འབྲོག་བུ་དཀོམ་བཀྲ།
དབུགས་ཟད་གྲོག་མའི་ཚོགས་ཀྱི་ཕྲུ་མ་བཏབ་འདྲའི།།
བློ་ལ་གཏད་སོ་ཆུང་བའི་བདག་པོའི་འཁོར་གཡོག།
སྲིད་པའི་འདོམས་སུ་ཉུལ་བའི་ཤིག་སྲོ་ཡིན་སྐད།།
སྣང་བ་དག་པའི་གླུ་ཞིག་ལེན་སྙིང་མི་སྤྲོ།།
ང་དང་ཁོ་ཚོའི་བར་གྱི་གཙང་ཆུ་རབ་མེད།།
དབང་གི་དྲེག་པ་ནག་པོས་བསྣོག་པར་དོགས་ཏེ།།
ང་ཡི་ལུས་ལ་ཚོས་ཁ་དཀར་པོ་བྱུགས་ཤིང་།།
རང་སྤྱིལ་དོག་མོར་ཆུ་རགས་གྲུ་བཞི་བརྩིགས་ཡོད།།
གཏིང་འཁྱག་ས་གཞིའི་སྒྲོམ་དུ་ལོ་མང་ཡིབ་པའི།།
རྟག་པར་ཡིད་དུ་འཁོར་བའི་རྒྱ་སེ་མེ་ཏོག།
ཤེལ་དང་གྱོ་མོས་གྲུབ་པའི་བདག་གི་ཁྱིམ་དུ།།
ཆང་དང་ཤོག་བུ་རུལ་བའི་ང་ཡི་གམ་དུ།།
ཁྱེད་ལ་གཟས་པའི་མེ་སྒྱོགས་ཕྲེང་དུ་བསྟར་བས།།
གུས་པོ་ནོངས་པས་བསྣད་དེ་དབང་རྩ་བད་སོང་།།
ད་ནི་སྲོག་གི་ལག་པར་རྐྱོང་སྐུམ་བྲལ་ཞིང་།།
དྲན་པའི་མཚོ་ཆུང་དེ་ཡང་གཅིག་པུར་ལུས་ཡོད།།
གསེར་གྱི་ཚེ་འབར་ལྟ་བུའི་ཉི་མ་སེར་པོ།།
ཨ་སྔོན་མཐོན་པོའི་དབྱིངས་ནས་འདར་ཙམ་བྱས་ཤིང་།།
ལུས་ཀྱི་ཡང་ཟོར་སྐྱེན་པའི་བྱ་རོག་ཁྱུ་ཞིག།
སྙིང་གི་ལྕགས་རིའི་སྡེབས་སུ་ཡང་ཡང་ལྡིང་སྟེ།།
བཙོན་མའི་རྟུལ་ཞུགས་སྲུང་བའི་བདག་གི་དཔྲལ་བར།།
དུས་ཀྱི་གཉེར་མ་རིང་མོ་ཧར་གྱིས་ཕབ་སོང་།།
ད་ནི་རི་རབ་འདི་ཡི་ཕྱི་ལ་འཁྲེང་བཞིན།།
འཆི་བའི་ཕོ་ཉ་སྒུག་པའི་ཚེ་སྐབས་ཡིན་ནམ།།
ནམ་ཟླ་དགུན་གྱི་ཁ་བ་མཐུག་ཏུ་ཕྱིན་ཅིང་།།
ལམ་གྱི་ཕྱི་ནང་གྲང་མོ་དར་གྱིས་གཡོགས་དུས།།
མི་ཚོགས་དབུས་སུ་ལུས་པའི་སྙིང་སྡུག་སྐད་སྒྲ།
ཉི་མའི་རྡུལ་ཕྲན་བཞིན་དུ་སིལ་བུར་གས་ཤིང་།།
ཆགས་པའི་ཕྱི་མིག་མེད་པར་རླུང་ལ་སིམ་ཚེ།།
ང་ནི་ཕངས་སེམས་ལྕི་མོའི་འཁར་བར་བསྙེས་ཏེ།།
དུས་ཀྱི་བདག་མོས་གཡུག་པའི་མཚེར་ཤུལ་ཞིག་ཏུ།།
གྲོགས་དང་ཉེ་དུ་མེད་པར་ཧྲེང་ངེར་འཚོ་འདོད།།
སྒྱུ་མའི་གདོང་ཁེབས་གྱོན་པའི་གར་མ་རེ་རེ།།
གཞས་ཆུང་ཕྲ་མོའི་གདངས་ལས་ཕྱི་ལ་མཆོངས་ཏེ།།
གཏམ་དང་ཀུ་ཅོའི་ཝུ་བ་མཚོན་དུ་བསྡེབས་ནས།།
ང་དང་གྲིབ་མའི་ངོ་བོ་སོ་སོར་ཕྲལ་སོང་།།
ད་ནི་བདག་གི་མདུན་དུ་ཀེར་རེར་ལངས་པའི།།
ལོ་ཟླའི་ཁ་རྔོག་ལྟ་བུའི་འཁོར་བའི་བྱེ་རི།།
ཉིན་བཞིན་མཐོ་རུ་འཕགས་པའི་འཁྲུལ་སྣང་ཞིག་གིས།།
ང་ཡི་དྲན་པའི་རྩིག་པ་ཡོམ་ཡོམ་སྒུལ་བྱུང་།།
གློ་དང་རྒྱུ་མ་མཐུན་པའི་ཟོལ་གྱིས་འཛོམས་ཏེ།།
ཞེ་དང་སྣང་བ་འགྲེས་ནས་སོ་སོར་གྱེས་པའི།།
མི་ཚེའི་ཟློས་གར་ཁྲ་མོར་ལན་གཅིག་བཅར་བས།།
སེམས་ཀྱི་ཨ་ལོང་སྒོར་མོ་དུམ་བུར་ཆག་སོང་།།
ད་ནི་ཤོག་ཧྲིལ་མཐུག་པོའི་མལ་ཁྲིར་ལོག་སྟེ།།
ལས་ཀྱི་ཆུང་མའི་ཚབ་ཏུ་ཁྱེད་རང་དྲན་བཞིན།།
འཇིག་རྟེན་གཞན་དུ་ཆས་པའི་སྐར་མདའ་ཞིག་ལ།།
སེམས་ཀྱི་སྨོན་འདུན་ལན་གཅིག་ཞུ་སྙིང་ཆེ་འང་།།
| 