རང་གྲོལ་གྱིས་བརྩམས།
ཀ་ཁ་སློབ་པའི་དེང་གི་གཞོན་ནུ་འགའ། །
ཀ་ལི་ཕྲེང་བར་བསྒྲིགས་པའི་རྩོམ་ལ་དགའ། །
ཀ་རྩོམ་བྲིས་ན་ཤིན་ཏུ་ལེགས་མོད་ཀྱང་། །
ཀ་རྡོ་མེད་ན་ཀ་བ་ཕུགས་མི་བརྟན། །
ཀ་ཡེ་ཟེར་བའི་ཀ་རྩོམ་མང་མཐོང་ཡང་། །
ཀ་བར་རུང་བའི་རྒྱུ་ཆ་ཆེས་ཉུང་བས། །
ཀ་ནས་དག་པའི་བསམ་པའི་ཀུན་སློང་གིས། །
ཀ་རྐྱང་ཁོ་ནས་སེམས་གཏམ་འདི་དག་སྨྲས། །
ཀ་ཕྲེང་རྩོམ་པར་རང་ཉིད་མཁས་རློམ་གྱིས། །
ཀ་མད་སུམ་ཅུ་བཙན་གྱིས་བསྒྲིགས་ན་ཡང་། །
ཀ་དབྲག་ཤིན་ཏུ་ཐུང་བའི་ཁང་བ་བཞིན། །
ཀ་ཅའི་སྣག་ཤོག་གྲོན་པའི་རྒྱུ་རུ་ཟད། །
ཀ་ཏ་བུར་འཛག་ལ་སོགས་མངོན་བརྗོད་ཀྱིས། །
ཀ་ཏའི་བུ་འདྲའི་མཁས་དབང་མགུ་བྱེད་མོད། །
ཀ་ཁའི་གནས་ལ་རྨོངས་པ་བདག་འདྲ་བས། །
ཀ་ཞེས་མཛུབ་མོ་རི་སྟོན་བྱེད་པར་དགའ། །
ཀ་ལ་པིང་ཀའི་དབྱངས་ལྟའི་མངོན་བརྗོད་ལ། །
ཀ་གཉིས་པ་དག་དགའ་བར་མི་འགྱུར་བཞིན། །
ཀ་ཡིག་ཙམ་ཞིག་ཤེས་པ་འགའ་སྒྲོག་ཀྱང་། །
ཀ་ར་བུ་རམ་མངར་ཁྱད་སུ་ཡིས་འབྱེད། །
ཀ་མ་ལ་སོགས་མིང་གི་རྣམ་གྲངས་ཀྱིས། །
ཀ་སྡེའི་ཐ་སྙད་བང་མཛོད་ཕྱུག་ངེས་ཀྱང་། །
ཀ་ཡིག་ནོར་གྱིས་དབུལ་བ་བདག་འདྲ་ལ། །
ཀརྞི་ཀ་ཡི་རྒྱན་ཆ་ངོམ་པས་ཅི། །
ཀ་བ་ལི་ཡི་བོད་ཀྱི་གླེགས་མཛོད་ནང་། །
ཀ་ལིང་སྦུག་གི་ཐ་སྙད་མང་བསྲེས་ན། །
ཀ་སོགས་སུམ་ཅུའི་གསེར་གྱི་ཕོར་བ་ཡང་། །
ཀ་ཐམ་ཕལ་བ་ཙམ་དུ་མི་འགྱུར་གྲང་། །
ཀ་མ་རུ་ཡི་སྙན་ངག་ཁང་བཟང་རྩེར། །
ཀ་ན་ཀ་ཡི་མངོན་བརྗོད་རྒྱལ་མཚན་མཛེས། །
ཀ་རག་བསྐུས་པའི་ས་ཁང་གྲུ་བཞི་ལ། །
ཀ་གཱ་ནཱི་ལའི་ཏོག་གིས་ཅི་ཞིག་བྱ། །
ཀ་ཀོ་ལ་སོགས་མིང་གི་མངོན་བརྗོད་རྣམས། །
ཀ་སྡེའི་ནས་དབྱང་དགོས་ཡེ་མེད་ཀྱང་། །
ཀ་ཡང་རྩེ་མོ་མཆོག་ཏུ་མི་སེམས་པར། །
ཀ་བ་བུམ་པའི་ཐ་སྙད་སྦྱོར་བ་གཅེས། །
ཀ་ལཱ་པ་སོགས་སྒྲ་ལ་ཁུངས་གཏུགས་ནས། །
ཀ་ཁའི་ནུས་པ་དམན་སར་འགོད་པ་དག །
ཀ་མིན་ཁ་མིན་ཞིག་ཏུ་འགྱུར་ངེས་པས། །
ཀ་ཡེ་རང་གི་ཡི་གེར་དང་ཞེན་མཛོད། །
ཀ་བ་འདི་ནི་གངས་ཅན་ནགས་ནས་ཏེ། །
ཀ་རྡོ་འདི་ཡང་ཁ་བ་ཅན་ནས་ཞེས། །
ཀ་ཁའི་འབྱུང་ཁུངས་ངོ་མ་མི་འཚོལ་བར། །
ཀ་ཏར་གྲོང་ལ་མཛུབ་མོ་འཛུགས་དོན་མེད། །
ཀ་བའི་མངོན་བརྗོད་རྩོམ་གྱི་ཁང་བཟང་འདི། །
ཀ་ནས་བཟུང་སྟེ་བོད་ལ་དར་ན་ཡང་། །
ཀ་བ་གདུང་ལྕམ་མེད་པའི་ཚོམས་ཁང་སོགས། །
ཀ་ཡེ་དེང་རབས་དུས་ཀྱི་ཁྱད་ཆོས་ཡིན། །
ཀ་སོགས་ཀུན་གྱིས་གོ་བའི་སྐད་བཀོལ་ནས། །
ཀ་ཁའི་རི་མོ་འབྲི་ལ་ཁྲེལ་བ་རྣམས། །
ཀ་གདུང་མེད་པའི་ཁང་བཟང་མཐོང་བཞིན་དུ། །
ཀ་བ་མེད་ཅེས་བཞད་གད་བྱེད་དང་མཚུངས། །
ཀ་བསྟོད་ཡིན་ཀྱང་ཀུན་གྱིས་མ་གོ་ན། །
ཀ་ཁོག་གསེར་གྱིས་བཀང་ཡང་དགོས་པ་མེད། །
ཀ་ར་ཡིན་ཡང་ཚྭ་དང་འདྲེས་པ་ན། །
ཀ་པི་ཏ་དང་ཁྱད་པར་ཅི་ཞིག་ཡོད། །
ཀ་ཕྲེང་རྩོམ་ཡང་དོན་སྙིང་མི་ལྡན་ན། །
ཀ་སྒྲོགས་སྐད་ལྟར་རྣ་བར་གཟན་འགྱུར་བས། །
ཀ་ལ་པིང་ཀའི་དབྱངས་འདིར་ཁྱོད་སོམས་ལ། །
ཀ་ཕྲེང་རྩོམ་གྱི་ཟློས་གར་སྒྱུར་ཅིག་གུ། །
༢༠༡༢ལོའི<<རྨ་ཆུའི་རླབས་སྒྲ>>ལས།
|