ཨེ་ཅིབ་ཞིབ་དཔྱོད་སྡེ་ཁག་གིས་ཚེས་བཅུ་གསུམ་ཉིན་ཁྱབ་བསྒྲགས་བྱས་དོན། སྔོན་ཆད་ཀྱི་ཙུང་ཐུང་མུའུ་ཨར་ཞི་དང་མུའུ་སི་ལིན་སྤུན་ཟླ་ཚོགས་པའི་ཁོངས་མི་མང་བོར་ཉེས་དོན་རྟོག་ཞིབ་བྱེད་རྒྱུ་ཁྱབ་བསྒྲགས་བྱས་པ་དང་། ཉེས་མིང་ནི་ཕྱི་རྒྱལ་ལ་ངན་འབྲེལ་བྱས་པ་དང་། དྲག་ཤུགས་ལ་ངན་སྐུལ་བྱས་པ། རྒྱལ་ཁབ་ཀྱི་དཔལ་འབྱོར་ལ་གཏོར་བརླག་བྱས་པ་སོགས་ལ་འབྲེལ་བ་ཡོད།
མུའུ་སི་ལིན་སྤུན་ཟླ་ཚོགས་པས་ཉེས་མིང་དེ་དག་ཁས་ལེན་མ་བྱས་པ་དང་། དབང་འཛིན་ལས་ཁུངས་ཀྱིས་དྲག་ཤུགས་འཁྲུག་རྩོད་ལ་འགན་ཁུར་དགོས་པ་དང་། ཞོར་དུ་རྒྱབ་སྐྱོར་མཁན་གྱིས་མུ་མཐུད་དུ་གཞི་རྒྱ་ཆེ་བའི་རྔམ་སྟོན་ཁྲོམ་སྐོར་བྱེད་དགོས་པའི་སྐུལ་མ་བཏང་།
ཉེས་དོན་རྟོག་ཞིབ་བྱ་ཡུལ་ཁྲོད་མུའུ་ཨར་ཞི་དང་། མུའུ་སི་ལིན་སྤུན་ཟླ་ཚོགས་པའི་ཁྲིད་སྟོན་པ་པཱ་ཏིས་ཡཱ། དེ་མིན་མུའུ་སི་ལིན་སྤུན་ཟླ་ཚོགས་པའི་ཁོངས་མི་བདུན། གཞན་ཡང་མུའུ་སི་ལིན་སྤུན་ཟླ་ཚོགས་པའི་རྒྱབ་སྐྱོར་མཁན་རེ་འགའ་བཅས་ཡོད།
ཨེ་ཅིབ་ཞིབ་དཔྱོད་ཁང་གིས་བཤད་རྒྱུར། ཞིབ་དཔྱོད་ཁང་ལ་འབྱོར་བའི་ཞུ་གཏུག་ལྟར་ན། གོང་གི་མི་སྣ་དེ་དག་གིས་ཕྱི་རྒྱལ་ལ་ངན་འབྲེལ་བྱས་ཏེ་ཨེ་ཅིབ་རྒྱལ་ཁབ་ཀྱི་ཁེ་ཕན་ལ་གཏོར་བརླག་བྱས་པ་དང་། དྲག་ཤུགས་ལ་ངན་སྐུལ་བྱས་ཏེ་ཞི་བའི་ཁྲོམ་སྐོར་མཁན་དམར་གསོད་བྱས་པ་མ་ཟད། མཚོན་ཆ་དང་འགད་རྫས་བཀོལ་ནས་དམག་སྒར་ལ་འཇབ་རྒོལ་བྱས་པ་དང་། ཨེ་ཅིབ་ཀྱི་དཔལ་འབྱོར་ལ་གནོད་པ་བཏང་ཡོད་ཟེར།
ཞིབ་དཔྱོད་ཁང་གིས་ཞུ་གཏུག་དེ་སུས་སྤྲད་པ་གསལ་བཤད་མ་བྱས། ཨེ་ཅིབ་ཀྱི་བཅའ་ཁྲིམས་ལྟར་ན། ཞུ་གཏུག་ནི་ཉེན་རྟོག་ཕྱོགས་དང་ཨེ་ཅིབ་ཀྱི་སྤྱི་དམངས་གང་རུང་གིས་བཏོན་ཆོག་པ་རེད།
ཨེ་ཅིབ་དམག་ཕྱོགས་ཀྱིས་ཟླ་འདིའི་ཚེས་གསུམ་ཉིན་མུའུ་ཨར་ཞི་ཡིས་ལས་འགན་བསྐྱུར་བ་ཁྱབ་བསྒྲགས་བྱས་རྗེས་མུའུ་ཨར་ཞི་གསང་བའི་གནས་ཤིག་ཏུ་བཀག་འཇུག་བྱས་ཡོད།དེ་ལས་གཞན་ཞིབ་དཔྱོད་ཁང་གིས་མུ་མཐུད་དུ་ཉིས་སྟོང་བཅུ་གཅིག་ལོའི་ཨེ་ཅིབ་ཀྱི་གནས་བབ་ཟང་ཟིང་བྱུང་བའི་སྐབས་སུ། མུའུ་ཨར་ཞི་དང་མུའུ་སི་ལིན་སྤུན་ཟླ་ཚོགས་པའི་མཐོ་རིམ་མི་སྣ་སུམ་ཅུ་ཡིས་ཕཱ་ལེ་སི་ཐན་དབྱི་སི་ལན་འགོག་རྒོལ་རྩ་འཛུགས་ལ་བརྟེན་ནས་བཙོན་ཁང་ནས་བྲོས་བྱོལ་བྱེད་པར་རོགས་རམ་བྱས་མིན་ལ་རྟོག་ཞིབ་བྱེད་རྒྱུ་རེད། དེའི་སྔོན་ཞིབ་དཔྱོད་ཁང་གིས་པཱ་ཏིས་ཡཱ་སོགས་མུའུ་སི་ལིན་སྤུན་ཟླ་ཚོགས་པའི་མཐོ་རིམ་མི་སྣ་འགའ་འཛིན་བཟུང་བྱེད་རྒྱུའི་བཀའ་རྒྱ་བཏང་བ་དང་། ཁོ་ཚོས་དྲག་ཤུགས་ལ་ངན་སྐུལ་བྱས་པར་སྐྱོན་འཛུགས་བྱས། ཡིན་ན་ཡང་ད་ལྟའི་བར་དེ་དག་འཛིན་བཟུང་བྱེད་ཐུབ་མེད།
ཞིན་ཧྭ་གསར་འགྱུར་དྲ་བ་ལས།
| 