ཐེ་གོའི་གྲོས་ཁང་ཞོལ་མའི་འདེམ་བསྐོའི་བྱ་འགུལ་གྱིས་ཚེས་གཉིས་ཉིན་འདེམ་ཤོག་འཕེན་པའི་བྱ་བ་མགོ་བརྩམས་ནས་དུས་ཚོད་འགའ་འགོར་རྗེས། བསྟུད་མར་དྲག་ཤུགས་འཇབ་རྒོལ་དོན་རྐྱེན་ཐེངས་གསུམ་བྱུང་སྟེ་མི་དགུ་ལ་རྨས་ཕོག་པ་དང་། དེའི་ནང་མི་གཉིས་ཀྱི་རྨས་སྐྱོན་ཅུང་ཚབས་ཆེན་རེད། པར་འདི་ནི་ཐེ་གོའི་འདེམ་དམངས་དང་རྔམ་སྟོན་ཁྲོམ་སྐོར་མཁན་བར་འཁྲུག་རྩོད་བྱུང་སྟེ་ཕན་ཚུན་རྡོ་བས་རྒྱག་བཞིན་པའི་ཚུལ་རེད།
ཐེ་གོའི་འདེམ་བསྐོ་ཨུ་ཡོན་ལྷན་ཁང་གིས་ཚེས་གཉིས་ཉིན་ཁྱབ་བསྒྲགས་བྱས་དོན། རྒྱལ་ས་མན་ཀུའུ་གྲོང་ཁྱེར་གྱི་འདེམ་ཤོག་འཕེན་ས་བཞི་བརྒྱ་དང་གྱ་བརྒྱད་ཀྱི་བྱ་བ་མཚམས་བཞག་ཟེར།
ཐེ་གོའི་གྲོས་ཁང་ཞོལ་མའི་འདེམ་ཤོག་འཕེན་པའི་བྱ་བ་དེ་ཚེས་གཉིས་ཉིན་གྱི་སྔ་དྲོའི་དུས་ཚོད་བརྒྱད་ནས་མགོ་བརྩམས་པ་དང་། འདེམ་ཤོག་འཕེན་པའི་བྱ་བ་མགོ་བརྩམས་པའི་ཚུན་དྲག་ཤུགས་འཇབ་རྒོལ་དོན་རྐྱེན་རྒྱུན་ཆད་མེད་པར་བྱུང་ཞིང་། འདེམ་ཁུལ་ཞེ་གཉིས་ལ་རྔམ་སྟོན་ཁྲོམ་སྐོར་མཁན་གྱི་འཇབ་རྒོལ་ཐེབས་པས་འདེམ་ཤོག་འཕེན་པའི་བྱ་བ་སྤེལ་ཐབས་མེད་པར་གྱུར།
ཐེ་གོའི་འདེམ་བསྐོ་ཨུ་ཡོན་ལྷན་ཁང་གིས་ཚེས་གཉིས་ཉིན་གྱི་ཕྱི་དྲོའི་དུས་ཚོད་གཅིག་དང་སྐར་མ་ཉི་ཤུའི་སྟེང་མན་ཀུའུ་གྲོང་ཁྱེར་གྱི་འདེམ་ཤོག་འཕེན་ས་བཞི་བརྒྱ་དང་གྱ་བརྒྱད་ཀྱི་འདེམ་ཤོག་འཕེན་པའི་བྱ་བ་མཚམས་འཇོག་རྒྱུ་ཁྱབ་བསྒྲགས་བྱས།
དེའི་སྔོན་ཐེ་གོའི་འདེམ་བསྐོ་ཨུ་ཡོན་ལྷན་ཁང་གིས་ཚེས་གཉིས་ཉིན་ཁྱབ་སྒྲོག་བྱས་དོན། རྒྱལ་ཡོངས་ཀྱི་ཞིང་ཆེན་དོན་བདུན་གྱི་འདེམ་ཁུལ་སུམ་བརྒྱ་དང་དོན་ལྔའི་ནང་། ཞིང་ཆེན་རེ་བརྒྱད་ཀྱི་འདེམ་ཁུལ་སུམ་བརྒྱ་དང་སོ་གསུམ་ནས་འདེམ་ཤོག་འཕང་བ་དང་། ཞིང་ཆེན་དགུ་ཡི་འདེམ་ཁུལ་ཞེ་གཉིས་ཀྱི་འདེམ་ཤོག་འཕེན་པའི་བྱ་བར་བཀག་རྒྱ་ཐེབས་ནས་འདེམ་ཤོག་འཕེན་པའི་བྱ་བ་མུ་མཐུད་དུ་སྤེལ་ཐབས་མེད་ཟེར།
| 