| རྨ་སྲིབ་སྨྱུག་གཞོན། （ཞལ་ཤུལ）
ཐུབ་བསྟན་གསེར་གྱི་ལྷུན་པོ།།
ནམ་ཀུན་ཐུགས་ན་འགྱིང་བའི།།
རིས་མེད་འགྲོ་བའི་སྐྱབས་མཆོག།
འབྲལ་མེད་གཙུག་ཏུ་མཆོད་དོ།།
ཁམས་གསུམ་འགྲོ་བའི་ལམ་སྟོན།།
ཡང་དར་བསྟན་པའི་སྲོག་ཤིང༌།།
ཀུན་སྤངས་རྣལ་འབྱོར་དབང་བོ།།
རྗེ་བཙུན་བློ་བཟང་ཚུལ་ཁྲིམས།།
དམར་སེར་རང་མདངས་རྫོགས་པའི།།
ཁྲིམས་ལྡན་ངུར་སྨྲིག་འཆང་མཁས།།
ཞིང་ཁམས་གཞན་དུ་ཕེབས་ན།།
ང་ཚོའི་སྐྱབས་ཡུལ་སུ་བྱེད།།
དུས་སྙིགས་མུན་པའི་ཀློང་གི།
བརྩེ་ཆེན་དུང་ཟླ་དཀར་བོ།།
སྨག་རིམ་ཁྲོད་ན་འཁྱམས་པའི།།
བུ་ངས་ཁྱེད་ཞལ་དྲན་བྱུང༌།།
ཐུགས་རྗེ་སྤྲིན་སྔོན་ཀློང་ནས།།
ཞལ་གདམས་བདུད་རྩིའི་གྲུ་ཆར།།
གསུམ་ལྡན་སློབ་བུའི་ཞིང་སར།།
འཛད་མེད་འཇོ་བ་དྲན་བྱུང༌།།
ཟང་ཟིང་འཁོར་བའི་རང་གཤིས།།
མཐའ་མེད་མངོན་པར་གཟིགས་ནས།།
དབེན་གནས་བྲག་སྐྱིབས་བརྟེན་པའི།།
བྱ་བཏང་མཛད་རྣམ་ལོས་དྲན།།
སྐྱོ་གདུངས་ཟུག་རྔུའི་དབྱངས་རྟ།།
མགྲིན་པའི་སྦུབས་སུ་ལུས་ནས།།
དབུགས་རིང་འཁུན་སྒྲའི་ངུ་ངག།
མིག་ཆུའི་ནང་དུ་ཐིམ་སོང༌།།
༢༠༡༠ལོའི་ཟླ༩ཚེས༡༥ཉིན་ནང་བསྟན་སློབ་གྲྭ་ནས།
༢༠༡༠ལོའི་རིག་གནས་ཡར་སྤེལ་ལས།
|