ར་ལོ། ལན་གྲུ།
ཀློང་ཡངས་བའི་ནམ་མཁའ་ཞིག་འབྲི་མགོ་བརྩམས་པ་ནས་བཟུང
ངའི་ཁྱོད་ཀྱི་གླུ་སྐད་ལ་ཐེངས་རེར་ཉན་ནས
དེ་དུས་ང་ཁྱོད་ཀྱིས་ཐོག་མར་བཞེངས་བའི་སྐྱེད་ཚལ་དེའི
མེ་ཏོག་རྐང་གཅིག་བྱེད་ན་འདོད་མོད
འུ་གཉིས་དབར་གྱི་སེང་རས་ལྟ་བུའི་མཁའ་དབུགས་འདི
སུ་ཞིག་གི་སྐྱག་པ་བཏང་བའི་རྔམ་ཁ་རེད
མེ་ལྕེ་ཞིག་གམ་མེ་སྟག་ཞིག་ཏུ་འཁུམ་པའི་ཁྱོད
ཁ་བ་ལྡོག་གཅིག་གམ་བསེར་བུ་སྤར་གང་གི
རྣོ་ས་ཞིག་གམ་འཁྱོག་ས་ཞིག་ཁྱོད་ལ་ཕོག་པ་ཉུང་ཉུང་མིན་པས
ངས་སྔར་བཞིན་ཁྱོད་ཀྱི་མིག་སྐྱི་ལ་འོ་ཞིག་བྱ་འདོད
གོ་ཐོས་ཞིག་ལ
ཁྱོད་ཀྱི་ཚེམས་ཕྲེང་བར་ནས་དངུལ་དཀར་གྱི་ཟླ་བ་འཚེར་ཞིང
ཁྱོད་ཀྱི་མིག་ཟུང་ནང་ནས་གསེར་མདོག་གི་ཉི་མ་དགོད་ཟེར་བ་བདེན་ནམ
ས་ཆེན་ལ་ལག་པས་བྱ་ར་བྱས་ཤིང
རི་སྒང་ལ་ལྕེ་ཡིས་མྱང་མྱང་བྱེད་མཁན་ཁྱོད
ད་ནི་ཁྱོད་ཀྱི་དཔྲལ་བ་དེ
སེར་ཐིགས་ལྷུང་བའི་ལོ་མ་བཞིན
རི་བོ་དེས་གླེང་གིན་འདུག ཆུ་བོ་དེས་གླེང་གིན་འདུག
བདག་ནས་ཡང་མགྲིན་པ་བརྣངས་བའི་བྲག་ཅ་སེན་སྟེང་ན་བྲིས་ན
མཁུར་མགོ་ནས་རྡུལ་འཚུབ་ཞིག་ཤུགས་ཀྱིས་སྐྱོམས་དགོས་བྱུང་།
ཡེ་ལོ་༢༠༡༤，༥，༢༤ ཉིན་ནུབ་བྱང་དཔེ་མཛོད་ཁང་དུ།
| 