བཻེ་ཌཱུརྱ།༼ཀན་ལྷོ༽
བཙན་བཞིའི་ཡ་གྱལ་ཁྲི་ཐོག་རྗེ་བཙན་གྱི་རིང་ལ།།
མགར་གྱི་རྒྱུད་འདི་བཙན་པོའི་ཆབ་སྲིད་དུ་ཞུགས་ཤིང་།།
བླང་དོར་འཐོམ་པའི་བཙན་པོ་འདུས་སྲོང་གི་བར་ལ།།
མགར་གྱི་རྒྱུད་པས་བོད་ལ་སྲི་ཞུ་ཅིག་སྒྲུབ་སོང་།།
ལྷག་པར་རྒྱལ་རབས་སོ་གསུམ་སྲོང་བཙན་གྱི་རིང་ལ།།
བཙན་པོའི་སྲོག་ལ་རྒོལ་བའི་ཁྱུང་བོ་ནི་སྤུང་ཟད།།
སྟོང་བཙན་བློ་རིག་སྐྱེན་པོའི་གློག་ཞགས་ཀྱིས་བསྒྲལ་ཏེ།།
བཙན་པོའི་སྐུ་སྲོག་བསྐྱབས་པའི་མཛད་འཕྲིན་འདི་རྨད་བྱུང་།།
རྒྱ་བཟའ་བལ་བཟའ་རྣམ་གཉིས་བཙུན་མོ་རུ་བསུ་ཆེད།།
རྒྱ་བལ་ལ་སོགས་ཕྱོགས་བཞིའི་རྒྱལ་ཁམས་ཀྱི་ཁྱོན་ལ།།
གཡོ་སྒྱུའི་གསང་འབེན་བློ་རིག་མདའ་མོ་ཡིས་བརྟོལ་བའི།།
མགར་གྱི་ངོ་མཚར་བྱས་རྗེས་གནམ་ས་རུ་མི་ཤོང་།།
མདོ་སྨད་འདུན་མ་བསྡུ་བའི་གཅིག་གྱུར་གྱི་ཐབས་མཆོག།
རྒོད་གཡུང་དབྱེ་བ་ཕྱེ་བའི་དམག་དོན་གྱི་ སྒྲིག་གཞི།།
བཀའ་ཁྲིམས་ཡི་གེར་བཀོད་པའི་ལོ་རྒྱུས་ཀྱི་བྱུང་བ།།
མགར་གྱིས་བོད་ལ་ཕུལ་བའི་རིན་བྲལ་གྱི་ལེགས་སྐྱེས།།
ཡབ་རྗེ་སྲོང་བཙན་སྒམ་པོ་བཞུད་སོང་གི་རྗེས་སུ།།
དབོན་སྲས་མང་སྲོང་ན་ཚོད་མ་སྨིན་གྱི་རིང་ལ།།
ངང་ཚུལ་བརྟན་པོའི་སྟོང་བཙན་ཡུལ་བཟུང་གི་བདག་པོས།།
སྲིད་དོན་ཧུར་བཞེས་བཀའ་དྲིན་དགུ་ཚིགས་ཀྱིས་མི་འཆིང་།།
འདུས་སྲོང་བྱིས་པ་དམར་འབྱར་སེམས་མེད་ཀྱི་དུས་ལ།།
ཁྲི་འབྲིང་སྤུན་མཆེད་དྲིན་གྱིས་སྲིད་དབང་ནི་མ་ཉམས།།
ཕྱི་ནང་བདེ་ལ་ཕབ་པའི་དཔའ་མཛངས་ཀྱི་མཐུ་ཡིས།།
མགོ་ནག་བོད་པ་བདེ་སྐྱིད་འཚོ་བ་ལ་རོལ་སོང་།།
དྲིན་ཅན་དྲིན་དུ་མི་གཟོ་འདུས་སྲོང་གི་མཚན་ཅན།།
ནག་པོ་རྒྱ་ཡིས་བཤམས་པའི་གཡོ་སྒྱུ་ལ་ཚུད་དེ།།
རྒྱལ་ཁམས་ཕྱོགས་བཞིར་བསྐྱེད་པའི་ཁྲི་འབྲིང་སོགས་སྤུན་མཆེད།།
ཉེས་མེད་ཆད་པ་བཅད་པའི་དོན་རྐྱེན་འདི་སྐྱོ་བ།།
ཕ་ཤུལ་བུ་ཡིས་འཛིན་པའི་སྟོང་བཙན་གྱི་བུ་རྒྱུད།།
དཀར་ནག་གོ་ལོག་བསྡེབས་ནས་ཚེ་སྲོག་ལ་རྒོལ་བའི།།
འདུས་སྲོང་ལས་ལ་འགྲོ་དྲུག་ཞེན་པ་ཞིག་ལོག་པས།།
ཀླུ་ཆུ་གྱེན་ལ་ལྡོག་ཅེས་ངག་རྒྱུན་ཏུ་གྲགས་སོ།།
སྟོང་བཙན་ཡབ་སྲས་ཁྲི་འབྲིང་སྤུན་མཆེད་ཀྱི་སྐུ་དྲིན།།
བཙན་པོ་འདུས་སྲོང་སྟག་མོའི་ཕྲག་དོག་གིས་འཇལ་ཏེ།།
མགར་གྱི་བུ་རྒྱུད་བཅད་པའི་ལོ་རྒྱུས་ཀྱི་ཉེས་པས།།
གངས་རིའི་གཟི་བྱིན་ཉམས་པའི་རྒྱུ་འབྲས་འདིར་གཟིགས་དང་།།
བཙན་པོའི་རྒྱལ་ཁམས་ཐོར་ཅིང་སིལ་བུ་རུ་གྱུར་དུས།།
རྒྱལ་ཁྲིམས་གསེར་གྱི་གཉའ་ཤིང་སྒོ་ཐེམ་དུ་བྱས་ཤིང་།།
བོད་པ་སྡུག་བསྔལ་རྒྱ་མཚོའི་མུན་དོང་དུ་ལྷུང་བ།།
མགར་གྱི་བུ་རྒྱུད་བཅད་པའི་རྣམ་སྨིན་རང་ཨེ་ཡིན།།
ཕན་ཚུན་མི་མཐུན་སོ་སོ་ཕྲག་དོག་གིས་འཚོ་ཞིང་།།
རྩྭ་ཆུའི་དོན་དུ་ཕ་སྤུན་མཐོ་སྒང་དུ་འཁྲུག་པ།།
མཐུན་སྒྲིལ་དཔུང་རྡང་གོམ་སྒྲ་ཉམས་དམས་སུ་སོང་འདི།།
མགར་གྱི་བུ་རྒྱུད་བཅད་པའི་རྣམ་སྨིན་ཞིག་ཨེ་ལགས།།
བདེན་དོན་གནས་ལུགས་ཁ་ནས་མ་ཎི་ལྟར་བགྲང་ཡང་།།
ངལ་བ་འབྲས་མེད་སྔར་བཞིན་མུན་དོང་གི་འཚོ་བ།།
ནག་ཕྱོགས་རྒྱལ་ཞིང་དཀར་ཕྱོགས་ཕམ་ཉེས་ཀྱི་དུས་འདི།།
མགར་གྱི་བུ་རྒྱུད་བཅད་པའི་རྣམ་སྨིན་ཞིག་མིན་ནམ།།
ཆོས་དང་རིག་གཞུང་འཕེལ་འགྲིབ་རླུང་ནང་གི་མར་མེ།།
མི་རིགས་ཉམས་པའི་སྡུག་བསྔལ་སེམས་ནང་གི་ཚེར་མ།།
རྒྱུ་འབྲས་ཚད་མའི་ལྟ་བ་དངོས་ཡོད་དུ་རྟོགས་ན།།
མགར་གྱི་བུ་རྒྱུད་བཅད་ལ་རྣམ་སྨིན་དུ་འཁོར་སྙམ།།
༢༠༡༢.༤.༡༥ཉིན་ལ་བྲིས།
སྙན་དེབ༼ འོད་དང་གྲིབ་མ ༽ལས་བཤུས།
