རྐང་བ་མེད་པས་བགྲོད་ལམ་མི་རྙེད་ཅིང༌།།
ཨོང་ཏོ་མེད་པས་སྡོད་སྟངས་མི་ཤེས་པ།།
མྱ་ངན་མགོ་ལ་ཁུར་བའི་རིགས་མཐུན་ཚོ།།
སྐྱོ་སྐྱོ་མ་གནང་ཁྲག་གི་སྙན་ངག་འབྲི།།
བཙན་དུག་ནག་པོ་ཁྲག་ལ་མ་འདྲེས་ཤིང༌།།
ཡ་རབས་ཞེ་ས་ཁ་ལ་མ་བྱང་ཡང༌།།
འོ་མ་ལྟ་བུའི་སེམས་ཁམས་འུ་ཚོར་ཡོད།།
ཞིམ་མངར་མར་ལོ་ལྟ་བུའི་སྙན་ངག་འབྲི།།
འདྲེན་པའི་མགོ་བོ་ལྷ་ཡིས་མ་བྱིན་ཞིང༌།།
མཁོ་བའི་སྐྱོར་མ་སུ་ཡང་མ་རག་ཀྱང༌།།
བྱང་ཁོག་སྟོད་ན་སྐྱོ་སྡུག་ཁུར་དུ་ལྩི།།
ཁྲག་མཚོ་ལུད་པ་ལྟ་བུའི་སྙན་ངག་འབྲི།།
ལྟེ་བའི་རཀ་ཏ་འཕོས་པའི་གནས་ཡུལ་བརླག།
དྲོན་པོའི་བྱམས་བརྩེ་སྟེར་བའི་འཇུ་ཐག་བྲལ།།
འཚོ་བའི་དམིགས་ཡུལ་འཇའ་ལྟར་ཡལ་ན་ཡང༌།།
རང་སེམས་དྲོད་ཀྱིས་གསོ་བའི་སྙན་ངག་འབྲི།།
ངལ་ཅིང་དུབ་པས་གོམ་པའི་འདེགས་འཇོག་འཆོལ།།
བཀྲེས་ཤིང་ལྟོགས་པས་ཤ་ཟད་རུས་ལ་ཐུག།
ས་མཐའི་སུལ་དུ་འཚོ་ཐབས་བྲལ་ན་ཡང༌།།
ཕ་མའི་སེམས་ཁ་བདེ་བའི་སྙན་ངག་འབྲི།།
སྲིད་ཀྱི་གར་སྟེགས་ཡ་གིའི་དབྱིངས་ན་མཐོ།།
དབང་གི་རྒྱལ་བོ་རྟག་པའི་ཁྲི་ལ་བརྗིད།།
ནུས་མེད་ཞ་འཐེང་ལྟ་བུའི་རིགས་མཐུན་ཚོ།།
རྒུམ་ན་ཆོག་པ་བདག་མེད་སྙན་ངག་ཡིན།།
དབང་གི་ལྕགས་རི་མཐུག་པོའི་ཚུར་རོལ་ན།།
དངུལ་གྱི་མཛོད་ཁང་སྣུམ་པོའི་ཕ་རོལ་ཏུ།།
ཆེན་པོ་སུས་ཀྱང་སྙིང་བོ་མ་མཐོང་བ།།
གདུང་ཚོར་ནག་པོ་བཞུར་བའི་སྙན་ངག་ཡིན།།
རེ་བའི་ཤུགས་ཀྱིས་རྒྱ་མཚོའི་རླབས་ལྟར་སྐྱོམ།།
དུང་སྣང་སྐྱེན་པོས་ལོ་རྒྱུས་རྫ་གོག་སྐྱོར།།
ངོ་སོ་མེད་པའི་ངལ་དུབ་མཐའ་སྣེ་འདིར།།
ཆག་གྲུམ་སེམས་པ་སྦྱར་བའི་སྙན་ངག་འབྲི།།
མཁའ་ཡི་སྐར་ཚོགས་ཐང་གི་རྡོ་ལེབ་སོགས།།
ཆོས་ཉིད་བདག་པོ་མེད་པའི་གཤིས་ཉམས་འདི།།
སུས་ཀྱང་ཚོར་བའི་གྲོགས་སུ་སྦྲན་ཆོག་པས།།
འཇིགས་སྣང་མ་སྐྱེས་འདི་ལ་བདག་པོ་མེད།།
བྱང་གི་གྲང་རླུང་ལྷོ་ཡི་མཐའ་ན་རྩུབ།།
འུ་ཅག་གཅེར་བུའི་རིགས་འདི་ཤིན་ཏུ་གྲང༌།།
ཁ་ཡི་དུང་སོ་འཐམ་པའི་འདར་སིག་ངང༌།།
ཧྲུག་གྲུམ་སྙིང་རྩ་ཐོར་བའི་སྙན་ངག་འབྲི།།
བླ་མ་ཁྲི་ལ་རྩོད་པའི་ཡང་སྲིད་ཡོད།།
དཔོན་པོའི་དབང་ལ་བདག་པའི་མི་རྒྱུད་འདུག།
འུ་ཚོར་དབང་བ་སེམས་ཀྱི་སྐྱོ་སྡུག་ཡིན།།
ས་སྲོད་མུན་པ་ལྟ་བུའི་སྙན་ངག་འབྲི།།
ལུག་གི་མིག་ལ་ར་སྐྱེས་རྒྱ་བོར་སྣང༌།།
རང་གི་སེམས་ལ་གཡང་མོ་ལུག་ཆུང་སྟེ།།
ར་ལུག་གང་གི་གྲལ་དུ་མི་སྙོག་པ།།
འུ་ཚོས་ས་མཐའ་འདི་ནས་སྙན་ངག་འབྲི།།
༢༠༠༢ལོའི་ཟླ༡༢པའི་ཚེས༣༡ཉིན།
<<གདོན་འཕྲུལ་ལྟ་བུའི་བཟི་ཁ>>ལས།
