གནའ་སྔ་མོ་ཡུལ་ཀ་ཤི་ཞེས་བྱ་བའི་ནགས་ཚོགས་སྟུག་ལ་ཤིན་ཏུ་ཉམས་དགའ་བའི་གནས་ཤིག་ན། སྲོག་ཆགས་གོང་མ་སྲེག་དང་། རི་བོང་། སྤྲེའུ། གླང་ཆེན་བཅས་གནས་ཡོད།  

དེ་རྣམས་ཕན་ཚུན་ཡིད་གཅུགས་ཤིང་བདེ་སྐྱིད་ཀྱི་འཚོ་བ་ལ་ལོངས་སུ་སྤྱོད་པའི་སྐབས་དེར། སྲོག་ཆགས་བཞི་པོས་རང་ཅག་བདེ་ཞིང་སྐྱིད་པ་འདིའི་ཐོག་ང་ཚོས་རྒན་རབས་ལ་བཀུར་བ་དང་། གཅིག་ཕན་གཅིག་གྲོགས་འཇིག་རྟེན་གྱི་མིག་དཔེར་འོས་པ་ཞིག་ཡོང་ཐུབ་པ་ལ་འབད་རྒྱུའི་བཟང་པོའི་གྲོས་ལ་ཞུགས་ཏེ་མཐར་སུ་རྒན་པ་དང་།   སུ་གཞོན་པའི་གནས་ཚུལ་བརྟག་དཔྱད་བྱ་རྒྱུར་མོས་མཐུན་བྱུང་། ཐོག་མར་བྱ་གོང་མ་སྲེག་གིས་ནེ་གྲོ་རྡའི་ཤིང་སྡོང་ཞིག་བསྟན་པར།   གླང་ཆེན་གྱིས་བདག་དང་པོ་ལམ་འདི་བརྒྱུད་ནས་འགྲོ་སྐབས་ཤིང་འདི་བདག་གི་ལུས་ཚད་དང་མཉམ་པ་ཞིག་མཐོང་བྱུང་ཞེས་བཤད།  དེ་ནས་སྤྲེའུས་བདག་གནས་འདིར་སླེབས་སྐབས་ཀྱང་ཤིང་འདིའི་རིང་ཚད་བདག་གི་ལུས་དང་མཉམ་པ་འདུག་ཅེས་བཤད། དེ་ནས་རི་བོང་གིས་བདག་འདིར་སླེབས་སྐབས་ཤིང་འདི་སྐྱེས་ནས་ལོ་མ་གཉིས་ཙམ་ཡོད་པའི་སྟེང་གི་ཟིལ་པ་བལྡགས་པ་ཡིན་ཞེས་སྨྲས། མཐར་བྱ་གོང་མ་སྲེག་གིས་བདག་གིས་འདིའི་ས་བོན་བཟས་ནས་སྟུག་པ་བཏང་བ་ལས་ཤིང་འདི་སྐྱེས་པ་རེད་ཅེས་བཤད།

སྲོག་ཆགས་བཞི་པོས་རང་གནས་འདིར་ཐོག་མ་སླེབས་ཀྱི་གནས་ཚུལ་གསོང་པོར་སྨྲས་པས། དེ་རྣམས་ཀྱི་རྒན་གཞོན་གྱི་གོ་རིམ་བྱུང་བ་དེས་སྔར་བས་ཕན་ཚུན་མཛའ་གཅུགས་དང་ཞེ་སར་བཅས་པའི་རྒན་གཞོན་བཀུར་བསྟི་དང་། ཐ་ན་ཕར་ཚུར་འགྲོ་སྐབས་ཀྱང་གླང་པོ་ཆེ་ལ་སྤྲེའུ་དང་། དེ་ལ་རི་བོང་། རི་བོང་ལ་གོང་མ་སྲེག་བཞོན་ནས་འགྲོ་བས་ཡུལ་དེའི་མི་རྣམས་སྲོག་ཆགས་བཞི་པོ་དེའི་ལེགས་བྱས་ཀྱི་དཔལ་ལ་ཡི་རང་ཞིང་དེ་ལྟར་སྤྱོད་པས་ས་ཀུན་ཏུ་ཆར་ཆུ་དུས་སུ་འབེབ་པ་དང་།ལོ་ཕྱུགས་རྟག་ཏུ་ལེགས་པ་སོགས་བཀྲ་ཤིས་དགེ་མཚན་གྱིས་ཁྱབ་པ་བྱུང་ཞེས་གྲགས་འདུག་གོ །

མཐུན་པ་སྤུན་བཞི།
Four Dutiful Friends
和气四瑞
1.བྱ་གོང་མ་སྲེག thrush 半角鸡
2.རི་བོང་། hare 山兔
3.སྤྲེའུ། monkey 猴子
4.གླང་ཆེན། elephant 大象