ཆོས་ཤུལ་གསང་བདག

རྩྭ་རྐང་དག་སྒུལ་གྱིན་སྒུལ་གྱིན

བྱེ་མའི་ཕོན་པོ་དག་ཁུར་ཅིང

ཕ་བོང་གི་སྲོག་ལ་རྒོལ་བར་བྱེད

འཁྱག་རོམ་ལ་གས་ཀ་ཕབས་ཤིང

རྦ་རླབས་ལ་ཟིལ་ཤུགས་ཀྱི་རྣོ་དབལ་བྱིན

ཁ་རླངས་ཤིག་ཕུད་པའི་ཞོར་དུ

རྨི་ལམ་ལ་གས་ཆག་བཏང་ཞིང

རྡོག་སྒྲ་ཞིག་ངང་གིས་ཡལ་བར་བརྩམས

གྲོང་ཁྱེར་གྱི་རླུང་ལ་མེ་དྲོད་ལྡན་ཞིང

ལུས་དང་སེམས་སྲོ་བར་རོལ་མོ་དཀྲོལ

རྣམ་ཤེས་ལ་གསོན་ཤུགས་རྒྱས་བྱེད་དེ་དག

ཕ་ཡུལ་དང་བར་ཐག་རིང  རྨི་ལམ་དེའང་བར་ཐག་རིང

ཆར་དང་བསྡེབས་པའི་ས་སྲོད་དེར

རང་བྱུང་ཁམས་དགྲ་རུ་བཟུང་བ་འདྲ་བར

སྤྲིན་པའི་ཡོལ་བ་ཞིག་ལུས་སུ་གྱོན་ཞིང

གཟེར་མའི་མདའ་མདུང་དག་འཕེན་པར་བྱེད

ཁྱོད་རང་སུ་ཞིག་གིས་མངགས་པའི་ཇག་པ་དེ་ཡིན

སུ་ཞིག་གིས་ཕངས་པའི་བོའུ་མདེའུ་དེ་ཡིན

ལམ་གྱི་ཐལ་རྡུལ་དག་གཙང་ཕྱགས་བྱས་ནའང

ཁྱོད་ཀྱི་གསེང་དུ་ཐིམ་པའི་མི་གཙང་བ་མཐའ་དག

ཆུ་ཕྲན་གྱིས་བཀྲུའམ    ཆར་ཆུས་བཀྲུ་བར་བྱ

བཀྲུས་ནས་མི་འདག་པ་དེ་དག

ཁྱོད་ཀྱི་ཁམས་སུ་ཆགས་པའི་གཡའ་དེ་ཡིན་ནམ

                               སྤྱི་ལོ༢༠༡༣ལོའི་ཟླ༡པོའི་ཚེས༩དགོང་མོར་སྦྱར།