སྙན་ངག་ཚན་པ་གསུམ།
ཁ་བ།
|དབྱངས་སོ་མ། {མགོ་ལོག}
ཁ་བ།
ང་ལ་ཡང་ཞུ་རྒྱུ་ཡོད།
ང་ལ་ཡང་ཁྱོད་རང་ནང་བཞིན་ཞུ་རྒྱུ་ཡོད།
ང་ཡི་རྣམ་ཤེས་དང་སྟོང་བསམ་ཡོད་ཚད།
ཁྱོད་དང་འདྲ་བར་ཞུ་བཞིན་ཡོད།
ཡིན་ན་ཡང་ཁྱོད་ང་དང་མི་འདྲ་སྟེ།
ཁྱོད་ཞུ་ཚར་རྗེས་སླར་ཡང་གསོན་མི་སྲིད།
དེ་བས་དཀར་གཙང་གི་ཁྱོད་ཞུ་ཐེངས་རེར།
ངས་ཕངས་སེམས་ཆེན་པོས་སྙན་ངག་བྲིས་པ་ཡིན།
ཡང་མཚམས་རེར།
ངས་རང་ཉིད་ཀྱང་ཁྱོད་དང་འདྲ་བར།
རྩ་བ་ནས་ཞུ་སོང་ན་བསམ།
སྐྱེ་བ་གྲངས་མེད་ཀྱི་སྡིག་སྒྲིབ་དང་ལྷན་དུ།
བསྐལ་བ་རྫོགས་མེད་ཀྱི་ཞེན་ཆགས་དང་ལྷན་དུ།
འབྱུང་བཞིའི་བར་གསེང་དུ་མེད་པར་འཐིམ་སོང་ན་བསམ།
10/7 ཉིན།
ཁེར་རྐྱང་།
ངས་ལམ་མདོ་དང་ཁང་སྟོང་དག་ནས།
གླུ་སྐད་བན་བུན་ཞིག་གི་དབྱངས་རྟ་ལ་ཁེན་གྱིན།
རང་ཉིད་ཀྱི་སྣང་བའི་ངོས་སུ།
གློག་སྒྲོན་མེད་པའི་མཚན་མོ་གྲངས་མེད་བཤམས།
མཚན་མོ་རེ་རེའི་པང་ཁུག་ཏུ།
ངའི་ཁེར་རྐྱང་གི་གཏམ་རྒྱུད་ཡོད་ཚད།
མིག་ཆུ་བཞིན་འཐོར་སོང་།
ངའི་ན་ཟུག་གི་སྙན་ངག་ཡོད་ཚད།
རྡོ་བ་ལྟར་འཁྱགས་སོང་།
༩/༢༩ ནུབ་མོར།
འབྲོག་མོ།
༡
རྩྭ་ཐང་གི་སྟེབ་ཁུག་ནས།
མེ་ཏོག་གི་པང་གཞུང་ནས།
ངས་སུ་ཞིག་ལ་རྫོགས་མི་ཚར་བའི་སྙིང་གཏམ་ཤོར། སྐྱེ་གཟུགས་མཛེས་མོ་དེ།
སྐད་ངག་སྙན་མོ་དེ།
མེ་ཏོག་ལྟ་བུའི་ཁྱོད། ངའི་མིག་ཁ་ནས་འཚང་དེ་སེམས་ཁོང་དུ་སླེབས།
༢
དུས་ཚིགས་རེ་རེ་དང་འགྱུར་ལྡོག་རེ་རེ།
ངའི་སེམས་བྱུང་དང་སྡེབས་ནས་རྦད་ཀྱིས་ཐོན་དུས།
ཁྱོད་ནི། ངའི་སྨོན་འདུན་དང་བརྩེ་འདང་གི་སྒྲོམ་ཆུང་དེར་གཏན་དུ་སྦས་ཡོད།
༣
འཇམ་ལྷོད་ལྷོད་ཀྱིས་རྒྱུ་བའི་སྤྱན་ཟུང་དེ།
ངའི་ཡིད་ལ་དྲན་ཐེངས་རེར།
ཚོད་ཚོད་ལ། གསང་ཁུག་ཏུ་བཅུག་པའི་སྙིང་གཏམ་དང་། སྙན་ངག་དེ་ཚོའང་ཙག་ཤེད་ཀྱིས་ལྡང་།
ང་འཇིག་རྟེན་འདིར་ཡོད་པས།
འཇིག་རྟེན་ལ་དུང་བ་ཟབ་མོ་ཞིག་ཀྱང་ཆགས་ཡོད།
2017/7/23 ཉིན།
ངོ་སྤྲོད།
དངོས་མིང་། སྐལ་ལྡན།
མིང་གཞན། དབྱངས་སོ་མ།
ཐོབ་ཐང་། སློབ་མ།
སྐྱེས་ལོ། ༡༩༩༨
མི་རབས་བདུན་པའི་ཚོགས་མི་དང་༼དབྱངས་གསལ་གྱི་འོད་སྣང་༽ཞེས་པའི་ཚགས་དེབ་རྩོམ་སྒྲིག་པ།
ཁོས་བཤད་རྒྱུར།
མྱ་ངན་དང་མནར་གཅོད་ཡོད་ཚད་བཟོད་པར་བྱས་པའི་ནམ་མཁའམ། ཡང་ན་རྐང་འོག་གི་ས་ཆེན་ལགས། པི་ཝང་དཀར་བོ་ཁུར་བའི་སྙན་ངག་པས་ཁྱེད་ཀྱི་སྙན་དུ་གླུ་དབྱངས་ཡང་ཡང་ལེན་པ་ནི་སེམས་ཀྱི་ལོག་མལ་འཚོལ་བའི་ཆེད་དུ་ཡིན།
|