རྨ་ཁེར་ཉལ།

ལས་དབང་གི་ཕ་མས༎

བཀའ་དྲིན་གྱིས་བསྐྱངས་པའི༎

ཁྱད་འཕགས་ཀྱི་ལུས་པོ༎

བདག་སྐྱོང་རང་མ་ཐུབ༎

ལས་དབང་གི་རྩེད་ར༎

ཆར་ཆུ་ཡི་འཇིགས་སོང་༎

སྤྲོ་སྣང་གི་མི་ཚེ༎

མིག་ཆུ་ལ་འཐུམས་སོང་༎

ལས་དབང་གི་རླུང་རྟ༎

ཁ་བ་ཡིས་མནན་སོང་༎

སེམས་གཏིང་གི་ཡི་གེ༎

འདོན་མཁན་དེ་མ་བྱུང་༎

ལས་དབང་གི་བརྩེ་རོགས༎

ལས་དབང་གིས་བྲལ་སོང་༎

སླད་མེད་ཀྱི་དུང་བ༎

རྨི་ལམ་དུ་གྱུར་སོང་༎

ལས་དབང་གི་ལུ་གུ༎

སྤང་ཐང་ནས་འཚོ་དུས༎

ངེད་གཉིས་ཀྱི་སྙིང་གཏམ༎

ཁུ་བྱུག་གི་མགྲིན་དབྱངས༎

ལས་དབང་གི་ལ་གཞས༎

རང་མལ་ནས་ལེན་དུས༎

ཕྱིར་དྲན་གྱི་བུ་མོ༎

དེང་མ་ནས་བུད་སོང་༎

ཧྲུག་ཆད་ཀྱི་སྐུད་པ༎

ཁ་པར་ལས་མཐུད་ཀྱང་༎

བར་སྲུབས་ཀྱི་གསང་བ༎

ཇེ་གསང་ནས་ཇེ་གསང་༎

ལས་དབང་གི་ལྷ་སྐལ༎

གཟིམས་ཤག་ལས་མ་བཞེངས༎

རུས་མེད་ཀྱི་སྤྱན་གཟིགས༎

སང་ཉིན་ལ་སྒུག་དགོས༎