བརྩེ་བ་སྦས་པས་ཟུག་རྔུ་གསོན་པོ་ཞིག །
ཤེལ་དཀར་འདྲེན་པའི་གདོང་པ་རྫ་ལ་གཏད། །
བཅུད་འཛིན་བདུད་རྩིས་གཏམས་པའི་ངལ་དུབ་ཀྱིས།
།
དྲན་པའི་གདུང་དབྱངས་གངས་ཆར་ཀློང་དུ་ཟག །
ཨ་མའི་འོ་མ་ཉུལ་བའི་བེའུ་ཆུང་ཞིག །
རྩེ་གར་འཁྲབས་པའི་སེམས་པ་འདམ་ལ་ཟུག །
སྨུག་པའི་ལ་བ་གྱོན་པའི་ལྷས་འདབ་ན། །
འཆར་རྟོག་རིང་མོའི་ཟིན་ཐོ་ཡང་ཡང་བཀོད། །
གློག་གིས་ཟི་ར་གཏོར་བའི་རྫ་ཟུར་ནས། །
དྲེད་མོང་ཁམ་པའི་ཟུར་མིག་ལྷས་ལ་སྲིང་། །
ཆར་མུན་ཁྲོད་དུ་ཡིབས་པའི་སྦྲ་ནག་ལ། །
སྒོ་ཁྱིས་སྐོར་ཞིང་ཟུག་པ་འཇིགས་སུ་རུང་། །
འཁྲིག་བདེའི་རོ་བཅུད་དྲན་པའི་ན་ཆུང་མས། །
སྒོ་ཁྱིའི་མགོ་བོར་འོ་རྡོའི་དབང་ཆེན་བསྐུར། །
གཅན་ཟན་ཁམ་པ་ཞིག་གི་མཆན་འོག་ནས། །
ཉམ་ཆུང་གཡང་དཀར་ལུག་གིས་གྱེས་ཚིག་འདོན། །
རྫ་ནག་གསེར་ཞུ་གྱོན་པའི་རི་འདབས་ན། །
རླངས་པ་འཐུལ་བའི་ལུག་མགོ་རློན་པ་ཞིག །
ཞོགས་སྨུག་འཇའ་གུར་འཁྱིལ་བའི་བར་སེང་ནས། །
བྱ་རོག་བགྲེས་པོས་མ་ཎི་རླུང་ལ་བསྐུར། །
ཞི་བའི་བསྟི་གནས་བཙལ་བའི་སྤྲང་བོ་ང་། །
རྒྱུ་མའི་གྲོང་ཁྱེར་ཉུལ་བའི་བས་མཐའ་ནས། །
མིག་མཐར་འཁྱུད་པའི་ཟིལ་པ་རེ་རེས་ཀྱང་། །
ཡུན་རིང་འཚོལ་བའི་སྙིང་པོ་ཡང་ཡང་དག །