ཉན་ཤུལ་མཁྱེན་རབ་འོད་གསལ་གྱིས་བརྩམས།
ཀ༵་ཕྲེང་སྡེབ་ལེགས་ཚིག་གི་སྦྱོར་བ་ལ་བརྟེན་ནས། །
ཁ༵་བའི་ལྗོངས་སུ་འཛད་མེད་ཤེས་བྱ་ཡི་ཆར་ཕབ། །
ག༵་ནས་བསམས་ཀྱང་སྔོན་བྱོན་མཁས་མང་གི་ཁྲོད་ན། །
ང༵་ཚོའི་མེས་པའི་མཛད་རྗེས་མི་ནུབ་པའི་རྒྱལ་མཚན། །
ཅ༵་ག་ནོར་གྱི་མཆོག་གྱུར་ཐོས་པ་ཡི་ནོར་བུ། །
ཆ༵་རྒྱུས་ཅན་གྱི་མཁས་ལས་འབད་པ་ཡིས་མི་སློབ། །
ཇ༵་མངར་ཆང་ལ་མགོ་བོ་གདུགས་ལྟར་དུ་འཁོར་ནས། །
ཉ༵་མོ་དོལ་ལ་ཚུད་འདྲའི་ན་གཞོན་རྣམས་ཅི་དྲག །
ཏ༵་ལའི་ལོ་མར་བྲིས་པའི་གནའ་རབས་ཀྱི་དཔེ་ཆ། །
ཐ༵་ཤལ་རྨོངས་པའི་ཚོགས་ཀྱིས་ཐལ་དོང་དུ་བསྐྱུར་བ། །
ད༵་ལྟ་དྲན་པའི་སྐྱོ་སེམས་འདི་ཉིད་ཀྱི་ཆ་ཙམ། །
ན༵་ཚས་བར་མེད་མནར་ཡང་བརྗེད་ཐབས་ནི་མི་འདུག །
པ༵་ཏྲའི་རི་མོས་ཞལ་གྱི་དཀྱིལ་འཁོར་ཀུན་ཁེབས་དུས། །
ཕ༵་རྒན་གླེན་པ་ཞེས་པའི་ངན་སྨྲས་དེ་ཐོས་ཡོང་། །
བ༵་གླང་ལྷས་སུ་ཉལ་འདྲའི་རྣམ་གཡེང་འདི་སྤངས་ནས། །
མ༵་ལུས་ཤེས་བྱའི་གནས་ལ་བརྩོན་པ་རེ་མཛོད་ཅིག །
ཙ༵་རིའི་གནས་ཀྱི་ངོ་མཚར་བཀོད་པ་ཡི་གཟིགས་མོ། །
ཚ༵་གྲང་ཁྱད་གསོད་ནུས་པའི་སྐྱེ་བོ་ཡིས་མཇལ་སྐད། །
ཛ༵་ཡའི་དགོངས་དོན་ཟབ་གསང་བརྗོད་བྲལ་གྱི་ངོ་བོ། །
ཝ༵་ལེར་ཁོང་དུ་ཆུད་པ་ཉིན་སྐར་ལས་དཀོན་སྐད། །
ཞ༵་བོས་ཅང་ཤེས་ཞོན་པའི་བརྟུལ་ཞུགས་དེ་བསྐྱངས་ན། །
ཟ༵་ཉལ་འགྲོ་འདུག་སྤྱོད་པའི་དུས་ཚོད་ཀྱང་དོན་ལྡན། །
འ༵་འུར་འདུ་འཛིའི་ཁྲོད་དུ་ཁྱི་འཁྱམ་བཞིན་ཉུལ་ན། །
ཡ༵་རབས་མཁས་རྣམས་ཁྲེལ་བས་བག་ཡོད་དང་ལྡན་མཛོད། །
ར༵་བ་ལྕགས་ལས་གྲུབ་ཀྱང་མཐའ་མར་ནི་འཇིག་འགྲོ། །
ལ༵་རྒྱའི་མདུད་པ་བཅོས་མིན་དམ་པོ་ཞིག་ཡོད་ན། །
ཤ༵་ཚའི་ཁ་ནས་ཐོན་པའི་ཕན་སེམས་ཀྱི་བསླབ་བྱ། །
ས༵་ལེའི་གསེར་བཞིན་ཕན་པའི་ཆ་ཤས་དེ་བཞེས་མཛོད། །
ཧ༵་ལས་དགོས་པའི་ཚིག་སྙན་དོན་ཟབ་ནི་མེད་ཀྱང་། །
ཨ༵་མཚར་ཀུ་རེའི་ཚུལ་གྱིས་ཉམས་མྱོང་གི་དོན་འགའ། །
བཅོས་མིན་ལྷག་བསམ་དཀར་བའི་ཀ་ཕྲེང་དུ་སྤེལ་བ། །
འདུ་ཤེས་གསུམ་པ་མཁྱེན་རབ་འོད་གསལ་གྱིས་བྲིས་སོ། །
༢༠༡༢ལོའི<<རྨ་ཆུའི་རླབས་སྒྲ>>ལས།
| 