ལམ་འགྲམ་དུ་མཚོ་མོ་སྒྱུད་ལུག་གིས་བཅངས་ཤིང་དེའི་ནང་གི་སྲིན་འབུའི་གཤོག་པ་དང་རྭ་ཅོ། ད་དུང་དུག་གསུམ་
གྱིས་ཕྱུག་པའི་བདག་གི་མ་ཡུམ་དཀར་མོ་གཉིད་དུ་ཡུར་ཡོད་ཚེ། ཕོ་རོག་གི་ཏུག་པ། ཁ་ཏའི་རྭ་མཆུ། སེང་གེ་ཡི་མིག་ཆུ། ཧ་
ཅང་མཁོས་ཆུང་ལ་ཉམས་ཞན་པའི་ཁ་ལུད་དག་ངར་ལྕགས་སུ་སྦྱོང་ནས་རལ་གྲི་ཅིག་བཟོ་ངེས། རལ་གྲི་དལ་མོར་གཡུག་
བཞིན་གཙང་བོའི་སེམས་སྒྲར་ཉན་ངེས་ལ། རལ་གྲི་ཤུགས་ཀྱིས་གཡུག་བཞིན་དཔའ་བོའི་ཁྲག་དྲིར་སྣུམ་ངེས།
འགྲོ་ཡ་འགྲོ ཟུང་ཟད་པའི་ཤིང་སྐམ་གྱི་ལག་པ་བདག་གི་སྡོངས་གྲོགས་ཡིན། དུར་ཐང་གི་རུས་སྒྲོམ་རླུང་
གིས་སྒུལ་ཞིང་ཤེས་རབ་ཞ་འཐེང་དུ་གྱུར་བའི་སང་ཉིན་དང་ཞོགས་པ་དུས་ཚོད་ཀྱིས་སྲེགས་དུས། འགྲོ་ཡ་འགྲོ། དོ་དགོང་
ང་ཁོ་ན་རྒྱམ་མཚོ་སྐམ་བྱེད་པའི་མེ་ལྕེ་སྔོན་པོ་དེ་ཡིན།
ངའི་གདོང་། ངའི་བྱིས་པ། ངའི་སྙན་ངག སྐྱེ་རབས་བཅོ་བརྒྱད་ཀྱི་ཡུགས་ས་མའི་རོལ་དབྱངས། ཐ་དག་གི་ཐ་དག་
དོ་དགོང་བདག་སྒུལ་ཞིང་འཕྱོ་བྱེད་ཀྱི་སྐུད་པ་རིང་མོ་དེ་ཡིན་ལ། དུག་འཐུང་པས་མ་ཡུམ་སྔ་མོ་ནས་འདས་ཀྱང་། ཐལ་བབས་
པས་གཤོག་པ་སྔ་མོ་ནས་རལ་ཡང་། ངས་རང་ཉིད་གསོན་དུར་བྱེད་དོན་གཏན་ནས་མེད། ༼ང་མ་ཤི་གསོན་དུར་བྱས་པར་
གཏན་ནས་མི་འཐད༽།
ལྟོས་དང་མུན་པའི་ཁ་དང་ལྕེ། སྦྲུལ་གྱི་མཆེ་བ་དང་སྤྱང་ཀིས་འདུར་རྒྱུགས། རི་བོ་གྱེན་དུ་འབར་ནས་ཤེས་རབ་
ཀྱི་སྒེའི་ཁུང་གནོན་གྱིན་འདུག ཆུ་མོ་ཐུར་དུ་བཞུར་ནས་དམྱལ་ཁམས་ཀྱི་བརྩིགས་པ་ཞིག་གིན་འདུག ད་ནི་སྙན་
ངག་གི་མཆོད་པ་དང་པོ་ཕུལ་རན། ད་ནི་སྒྱུ་རྩལ་གྱི་གཤོག་པ་ལྕགས་ཐུམ་ལས་གྱེས་རན།
རྡོ རྡོ རྡོ
རྡོ་ནག་པོ རྡོ་དཀར་པོ རྡོ་དམར་པོ
འཁོར་བ་སྤྱི་འགྲོས་ཀྱིས་འཁོར་ཞིང་དུས་ཚོད་དུད་དྲག་གིས་འགག་གིན་འདུག འགྲོ་ཡ་འགྲོ། དུས་ཚོད་ཞི་དུལ་གྱིས་
བགྲོད་དུས་འཆི་བ་དངངས་འཚབ་ཀྱི་འོང་གིན་འདུག
དུས་ཚོད་བདེན་ལུགས་ཀྱིས་བཞུར་དུས འཇའ་མཚོན་ཁངས་སྐྱ་ཡིས་སུབ་ཀྱིན་འདུག འགྲོ་ཡ་འགྲོ ང་རང་
འདི་ལྟར་བུད་འགྲོ། དུས་ཚོད་རྗེས་སུ་དྲུད་ནས་དམྱལ་ཁམས་སུ་ཆས་འགྲོ། འགྲོ་ཡ་འགྲོ དུས་ཚོད་སྔོན་བཞག་སྟེ་
ལམ་བར་ནས་འཆི་ཆོག