ངས་ནམ་ཡང་འབྲོང་ལ་སྒུག་ནས་ཡོད།
ཅོ་བྱང་སྐར།
ཁ་བའི་འདབས་མས་ངའི་རྨི་ལམ་གྱི་ཞིང་ཁམས་ཡོངས་སུ་དཀྲོགས་ཟིན།
པྲ་ཚག་གྱི་མིག་ཟུང་ལས་གཞིས་ཁྱིམ་འདི་ལ་སྙིང་གཏམ་གླེང་།
ནམ་མཁར་ལྟ་བཞིན། དལ་གྱིས་ཐྲིག་ཐྲིག་གི་གོམ་སྒྲའི་ཁྲོད་ནས།
འཇིག་རྟེན་འདིའི་མཛེས་སྡུག་གི་ཡུལ་ལྗོངས་གཅིག་ལ་རེ་བཞག་འཁོར།
ངུར་སྨིག་གིས་རྒྱབ་ལྭ་བྱས་པའི་འོད་སྣང་གི་དེད་དཔོན་ཆེན་མོ།
ཡུལ་གྲུའི་འདིའི་ལྷག་བསམ་ལྗོན་པར་འཛུམ་མུལ་གྱི་ཞལ་བརྡ་གཏོང་བཞིན།
དག་གཙང་གི་གནས་མལ་འདི་རུ་ལྷད་མེད་པའི་དྲོད་ཁོལ་སྦྱིན་དུས།
ང་། ཨ་ཕོ་ལུག་རྫིར་ཨ་མའི་ཕྱག་ཟུང་ལྟ་བུའི་དྲོད་འཇམ་གྱི་ཚོར་སྣང་ཐོབ།
སྟོང་གསུམ་གྱི་འཁོར་ལོའི་བར་ནས་གཏམ་རྒྱུད་ཀྱི་ལོ་རྒྱུས་ཟད་དུས།
རྣོ་ལྕགས་ལྟ་བུའི་དགུན་གསུམ་གྱི་སེར་རླུང་བཙན་པོ་དེས།
དྭངས་གཙང་གི་མེ་ཏོག་ཚོམ་བུ་གཡག་གོང་གི་རྨི་ལམ་བཞིན།
རྒྱང་རིང་གི་རི་སུལ་དེ་རུ་ཁུར་ལ་རུ་སུལ་དེ་ན་ལྷགས།
ཐལ་མདོག་གི་སྐྱ་གཤིས་མངའ་བའི་ཚེར་ཤུལ་སྟོང་པའི་ལྷང་འཇགས་དང་།
འཚུབ་སྣང་ཁྲོད་ལྡིང་བསྐོར་བྱེད་པའི་ཐག་རིང་གི་རྒོད་པོའི་གཤོག་འགྱུར།
ཉི་ནུབ་ཁྲོད་འོབས་སུ་ལྷུང་ལ་མུན་ནག་ཁྲོད་ན་འདར་ར་ར།
དེ་དུས་བསང་བ་ཡོད་ཚད་རི་རབ་ཀྱི་རྩེ་རུ་གཏོར་རུང་ཡ་ལན་མེད་གི །
ཁ་བས་གཏམ་རྒྱུད་ཁྱེར་ནས་རྒྱང་རིང་གི་དབྱར་གཞུང་སྙེག་ནས་བཞུད་སོང་།
གཏམ་རྒྱུད་དུ་ངས་མྱ་ངན་དང་དགའ་སྡུག་ཁྲོད་ནས་འབྲོང་ལ་སྒུག་པ་བྲིས་ཡོད།
དུས་རབས་ཨ་མས་མིག་ཟུང་གིས་གཏམ་རྒྱུད་ལ་སྙན་ངག་གི་ཚོར་བ་མ་སྦྱིན་ན།
ནམ་མཁའ་ནས་འཐོར་བའི་གངས་ཀྱི་མེ་ཏོག་དེ་རྣོ་ལྕགས་ཀྱི་སོལ་བར་ནས་ཟད་ངེས་རེད།
འབྲོང་ཡག་གི་རྭ་སྣེ་ཉི་ཟླའི་པང་ནས་མངོན་ཡོང་དུས།
ལུག་ཁྱུ་རྒོད་ཁྱུ་དང་འདྲེས་སྲིད་ལ་ཁ་བ་དང་སྤྲིན་དཀར་གྱི་འདབ་མ་འཁྱུད་སྲིད།
རྣམ་རིག་དང་སྤྱང་དྲུང་འཛོམས་ཡོང་ལ་དཔལ་ཡོན་དང་འཕེལ་རྒྱས་ཡང་འཕེལ་ཡོང་།
ད་དུང་། སྒྱུ་མ་ལྟ་བུའི་རྨི་ལམ་གྱི་ཕོ་བྲང་ལས་གསོན་ཤུགས་འབར་བའི་དབྱངས་ཡིག་འཁྲུངས་ཡོང་།
འབྲོང་ཡག་གི་ངུར་སྒྲར་དབྱངས་གསལ་སོ་བཞིས་ཚོས་ཁ་བྱུགས་ཡོང་དུས།
མཐུན་སྒྲིལ་དང་འཆམ་མཐུན་གྱིས་གཉེན་སྟོན་གྱི་ཆོ་ག་སྤེལ་ཡོང་ལ།
ཡིད་ཆེས་དང་བརྩི་འཇོག་གིས་དུས་རབས་ཤིག་གི་མདུན་ལྗོངས་བསུ་ཡོང་།
དེ་དུས། ངས་འབྲོང་ལ་སྒུག་ལ་འབྲོང་རེ།
|