བུ་མོ་ཁྱོད་བོད་མོ་ཞིག་ཡིན་ན། 
                         ནས།༼རྨ་ཆུ༽ 
སེམས་པ་དུང་དུང་གི་འཕྲིན་ཞིག་བྲི་ཆོག། 
སྙིང་གཏམ་ལྷུག་ལྷུག་གི་གཏམ་ཞིག་ལབ་ཆོག། 
ཞེ་སེམས་མཐུན་ཙམ་གྱིས་ཁྱེད་ལ་རྩེད་ཆོག།
 ཆོག་ཆོག་དུང་དུང་ཞིག་ཁྱེད་ལ་བརྗོད་ཆོག།
 ཁྱོད་ཉིད་བོད་མོ་ཞིག་ཡིན་ན་འདོད་ཡོད། 

གངས་རི་རྫ་རི་ལ་ཁྲིད་ནས་རྩེད་ཆོག།
 སྤང་རི་སྤང་ཐང་ལ་བརྒལ་ནས་སྦེད་ཆོག།
 དུང་སེམས་འདྲེས་ཙམ་གྱིས་ལག་རྡང་སྦྲེལ་ཆོག། 
ཆོག་ཆོག་དུང་དུང་གི་མཐུན་སེམས་གླེང་ཆོག། 
ཁྱོད་ཉིད་བོད་མོ་ཞིག་ཡིན་ན་ཅི་སྐྱོན།། 

སྦྲ་གུར་རུས་གུར་ནས་སྙིང་གཏམ་གླེང་ཆོག། 
མཆོན་མེའི་གྲིབ་གཟུགས་ནས་འཁྲབ་སྟོན་བྱེད་ཆོག།
 སྒོ་ཁྱིའི་ཟུག་སྐད་ནས་བརྡ་ཙམ་སྟོན་ཆོག།
 ཆོག་ཆོག་དུང་དུང་གི་སྙིང་སྡུག་ཟེར་ཆོག། 
ཁྱོད་ཉིད་བོད་མོ་ཞིག་ཡིན་ན་བསམ་གི། 

དབྱར་གཞུང་སྤང་ཐང་ནས་མེ་ཏོག་བཏོག་ཆོག། 
བཏོག་བཏོག་མེ་ཏོག་དེ་མགུལ་རྒྱན་བྱས་ཆོག། 
མགུན་རྒྱན་རྒྱུན་ཐག་ནས་འོ་ཞིག་སྐུར་ཆོག། 
ཆོག་ཆོག་དུང་དུང་གི་གླུ་ཞིག་ལེན་ཆོག། 
ཁྱོད་ཉིད་བོད་མོ་ཞིག་ཡིན་ན་འགྲིག་འདུག། 

དགུན་ཟླའི་ཁ་བའི་ཁྲོད་ཁྱོད་ལ་བལྟས་ཆོག། 
ཁ་བའི་འདབ་མ་ལ་སྙིང་གཏམ་བསྐུར་ཆོག། 
གཏམ་གྱི་མཁུར་ཚོས་སུ་གསང་བ་སྦས་ཆོག། 
ཆོག་ཆོག་དུང་དུང་གི་ཚིག་རྐང་བསྒྲིགས་ཆོག། 
ཁྱོད་ཉིད་བོད་མོ་ཞིག་ན་ཡིན་ན་བསམ་བྱུང་།།