| ཆོས་ཤུལ་ཚུལ་ཁྲིམས། （ཞལ་ཤུལ）
གདོད་ནས་གཞོམ་བྲལ་མི་འགྱུར་རྡོ་རྗེའི་སྐུ།།
བརྙེས་པས་སྐྱེ་འཆིའི་ཚད་མ་མི་མངའ་མོད།།
རབ་མང་གདུལ་བྱའི་རྟག་འཛིན་རྫོགས་པའི་སླད།།
ཞིང་ཁམས་གཞན་ལ་གཤེགས་པའི་མཛད་པ་བསྟན།།
མགོན་ཁྱོད་ཁོ་ན་སྐྱབས་སུ་འཛིན་པ་ཡི།།
སྙིགས་མའི་དུས་ཀྱི་ཉམ་ཐག་འགྲོ་རྣམས་ཀྱིས།།
ཁྱེད་ཉིད་ཞི་བར་གཤེགས་པས་ཚུལ་ཐོས་ནས།།
མགོ་བོས་འཛིན་མ་རྡུང་བཞིན་འོ་དོད་འབོད།།
སྣ་ཚོགས་རྐང་འཐུང་དཀྲིགས་པའི་ནགས་ཀློང་གི།
རྒྱལ་རྣམས་དགྱེས་པའི་དབེན་གནས་རི་ཁྲོད་ནས།།
མི་ཕྱེད་དད་པའི་སྐུ་གདུང་ལ་མཇལ་ཚེ།།
ཕངས་པས་ཡིད་སྐྱོ་དད་པའི་མིག་ཆུ་སྙིལ།།
སྐལ་མང་སྔོན་ནས་སྤངས་རྟོགས་མཐར་ཕྱིན་ཀྱང༌།།
སྣ་ཚོགས་སྤྲུལ་སྐུའི་རྨད་བྱུང་ཐབས་མཁས་ཀྱིས།།
གདུལ་བྱ་རྒྱ་མཚོ་རྣམ་གྲོལ་ལས་བཟང་ལ།།
བཀོད་པའི་རྒྱལ་བ་གཉིས་པ་སྙིང་ནས་དྲན།།
གཞོན་ནུའི་དུས་ནས་འདིར་སྣང་བྱ་བ་དང༌།།
འཇིག་རྟེན་ཆོས་བརྒྱད་མཆིལ་སྣབས་བཞིན་དོར་ནས།།
ཚེ་གཅིག་སྒྲིབ་ལ་བརྩོན་པའི་ཟླ་བོ་ལ།།
རྗེ་བཙུན་མི་ལ་ལས་གཞན་ཡོད་མ་ཡིན།།
ལྔ་ཕྲག་སྙིགས་མའི་མུན་པ་དབྱིངས་སུ་བསྐྲད།།
རྒྱལ་བསྟན་པདྨའི་འདབ་ཕྲེང་ཆེས་ཆེར་གྲོལ།།
ལྟ་ངན་སྲིན་བྱའི་བློ་མིག་ལྡོངས་བྱས་ཏེ།།
ཡང་སྤྲུལ་ཉི་གཞོན་མྱུར་དུ་འཆར་བར་ཤོག།
བདག་ནི་སྐྱེ་བ་ཀུན་ཏུ་མགོན་ཁྱོད་ཀྱིས།།
བརྩེ་བའི་རྗེས་བཟུང་མདོ་སྔགས་གདམས་ཟབ་ལ།།
ཅི་དགར་ལོངས་སུ་སྤྱོད་པའི་སྐལ་བཟང་དང༌།།
འབྲལ་བ་མེད་པའི་སྨོན་ལམ་སྙིང་ནས་འདེབས།།
བློ་བཟང་བསྟན་པའི་སྙིང་བོ་ཚུལ་ཁྲིམས་གསུམ།།
དད་སོགས་འཕགས་ནོར་རིན་ཆེན་བདུན་གྱི་མཛོད།།
རླབས་ཆེན་སྨོན་ལམ་སྟོབས་ཀྱིས་དབང་བསྒྱུར་བ།།
གདུལ་བྱ་རྒྱ་མཚོའི་མགོན་ལ་གསོལ་བ་འདེབས།།
༢༠༡༠ལོའི་རིག་གནས་ཡར་སྤེལ་ལས།
|