས་འབྱུང་བར་གཏན་འབེབས་བྱས་ཡོད་པར་མ་ཟད་རྒྱལ་ཁའི་ངང་ནས་གྲོལ་ཡོད་པ་རེད་འདུག རླབས་ཆེན་གྱི་བྱ་བ་འདི་སྲ་བརྟན་ནམ་བཀྲ་ཤིས་བདེ་ལེགས་ཡོང་བའི་ཆེད་དུ་དམིགས་ནས་དྲྭ་ཐོག་ཏུ་བཀོད་པ་ཡིན།
ཁམས་དཀར་མཛེས་སྟོང་སྐོར་དགོན་པའི་དགོན་བདག་བསྟན་འཛིན་རབ་རྒྱས་ཚང་གིས་བཀའ་སློབ་གནང་བཞིན་པ།
སྤྱི་ལོ ༢༠༡༤ ༩ ༢༥ ཉིན་བློ་སྦྱིན་གྱིས་ལབ་དགོན་དུ་བྲིས་པའོ།།