ཚེར་མ།
༡ ཡུལ་དེའི་དགུན་ཁར་མེས་པོ་དྲན་པ།
ཉི་མའི་འོད་དེ་ས་གཞིར་བྱུགས་ཀྱང་
ནམ་ཟླ་སྔར་བཞིན་གྲང་ཤུར་ཤུར འཁྱག་སིབ་སིབ
གློ་བུར་བས་འཚུབ་སྐོར་རེ་རེའི་ཁྲོད
རང་ཉིད་ཀྱིས་ལྭ་བར་ལྟ་ཐེངས་རེར
ལོ་མ་གྱོན་ཆས་སུ་བྱས་པའི་མེས་པོ་དག་དྲན་ལ
ལག་པ་དམར་བོར་གྱུར་ནས་ཕོར་བ་ས་རུ་ལྷུང་བའི་ཚེ
རལ་གྲི་མཁའ་ལ་འཕྱར་བའི་མེས་པོ་དག་ལྷག་ཏུ་དྲན
༢ ཡུལ་དེའི་དགུན་ཁར་དགེ་ཆོས་དྲན་པ།
རྨ་ཆུ་ལ་སྲ་མཁྲེགས་ཀྱི་དར་ཟམ་དེ་ཆགས་དུས
སུ་ཚང་ལ་དྲོད་ཁོལ་དེ་མི་མཁོ་འམ
ཁང་བ་དེའི་ཕྱི་རོལ་ན
དགེ་ཆོས་ཁ་བ་དང་ལྷན་དུ་བབས་ལ
གྲང་རླུང་དང་ལྷན་དུ་སྤུར
དགེ་ཆོས་དེ་དཔའ་བོ་རེད
ཁོར་ཡུག་དཀར་བོང་བོང་ དེ་ནི་དགེ་ཆོས་ཀྱི་བསམ་བློ་ཡིན་ལ
དགེ་ཆོས་དྲན་པའི་གདུང་བའང་དེ་མ་ཡིན་ནམ
༣ ཡུལ་དེའི་དགུན་ཁར་རང་ཉིད་དྲན་པ།
རླུང་དམར་གྱིས་གཟུགས་མེད་ཀྱི་རལ་གྲི་འཕྱར་ནས
གང་ཞིག་ཏུ་ཇག་ལ་འགྲོ་ཆས་བྱས
རང་ཉིད་ཀྱིས་སྨྱུ་གུ་བཟུང་ནས་སྐྱ་ཐིང་ཐིང་གི་སྤང་གཞུང་ན
རྡུལ་ཕྲན་དང་མཉམ་དུ་གཉིད་ལ་ཤོར
ཀི་སྒྲ་དང་བཅས་ཏེ་ལམ་ལ་ཆས
དེ་དང་སྦྲགས་ནས་སད་བྱུང་ སྣང་ངོར
རང་ཉིད་ཀྱིས་ཀྱང་སྤོབས་པ་ཞིག་རྒྱབ་ཏུ་ཁུར་ཏེ
རྟ་ཕོ་ལ་གོམ་ཁ་བསྒྱུར་སའི་ལམ་བུ་ཞིག་ཡོད་ན་སྙམ
༢༠༡༢ལོའི<<རྨ་ཆུའི་རླབས་སྒྲ>>ལས།
|