འཇུ་སྐལ་བཟང་ངོ་སྤྲོད་མདོར་བསྡུས།
  ༄༅། །བཙན་པོའི་མགར་གྱི་དྲ་བས་ཁྱེད་ལ་དགའ་བསུ་ཞུ། དེ་རིང་ནི་སྤྱི་ལོ 2019 ལོའི་ཟླ 9 ཚེས 17 རེས་གཟའ་མིག་དམར་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། ནང་འཇུག འདི་ནས་ང་དང་གླེང་མོལ་བྱ།
གཙོ་ངོས།
ཆོས་ལུགས།
རྩོམ་རིག
ལོ་རྒྱུས།
རུས་རྒྱུད།
དམངས་སྲོལ།
སྒྱུ་རྩལ།
དཔལ་འབྱོར།
མི་སྣ།
སློབ་གསོ།
ཕྱོགས་སྟོན་་་་ གཙོ་ངོས།» མི་སྣ།» གྲགས་ཅན་སྐྱེས་པའི་སྡེ། »འཇུ་སྐལ་བཟང་ངོ་སྤྲོད་མདོར་བསྡུས།
འཇུ་སྐལ་བཟང་ངོ་སྤྲོད་མདོར་བསྡུས།
རྩོམ་སྒྲིག་པ།  ཁཱ་ཤེས་རབ་རྒྱ་མཚོ། སྤེལ་དུས། 2013/6/14ལྟ་ཀློག (15121)རྩོམ་ཁུངས: ངེད་དྲ་བ།པར་འདེབ།

                འཇུ་སྐལ་བཟང་ནི་༡༩༦༠ལོར་མཚོ་སྔོན་ཞིང་ཆེན་མགོ་ལོག་ཏུ་སྐྱེས།   ༡༩༧༦ལོར་མཚོ་སྔོན་མི་རིགས་སློབ་གླིང་གི་བོད་ཡིག་སྡེ་ཁག་ཏུ་ཞུགས།   ༡༩༧༩ལོར་མགོ་ལོག་ཏུ་ཕྱིན་ནས་དགེ་རྒན་གྱི་ལས་ཀ་གཉེར།   ༡༩༨༥ལོར་མཚོ་སྔོན་མི་རིགས་སློབ་གླིང་ནས་ཞིབ་འཇུག་བཏོན།    ༡༩༨༧ལོར་མཐར་ཕྱིན་རྗེས་ཕྱིར་མགོ་ལོག་ཏུ་ཕྱིན་ནས་ཁུལ་མི་རིགས་སྐད་ཡིག་ལས་སྒྲུབ་ཁང་དུ་ཕྱག་ལས་གནང་།   ད་བར་དུ་ལས་ཁུངས་དེ་ག་ནས་བྱ་བ་བསྒྲུབས།   རྩོམ་རིག་གསར་རྩོམ་གྱི་ལས་ལ་ཞུགས་པ་ནས་ད་བར་དུ་སྙན་ངག་དང་ལྷུག་རྩོམ་སོགས་བརྩམས་ཆོས་བརྒྱ་ཕྲག་སྤེལ་ལ་རྩོམ་རིག་དཔྱད་རྩོམ་ཆེད་དེབ་སོགས་མང་བ་ལས་ཐེངས་དང་པོར་༡༩༧༧ལོར་༼ཤ་སྐྱ་དུས་དེབ།༽སྟེང་སྙན་ངག་དང་པོ་སྤེལ།སྙན་དེབ་ལ་༼གངས་འདབས་ཀྱི་སེམས་པ།༽༡༩༩༤ལོ་དང་།༼དུང་སེམས་རླབས་ཀྱི་ཟེགས་མ།༽༼གངས་གྲོང་གི་རླུང་བུ།༽༢༠༠༩ལོར་གསུམ་དང་།བསྒྱུར་དེབ༼ཨ་མའི་སྙན་ངག༽བཅས་ཡོད་ལ།   རིག་གཞུང་དཔྱད་རྩོམ་ལ༼སྙན་ངག་གི་རྣམ་བཤད༽ཡོད།    འཇུ་སྐལ་བཟང་གི་སྙན་ངག་གི་ལུས་དང་རྩོམ་ལུགས་མང་པོར་འཚོལ་དཔྱོད་བྱས་ཡོད།   སྔ་གཞུག་ཏུ་ཀྲུང་གོའི་ཀྲོང་ཀྲུན་ཝིན་རྩོམ་རིག་བྱ་དགའ་དང་གངས་ཅན་རྟགས་ཅན་གྱི་བོད་ཀྱི་རྩོམ་རིག་བྱ་དགའ་སོགས་བྱ་དགའ་མང་དུ་ཐོབ།   ད་ལྟ་ཀྲུང་གོ་གྲངས་ཉུང་མི་རིགས་རྩོམ་རིག་མཐུན་ཚོགས་ཀྱི་ཁོངས་མི་དང་།  མཚོ་སྔོན་ཞིང་ཆེན་རྩོམ་པ་པོའི་མཐུན་ཚོགས་ཀྱི་ཚོགས་གཙོ་གཞོན་པ་སོགས་ཀྱི་ཞོར་འགན་ཁུར་ཅིང་།     མགོ་ལོག་ཁུལ་མི་རིགས་སྐད་ཡིག་ལས་སྒྲུབ་ཁང་དུ་ཕྱག་ལས་གནང་བཞིན་མཆིས།


                             


 ལམ་ཕྱེད་ནས་ཕྱི་མིག་བལྟས་པ།

                       དགའ་སྐྱོ་གོམ་ལ་གཞལ་བའི་བཤུལ་ལམ་གྱི་ཁུགས་པར།།

                       སྐྱིད་སྡུག་ཚེ་ཕྱེད་ཟད་ལ་འགྱོད་པ་རང་མེད་ཀྱང་།།

                       ཨ་མའི་པང་ནས་རྙེད་པའི་ལྷན་སྐྱེས་ཀྱི་གཤིས་རྒྱུད།།

                       རྩྭ་མགོར་ཤིང་མགོར་ཟགས་ལ་ཕང་སེམས་ཤིག་ཤོར་སོང་།།

                       ང་རྒྱལ།

                       གཅུན་ཆེ་ན་རྒྱ་མོའི་བྱིའུ་རྐང་འདྲ།།

                       བསམ་བཞིན་དུ་རང་ལུས་ཕྱེད་ཀར་གཏོང་།།

                       སྦུད་ཆེ་ན་དབུགས་ཀྱི་ལྒང་བུ་འདྲ།།

                       ཚད་ཅིག་ནས་རང་ལུས་ཚལ་བར་འགས།།

                       ལས་དབང་།

                       རེས་འགའ་ཤིང་ལོ་རླུང་ཞོན་མ།།

                       འགྲོ་འདུག་གདམ་ག་འགའ་ཡང་མེད།།

                       རེས་འགའ་གླ་ལྤགས་བཟའ་མཉེད་མ།།

                       ག་སར་འཐེན་ན་དེ་སར་འོང་།།

                       ཉིན་གུང་གི་དབེན་པ།

                       གོག་མ་གེར་གྱིས་ལངས་པའི་རེ་སྦྲ་རིད་པོ་ན།།

                       བན་མ་བུན་དུ་ལྡང་བའི་དུ་བ་ནད་པ་ཞིག།

                       དྲོད་མ་འཇམ་དུ་ཤར་བའི་ཉི་ཐིག་རྙིད་པོ་ན།།

                       གཉིད་མ་སད་དུ་ལོག་པའི་བགྲེས་པོ་རྙིང་བ་ཞིག།

                       དགུན།

                       ལྗོན་ཤིང་ཡལ་གར་འཕྲེད་དུ་རེངས་པའི་མི་སྡུག་གཟུགས།།

                       ཁུ་བྱུག་ལྕེ་རྩ་དམ་དུ་བཅིངས་པའི་སྐྱོ་ཤས་སྒྲོག།

                       རྫི་བོའི་ལྷམ་ངོར་རིམ་གྱིས་མཁར་བའི་གངས་འཁྱགས་ལྕིད།།

                       ཆབ་རོམ་སྦུབས་ན་ལྷུང་ལྷུང་འབབ་པའི་རེ་བའི་རྒྱུན།།

                       མཛའ་བརྩེ།

                       གཡང་དཀར་པགས་པའི་སློག་པ་སྤུ་རིང་མ།།

                       ཇི་ཙམ་མཐུག་པ་དེ་ཙམ་སིམ་ནས་འོང་།།

                       རྫས་འགྱུར་སྐུད་པའི་ལྭ་བ་མཛེས་པོ་མ།།

                       ཇི་ཙམ་སྲབ་པ་དེ་ཙམ་བརྟོལ་དུ་མེད།།

                       སྙན་ངག་གི་རིན་ཐང་།

                       ཐོ་ཤོར་གྱི་མེ་ལྕེ་ཁ་ཚ་མས།།

                       འདོད་སྲེད་ཀྱི་ཅོ་ནས་བཟུང་གྱུར་དེ།།

                       རྒྱལ་ཁམས་འདི་འུར་གྱི་གང་བའི་དུས།།

                       ངུ་རྒོད་ཀྱི་གཏམ་དེ་སུ་ལ་སྒྲོག།

                       གྲངས་ལྷགས་ཀྱི་མཚན་མོ།

                       གངས་འཁྱགས་མལ་དུ་གནག་ཕྱུགས་སོ་སྒྲ་འཆའ།།

                       སྒོ་ཁྱི་ཟུག་པའི་གཅོང་སྐད་རླུང་གིས་འཁྱེར།།

                       སྦྲ་ནག་གོང་ཁ་རལ་བའི་བུ་ག་ན།།

                       ལྷག་པས་འཇུམ་པའི་སྐར་མ་ཁོང་འདར་བྱེད།།

                       རྩྭ་ཐང་གི་དགོང་སྲོད།

                       སྲོད་ཁའི་ཉི་མས་གྲིབ་མ་རིང་དུ་བསྲིངས།།

                       གཡང་དཀར་མ་བུ་འཕྲད་པས་འབའ་སྒྲ་སྒྲོག།

                       ཨོང་སྒྱེ་ཕྲག་པར་གཟར་བའི་གཞོན་ནུ་མས།།

                       རྡུལ་རླུང་འཐིབ་པའི་ལམ་ལ་རྒྱང་མིག་ལྟ།།

                       བག་ཆགས།

                       ནམ་ཞིག་རྟེན་མེད་རྣམ་ཤེས་འཁྱམ་པོར་གྱུར་པའི་ཚེ།།

                       ཁྱོད་དང་འུ་གཉིས་དུར་ས་གཅིག་ཏུ་སྦས་གྱུར་ན།།

                       ཁྱོད་ཀྱིས་དེ་རུ་གསེར་གྱི་སྒོར་མོ་ཁྲོག་ཁྲོག་བརྩི།།

                       ཁོ་བོས་ད་དུང་ལེགས་ཉེས་དགེ་སྐྱོན་འབད་པས་དཔྱོད།།


                       དུང་སེམས་རླབས་ཀྱི་ཟེགས་མ།

                       དང་པོའི་ན་ཆུང་གི་བརྩེ་དུང་།།

                       དྭངས་གསལ་ཆུ་ངོགས་ཀྱི་ཟླ་བ།།

                       ལག་པས་འཛིན་རྒྱུ་ཞིག་མེད་ཀྱང་་།།

                       སེམས་པས་འགོག་ཐབས་རང་མི་འདུག།

                       མཆུ་སྒྲོས་པད་འདབ་ཀྱི་ཟིལ་བ།།

                       ང་ལ་གནང་འདོད་ཅིག་མེད་ན།།

                       ཟུར་མིག་གེ་སར་གྱི་མདའ་མོས།།

                       སྙིང་ལ་གཙག་པ་རང་མ་གནང་།།

                       མེ་ཏོག་ཆུང་ཆུང་གི་སྒྲོམ་བུར།།

                       གཡུ་སྦྲང་འཁོར་འཁོར་རང་མ་གནང་།།

                       གེ་སར་སྦྲང་ཆར་དུ་སྨིན་ཚེ།།

                       དུང་སེམས་འདབ་གཤོག་དེ་སྒྱུར་ཤོག།

                       སོ་འཛུམ་གེ་སར་གྱི་ཕྲེང་བ།།

                       ང་ལ་ངོམ་པ་རང་མ་གནང་།།

                       ཟུར་མིག་གཡུ་སྦྲང་གི་གཤོག་རྩེ།།

                       དབང་མེད་དེ་ཕྱོགས་ལ་འཁོར་འགྲོ།

                       འོ་མའི་རྒྱ་མཚོ་ཞིག་བསྐྱིལ་ཡོད།།

                       མཚོ་མཐའ་མེ་ཏོག་གིས་བརྒྱན་ཡོད།།

                       ངང་ཆུང་འབབ་པ་རང་མ་གནང་།།

                       བབས་ནས་འཕུར་བློ་དེ་མི་འཁྲུངས།།

                       སྨིན་མའི་གཞུ་རྒྱུད་ལས་བསྐུལ་བའི།།

                       མིག་འཛུམ་མེ་ཏོག་གི་མདའ་མོ།།

                       གཞོན་པའི་སྙིང་ཁ་ལ་ཐེབས་ཚེ།།

                       དྲན་ཤེས་རང་དབང་ན་མི་འདུག།

                       ངས་ནི་ཕེབས་ཤོག་རང་མ་སྨྲས།།

                       ཁོས་ཀྱང་བཀའ་ཞུ་ཡང་མེད་མོད།།

                       ཇོ་ཇོ་གསང་སྟབས་ཀྱི་ཕེབས་ཏེ།།

                       སྙིང་གི་ཁང་ཆུང་དུ་འཛུལ་བྱུང་།།

                       དགའ་བའི་ཟུར་མིག་དེ་འཕྲད་པས།།

                       སེམས་པའི་ཕྱེད་ཀ་བཀུག་སོང་།།

                       དུང་བའི་སེམས་པ་དེ་ཕྲད་པས།།

                       ལུས་སེམས་གཉིས་མེད་དུ་ཤོར་སོང་།།

                       སྙིང་དབུས་སྒྲོལ་ཆུང་གི་སྦུབས་སུ།།

                       ན་ཆུང་གསང་བ་ཞིག་སྦས་ཡོད།།

                       ཚིག་གསུམ་མེ་ཏོག་གི་ལྡེ་མིག།

                       ཁྱོད་རང་གཅིག་པུ་ལ་གཏད་ཡོད།།

                       ཚལ་དཀར་གོང་བ་ཡི་ཁ་ནས།།

                       མིག་ཞགས་ལྷོད་ལྷོད་ཅིག་འཕངས་པས།།

                       དགའ་སྐྱོ་བརྩེ་དུང་གི་གཏན་ཚིགས།།

                       གཞོན་པའི་ལས་དབང་ལ་བྲིས་སོང་།།

                       ཨ་ཇོ་རྔོན་པ་ཡི་བུ་ཆུང་།།

                       ཁྱོད་ལ་སྙིང་རྗེ་ཞིག་མེད་ན།།

                       དབང་མེད་ལས་དེད་ཀྱི་ཤེའུ་ཆུང་།།

                       ང་ནི་བཤོལ་ཐབས་ཤིག་མི་འདུག།

                       དགའ་ཡང་རྣམ་གཡེང་དུ་མ་ཤོར།།

                       སྡུག་ཀྱང་མིག་ཆུ་རུ་མ་བཞུར།།

                       དྲན་ཤེས་གཤོག་དྲུག་གི་ཉ་མོ།།

                       དཀྱུས་རིང་ལྕགས་ཀྱུ་དེས་དྲངས་སོང་།།

                       ལམ་མདོའི་རྐུན་པོ་དང་ཕྲད་ཀྱང་།།

                       རིན་ཆེན་རྒྱན་ཆ་དེ་མ་ཤོར།།

                       སྙིང་གི་རྐུན་པོ་ཁྱོད་མཐོངས་བས།།

                       ལུས་སེམས་ཕྱེད་ཀ་དེ་བརྐུས་སོང་།།

                       སེམས་པ་རྗེས་སོང་གི་མི་དང་།།

                       གཏན་དུ་མཛའ་རྒྱུ་ཞིག་བྱུང་ན།།

                       ཡ་གིའི་ཞིང་ཁམས་ལ་མི་སྨོན།།

                       མ་གིའི་དམྱལ་བར་ཡང་མི་སྐྲག།

                       ཆུ་དང་འོ་མ་གཉིས་བསྲེས་པས།།

                       འོ་ཆུ་གཉིས་ཀ་རུ་གྱུར་སོང་།།

                       སེམས་དང་སེམས་པ་གཉིས་བསྲེས་པས།།

                       སེམས་པ་གཅིག་པུ་ལས་མི་འདུག།

                       ཁ་ལ་སྦྲང་རྩི་དེ་ཞིམ་པོ།།

                       སྣ་ལ་བཟང་སྤྲོས་དེ་ཞིམ་པོ།།

                       བཅོ་ལྔའི་ན་ཆུང་གི་སྙིང་ལ།།

                       དགའ་བའི་རོ་མངར་དེ་ཞིམ་པོ།།

                       གདུང་བའི་ཟུར་བག་དང་འགྲོགས་པ།།

                       ན་ཆུང་རྗེས་ཆགས་ཀྱི་བདེ་བ།།

                       ཅུང་ཟད་སྐྱུར་ཁ་དང་ལྡན་པ།།

                       བོད་པའི་ནས་ཆང་གི་རོ་མངར།།

                       རོ་མངར་འབྲས་བཟང་ཞིག་མེད་ན།།

                       མེ་ཏོག་ཟེའུ་འབྲུ་དེ་འཐོར་འགྲོ།།

                       ཁྲེལ་གཞུང་ཕྱི་ཐག་ཅིག་མེད་ན།།

                       ཞག་གསུམ་འཛུམ་ངོ་དེ་འགྱུར་འགྲོ།།

                       ཕར་དགའ་ཚུར་འཐད་ཅིག་མིན་ན།།

                       བཙན་པོའི་གཉེན་ཐག་དེས་མི་ཆོངས།།

                       ཁ་ཡ་ན་ཟླ་ཞིག་མིན་ན།།

                       ཆེ་སྐེར་ཆུང་འདོག་དེ་མི་མཛེས།།

                       ན་ཆུང་དགའ་ཕྱོགས་ཀྱི་སེམས་པ།།

                       ནམ་མཁའི་སྤྲིན་གསེབ་ཀྱི་ཟླ་བ།།

                       སྤྲིན་པ་གཅིག་གསེང་ནས་ཐོན་ཏེ།

                       སླར་ཡང་གཅིག་གསེང་ལ་འཛུམ་འགྲོ།།

                       རྒྱ་ལྕང་གྱེན་ཕྱོགས་སུ་སྐྱེས་ཀྱང་།།

                       འདབ་ལོ་ཐུར་ཕྱོགས་ལ་འཕྱང་སོང་།།

                       བཞིན་རས་ཚུར་ཕྱོགས་སུ་འཁོར་ཡང་།།

                       སེམས་པ་ཕར་ཕྱོགས་ལ་ཤོར་འདུག།

                       སྡེ་ཆེན་མི་ཁ་ཡི་གླེང་ཕྱོགས།།

                       སྟོན་ཁའི་དྲི་བཞོན་དང་འདྲ་བ།།

                       ན་ཆུང་བློ་རྩེ་ཡི་འགྱུ་ཕྱོགས།།

                       ལ་ཁའི་དར་ལྕོག་དང་འདྲ་བ།།

                       བླང་དོར་འོ་ཆུ་དེ་འབྱེད་ལ།།

                       ངང་བའི་ན་ཆུང་ཁོ་མཁས་ཀྱང་།།

                       བཅོས་འཛུམ་ཆུ་ནང་གི་ཟླ་གཟུགས།།

                       དུང་སེམས་པད་རྩ་རུ་འཁྲུངས་སོང་།།

                       རྒྱུས་མེད་ཞག་གསུམ་གྱི་བྱམས་པ།།

                       ཆུ་ལ་འཁྲུངས་པ་ཡི་མེ་ཏོག།

                       མི་བརྟན་ལྕུག་ལྕུག་ཏུ་གཡོ་བ།།

                       ཉ་མོའི་བྱེད་ལས་ཤིག་ཡིན་ནམ།།

                       སེམས་པ་འཇའ་ཚོན་གྱི་རི་མོ།།

                       ཚུར་ལ་འོང་ཐབས་དེ་དཀའ་ཡང་།།

                       མོས་འདུན་སྨུག་རླངས་ཀྱི་ན་བུན།།

                       ཕར་ལ་བཟློག་ཐབས་ཤིག་མི་འདུག།

                       སྐུ་ལུས་ཆུ་ཀླུང་གི་འབབ་རྒྱུན།།

                       ཟམ་མིག་གཅིག་འོག་ཏུ་ཚུད་ཀྱང་།།

                       སེམས་པ་ཆུ་འགོ་དང་ཆུ་རྔ།།

                       ལྷན་དུ་འཕྲད་ཐབས་ཤིག་མི་འདུག།

                       སེམས་དང་སེམས་པ་ཡི་མཐུན་ཕྱོགས།།

                       གཅིག་ཏུ་འདྲེས་པ་རང་མེད་ན།།

                       གོས་དང་གོང་བ་ཡི་འདབ་མ།།

                       འདྲེས་དང་མ་འདྲེས་རང་མི་འདུག།

                       མི་ཁ་སྨྱུག་རྒོད་ཀྱི་མདའ་མོ།།

                       ཕོ་རོག་ཤ་ཁྱེར་ལ་འབབ་ཀྱང་།།

                       ཕྲག་དོག་མདེའུ་ཡི་ཟེགས་མ།།

                       རྨ་བྱའི་སྒྲོ་ཐིག་ལ་བབ་བྱུང་།།

                       ཕོ་རོག་ཤ་ཁྱེར་གྱིས་ཉེས་སོང་།།

                       སྤྲེའུ་བྱ་ལག་གིས་ཕུང་སོང་།།

                       ང་དང་རྨ་བྱ་ཡི་བུ་མོ།།

                       མ་བཅོས་མཛེས་སྡུག་གིས་ལན་བྱུང་།།

                       ཡིད་སྨོན་ཁུ་བྱུག་གི་བུ་མོ།།

                       མི་ཡི་སྡོང་འགོ་རུ་བབ་ཚེ།།

                       ཁ་ནས་འཛུམ་འཛུམ་ཞིག་བཅོས་ཀྱང་།།

                       ཁོག་ལ་དགའ་དགའ་རང་དཀའ་འདུག།

                       ན་ཆུང་མཛའ་མཐུན་གྱི་ཕྱི་ཐག།

                       ནོར་བུ་ཐང་རྙེད་ཀྱི་རྨི་ལམ།།

                       ལན་གཅིག་ཆད་པ་ཡི་འཕྲོ་ལ།།

                       སླར་ཡང་མཐུད་ཐབས་དེ་དཀའ་མོ།།

                       སྡོང་ལོ་སྡོང་འགོ་རུ་མ་བསྡད།།

                       སྡོང་ལོ་ཆུ་ཕྲན་དུ་བབ་སོང་།།

                       ཆུ་ཕྲན་རླབས་རྗེས་དེ་ཟིན་ན།།

                       རླབས་རྗེས་དེད་པ་ལ་ཅི་སྐྱོན།།

                       གཞོན་པའི་དུང་སེམས་ཀྱི་ལས་ལ།།

                       ཆགས་སྡང་དེ་ཙམ་ཞིག་མི་དགོས།།

                       མཛའ་མཛའ་དུང་དུང་གིས་འགྲོགས་ཏེ།།

                       དགའ་དགའ་འཛུམ་འཛུམ་གྱིས་གྱེས་འགྲོ།།

                       བསྐྱངས་པའི་བུ་ལོན་དེ་མ་ཆད།།

                       ཤ་རུས་ཁྲག་རྒྱུན་གྱིས་མ་འབྲེལ།

                       ཁྱོད་དང་འུ་གཉིས་ཀྱི་འབྲེལ་ཐག།

                       ཕར་དགའ་ཚུར་འཐད་ཀྱི་མདུད་པ།།

                       བརྩེ་མདུད་རང་ཞིག་ཏུ་གྱུར་ཏེ།།

                       རང་རང་སོ་སོ་རུ་གྱེས་ན།།

                       ཕར་ལ་ཁྲམ་པ་དེ་མི་ཟེར།།

                       ཚུར་ལ་ཁྲེལ་མེད་ཀྱང་མ་གསུངས།།

                       སྙིང་གི་ཤིང་ལོ་ཡི་ངོས་ལ།།

                       དགའ་བའི་ཡིག་འབྲུ་ཞིག་བྲིས་ཡོད།།

                       ཤིང་ལོ་རླུང་བུ་ལ་སྐུར་ཉིན།།

                       ང་ཡི་ཡི་གེ་དེ་གསུབས་རོགས།།

                       རྔོག་མའི་སྤྲིན་ཕུང་གི་འདབས་སུ།།

                       ཚེ་ལྷའི་སྲུང་མདུད་ཅིག་ཐོགས་དང་།།

                       རྟ་ཕོ་གཞན་དབང་དུ་གྱུར་ཡང་།།

                       སྲུང་མདུད་སྒ་འོག་ཏུ་མི་གཏོང་།།

                       འཇིག་རྟེན་འདུ་འབྲལ་གྱི་ཞིང་ན།།

                       གཏན་དུ་འཛོམས་པ་དེ་དཀའ་མོ།།

                       སྙིང་ནས་ལན་གཅིག་ལ་འགྲོགས་དང་།།

                       བྲལ་ཡང་འགྱོད་པ་དེ་མི་འདུག

                       ཚིག་གསུམ་སྐད་ཆ་ཞིག་ཡོད་ཀྱང་།།

                       མགྲིན་ལ་མཆི་མ་ཡིས་བརྣངས་སོང་།།

                       གོམ་གསུམ་སྐྱེལ་མ་དེ་བྱེད་ལ།།

                       མ་ཕེབས་གསུང་བ་རང་མ་གནང་།།

                       ལོ་སྒུག་ཟླ་སྒུག་དེ་མ་གསུངས།།

                       དབུ་མནའ་བཞེས་པ་མང་མི་དགོས།།

                       བུ་ཕོ་ས་མཐའ་རུ་འགྲོ་ལ།།

                       གོམ་གསུམ་སྐྱེལ་མ་ཞིག་གནང་རོགས།།

                       མྱ་ངན་སྡུག་ཡུས་ཀྱི་མིག་ཆུ།།

                       འགྲོ་ཁའི་སྙིང་སྡུག་ལ་མ་སྟོན།།

                       དྲན་པའི་མེ་ལོང་གི་ངོས་སུ།།

                       འཛུམ་པའི་ཞལ་རས་དེ་འགོད་རོགས།།

                       ཕྲད་པའི་འཛུམ་དཀར་གྱི་སྦྲང་ཆང་།།

                       མཉམ་པས་བཞེས་རོགས་ཤིག་གནང་དང་།།

                       བྲལ་བའི་སྐྱོ་གདུང་གི་མིག་ཆུ།།

                       རང་རང་སོ་སོ་ནས་འཐུང་ཆོག།

                       ང་རང་བྱེས་སོང་གི་རྗེས་ལ།།

                       སྤྱན་ཆབ་གཏོང་བ་རང་མ་གནང་།།

                       ཁྲེལ་མེད་འཁྱམ་པོ་ངའི་དོན་ལ།།

                       སེམས་པ་དཀྲུག་རིན་ཞིག་མི་འདུག།

                       ཧ་ལོའི་མེ་ཏོག་གི་འདབ་མ།།

                       ལྷོ་སྤྲིན་མིག་ཆུ་དེ་འགྲིལ་ཚེ།།

                       ད་ནངས་སྐྱེལ་ཐུང་ལ་ཕེབས་པའི།།

                       བུ་མོའི་ཞལ་རས་དེ་དྲན་བྱུང་།།

                       སྤྲིན་པ་ཐར་ཐོར་གྱི་གསེབ་ན།།

                       ཟླ་བ་ཁེར་འགྲོས་དེ་མཐོང་ཚེ།།

                       མི་ཡུལ་སྡེ་མཐའ་རུ་ཕྱིན་པའི།།

                       ཆུང་གྲོགས་བུ་མོ་དེ་དྲན་བྱུང་།།

                       ཞར་རས་མེ་ཏོག་གི་འདབ་མ།།

                       མིག་ཆུའི་ཟིལ་བ་ཡིས་བརླན་ཏེ།།

                       མ་བརྗེད་ལན་གསུམ་དུ་གསུངས་པ།།

                       དྲན་ན་ཚུགས་ཐབས་ཤིག་མི་འདུག།

                       བཅོ་ལྔའི་དུང་ཟླ་དེ་ཤར་ཚེ།།

                       ཉིན་མོའི་སྣང་བ་དང་འདྲ་ཡང་།།

                       བྱམས་པའི་ཞལ་རས་དེ་དྲན་ན།།

                       སེམས་ལ་མུན་པ་ཞིག་འཐིབ་ཡོང་།།

                       ཞལ་ངོ་མ་མཐོང་ཡང་ཆོག་གི།

                       གསུང་ངག་མ་ཐོས་ཀྱང་ཆོག་གི།

                       ནང་གི་དུང་སེམས་ཀྱི་སྐུད་པ།།

                       དུམ་བུར་ཆོད་ཐབས་ཤིག་མི་འདུག།

                       སྐུ་ལུས་ཚིགས་དྲུག་གི་སྨྱུག་མ།།

                       ལྷོ་རོང་ནགས་གསེབ་ན་ཡོད་ཀྱང་།།

                       ཞལ་རས་མེ་ཏོག་གི་འདབ་མ།།

                       ང་ཡི་སྙིང་ཁ་རུ་བཞད་འདུག།

                       ཨ་ཇོའི་ཚིག་གསུམ་གྱི་གསང་གཏམ།།

                       སྙིང་གི་མཚོ་གཏིང་དུ་སྦས་ཡོད།།

                       མཚོ་ལ་བྲི་བ་རང་མེད་ན།།

                       ཚིག་ལ་བོར་བ་དེ་མི་སྲིད།།

                       དྲན་བྱུང་སྙིང་སྡུག་དེ་དྲན་བྱུང་།།

                       དགོད་པའི་ཟུར་མིག་དེ་དྲན་བྱུང་།།

                       དྲན་བྱུང་དགའ་ལོ་དེ་དྲན་བྱུང་།།

                       འཛུམ་པའི་མཛེས་ཀོང་དེ་དྲན་བྱུང་།།

                       ཡིད་འོང་ན་ཆུང་གི་ལང་ཚོ།།

                       ཆུ་བོའི་ཕར་ཚུར་དུ་ལུས་ཀྱང་།།

                       དྲན་སེམས་སྤྲིན་དཀར་གྱི་དུམ་བུ།།

                       ཆུ་བོའི་མཐོངས་དབྱིངས་ནས་འཕུར་སོང་།།

                       དུང་ཤོག་དཀར་པོ་ལ་ཕབ་པའི།།

                       དྲན་པའི་རི་མོ་དེས་མ་ཡིན།།

                       མིག་ཆུས་བརླན་པ་དེ་མཐོང་བས།།

                       ཤུགས་རིང་ལན་གསུམ་དུ་ཤོར་སོང་།།

                       ཁྱོད་རང་བྱང་ལམ་ནས་ཕེབས་ཤིང་།།

                       ང་ཡང་ལྷོ་ལམ་ནས་འོངས་མོད།།

                       ལམ་བུ་སྣེ་འཛོལ་རང་བྱུང་བ།།

                       ལས་དང་སྐལ་བ་ཡིས་ལན་འདུག།

                       འཇོ་སྒེག་སྔ་ས་ན་འདུག་ཅིང་།།

                       དུང་བ་སྔར་ལས་ཀྱང་ལྷག་མོད།།

                       གསང་གཏམ་སྨྲ་ཤེས་ཀྱི་སྤྱན་ལ།།

                       སྔར་གྱི་གྲུང་ཉམས་དེ་མི་འདུག།

                       ཤྭ་རྭ་སྨུག་པོ་དེ་བསམ་ནས།།

                       གཞུ་རྒྱུད་ལྷོད་ཐག་ནི་མ་ཆོད།།

                       ཤ་བ་འདྲོག་སྙམ་གྱིས་དོགས་ཏེ།།

                       མདའ་མོ་འཕེན་ཐག་ཀྱང་མ་ཆོད།།

                       བུ་མོའི་བསླད་མེད་ཀྱི་བརྩེ་དུང་།།

                       ལོ་བསྙལ་ཟླ་བསྙལ་གྱི་རྒུན་ཆང་།།

                       ཨ་ཇོ་ཁྲེལ་ཡོད་ཅིག་མིན་ན།།

                       ཆང་ཕུད་བཞེས་པ་རང་མ་གནང་།།

                       ཁྱོད་ནི་ཨ་གར་གྱི་ལྗོན་པ།།

                       ང་རང་མེ་ཏོག་གི་འཁྲི་ཤིང་།།

                       སྐྱེ་བ་ལན་གཅིག་གི་ཚེ་འདིར།།

                       སོ་སོར་དབྱེ་ཐབས་ཤིག་མི་འདུག།

                       དུང་སེམས་དར་དཀར་གྱི་ཁུགས་པར།།

                       སྨོན་ལམ་རྒྱ་མདུད་ཅིག་ཕབ་སྟེ།།

                       ཁྱོད་ཀྱི་ཕྱག་སོར་ལ་གཏད་ཡོད།།

                       བུ་མོའི་ལས་དབང་ལ་ཁྱོད་མཁྱེན།།

                       ཁྱོད་རང་འཇིག་རྟེན་འདིར་བཙལ་ནས།།

                       མི་ཚེ་ཕྱེད་ཀ་དེ་ཡོལ་ཐལ།།

                       ཁྲེལ་མེད་ཁྲམ་པ་ཞིག་ཡིན་ཀྱང་།།

                       ད་ནི་འགྱོད་སེམས་དེ་མེད་དོ།།

                       རང་བློ་དབང་ཆེན་དུ་བྱས་ཡོད།།

                       བློ་ཕུགས་བརྩེ་དུང་ལ་བཅོལ་ཡོད།།

                       སྐྱིད་ན་དཀོན་མཆོག་གི་བྱིན་རླབས།།

                       སྡུག་ན་སྔོན་ལས་ཀྱི་བསྐོས་ཐང་།།

                       འཇིག་རྟེན་སྐྱིད་སྡུག་གི་ཞིང་འདིར།།

                       བུ་མོའི་སེམས་པ་ཡི་གཏད་སོ།།

                       ཁྱེད་རང་གཅིག་པུ་ལས་མེད་ན།།

                       ང་ལ་བྱམས་བརྩེ་དེ་མ་ཆུང་།།

                       ན་ཆུང་བློ་རྩེ་ཡི་སྲབ་མཐུར།།

                       འཐེན་ཤེས་ལྷོད་ཤེས་ཤིག་དགོས་ཀྱི།།

                       ལྕག་གཞུ་ཡོབ་རྡུང་ལ་བརྟེན་ན།།

                       སྒ་ལོག་སྟན་འགྱུར་ཞིག་ཡོང་ངོ་།།

                       གཏན་གྲོགས་མཛའ་མོ་ཡི་སེམས་རྒྱུད།།

                       དབྱངས་ཅན་པི་ཝང་གི་སྐུད་པ།།

                       བྱམས་སྐྱོང་ཕྱག་སོར་གྱིས་སྐུལ་དང་།།

                       བདེ་སྐྱིད་རོལ་མོ་དེ་འཁྲོལ་ཡོང་།།

                       ཟླ་བ་ནག་ཕྱོགས་ལ་ཕེབས་འགྲོ།།

                       མེ་ཏོག་སྟོན་དུས་སུ་ལྷུང་འགྲོ།།

                       ནམ་ཡང་བྲི་གང་དེ་མེད་པ།།

                       ན་ཟླའི་བརྩེ་དུང་གི་ཞལ་རས།།

                       གསུང་ལ་ལན་གཅིག་ལ་ཉན་ཆོག།

                       ཐུགས་དང་ལན་གསུམ་དུ་བསྟུན་ཆོག།

                       ཐམས་ཅད་ན་ཆུང་དང་བསྟུན་ན།།

                       སྲབ་མཐར་རང་མགོ་ལ་འཁོར་ཡོང་།།

                       ཞིམ་མངར་རྒུན་ཆུང་གི་རྗེས་ལ།།

                       དྲན་ཤེས་མཐུར་ཡན་དུ་མ་གཏོང་།།

                       ན་ཆུང་འཛུམ་དཀར་གྱི་ངོ་ལ།།

                       མི་ཚེ་དོན་མེད་དུ་མ་གཟོན།།



དྲྭ་ཚིགས་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན།
བཤེར་གྲངས།
mjcq བཤེར་གྲངས་ཁ་སྐོང་བྱོས། ཡིག་འབྲི་བཞི་ལས་མང་མི་རུང་། ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་། ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།    
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
15095984
དྲ་ཚིགས་བཟོ་སྐྲུན།
 
འབྲེལ་གཏུག་བྱ་ཡུལ།   ཁ་པར།  15283703999 13909418876 QQ:516617821    E-mail:tbmgar@163.com
པར་དབང་བཙན་པོའི་མགར་གྱི་དྲ་བ་ལས་གཞན་ལ་མེད།
网站备案号:蜀ICP备13002975号