ཟླ་ལྔ་བའི་ཚེས་ཉེར་ལྔ་ཉིན། ཀྲུང་ཧྭའི་གསོ་རིག་སློབ་ཚོགས་སྨྱོ་ནད་རིག་པའི་ཡན་ལག་སློབ་ཚོགས་ཀྱི་དགེ་རྒན་ཆེན་མོ་ཅ་ཅན་ཕེན་སོགས་རྒྱལ་ཡོངས་ཀྱི་མིང་དུ་གྲགས་པའི་ཆེད་མཁས་པ་བཅུ་བཞི་མཚོ་སྔོན་དུ་ཡོང་སྟེ། “ནུབ་རྒྱུད་དུ་བསྐྱོད་པ”ཞེས་པའི་སྨན་བཅོས་ཆེད་མཁས་པའི་སྤྱི་ཕན་རོགས་སྐྱོར་བྱ་འགུལ་གྱིས་རིགས་གཞུང་སློབ་སྦྱོང་དང་གསོ་སྦྱོང་བྱེད་པ་དང་། བཅོས་དཀའ་བའི་ནད་ལ་བརྟག་དཔྱོད་བྱེད་པ། ནད་ཐོག་སྨན་བཅོས་བྱེད་པ། ཆེད་མཁས་པས་རིན་མི་ལེན་པར་སྨན་བཅོས་བྱེད་པ་སོགས་ཀྱི་བྱེད་ཐབས་སྤྱད་དེ། མཚོ་སྔོན་ལ་ཆེད་ལས་ཅན་གྱི་མཛུབ་སྟོན་དང་ལག་རྩལ་གྱི་རོགས་སྐྱོར་བྱེད་རྒྱུ་རེད།

“ནུབ་རྒྱུད་དུ་བསྐྱོད་པ”ཞེས་པའི་བྱ་འགུལ་ནི་མཚོ་སྔོན་ཞིང་ཆེན་འཕྲོད་བསྟེན་ལས་རིགས་ཀྱིས་སྔོན་ཐོན་འདུ་ཤེས་ལ་སློབ་སྦྱོང་བྱེད་པ་དང་། མིག་རྒྱ་དང་བསམ་ཕྱོགས་རྒྱ་བསྐྱེད་པ། སྔོན་ཐོན་ལག་རྩལ་ཁོང་དུ་ཆུད་པར་བྱེད་པ། སྨན་བཅོས་བྱ་སྤྱོད་ཚད་ལྡན་དུ་གཏོང་བའི་གོ་སྐབས་བཟང་བོ་ཞིག་ཡིན་ལ། མཚོ་སྔོན་ཞིང་ཆེན་གྱི་རིགས་སོ་སོའི་མང་ཚོགས་ཀྱི་སྨན་བཅོས་བྱེད་དཀའ་བ་དང་སྨན་ཡོན་མཐོ་བ། སྨན་ཁང་དང་བར་ཐག་རིང་བ་བཅས་ཀྱི་གནད་དོན་ཐག་གཅོད་པའི་གཅེས་སེམས་འབུལ་བའི་ལས་དོན་ཞིག་ཀྱང་ཡིན།

ཤེས་པ་ལྟར་ན། ཐེངས་འདིའི“ནུབ་རྒྱུད་དུ་བསྐྱོད་པ”ཞེས་པའི་བྱ་འགུལ་གྱི་ཆེད་མཁས་པ་ཚང་མ་ནི་རྒྱལ་སའི་གསོ་རིག་ཚན་རྩལ་སློབ་གྲྭ་ཆེན་མོ་དང་བཅིངས་འགྲོལ་དམག་སྤྱིའི་སྨན་ཁང་། ཧྥུའུ་ཏན་སློབ་གྲྭ་ཆེན་མོའི་ཟུར་གཏོགས་ཧྭ་ཧྲན་སྨན་ཁང་སོགས་འཕྲོད་བསྟེན་ཁྱབ་ཁོངས་ཀྱི་སྨྱོ་ནད་རིག་པའི་ཕྱོགས་ཀྱི་ཆེད་མཁས་པ་རེད།　                                                                  མཚོ་སྔོན་གསར་འགྱུར་དྲ་བ་ལས་བཤུས།