——དགེ་ཆོས་ཚང་ལ་ཕུལ།
གངས་དགའ་འཁྱམ་པོ། (ཆབ་མདོ།)
བཀག་རྒྱའི་སྡོམ་པ་རླུང་ལ་བསྐུར།།
བྱམས་པའི་བུ་མོ་པང་ལ་འཁྱུད།།
འདོད་པའི་བསྟན་བཅོས་མི་ཡུལ་བཞག།
རྟོགས་པ་སད་པའི་གད་རྒྱངས་རེད།།
དགེ་བཤེས་མཚན་གྱི་གྲགས་པ་ལ།།
ཆཊ་པའི་བབ་ཆགས་མ་བཞག་པར།།
གཞན་རིག་ནང་འདྲེན་སྙིང་སྟོབས་དེས།།
སེམས་པ་གང་ལ་དཀར་བ་ཤེས།།
སྡེབ་ལེགས་ཚིག་གི་སྦྱོར་བ་ལ།།
མིག་ལྡན་སྐྱེ་བོའི་ཡིད་དབང་འཕྲོག།
དུས་རབས་ཤིག་གི་སྙན་ངག་པའི།།
མཚན་གྱི་ཅོད་པན་ཁྱེད་ལ་དབང༌།།
བཀའ་བབ་གྲུབ་མཐའི་ཤན་རྒྱ་བྲལ།།
དཔྱད་གཞི་ཁུངས་ལ་དབང་བཅོལ་ནས།།
ལོ་རྒྱུས་སྨྲ་བའི་ལུགས་སྲོལ་འདི།།
དྲང་བདེན་སྐྱོང་བའི་བདེན་དཔང་ཡིན།།
རྒྱལ་ཁམས་རིག་པས་བསྐོར་བ་འདི།།
རྒྱང་བལྟའི་འདྲེན་བྱེད་ཆེ་རྒྱས་པའི།།
དུས་རབས་ཤིག་གི་རིག་པའི་བུ།།
ཡིན་ལུགས་བཤད་པའི་རྒྱུ་མཚན་རེད།།
ལྟ་ལོག་ཞྭ་ནག་བསྐོན་ཡང་རུང༌། །
སངས་རྒྱས་རློན་པར་བརྗོད་ཀྱང་ཆོག །
གང་ལྟར་ཁྱེད་ཀྱི་མི་གཤིས་ལ། །
ཁོ་བོ་དགའ་བ་ཚད་མེད་དོ། །
༢༠༠༩ལོའི་ཟླ༡༢ཚེས༣གྱི་ཐོ་རངས་ཤིག་ལ་ལྷ་ས་ནས་ཤར་མར་བྲིས།
༢༠༡༠ལོའི<<རིག་གནས་ཡར་སྤེལ>>ལས།
|