བེ་མིག་གམ་མིག་བརྩེ་རུད་ནས།

ཚེ་འདིར་སྣང་ཤས་མ་ལོག་ཡིད་རེ་རྨོངས།།

གཏན་གྱི་མདུན་མ་མ་རྙེད་ཨ་ཐང་ཆད།།

དྲིན་མའི་ནུ་རིན་མ་མཇལ་ཡིད་རེ་མུག།

གྲོགས་ཀྱི་ཕྱི་ཐག་མ་བརྟན་རེ་ཐག་ཆད།།

སྒྲོལ་མའི་གསེར་ཞལ་མ་མཇལ་ཡིད་སེམས་སྐྱོ།།

འཕྲིན་གྱི་ཕོ་ཉ་མ་སླེབས་སེམས་པ་སྡུག།

བརྩེ་དུང་འདབ་བརྒྱ་མ་གྲོལ་ཞེ་སེམས་རྨོངས།།

དུང་སེམས་ཟླ་བ་འགྲིབ་པའི་མཆི་མ་འཐོར།།

འཇིག་རྟེན་སྒྱུ་མར་མ་རྟོགས་མགོ་བོ་རྨོངས།།

སྐྱེ་འཆི་མི་རྟག་མ་རྟོགས་ཕྱི་བཤོལ་གདའ།།

རང་ལུས་བདག་ཏུ་འཁྲུལ་བའི་སེམས་པ་འཁྲུལ།།

དོན་དམ་བདེ་བ་མ་ཤེས་སྙིང་རེ་རྗེ།།

དམར་ཆུང་སེམས་པ་མགྱོགས་པོ་བཤོག་ཐོག་རེད།།

དམར་ཆུང་སེམས་པ་དབྱར་ཁའི་གནམ་ངོ་རེད།།

དམར་ཆུང་སེམས་པ་གློག་དམར་སྐད་ཅིག་རེད།།

སེམས་པ་ཆག་གྲུམ་ཤོར་བ་ཆོས་ཉིད་རེད།།

                            ༢༠༡༤/༤/༢ཉིན་བསང་འགྲམ་ནས་ཐོལ་བྱུང་དུ།