| བློ་བྷེ་ཚེ་རིང་༼རྨ་ཆུ༽
ཁྱེད་ཀྱིས་མུན་འཇོམས་སྒྲོན་མེ་ཡི་མཚན་སྙན་ཁུར་དུ་བླངས་པ་ནས
ཁྱེད་ནི་མུན་ནག་ཁྲོད་ཁེར་རྐྱང་གིས་འབར་བའི་མར་མེ་ལགས་ན
ཁྱེད་ལ་ལྷད་མེད་ཀྱི་ལྷག་བསམ་ལས་ཅི་ཡང་དབེན་ཨང
གཞན་དག་སྤུས་ལེགས་དབྱིབས་མཛེས་ཀྱི་འཇེབ་འཁོར་ལ་བསྡད་དེ
ཟས་རིགས་སྣ་དགུའི་གསོལ་མགྲོན་ལ་རོལ་སྐབས
ཁྱེད་ཀྱིས་དཔེ་ཆ་ཧྲལ་ཧྲུལ་ཞིག་མཆན་ལ་བཙུར་ཏེ
ས་སྨྱུག་གི་དྲོ་བ་མྱོང་བཞིན
ཀ་ཁའི་གཞས་གདངས་དབྱངས་སུ་གྱེར་བ་སུ་ཡིས་ཐོས་སམ
གཞན་དག་ཐོབ་དང་གོ་སའི་ཆེད་དུ
རྒྱུ་དང་ནོམ་པའི་ཆེད་དུ
ལས་འབྲས་ལ་རྡོག་རྫིས་གཏོང་བཞིན
ཚུལ་འཆོས་ཀྱི་འཛུམ་མདངས་ངོམ་བཞིན
བྲེལ་འཚུབ་ཀྱིས་འདུར་དུས
ཁྱེད་ཀྱིས་ཤེས་རིག་གི་སྦྲང་རྩི་མངར་མོ་ཕངས་མེད་དུ
སྐོམ་པས་གདུང་བའི་སློབ་བུ་ཚོར་སྩོལ་བཞིན
རྒྱལ་བུ་དྲི་མེད་ཀུན་ལྡན་གྱི་རྣམ་ཐར་སྐྱོང་བ་སུ་ཡིས་མཐོང་ངམ
གཞན་དག་གིས་ཆུང་མ་གང་མཛེས་དང
སྡོད་ཁང་གང་ལེགས་འགྲན་དུས
ཁྱེད་ཀྱིས་གཞུང་ལ་གཡར་བའི་ཁང་མིག་དོག་པོ་རུ
ཁེར་རྐྱང་དུ
བྱིས་པ་སྣབས་ལུག་ཚོའི་མ་འོངས་པར་བསམ་བློ་གཏོང་བཞིན
ཚེ་སྲོག་གི་སྐར་ཆ་རེ་རེ་སྨྱུག་རྩེ་ན་འཛར་གྱིན་པ་སུ་ཡིས་ཚོར་རམ
༢༠༡༠ལོའི་ཟླ་༡པོའི་ཚེས་༥ཉིན།
༢༠༡༢ལོའི<<རྨ་ཆུའི་རླབས་སྒྲ>>ལས།
| 