| ཞགས་ཐག ཆིན་ཏོ།
ཐོག་མར་རང་བྱུང་ཁམས་བསྟོད་དོ
ང་ནི་ཁྱོད་ཀྱིས་པང་ཁུག་ན་ཡོད་པའི་ཕྱིར
གཙང་བོའི་རླབས་སྒྲས་མི་སེམས་བསྒུལ་ཡོང
ད་ནི་ཡུལ་ཕྱོགས་འདི་ནས་ལམ་ལ་ཆས་རན
ཁྱོད་ཚོས་ང་རང་འཇིམ་པར་ནོར་འདུག
འོན་ཀྱང་ངའི་རང་ཉིད་སུ་ཡིན་མི་ཤེས་མོད
གང་ལྟརངས་ཀྱང་ཉི་མ་ལྟ་བའིཟླ་བ་ལྟ་བའི
སྐར་མ་ལྟ་བའིའོད་སྣང་ཉག་ཙམ་ཡང་འཚོལ་བར་བྲེལ་ཡོད
ད་ནི་མེས་པོ་བསྟོད་དོ
ཁྱོད་ཀྱིས་ང་རང་གོས་ཐུམ་ནང་བཏུམས་ཡོད་པའི་རྐྱེན
ཆུང་དུས་ནས་འཁྱགས་མ་དགོས་ལ
གཞན་གྱིས་མདུན་ནས་འདར་སིག་རྒྱག་མ་དགོས
ང་རང་བཟི་ཡོད་དུས
དྲན་ཡོང་བ་ནི་ཆང་ཕོར་ཁོ་ན་མ་ཡིན་པར
འཕུར་ལ་ཁད་ཀྱིས་ལྷན་ཐབས་མཐུག་པོ་དེ་ཡིན
ང་རང་གཉིད་ཡོད་དུས་རྨིས་ཡོང་བ་ནི
ཆུང་འདྲིས་ཁོ་ན་མ་ཡིན་པར
མེ་ལོང་མདུན་ན་ཤི་བའི་མི་རོ་དག་ཡིན
མཇུག་མཐར་ཕ་མ་བསྟོད་དོ
ཁྱོད་ཀྱིས་ང་ལ་གནང་བ་མང་སོང་བའི་རྐྱེན
ཆུང་དུས་ནས་ང་རང་སྒོར་སྒོར་དུ་བཏང་དེ
མི་ཚོགས་ཞེས་པའི་གྲོང་ཁྱེར་འདིའི་དཀྱིལ་ལ་བཞག་ཡོད
སེམས་པ་བརྣལ་དུ་ཕབ་ནས་ཕྱིར་འདང་བརྒྱབ་ན
ཆུང་འདྲིས་བསླབ་ཡོང་བ་དག
ད་ནི་ངོམ་སོ་བྱེད་པའི་དུས་ལ་བབས་འདུག
མདོར་ན
རུས་རྐང་ནས་བཙུར་ཡོང་བ་ཐམས་ཅད
ད་ནི་ཁྱོད་ཚོའི་ཁ་ཟས་སུ་འབུལ་ལོ
ངས་ཀྱང་འདི་ལྟར་རྨི་ལམ་ཞིག་རྨིས་ཚར་རྗེས
ཡང་བསྐྱར་ཁྱོད་ཀྱིས་པང་ཁུག་ནས་ཉལ་འདོད
|