དེབ་གསར་《རྣམ་ཤེས་ཀྱི་ངལ་དུབ》སྒོར་ཐོན་པར་རྟེན་འབྲེལ་ཞུ།

དེབ་གསར་འགྲེམ་བརྡ《རྣམ་ཤེས་ཀྱི་ངལ་དུབ》

       རྩོམ་པ་པོ་ངར་ཆ་ནི།  གཞན་རྔ་སྙུག་རྩེའང་ཟེར་ཞིང་། དངོས་མིང་ལ་ཡེ་ཤེས་མགོན་པོ་རུ་འབོད།  ཕྱི་ལོ ༡༩༨༥ལོར་དཀར་མཛེས་ཉག་རོང་གི་སྒྲེ་བོ་ཞེས་པའི་ཡུལ་སྡེ་ཞིག་ཏུ་སྐྱེས།  བགྲང་བྱ་བདུན་ལོན་དུས་སློབ་སྦྱོང་གི་མགོ་བརྩམས། ༢༠༠༣ལོར་དཀར་མཛེས་བན་རྒན་བཤད་གྲྭ་དང་།  ༢༠༠༦ལོར་བླ་རུང་དུ་འབྱོར།  སྔར་ནས་མོས་པ་ཡོད་ཐོག  ༢༠༡༣ལོར་རྩོམ་རིགས་ལ་འབད་པར་བྱས་ཏེ་ད་ལྟའི་བར་དུ་བཅད་རྩོམ་དང་རང་མོས། ལྷུག་རྩོམ་སོགས་རྩོམ་ཡིག་བཅུ་ཕྲག་ཁ་ཤས་བྲིས་ནས《གངས་དཀར་རི་བོ》《གསེར་རྔ》《ལྕགས་མདུད》《སྒྲེ་བོ》སོགས་ལོ་དེབ་དང་དུས་དེབ་ཁག་ཏུ་སྤེལ་ལ།  དྲྭ་ཚིགས་དག་ཏུ་རྩོམ་ཡིག་མང་པོ་སྤེལ།  ༢༠༡༤ལོ་ནས་ལོ་གསུམ་བར(ཉག་སྙན་ངག་གླིང)གི་ཚོགས་གཙོའི་འགན་ཁུར།  ད་ལྟ་ཉག་རོང་དང་ཕ་ཡུལ་གྱི་ལོ་དེབ་གསུམ་གྱི་རྩོམ་སྒྲིག་པའི་འགན་ཁུར་མུས་སུ་ཡོད།

       སྙན་ངག་ནི་དབྱིངས་རང་བཞིན་གྱིས་དྭངས་པའི་མཛེས་རྟོག་གི་ཁམས་ཤིག་སྟེ། འཕོ་འགག་དང་སྐྱེད་འཕེལ་གྱི་ཆོས་ཅན་དུ་གྲུབ་པའི་གཉུག་མའི་འཁོས་ཀ་ཅན་གྱི་ཡིད་འགྱུར་ཞིག་ཡིན་ན། སྐམ་ཐན་དང་ཙད་པ་ཡིས་གདུང་བའི་བདག་ཉིད་ཅན་དག་ནི་སྙན་ངག་གི་སྲད་བུར་འཇུས་ཏེ་ཆོས་ཉིད་ཀྱི་དབྱིངས་སུ་ཞུགས་པའི་ཡིད་འགུག་གི་ཆོས་ཅན་ལ་བཤོལ་འདེབས་པ་དང་བརླ་རྡུང་གིན་འདུག་ན། ཚུལ་དང་ཚུལ་འཆལ་གྱི་ར་སྐོར་དུ་གསོན་པའི་ཁམས་འདི་ལ་ལོག་གཡེམ་གྱི་སྦྱོར་བ་གཞན་གྱིས་ཅི་བྱ་ཨང་། དེ་བཞིན་གྲོགས་པོ་ངར་ཆ་ལགས་ཀྱི་བརྩམས་ཆོས་དག་ཀྱང་དེའི་འཁོར་དུ་ཐེ་བའི་སེམས་བསྐྱེད་ཞུས་པ་ཡིན།

------ ཞེས་ཛ་ཕོག་ཏུ་འབོད་པས།

      རྩོམ་ཡིག་ཀློག་མ་ཐུབ་ཀྱང་། ཁ་བྱང་གཅིག་པུས་བསམ་གཞིག་རི་འདྲ་བ་ཞིག་དྲུད་ནས་འོང་། ང་ཚོས་ནི་རང་ཉིད་ཀྱི་འདོད་རྔམ་ཁོ་ནས་རྣམ་ཤེས་ལ་རྫོགས་མཐའ་མེད་པའི་ངལ་དུབ་ཅིག་བསྐྲུན་ཡོད་ངེས། གལ་ཏེ་རྣམ་ཤེས་འདི་དབྱིབས་དང་ཁ་དོག་ལྡན་པའི་བྱ་དངོས་ཤིག་ཡིན་ཚེ། དེ་ནི་བལྟར་མི་བཟོད་པ་ཞིག་ཡིན་ཨང་། ཁྱེད་ཀྱི་སྙན་དེབ་འདི་བརྒྱུད་ནས་རྣམ་ཤེས་སྐོར་ཞིག་ངལ་དུབ་ཀྱི་འཆིང་རྒྱ་ལས་ཐར་བའི་རེ་བ་ཆེ།

------ལྡོང་ཆུ་ཤེལ།

སུ་ཞིག་གིས་རྣམ་ཤེས་ཀྱི་ངལ་དུབ་ཚོར་ཚེ་ཅི་དགར་བག་ཕེབས་པའི་ངལ་གསོར་བསྟེན།  སྙན་ངག་ནི་སེམས་ཀྱི་སྐྱོ་ངལ་གསོ་བའི་གཉེན་པོ་གཅིག་པུ་དེ་ཡིན་ན།  ད་ནི་སྐུ་ཉིད་ཀྱི་སྙན་དེབ་ཀྱིས་ཀུན་ལ་བདེ་བའི་ལོངས་སྤྱོད་བར་མེད་དུ་སྩོལ་ཤོག་ཨང་།

------བདེ་སྐྱིད་སྒྲོལ་མ།
      འདི་ནི་རླབས་ཆེན་གྱི་སྐྱེས་བུ་ཞིག་གི་ཕྱག་རྗེས་ལས་གྲུབ་པའི་ཡིག་འཇོག་ཅིག་མིན་ཡང་།  རང་སེམས་ཀྱི་རྩྭ་ཐང་ན་བག་ཡངས་ཀྱིས་རྒྱུག་ཤར་གློད་པའི་རྟེའུ་ཞིག་དང་མཚུངས་པར། ཕ་མ་དང་ཨ་ཁུ་སོགས་ཀྱི་སེམས་པ་གསོ་བའི་གྲུ་ཆུང་ཞིག་འཁོར་བའི་རྒྱ་མཚོར་གཏོང་བ་ལགས་ན།
ཁྱེད་གྲོགས་པོ་དང་ཀློག་པ་པོ་དག་གིས་རླབས་རྩེར་འཕྱོ་བའི་སེམས་ཀྱི་ལང་ཚོ་འདི་ག་བཞེས་སུ་གསོལ།

------རྩོམ་པ་པོས།

དཔེ་ཆ་མངག་ཉོ་བྱེད་ས།
            ཁ་པར་ཨང་གྲངས།13558513925
           འཕྲིན་ཕྲན་འབྲེལ་གནས། 2579655228


རྩོམ་སྒྲིག་པ།  དོ་དམ་པ།  སྤེལ་དུས། 2019/5/17 བལྟ་ཀློག (1193)