ཆམ་པ་འཕོག་པའི་སྐབས་སུ་བསྟེན་དུ་འོས་པའི་བོད་སྨན་འགའ་ངོ་སྤྲོད།

ཆམ་པ་འཕོག་པའི་སྐབས་སུ་བསྟེན་དུ་འོས་པའི་བོད་སྨན་འགའ་ངོ་སྤྲོད།

     སྟོན་ཀ་དང་དགུན་ཁ་ནི་ཕྱིའི་ཁོར་ཡུག་དང་ནང་སྤྱོད་ལམ་གྱི་དབང་གིས་ཆམ་པའི་ནད་རིགས་སམ་དྲོས་འཁྱགས་སོགས་ལུས་སུ་འབྱུང་སླ་བའི་དུས་སྐབས་ཤིག་ཡིན་པས།    ཐེངས་འདིར་གཞལ་ཡས་ཁང་བོད་སྨན་བདེ་སྲུང་འཕྲིན་སྟེགས་ཀྱིས་རྒྱ་ཆེ་བའི་དྲ་གྲོགས་དང་མང་ཚོགས་ཀྱི་བདེ་གནས་ཆེད་དུ། རྣམ་པ་ལྷན་རྒྱས་ཆམ་པ་འཕོག་པའི་སྐབས་སུ་བསྟེན་དུ་འོས་པའི་བོད་སྨན་འགའ་ངོ་སྤྲོད་ཞུ།

མ་ནུ་བཞི་ཐང་།

    ནུས་པ་མྱུར་བ། ཁྱད་པར་དུ་ཆམ་པ་ཐོག་མའི་དུས་སུ་བསྟེན་པའི་སྨན།

ནོར་བུ་བདུན་ཐང་།

    ནུས་པ་མྱུར་བ།

འཕྲུལ་ཐང་།

    ནུས་པ་མྱུར་བ།

ཆམ་ཐང་ཉེར་ལྔ།

    ནུས་པ་མྱུར་བ་དང་ཆམ་པ་ལྕི་མོ་ལ་ཕྱི་སྨན་ལས་ནུས་པ་མཆོག་གོ །

སྤང་ཁྲག་བཅུ་གཉིས།

    ནུས་པ་གོང་སྨན་ལས་ཅུང་དལ་བ་དང་། ཆམ་པ་ལས་བྱུང་བའི་མགོ་གཟེར་བ་དང་རྐང་ལག་ཉིང་ལག་མི་བདེ་བའི་རིགས་སོགས་ལ་ཕན་ནོ། །

ལུག་མུར་བདུན་པ།

    ནུས་པ་ཡང་གོང་གི་ཁུ་བའི་སྨན་ལས་ཅུང་དལ་བ་དང་། ཆམ་པ་ལས་བྱུང་བའི་གློ་ལུ་བ་དང་སྐད་འགགས་པ་ལ་ཕན་ནོ། །

ལོ་གྱོན་རིལ་བུའམ་ལོ་གྱོན་མ།

    ནུས་པ་གོང་གི་ཁུ་བའི་སྨན་ལས་ཅུང་དལ་བ་དང་། ཆམ་པ་ལས་བྱུང་བའི་མགོ་གཟེར་བ་ལ་ཕན་ནོ། །

      དེ་ནས་གོང་དུ་བསྟན་པའི་སྨན་བདུན་པོ་ནི་ཆམ་པའི་ནད་རིགས་ལ་ཤིན་ཏུ་ཕན་པའི་སྨན་ཡིན་པ་དང་། ལུས་ལ་ཞོར་སྐྱོན་ཡང་མེད་དོ། །

      ཁྱད་པར་དུ་ལོ་གྱོན་མ་དང་ཡང་ན་སྤང་ཁྲག་བཅུ་གཉིས་ནི་རིལ་བུ་གཉིས་གསུམ་ཙམ་ཆུ་བསྐོལ་༥༠༠mLནང་དུ་སྦང་བའི་ཁུ་བ་ཞོགས་པ་རེ་ལ་མཁུར་བཀང་གཅིག་འཐུང་ན་ཆམ་ནད་སྔོན་འགོག་གི་ནུས་པ་ཡོད་དོ། །

      འོན་ཀྱང་དངོས་སུ་ཆམ་པ་ཕོག་སོང་ན། སྨན་པའི་མདུན་དུ་ཕེབས་ནས་སྨན་པའི་གསུང་ལ་གསན་ན་ཤིས་སོ། །


རྩོམ་སྒྲིག་པ།  ཁྰ་ཤེས་རབ་རྒྱ་མཚོ།  སྤེལ་དུས། 2015/1/26 བལྟ་ཀློག (10391)