| རྨ་ཆུའི་ཤེས་རབ་རྒྱ་མཚོ།
ང་རང་ལྟེ་ཁྲག་འཕོས་པའི་བོད་ལྗོངས་སུ། །
དེང་ཡང་རྗེས་ལུས་མདུད་བརྒྱས་དམ་དུ་བཅིངས། །
གྲོལ་ཕྱིར་བདེན་གཏམ་རྡོ་རྗེ་ཚིག་གི་ཕྲེང་། །
བརྗོད་ལ་མི་འཇིགས་རྣ་བ་རིང་དུ་གཏོད། །
ཡང་དག་ལོ་རྒྱུས་དྭངས་གསལ་རྒྱབ་ཏུ་བཞག །
མི་རིགས་ལ་རྒྱའི་ཚིག་སྐམ་ངག་ནས་བཟླས། །
བཟའ་བཏུང་ཙམ་ལས་ཕུགས་བསམ་ཆེར་མེད་པ། །
ཚུལ་དེ་བོད་མིས་སྤང་འོས་གཤིས་ཀ་ཉིད། །
ཡིག་རྨོངས་ཞྭ་ཆེན་གྱོན་པས་དཀའ་ངལ་ལྕི། །
ལོག་ལྟའི་ཁུང་བུར་བརྟེན་པས་རང་ཞིད་བསླུས། །
སྒྲོ་སྐུར་ཚིག་གིས་ཕན་ཚུན་དབྱེན་སྦྱོར་བྱེད། །
ཚུལ་དེ་བོད་མིས་སྤང་འོས་གཤིས་ཀ་ཉིད། །
མ་འོང་མདུན་ལམ་མཆོག་ལ་མི་བལྟ་ཞིང་། །
ངག་རྒྱུན་ཙམ་ལ་བློ་ཕུགས་ཆེར་གཏད་ནས། །
གསར་གཏོད་མི་དགའ་རྙིང་ཞེན་མཆོག་འཛིན་པ། །
ཚུལ་དེ་བོད་མིས་སྤང་འོས་གཤིས་ཀ་ཉིད། །
རང་ལས་དམན་ལ་ཁྱད་གསོད་བརྙས་སྨོད་བྱེད། །
རང་དང་གཞན་གྱི་བྱ་བ་ཤར་ནུབ་འབྱེད། །
རང་ཉིད་རང་ལ་མཐོ་བའི་ཁེངས་དྲེགས་ཆེ། །
ཚུལ་དེ་བོད་མིས་སྤང་འོས་གཤིས་ཀ་ཉིད། །
ཕ་མའི་བསླབ་བྱ་རྒྱལ་བོའི་བཀའ་ལ་འགལ། །
རུ་སྡེའི་ནང་ལ་དོན་མེད་ཁ་མཆུ་བཟོ། །
རང་ནོར་རང་གིས་མ་ཟིན་གཞན་ལ་ཤོར། །
ཚུལ་དེ་བོད་མིས་སྤང་འོས་གཤིས་ཀ་ཉིད། །
རང་རིགས་མཐོན་པོའི་ཁྲི་ལ་གསོལ་བའི་ཚེ། །
ངན་སྨྲས་ཚིག་གི་མཚོན་གྱིས་ཆར་ཕབ་ཅིང་། །
མི་བཟོད་ཕྲག་དོག་དུག་གི་མེ་དཔུང་འབར། །
ཚུལ་དེ་བོད་མིས་སྤང་འོས་གཤིས་ཀ་ཉིད། །
མི་རིགས་ལས་དོན་མི་སེམས་སྒོར་མོ་སེམས། །
མཐར་ཐུག་དགོས་དོན་མི་སེམས་གྲགས་པ་སེམས། །
གཞན་ཕན་ལྷག་བསམ་མི་སེམས་གོ་ས་སེམས། །
ཚུལ་དེ་བོད་མིས་སྤང་འོས་གཤིས་ཀ་ཉིད། །
མཐོན་པོའི་དཔོན་སར་ཕྱིན་ཀྱང་འབངས་མ་བསྐྱངས། །
བདེན་རྫུན་གང་ཡིན་མ་ཤེས་བདག་གཞན་ཕོངས། །
གཞན་ལ་ངོ་འཛིན་གཏམ་གྱིས་རང་མཚང་སྟོན། །
ཚུལ་དེ་བོད་མིས་སྤང་འོས་གཤིས་ཀ་ཉིད། །
རི་ལུང་རྩྭ་ས་བརྩད་པས་དཔའ་བོ་མིན། །
གཞན་གྱི་ནོར་རྫས་བརྐུས་པས་ཕྱུག་པོ་མིན། །
དངུལ་གྱིས་ཐོབ་ཐང་ཉོས་པས་མཁས་པ་མིན། །
ཚུལ་དེ་བོད་མིས་སྤང་འོས་གཤིས་ཀ་ཉིད། །
རང་ཕྱོགས་ཉེ་འཁོར་བསྡུས་པ་མཐུན་སྒྲིལ་མིན། །
ཉམས་ཆུང་དམའ་སར་མི་བལྟ་རྗེ་བོ་མིན། །
བཙུན་པ་གྲོང་ཁྱིམ་ཉུལ་བ་ཆོས་པ་མིན། །
ཚུལ་དེ་བོད་མིས་སྤང་འོས་གཤིས་ཀ་ཉིད། །
ལྷག་བསམ་བློ་རྒྱ་ཆེ་བའི་རང་རིགས་དག །
དཔོན་པོའི་ཁྲི་ལ་འཇོག་ཚེ་ཕྲག་དོག་གིས། །
དམའ་སར་འབྲིད་པའི་སྤྱོད་ཚུལ་མ་རུངས་པ། །
རང་རིགས་ཐུར་དུ་རྒུད་པའི་ངན་ལྟས་ཡིན། །
རང་རིགས་མཁས་པའི་བར་ལ་ཕྲག་དོག་རྒོད། །
རང་རིགས་ཕུ་ནུའི་བར་ལ་གཅེས་སྲོག་གཏོང་། །
རང་རིགས་མཐོན་པོའི་བར་ལ་དབང་རྩོད་བྱེད། །
རང་རིགས་ཐུར་དུ་རྒུད་པའི་ངན་ལྟས་ཡིན། །
དེང་དུས་སྙིགས་མའི་མཁས་རློམ་འགའ་རེས་ཀྱང་། །
སངས་རྒྱས་ཆོས་ལུགས་དར་བ་རྗེས་ལུས་དང་། །
སྔོན་ཐོན་ཤེས་རིག་བསླབས་པ་བསླུ་བྲིད་ཕྱིར། །
ཞེས་པའི་གཏམ་གྱིས་རང་ཉིད་བསྐལ་བརྒྱར་དམོད། །
ཆོས་ཀྱི་ཐ་སྙད་ཙམ་ལ་འགྲེལ་མི་དཔྱོད། །
ཆོས་ཀྱི་དགོངས་དོན་ཅི་ཡང་མ་ཤེས་པར། །
ཆོས་ལ་སྐུར་བ་འདེབས་པ་རང་མཚང་ཡིན། །
ཚུལ་དེ་ཐོས་ན་ངོ་ཚ་སུ་ཡིས་འཁུར། །
ཆོ་ག་ཀློག་འདོན་ཙམ་གྱིས་ཆོས་པ་མིན། །
སྙན་རྩོམ་ཕྲན་ཚེགས་བྲིས་པས་རྩོམ་པ་མིན། །
སུམ་རྟགས་སྙན་ངག་བསླབས་པས་མཁས་པ་མིན། །
ལྔ་ཟུང་རིག་པའི་དགོངས་དོན་དཔྱོད་ལ་བརྩོན། །
སློབ་གྲྭ་ཆེན་མོའི་ཐོབ་ཐང་ཞིག་འབྱོར་ནས། །
མི་རིགས་བྱ་བའི་ལས་དོན་རྒྱབ་ཕྱོགས་ཏེ། །
འདུ་འཛིའི་ལས་སུ་ཉིན་མཚན་སྤྱོད་པ་ནི། །
རང་ཉིད་རིག་གནས་བསླབས་པའི་དགོས་དོན་མིན། །
ཕ་ས་རང་གིས་བདག་བཟུང་བྱས་པའི་སྟེང་། །
དཔལ་འབྱོར་འཛུགས་སྐྲུན་སྒོ་བརྒྱ་ཕྱེ་བ་དང་། །
རིག་གནས་སློབ་གསོ་དར་སྤེལ་གཏོང་བ་སོགས། །
གངས་ཅན་བོད་ཀྱི་ལས་དོན་གཙོ་བོ་ཡིན། །
དེ་ལྟར་ཁོ་བོའི་ལྷག་བསམ་དབྱུ་གུས་ཀྱང་། །
བསྐུལ་པས་མགྲིན་པའི་རྫ་རྔ་བསྒྲགས་པ་ལས། །
མངོན་བརྗོད་བརྡ་རྙིང་ཚིག་གིས་མ་སྤུད་པར། །
གོ་སླའི་སྙིང་གཏམ་ཁ་བའི་ལྗོངས་སུ་སྦྲེངས། །
༢༠༡༢ལོའི<<རྨ་ཆུའི་རླབས་སྒྲ>>ལས།
| 