| འབྲོག་བུ་དཀོམ་བཀྲ༼ནུབ་བྱང་༽
སྲོད་ཀྱི་མཚམས་སྤྲིན་མེ་རུ་འབར། །
ཉི་མའི་ཕྱི་མིག་བྲག་ལ་ཐེབས། །
རྒྱུ་སྐར་བཀྲ་བའི་གཙང་གཞུང་དུ། །
བདག་མོའི་ལན་བུ་ཤག་ཤག་འཁྲུད། །
དུ་བ་དཀར་པོའི་གཤོག་ཐོག་ཏུ། །
སྲེད་པའི་བྱེའུ་ཆུང་འཕུར་ཞིང་ལྡིང་། །
མ་ཎིའི་སྒོ་དར་སྐྱ་བོ་ལ། །
ཆགས་པའི་མཆུ་ཏོག་ཡང་ཡང་བསྣུན། །
རྒྱང་ནས་གྲགས་པའི་གླུ་སྐད་ཀྱིས། །
དོ་ཐོག་མཆོད་མེ་གློ་བུར་གཟིམས། །
སྣང་བ་དག་པའི་ལྷ་ཚོགས་ཀྱང་། །
སྤྱན་ཟུང་བཙུམས་ཏེ་ཡུལ་དུ་གཤེགས། །
བདག་པོ་གཉིད་ཀྱི་ཁྲུས་ལ་རོལ། །
རྨི་ལམ་སྦྲང་རྩིའི་ཁུད་དུ་ལྷུང་། །
སྦྲ་འདབས་སྐྱེས་པའི་རྩྭ་ལྗང་དག །
ཟིལ་བའི་ཆུ་དང་ལུས་འབྲེལ་བྱུང་། །
དོ་དགོང་ནམ་མཁའི་ཕོ་བྲང་ན། །
ཟླ་ཤེལ་མེ་ལོང་ཨེ་མ་གསལ། །
གནམ་སའི་བར་ཐག་ཆེས་ཆེ་ཡང་། །
ང་ཡི་ལས་དབང་གཅེར་བུར་མངོན། །
མཐིང་མདོག་རི་བོའི་ཁུགས་ཀྱོག་ན། །
ང་དང་འབྲོག་མོ་མཉམ་དུ་ཡོད། །
སྐེ་ཡི་ལྕགས་ཐག་དགུ་སྒྲིལ་འདི། །
ཡང་ལྗིད་གང་དུ་མ་ངེས་སོ། །
མུན་པ་སྟུག་པའི་མཚན་གཞུང་དུ། །
ང་དང་སྤྱང་མོ་ལྷན་དུ་ཟུག །
ལས་ཀྱི་འདོགས་ཐག་བཙན་པོ་འདི། །
ནམ་ཞིག་ཆད་འགྲོ་མ་ངེས་སོ། །
སྐྱ་རངས་ཤར་ནས་བཀྱགས་པའི་དུས། །
ང་དང་སྨིན་དྲུག་ངལ་བས་གཟིར། །
ཚེ་སྔོན་ལས་ཀྱི་བསྐོས་ཐང་འདི། །
ནམ་ཞིག་འགྱུར་འགྲོ་མ་ངེས་སོ། །
དགུན་གསུམ་གྲང་ལྷགས་ཆེ་བའི་དུས། །
ང་དང་ལུག་ཆུང་མཉམ་པོར་སྐྱེས། །
གངས་དཀར་ར་བའི་གནམ་གཤིས་ཀྱི། །
རྩུབ་སྤྱོད་རེག་བྱ་དང་པོ་མྱངས། །
དཔྱིད་ཟླའི་མུ་གེ་ཆེ་བའི་ཚེ། །
ང་དང་རྟེའུ་ཆུང་མཉམ་པོར་མནར། །
བཀྲེས་ཤིང་སྐོམ་པའི་སྡུག་བསྔལ་གྱི། །
ངེས་ཤེས་ཐོག་མ་དེ་ནས་རྙེད། །
དབྱར་གསུམ་ཆར་ཆུས་བྲན་པ་ཡི། །
ང་ཡི་ལུས་པོ་རབ་ཏུ་གྲང་།
གངས་འཁྱག་ས་གཞིའི་ཟེ་བར་དུ། །
གཟུགས་གཞི་ཧུར་གྱིས་སྲོ་བཞིན་ཡོད། །
འཇིག་རྟེན་ལས་ཀྱི་སྐྱིད་སྡུག་ལས། །
ངས་ནི་སྡུག་གི་ཆུ་འཁྱག་འཐུང་། །
མི་ཡུལ་དགའ་སྐྱོའི་མཐུད་མཚམས་ནས། །
ང་ལ་སྐྱོ་བའི་མཆི་མ་མོད། །
ཧམ་པའི་སྡེར་མོ་ནང་དུ་བསྐུམས། །
སྲེད་པའི་ལྕེ་རིང་ཁོག་ཏུ་བཅུམས། །
བདག་པོར་ཞེ་བློ་དཀར་བ་ཡི། །
དམ་ཚིག་སྐད་ཅིག་བརྗེད་དུས་མེད། །
ང་ཡི་མེས་པོ་རྟུལ་ཕོད་ཅན། །
ཤ་ཁྲག་མཚོན་ལ་བརྡར་ནས་ཤི། །
རྣམ་ཤེས་བདག་པོར་འཁྱུད་ནས་འདས། །
ང་ཡང་དེ་ལྟར་འཆི་སྙིང་སྐྱེ། །
ཐོ་རངས་བྱེའུ་སྐད་ཀྱུར་ཀྱུར་གྲགས། །
གཏི་མུག་ན་བུན་ཕྱོགས་སུ་ཡལ། །
སྡེ་མཐའི་བུ་མོ་ཆུ་ལེན་ལ། །
ཐུན་གསུམ་སྲུང་བའི་ཚང་རྩིས་སྤྲད། །
རི་ཚོགས་རླབས་ཀྱི་རྩེ་མོ་ནས། །
ནམ་ལངས་ཉི་མའི་པྲོག་ཟེ་མངོན། །
ཀྲིག་ཀྲིག་འཚེར་བའི་ཟེར་མའི་རྒྱུན། །
ང་ཡི་མིག་གི་གཟི་མར་ཆགས། །
༢༠༡༢ལོའི<<རྨ་ཆུའི་རླབས་སྒྲ>>ལས།
| 