ཀོ་ཏམ་བསྟན་པའི་ཞབས་འདྲེན་ཐ་མ་ཁ། །
ཁོ་ཐག་ཆོས་ལ་གཅོད་བྱེད་ཐ་མ་ཁ། །
གོ་རིག་དྲན་པ་སླད་བྱེད་ཐ་མ་ཁ། །
ངོ་ཚ་ཁྲེལ་འཛེམ་འདོར་བྱེད་ཐ་མ་ཁ། །
ཅོ་འདྲི་བསླུ་བྲིད་སྣ་འདྲེན་ཐ་མ་ཁ། །
ཆོ་རིགས་བཟང་པོ་སླད་བྱེད་ཐ་མ་ཁ། །
ཇོ་བཟང་མིན་པའི་དན་རྟགས་ཐ་མ་ཁ། །
ཉོ་ལེ་དགེ་སྦྱོར་འཆག་བྱེད་ཐ་མ་ཁ། །
ཏོ་གེར་ཚུན་ཆད་དྲི་མནམ་ཐ་མ་ཁ། །
ཐོ་ཅོའི་སྤྱོད་པའི་མཐར་ཟད་ཐ་མ་ཁ། །
དོ་གལ་ཅི་ཡང་མེད་བཞིན་འདི་ལ་སྤྱོད། །
ནོ་བསམ་ཅི་ཡང་མ་ཐོངས་འདི་ལ་དགའ། །
པོ་ཏི་ལྔ་ལ་མཁས་པའང་འདི་ཡིས་བསླད། །
ཕོ་རབས་སྙིང་སྟོབས་ཅན་ཡང་འདི་ཡིས་བསླད། །
བོ་དྷི་སྒྲུབ་བརྩོན་འགའ་ཡང་འདི་ཡིས་བསླད། །
མོ་བཙུན་གཙང་སྦྲ་ཅན་ཡང་འདི་ཡིས་བསླད། །
ཙོ་རས་ཙམ་ཡང་ཚ་གྲང་སྐྱོབ་མི་ནུས། །
ཚོ་སྣུམ་ཟས་བཞིན་ལུས་ཟུངས་སྐྱིད་མི་ནུས། །
ཛོ་ཀིའི་སྤྱོད་བཞིན་གྲོགས་སུ་འཁྱེར་མི་ནུས། །
ཝོ་བརྒྱལ་དོན་མེད་མིག་ཆུ་འཛག་པར་ཟད། །
ཞོ་སོགས་ཞིམ་དགུ་བསྟེན་ཀྱང་བྲོ་བ་བསླད། །
ཟོ་མདོག་མི་བདེ་གདོན་དང་ནད་རིམས་སློང་། །
འོ་དོད་བོས་ཀྱང་ལྷ་སྲུང་འཁོར་མི་ནུས། །
ཡོ་དོང་གཡང་ས་ལྟ་བུ་འདི་སྤོངས་ཤིག །
རོ་ལངས་གདོན་གྱི་སྣ་འདྲེན་འདི་སྤོངས་ཤིག །
ལོ་ཏོག་ས་བཅུད་ཉམས་བྱེད་འདི་སྤོངས་ཤིག །
ཤོ་དང་ཁྲམ་ལ་འདེབས་བྱེད་འདི་སྤོངས་ཤིག །
སོ་དང་སེམས་རྒྱུད་ནག་བྱེད་འདི་སྤོངས་ཤིག །
ཧོ་ཧོ་བསམ་བཞིན་བསམ་བཞིན་འགྱོད་དགོས་པ།།
ཨོ་ཆུའི་ངན་ལམ་མ་ཐལ་ཟབ་ཅིག་ཨང་། །
དུ་བ་འཐེན་མཁན་གྱི་ཁ་ནང་དང་ཁོག་གི་པར་རིས།