|
སོ་ཤུལ་བློ་བཟང་ཚེ་བརྟན།
ཕྱི་ན་རླུང་འཚུབ་འུར་སྒྲ་ལྡིར་ལྡིར་དུ་གྲགས་དུས། །
ནང་ན་ཉམས་ཆུང་སེམས་པ་ལྟིག་ལྟིག་ཏུ་ལྡིང་དུས། །
མི་ཡི་ཡུལ་འདི་རྡུལ་གྱི་ཀློང་རིམ་དུ་འཐིམས་དུས། །
སྨྱུག་ཐོགས་སྤྲང་ཕྲུག་འཁྱམ་པོའི་སོར་རྩེ་དེ་འཚབ་འོང་། །
གྲང་རེག་བུ་ཡུག་མདའ་མོས་ལུས་པོ་དེ་གཙེས་དུས། །
འཛིན་མའི་བཞིན་རས་ཁ་བས་གུར་ཁྱིམ་དུ་ཡིབ་དུས། །
གཙང་ཆབ་སྔོན་མོ་དར་གྱི་གཤམ་ཀློང་དུ་ཚུད་དུས། །
ཁོ་བོའི་ངག་ནས་སྐྱོ་བའི་འཁུན་སྒྲ་ཤིག་ཤོར་སོང་། །
སྒོ་ཕྱུགས་སྟོང་གིས་ལྷས་ནས་སོ་སྒྲ་དེ་འཆའ་དུས། །
ཕྱུགས་རྫི་རྒན་པོའི་གདོང་ལ་སྐྱོ་ཉམས་ཤིག་ཐོན་དུས། །
འབྲོག་མིའི་འཚོ་བར་རེ་བའི་མིག་ཟུང་དེ་ཟིམ་དུས། །
སྙིང་ལ་གཟན་པའི་ཚིག་ཅིག་མགྲིན་པ་ནས་བརྡོལ་སོང་། །
བཙན་པོའི་རྟ་ཁ་མ་ཐུབ་གང་འདོད་དུ་རྒྱུགས་དུས། །
གཉོམ་ཆུང་རྐང་ཐང་རང་ལམ་ཆོད་མིན་ལ་དོགས་དུས། །
མི་ཡུལ་ཁམས་ན་རྒྱུ་འབྲས་བློ་མིག་དེ་ཕྲ་དུས། །
དྲང་བདེན་དར་ཆ་གོ་ལའི་ཡང་རྩེ་རུ་བསྒྲེང་དགོས། །
བདེ་མོའི་ལམ་ཞིག་བསྟན་ན་མགོ་སྐོར་དུ་སེམས་ཤིང་། །
བདེན་པའི་གཏམ་ཞིག་བརྗོད་ན་དོགས་གཞི་ཞིག་སྐྱེས་ཡོང་། །
ཕ་བུ་ཡིན་ཡང་བློ་གཏད་ཡིད་ཆེས་ཤིག་དཀའ་དུས། །
སེམས་གཏམ་གསོང་བོར་བརྗོད་སའི་བློས་ཐུབ་ཅིག་གང་ན། །
ཡོད་ན་ཡོད་པའི་མི་ཆོག་དོན་སྒོ་ཞིག་ཆོད་དགོས། །
མེད་ན་མེད་པའི་མི་ཆོག་ཟས་གོས་ཙམ་མེད་དགོས། །
ཡོད་མེད་བར་ན་ལུས་པའི་སྡུག་ཡུས་ཀྱི་ཁུར་བོ། །
བརྗོད་ན་འགྲེལ་བ་དཀའ་བའི་ནང་སེམས་ཀྱི་མནར་གཅོད། །
དུས་ཀྱི་འཕར་རྩ་ཉིན་རེར་ཇེ་མགྱོགས་ནས་ཇེ་མགྱོགས། །
རིགས་ཀྱི་དུངས་ཞེན་ཉིན་རེར་ཇེ་ཟབ་ནས་ཇེ་ཟབ། །
མདུན་གྱི་ལམ་བུ་ཉིན་རེར་ཇེ་དོག་ནས་ཇེ་དོག །
ཁོ་བོའི་ཡིད་གྱི་རླབས་རྒྱུན་འཇགས་ཐབས་ནི་མི་འདུག །
༢༠༡༢ལོའི<<རྨ་ཆུའི་རླབས་སྒྲ>>ལས།
| 