ཀྲུང་གོའི་ཕྱི་འབྲེལ་པུའུ་ཀྲང་ཝང་དབྱི་ཡིས་ཚེས་ཉེར་དགུ་ཉིན་སི་རི་ཡའི་གནས་བབ་ཐད་ནས་འཇར་མན་གྱི་ཕྱི་འབྲེལ་པུའུ་ཀྲང་ཝེ་སི་ཐི་ཝེ་ལེ་དང་ཨ་རབ་མནའ་འབྲེལ་གྱི་དྲུང་ཡིག་ཆེན་མོ་ཨ་ལ་པེ་གཉིས་ལ་ཁ་པར་བཏང་།
ཝང་དབྱི་ཡིས་ཀྲུང་གོས་མི་སུ་ཡིན་རུང་རྫས་འགྱུར་མཚོན་ཆ་བཀོལ་བར་ངོ་རྒོལ་བྱེད་པ་དང་། སུས་རྫས་འགྱུར་མཚོན་ཆ་བཀོལ་ན་དེས་འགན་ཁུར་དགོས། མཉམ་འབྲེལ་རྒྱལ་ཚོགས་ཀྱི་རྟོག་ཞིབ་ཚན་ཆུང་གིས་སི་རི་ཡ་རུ་རྟོག་ཞིབ་བྱེད་བཞིན་ཡོད་པ་དང་། རྫས་འགྱུར་མཚོན་ཆ་བཀོལ་ཡོད་མེད་དང་སུས་བཀོལ་བར་རྟོག་ཞིབ་བྱེད་པ་ནི་གནད་དོན་ཐག་གཅོད་པའི་བརྒྱུད་རིམ་ཞིག་ཡིན་ལ། གནད་དོན་འདིའི་ཐད་ནས་ལོ་རྒྱུས་ལ་འགན་འཁུར་བའི་རྣམ་འགྱུར་འཛིན་དགོས་ཞེས་ནན་གྱིས་བཤད།
ཝང་དབྱི་ཡིས་དམག་འཁྲུག་དང་ཞི་བདེ་ལ་འབྲེལ་བའི་གནད་དོན་ཐད་ནས་ཕྱོགས་སོ་སོས་གཟབ་ནན་དང་ལུགས་མཐུན་གྱི་རྣམ་འགྱུར་འཛིན་དགོས། ཕྱོགས་གཅིག་གི་འགུལ་སྐྱོད་ཀྱིས་གནད་དོན་ཐག་གཅོད་ཐབས་མེད་པ་དང་། དེའི་ཁྲིམས་མཐུན་རང་བཞིན་ལའང་ཚང་མ་དོགས་པ་ཟ་ངེས། ཆབ་སྲིད་ཀྱི་ཐག་གཅོད་བྱེད་ཐབས་ནི་སི་རི་ཡའི་གནད་དོན་གྱི་བགྲོད་ལམ་ཉག་གཅིག་ཡིན་པས། ཕྱོགས་སོ་སོས་མུ་མཐུད་སྟོབས་ཤུགས་ཡོད་རྒུས་སི་རི་ཡའི་གནད་དོན་ཐད་ནས་རི་ནེ་ཝའི་ཚོགས་འདུ་ཐེངས་གཉིས་པ་མྱུར་དུ་བསྡུ་བར་བརྩོན་ལེན་བྱས་ཏེ། གྲོས་མོལ་བརྒྱུད་ནས་ཐབས་ལམ་འཚོལ་ཞིབ་བྱེད་དགོས་ཞེས་བསྐྱར་བསྒྲགས་བྱས།
མཚོ་སྔོན་རྒྱང་སྒྲོག་བརྙན་འཕྲིན་དྲ་ཚིགས་ལས།
| 