ལྡོག་འཆར།༼རྨ་ཆུ།༽

སྒོ་རུ་གོང་ཆུང་རླངས་འཁོར་རེ་འགའ་ཙམ།།

སྐས་ལ་ཟིན་དུས་ཆང་དྲི་ཁྱབ་པར་ཐལ།།

ནང་དུ་ཁང་ཆུང་འགའ་རེ་བསྟར་ལ་བརྒྱུས།།

འཐུང་དང་ཕོར་ཐུག་སྒྲ་ཡིས་སེམས་པ་བཏེཊ།།

ལུས་ཀྱི་ལྡེམ་མྱུར་རྒོད་ཅིང་འཛུམ་བཅོས་པའི།།

ཆང་མས་རྐང་སྒྲ་ཁྲིག་ཁྲིག་ཁྲིད་པ་ཡི།།

སྒོ་ནང་གཡས་ཀྱི་ཁང་ཆུང་ཟུར་གསུམ་དེར།།

ངས་ཀྱང་ཤ་རུས་རྣམ་ཤེས་སྦྲིད་པར་བརྩམ།།

དལ་བུར་འཐུང་ཞིང་མཉན་ནས་ཨེན་ཙམ་ལ།།

ཧབ་དགོད་དྲག་ཏུ་འཕྱོ་བའི་བར་གསེང་ནས།།

བུ་མོ་ཞིག་གིས་ངུ་སྐད་ཤོར་བ་དེ།།

དགའ་རོགས་བཟི་སྟེ་འཁོན་པ་ཨེ་ཡིན་སྙམ།།

འགྲོ་དང་མི་འགྲོ་འཐུང་དང་མི་འཐུང་རྩོད།།

བཟི་དང་མི་བཟི་ཡོད་དང་མེད་ཀྱང་རྩོད།།

རྩོད་ལ་མཚམས་འཇོག་མེད་པའི་བར་རིམ་ན།།

ང་ཡང་བཟི་བཟི་འདྲ་བའི་ཚོར་བ་ཞིག།

ཕན་ཚུན་བསྟོད་པའི་གཅམ་ཚིག་སྨྲ་བར་བྱེད།།

འདང་ཆེ་གཅེས་ཚུལ་ལབ་པ་དེ་ལས་ཀྱང་།།

ཁྱོད་ཀྱི་ཆེད་དུ་ཕོར་གསུམ་ཞབས་བཏུང་ཟེར།།

སྐབས་ཤིག་གཉིད་དེ་སྔུར་བ་འཐེན་པ་ཐོས།།

བཟི་བས་གཙེས་ན་རྔམས་ཀྱིས་འཐུང་བར་བྱ།།

ཆང་ནི་ཁྱོད་ཡིན་ཁྱོད་ཀྱང་ཆང་ལ་འཁྲུལ།།

ཇི་ལྟར་འཐུང་ན་ཚིམ་ལུགས་མེད་པ་དེས།། 

དལ་བུར་སུ་ཡང་གཉིད་པ་ཙམ་ལས་ཅི།།

                            ༢༠༡༤/༠༤/༠༩ཉིན།