| གཅན་མེ་སྟག
ཁྱོད་ཀྱི་མིང་ལ་ཉི་ཟླ་ཐོགས་པ་ནས་བཟུང༌།
ངས་རྒྱུན་དུ་རྟ་ཁ་གློད་ནས་སྨོན་ལམ་བཏབ་མྱོང༌།
དགུ་ཚིགས་ཀྱི་གཙང་བོས་བར་དུ་བཅད་པ་ནས།
ཟླ་འོད་ཀྱིས་ང་རང་ཕ་མཐར་སྐྱེལ་བའི་དུས་སུའང༌།
ཁྲུང་ཁྲུང་སྐེ་རིང་དང་མཚུངས་པའི་རི་སྒང་དེའི་ཞོལ་དུ།
སྔོ་ཡོམ་ཡོམ་གྱི་ལྡོག་འབབ་གཙང་བོ་ཡང་དྲན་པས་མནར།
—སྒམ་ལ་དཀྱེལ་ཆེ་བའི་བཙན་པོ་དང་གཡེར་བག་ལྡན་པའི་རྒྱ་བཟའ་ཡང་ས་འདི་ནས་ཕྲད་པ་སྟེས་དབང་མིན།
མེ་ལོང་བོར་ས་ནས་ཁུ་སིམ་མེར་སྨོན་ལམ་བཏབ་མྱོང་ཕྱིར།
ངས་རྒྱུན་དུ་ཉི་ཟླ་རི་བོའི་མཚམས་སྤྲིན་དེ་བརྗེད་ག་ལ་ནུས།
གླང་རྫི་དང་ཐགས་མཁན་བུ་མོ།
ཟླ་བའི་ཀློང་ན་དྲན་གདུང་གི་གླིང་བུ་དལ་གྱིས་འབུད།
དེ་དག་གི་དུས་ན།
ངས་ཀྱང་ཉི་ཟླའི་གོང་ཁ་རུ་རེ་སྒུག་གི་ཤུགས་གླུ་བླངས་མྱོང་ཨང༌།
ཡིན་ནའང་ད་ལྟ་ཉི་ཟླ་གཉིས་ལྷན་འཛོམ་གྱི་སྐལ་བ་ཧ་ཅང་ཕྲ་བས།
—ངས་སྨོན་ལམ་འདེབས་པ་ནི་རི་བོ་ཁྱོད་ཁོ་ན་མིན།
<<སྦྲང་ཆར>>ལས།
| 