ལྷ་ས། ཁྲི་གླིང་པདྨ་ཡང་གསང་།
༡
དགའ་སྐྱོ་རྣམ་རྟོག་གི་སྒ་ཡོབ།།
ཉོན་མོངས་རྟ་རྒོད་ལ་བསྟད་དེ།།
སུམ་ཅུའི་མེ་ཏོག་གི་ལང་ཚོ།།
འཁོར་བའི་བྱང་ཐང་ནས་ཟད་སོང་།།
༢
ཞོགས་ཀའི་དགྱེས་འཛོམས་ཀྱི་དགོད་སྒྲ།།
དགོང་གར་གྱེས་བྲལ་གྱི་མིག་ཆུ།།
མ་ངེས་འདུ་འབྲལ་གྱི་ཀློང་ནས།།
ཚོགས་གཉིས་ལམ་སྣ་ཡང་མ་ཟིན།།
༣
ལས་འབྲས་སྒྱོགས་ཆེན་གྱི་འབེན་ས།།
ཚེ་འདིར་རང་ལུས་སུ་བབས་ན།།
དབེན་པར་ཏིང་འཛིན་ལ་ཞུགས་ཏེ།།
ཕྱི་མའི་ལམ་གྲོ་རེ་བསྒྲུབ་འདོད།།
༤
རང་ལུས་ཨ་གར་གྱི་ཚལ་བུ།།
མྱ་ངན་མཚོ་ངོགས་ན་འཕྱོ་ཡང་།།
ལས་སྨོན་གཟིངས་དཀར་དེ་མེད་ན།།
སྐྱོབ་པའི་ཐབས་ཤེས་རང་མི་འདུག།
༥
བསྐྱར་ཟློས་དོན་ཆུང་གི་ལམ་བུ།།
སྲིད་པའི་སྐ་རགས་ལས་རིང་བ།།
ཨ་ཐང་སྙིང་ཁོང་ནས་ཆད་ཀྱང་།།
གོམ་ཁ་སྤོ་དགོས་རང་བྱུང་སོང་།།
༦
ཙག་ཙིག་ཁོམ་མེད་ཀྱི་བྱ་བས།།
དགེ་སྒྲུབ་ལས་སྐལ་ཡང་འཕྲོག་སོང་།།
སེམས་པ་འོ་མཚོ་རུ་སྤྲུལ་ན།།
ཕྱིས་ཀྱི་བཞུད་ལམ་དེ་བདེ་འམ།།
༧
དལ་འབྱོར་ལུས་རྟེན་གྱི་དྭངས་མ།།
ཆོས་བརྒྱད་ཆང་གསར་ལ་བཅོལ་བའི།།
འཁོར་བའི་གར་མཁན་གྱི་ལས་ལ།།
བསམ་ཞིང་སྙིང་བོ་རེ་མི་འདུག།
༨
ནེ་ཙོའི་མ་ཎི་ལ་མི་འཇོན།།
ཟག་བཅས་དགེ་སྒྲུབ་ལ་མི་ཁོམ།།
དོན་ཆུང་ལྷག་བསམ་ལ་བརྒྱུས་ན།།
ལན་རེར་སྐྱིད་སྣང་རེ་འབྱུང་གི།།
༩
ཕྱི་གཟུགས་ཆུ་སྐྱེས་ཀྱི་འཛུམ་རིས།།
མི་རྟག་ཆར་རྗེས་ཀྱི་འཇའ་ཚོན།།
ནང་སེམས་འོ་སྤྲིས་སུ་ཆགས་ན།།
གསོན་པའི་མཛེས་སྡུག་རང་ཡིན་འགྲོ།།
༡༠
ལོངས་སྤྱོད་ལྗོན་ཚལ་གྱི་ཟིལ་བར།།
བདག་འཛིན་ཞེན་ཆགས་དེ་མ་ལྕི།།
དོན་དམ་ཉི་ཐིགས་རེ་ཕོག་ཚེ།།
སྙིང་ཁོང་སྟོང་བ་ལས་མ་མཆིས།།
༡༡
འཁོར་བ་ཆུ་གཏེར་གྱི་ཀློང་ནས།།
དོན་གཏམ་ཞུ་ས་ཞིག་མ་རྙེད།།
དབང་བཙན་ཆུ་སྲིན་དང་འཕྲད་ཚེ།།
གནས་ལུགས་ཤེལ་སྒོང་ཡང་མུད་འགྲོ།།
༡༢
འཚོ་གནས་ཁྲམ་ཤིང་གི་ངོས་ལ།།
བདེན་པའི་གསང་ཚིག་ཅིག་བརྐོས་ཡོད།།
ལོ་དང་ཟླ་བ་ལ་བསྒུགས་ཏེ།།
རྟོགས་མཁན་སྙིང་ཐུབ་ལ་རེ་ཡོད།།
༡༣
དམ་པའི་ལྷ་ཆོས་ཀྱང་མ་འགྲུབ།།
འཇིག་རྟེན་མི་ཆོས་ཀྱང་མ་འཁྱོངས།།
སྒྲིབ་གཉིས་རྨི་ལམ་གྱི་ཀློང་ནས།།
ནམ་ཟླ་དབྱར་གཞུང་དེ་ཚར་སོང་།།
