བྲག་རྡོ། ༼ལན་གྲུ༽
ཆུང་འདྲིས་དྲན་ཐེངས་རེ་ལ།།
སེམས་པ་འཁྱག་གིས་བསྡམས་སོང་།།
འཁྱག་གིས་བསྡམས་པས་སེམས་པ།།
ཆུང་འདྲིས་ཕྱོགས་ལ་ཤོར་ཡོད།།
འབྲི་མོ་བཏགས་པའི་རྡང་ན།།
འབྲོག་མོའི་བཞོ་དབྱངས་ཁྱབ་ཡོད།།
བདག་གི་ཡ་ཆུང་སེམས་ལ།།
འབྲོག་མོའི་སེམས་གཏམ་བསྐྱིལ་ཡོད།།
ང་དང་འབྲོག་མོ་སྒྲོལ་མ།།
ལུས་སེམས་གཅིག་ལ་གཏད་ཡོད།།
བརྩེ་བ་གཅིག་ལ་གཏད་ཡོད།།
བློ་སེམས་གཅིག་ལ་གཏད་ཡོད།།
སློག་པ་སྐྱ་ལྡང་གྱོན་པའི།།
ང་ཡི་འབྲོག་མོ་སྒྲོལ་མ།།
སྣུམ་དྲེགས་བཞོ་ཟེའུ་བཟུང་བའི།།
ང་ཡི་འབྲོག་མོ་སྒྲོལ་མ།།
ཐར་ཐོར་ལུག་ཁྱུའི་རྫི་བོ།།
ང་ཡི་འབྲོག་མོ་སྒྲོལ་མ།།
ཐུལ་དཀར་འབྲི་མོའི་བདག་མོ།།
ང་ཡི་འབྲོག་མོ་སྒྲོལ་མ།།
ང་ཡི་བརྩེ་བ་དྭངས་མོ།།
འབྲོག་མོ་སྒྲོལ་མ་གཏད་ཡོད།།
སེམས་ཀྱི་དར་སྐུད་རིང་མོ།།
འབྲོག་མོ་སྒྲོལ་མར་འཐེན་ཡོད།།
སེམས་ལ་གློག་ཞགས་བརྒྱབ་འདྲ།།
མིག་ཟུང་ལོངས་བར་གྱུར་འདྲ།།
རྣ་བ་འོན་པར་གྱུར་འདྲ།།
འབྲོག་མོ་སྙིང་ནས་དྲན་ཡོང་།།
སེམས་ལ་སྨག་གནག་འཐིབ་འདྲ།།
ལུས་སེམས་རྨས་པ་བཞིན་འདྲ།།
ང་ཡི་འབྲོག་མོ་སྒྲོལ་མ།།
ག་ལེར་ག་ལེར་དྲན་ཡོང་།།
གནག་སྣུམ་སྐྲ་ལོའི་ལན་བུ།།
ལུས་ཀྱི་རྒྱབ་ལ་དཔྱངས་ཡོད།།
ཁྱོད་ཀྱིས་སྒེག་མཛེས་འགྲོ་སྟངས།།
སེམས་ན་ག་ལེར་ག་ལེར།།
ཆུང་འདྲིས་འབྲོག་མོ་སྒྲོལ་མ།།
ཚེ་གཅིག་སྙིང་གི་སྐྱ་ཡ།།
ཚེ་གཅིག་སྐྱ་ཡའི་ཕྱོགས་ལ།།
སྙིང་གཏམ་མཚོ་བཞིན་བསྐྱིལ་ཡོད།།
དཀར་འཇམ་ཚར་རའི་ནང་ན།།
འབྲོག་མོ་སྒྲོལ་མའི་མིག་ཟུང་།།
མཐོན་མཐིང་སྐར་ཆེན་འདྲ་བར།།
ང་ཡི་ཕྱོགས་ལ་ཅེར་ཡོད།།
འབྲོག་མོ་སྒྲོལ་མོའི་བྲང་གཞུང་།།
དཀར་འཇམ་ཚར་རུ་ནང་བཞིན།།
དྲོད་དང་འཇམ་ཤ་ལྡན་པ།།
ལུས་སེམས་སྨོན་པ་ཤོར་ཡོད།།
གཤིས་བཟང་འབྲོག་མོ་སྒྲོལ་མ།།
གཏན་གྱི་འདུན་མར་གྱུར་ཡོད།།
རིག་བཟང་འབྲོག་མོ་སྒྲོལ་མ།།
སྙིང་གི་ཚིག་གསུམ་བཤད་ཡོད།།
ཚར་ཞྭ་མཛེས་པའི་འོག་ན།།
འབྲོག་མོའི་མིག་ཟུང་རིག་རིག །
སྙིང་གི་ང་ཡི་ཕྱོགས་ལ།།
ག་ལེར་ག་ལེར་བལྟས་ཡོད།།
འབྲོག་མོའི་དངུལ་གྱི་གདུ་བུ།།
ང་ལ་དྲན་རྟེན་བྱིན་ཐལ།།
ང་ཡི་སྙིང་གི་ཚིག་གསུམ།།
འབྲོག་མོ་སྒྲོལ་མར་བྱིན་ཡོད།།
ཆར་རླུང་དྲག་པའི་ནང་ནས།།
འབྲོག་མོའི་ངོ་གདོང་བྱིད་ཐལ།།
ཁ་བ་བ་ཡུག་ནང་ནས།།
འབྲོག་མོའི་མིག་ཟུང་བྱིད་ཐལ།།
སྙིང་གཏམ་ཚིག་གཅིག་མ་ལུས།།
འབྲོག་མོ་སྒྲོལ་མར་ལབ་ཡོད།།
ལྕི་འདམ་ལས་ཀའི་ཁྲོད་ནས།།
འབྲོག་མོའི་མི་ཚེ་ཚར་ཐལ།།
ལག་ན་འུར་ཆ་བཟུང་ཡོད།།
ལུས་ལ་ཚར་ལྭ་གྱོན་ཡོད།།
སྐེ་ལ་བྱུ་རུ་བཏགས་ཡོད།།
ང་ཡི་འབྲོག་མོ་སྒྲོལ་མ།།
འབྲོག་མོའི་གོམ་པའི་འདེགས་འཇོག །
ཕྱུགས་རའི་རྗེས་ལ་སྙེག་ཡོད།།
ཚེ་གཅིག་དམིགས་ཡུལ་གཙོ་བོ།།
ཕྱུགས་རའི་འཕེལ་ཁ་དམིགས་ཡོད།།
བྱུ་རུའི་རྣ་ལོང་ཆ་གཅིག །
འབྲོག་མོ་སྒྲོལ་མར་ཉོས་ཡོད།།
སྙིང་གཏམ་རྣལ་མ་འགའ་རེ།།
འབྲོག་མོ་སྒྲོལ་མར་ལབ་ཡོད།།
