འཇང་ཚ་འཁྱམ་པོ།
ལས་དབང་འདི་
ཆེས་ལད་པའི་འཁྲབ་གཞུང་ཞིག་རེད།
ལྷན་འཛོམས་ཀྱི་མཇུག་སྒྲིལ་མེད་ལ།
རྒྱལ་ཁ་ཡི་དགའ་འབོད་ཀྱིས་སྤྲོ་འཛོམས་མེད།
རེད་དེ་
ངས་ཅིས་ཀྱང་རང་གི་འཁྲབ་ཚན་དེར་གསོན་ཉམས་བསྐྲུན་དགོས།
འབད་པ་བྱེད་དགོས། གཟི་འོད་སྤྲོ་དགོས།
སྤྱི་ཚོགས་འདི་དུས་བཞི་ཡི་འགྲོས་སུ་བསྟུན་དུས་
ངའང་རྒྱ་རྫོང་ཁྲོད་ཀྱི་སྡོང་ཕྲན་དེ་ཡིན།
སྦྲང་ཆར་གྱིས་ང་ལ་གསོན་ཉམས་བསྩལ་ཡོད་ལ་
སད་སེར་གྱིས་ང་རང་གཅེར་བུར་ཕུད་མྱོང་།
རེད་དེ་
ངའི་རྩ་བ་དོག་མོ་ས་ལ་འཐམ་ཞིང་།
ངའི་རྩེ་མོ་ཨ་སྔོན་གནམ་ལ་ཀེར་ཡོད།
ངས་ང་བོར་མེད།
ངས་ང་ལ་དབང་བའི་འཁོར་འབངས་ཤིག་ཡོད་པར་ཡིད་ཆེས་ལ།
ངས་ང་ཡི་འཁོར་འབངས་དེར་གྲིབ་བསིལ་རེ་སྦྱིན་ནུས་པའི་སྤོབས་པ་ཡོད།
ལག་ལེན་མེད་པའི་ཕུགས་བསམ་དེ་སྟོང་བསམ་ཡིན་ན་འཆར་ཡན་མེད་པའི་སང་ཉིན་ནི་དུར་ཁྲོད་རེད།
བཙུར་ནས་ཐོན་པའི་ཡིག་འབྲུ་དེ་གད་སྙིཊ་ཡིན་ན་
ཚོར་བ་མེད་པའི་འཁྱམ་པོ་ང་བེམ་རོ་རེད།
རེད་དེ་ ངས་ཅིས་ཀྱང་ང་འབོར་དུ་འཇུག་གི་མེད།
ཐ་ན་བྲག་དམར་དེར་སེན་བྲད་ལས་མ་ནུས་ཀྱང་་་་
| 