གསོན་པོ།
རྟ་ཕོ་ང་རས་ཞོན་ན།།
བདེ་མོའི་ཐང་ཞིག་ཡོད་དམ།།
མི་ཚོགས་ཁྲོམ་རའི་ནང་ན།།
ལྷ་སྐུ་མཇལ་རྒྱུ་ཡོད་དམ།།
དགུང་གི་སྐར་མའི་ཁྱིམ་ན།།
བདེ་སྤྲོད་ལྷང་ལྷིང་ཡོད་དམ།།
མཚན་མོའི་སྨག་རུམ་དབུས་ན།།
གཅན་གཟན་འཇིགས་པོ་ཡོད་དམ།།
དགུན་ཟླ་རིང་མོའི་མཇུག་ན།།
གཉོམ་པོའི་ལུས་ཤིག་ཡོད་དམ།།
དབྱར་ཟླ་གསུམ་པའི་སྒང་ལ།།
སྦྲ་མས་གཤོག་འགྱུར་ངོམ་མམ།།
རི་བོ་ཆེན་པོའི་རྒྱབ་ན།།
རེ་བའི་གསོན་ཤུགས་ཡོད་དམ།།
ལུང་ཀོག་སྐམ་པོའི་ནང་ན།།
ཡན་ལག་ཆུང་ག་ཚོད་ཡོད་དམ།།
ཕར་ཕྱོགས་ནགས་རིའི་ཀླུང་ན།།
བྱེའུ་ཆུང་གྲེ་འགྱུར་ཡོད་དམ།།
རྩྭ་ལོ་རླུང་གིས་སྒུལ་དུས།།
སྲོག་གི་གཞི་རྟན་ཡོད་དམ།།
འུར་མགོ་མཐོ་བའི་ཁྭ་ཏ།།
གདོན་གྱིས་བསླུས་པ་ཡིན་ནམ།།
མགྲོན་པོའི་འགྲུལ་བཞུད་བར་ན།།
རྣམ་རྟོག་ག་ཙམ་སྦས་ཡོད།།
བུ་མོའི་འཛུམ་ཆུང་གྲོལ་དུས།།
འཇིག་རྟེན་སྣང་བ་ཡོད་དམ།།
གོས་དཀར་ཚར་བུའི་ཁུག་ན།།
འཁོར་བའི་ཞེན་ཐག་ཡོད་དམ།།
ལྕི་འདམ་རྫོབ་པོའི་དབུས་ན།།
སྲང་ཆུང་ལང་ཚོ་བསྐུངས་ཡོད།།
རྨི་ལམ་ནང་གི་གནས་ཡུལ།།
ཞེ་སྡུག་འཇོག་ས་ཡིན་ནམ།།
སྐར་མས་ཁྲེལ་དགོད་གནང་བ།།
སིལ་མའི་སྒྲ་དག་ཡིན་ནམ།།
ཁ་ཁུ་སིམ་པའི་འགུལ་སྤྱོད།།
འཇིག་རྟེན་སྣང་བ་ཡིན་ནམ།།
ཟླ་བ་དཀར་པོའི་ངོགས་ན།།
ཆུང་འདྲིས་བྱམས་པ་ཡོད་ན།།
བརྩེ་བའི་མཚོ་མོ་འཁྱིལ་ས།།
རང་སེམས་གྲུ་བཞི་ཡིན་ནམ།།
གླིང་བཞི་སྐོར་བའི་བུ་ལོ།།
འཁྱམས་པོ་ལྡོམ་པོ་ཡིན་ནམ།།
ཞབས་རྗེས་རི་ལ་བཞགས་ན།།
བྱ་ཚོགས་གྲོགས་སུ་བསྡོང་ངམ།།
ང་རས་ཁྲེལ་དགོས་གནང་ས།།
མཐོན་པོའི་ཁྲི་དེ་ཡིན་ནམ།།
འཛུམ་པའི་སོར་མོ་གཏུགས་ས།།
རིགས་མཐུན་གྲོགས་དག་ཡིན་ནམ།།
ཁ་བ་མཐུག་པར་བསམ་ན།།
དགུན་ཁར་འཇིགས་དགོས་མི་འདུག།
རང་སེམས་རྡོ་དང་འདྲ་ན།།
ཕོ་བྲང་ང་རས་བཞེངས་ཆོག
༢༠༡༡ལོའི་ཟླ༦པའི་ཚེས༢༣དགོང་མོ་རང་ཤག་ཏུ་སྦྱར།
| 