རྨ་ཁེར་ཉལ།
༼ཁྱོད་ཀྱི་སེམས་ན་ང་ཡི་སྙིང་གཏམ་ཞིག།
ང་ཡིས་སེམས་ན་བརྩེ་བའི་དམ་བཅའ་ཞིག།
ཁྱོད་དང་འུ་གཉིས་སླད་མེད་དུང་བ་སྟེ།།༽
གོར་མོ་རྡོ་ཡི་གཤིས་བཞིན་གནས་པར་སྨོན།།
དམར་པོ་བྲག་གི་ཐེམ་གྱི་རྒོད་ཕྲུག་ང་།།
རྩུབ་མོ་ཙག་དང་ཤུགས་ཆེན་རླུང་གི་ཁར།།
འདི་ལྟར་འཚོ་དགོས་སྔོན་བསགས་ལས་ཡིན་ནམ།།
མིན་ན་རྒོད་ཕྲུག་ང་རང་སྙིང་རེ་རྗེ།།
ཡོད་ཡོད་འདྲ་བ་ཁྱོད་ཀྱི་དུང་བ་དང་།།
མེད་མེད་འདྲ་བ་འཇིག་རྟེན་གནས་ལུགས་ཏེ།།
བཙལ་བཙལ་བཙལ་ཡང་འདི་ལྟར་བཙལ་བས་མཐར།།
མ་རྙེད་ཨ་ཐང་ཆད་དུས་འདི་ལྟར་ལབ།།
ལབ་པའི་མ་ཕན་སྐྱོ་བའི་རྒྱུ་རུ་གྱུར།།
ཡིན་ཡང་མ་ལབ་བསྡད་ན་སུན་པའི་རྒྱུ།།
ལབ་ལབ་ལབ་ལ་འདི་ལྟར་ལབ་པའི་སྒྲ།།
འཇིག་རྟེན་འདི་ཡི་རྣ་བར་སོང་ཡོད་དམ།།
ཡིད་མཐུན་བུ་མོར་བྲིས་པའི་འཕྲིན།།
ཞག་གཅིག་མགྲོན་ལ་ཇ་འགྱེད་མིན།།
དགའ་བ་མཚོན་པའི་སྙིང་གཏམ་ཡིན།།
ཀུ་རེས་རྩེད་མོ་མི་སློངས་ཞུ།།
འགོག་ཏུ་མེད་པ་འདོད་པའི་བུ།།
ཁྱོད་དང་ང་ལ་སྐྱེས་སུ་མངའ།།
གང་སར་གཡོ་བ་ཆུ་རིས་དེ།།
བདག་ལ་གཏད་པ་བཟོད་དུ་དཀའ།།
ཁྱོད་རང་དྲན་པའི་དུས་ཚོད་དག །
ཤུགས་རིང་འབྱིན་པའི་ཉེར་ལེན་འདྲ།།
པར་ལ་གཏད་པའི་མིག་ཟུང་འདི།།
མ་དང་བྲལ་བའི་བུ་ཞིག་མཚུངས།།
ཟླ་བ་མཁའ་རུ་འཕགས་པའི་དུས།།
མལ་མཐའ་འུར་གྱི་སྟོང་བའི་དུས།།
སྔས་འབོལ་བྲང་ལ་བཙིར་ཐེངས་རེར།།
ཁྱོད་ཉིད་ཡིན་ན་སེམས་བཞིན་ཉལ།།
མ་བུ་བཞིན་ལྟར་འཕྲད་པའི་སྟབས།།
གཞན་དབང་ཤུགས་ཀྱི་མི་སྤྲོད་ཀྱང་།།
ཚན་རྩལ་འཕྲུལ་གྱི་རླབས་རྩེ་ན།།
སྙིང་གཏམ་འཇོ་བའི་སྐལ་བ་མོད།།
རང་བྱུང་དུང་བའི་ཁེ་དབང་འདི།།
རང་གཉིས་འབད་དེ་མ་བརྩད་ན།།
ཐམ་ཀ་མེད་པའི་ཁྱིམ་སྲོལ་འདིའི།།
གུ་ཡངས་མི་གཏོང་ཁོ་ཐག་རེད།།
ཕོ་རྒོད་འགུག་པའི་མོ་སྒོ་དང་།།
མོ་བརྒྱ་འགུག་པའི་ཕོ་སྒོ་གང་།།
ང་ཡང་མེད་ད་ཁྱོད་ར་མེད།།
ཡིན་ཡང་བརྗེད་དུ་མེད་པ་ཅི།།
ཉིན་དེར་ངའི་ཕ་སྤུན་བཀྲ་ཤིས་ཀྱིས་ངའི་གློག་ཀླད་ཀྱི་ཁ་ཕྱེས་ཏེ་ཡི་གེ་གཏགས་གྱིན་འདུག བར་དེར་ཡ་ཕུ་བོ་འདིའི་འཕྲོར་ཁྱོས་ཅིག་ཕྲིས་ད་ཟེར། ངས་ག་རེ་གང་གི་འཕྲོ། འདིའི་འཕྲོར། ངས་ཀྱང་ཁོའི་རེ་བ་ལྟར་གོང་གི་དགུ་ཚིག་ཅན་གྱི་ཐིག་ཤར་གསུམ་པོའི་ཁ་བཀང་སྟེ། དེའི་འཕྲོར་ཤོ་ལོ་ཀ་འདི་གསུམ་པོ་བྲིས་ཚར་དུས། ཨ་རོ་་་་་་ཕུ་བོ། ཁྱོས་ང་ཅིག་བྲིས་བཞག་ཡོད་ནི་མ་རཱ། ཟེར། ངས་ཁྱོའི་རང་ལ་བྲིས་ནི་མིན་ནས་ཞེས་བཤད་པ་ན། ཁོ་ལྷུག་ལྷུག་བགད་བྱུང་། ང་ཡང་བགད། དེའི་འཕྲོར་བདུན་ཚིག་ཅན་གྱི་ཤོ་ལོ་ཀ་བདུན་པོ་རྗེས་ནས་ངས་ཁོའི་ཉམས་སྣ་ཚོགས་ལ་བརྟགས་ཏེ་བྲིས་པ་ཡིན།
7/18/2010
| 