ཁམས་རི་ཚེ་རྡོར།
ཀ་མ་ལ་ལྟར་ཁ་བའི་མཚོ་མོ་སྒྲོན། །
ག་བུར་འཐུལ་ལེར་ང་ལ་ཟུར་མིག་གཡོ། །
ཅ་ལེ་ཅོ་ལེ་ཆ་སྙོམ་མ་ཡིན་པའི། །
ཇ་ཆང་མཚར་གླུའི་ཉ་ཀྱུ་འཕེན་ན་ཡང་། །
ཏ་ཐ་ག་ཏའི་ཐ་སྙད་དུ་མ་ཞིག །
ད་དུང་འཛིན་པའི་ན་ཆུང་བཙུན་པ་ངས། །
པརྦྦ་ཏ་ལྟར་ཕ་རོལ་འཇིག་རྟེན་དུ། །
བ་གམ་མཐོན་པོ་མ་བསྒྲིགས་ལྷུན་གྲུབ་ཡིན། །
ཙཀྵུ་འབྱེད་ཅིང་ཚ་གྲང་སེལ་བའི་སྨན། །
ཛ་ཡའི་དགོངས་པ་ཝ་ལེར་སྟོན་པའི་གཞུང་། །
ཞ་ལུ་སོགས་ཀྱིས་ཟ་ཧོར་ཡུལ་ནས་བསྒྱུར། །
འ་ཅག་བདེ་བའི་ཡ་མཚན་ནོར་བུ་ཡིན། །
ར་ས་འཕྲུལ་སྣང་ལ་སོགས་ལྷ་ཁང་དུ། །
ཤ་ཆང་སྤངས་ཏེ་ས་ལྟར་སེམས་སོགས་བསྐྱེད། །
ཧ་ཅང་བརྩེ་བའི་ཨ་མ་ཐམས་ཅད་ཀྱིས། །
ཧ་བཏབས་ལྟ་བུའི་ཨ་དོན་རྟོགས་པར་སྨོན། །
ཕྱི་གླིང་རིགས་ཀྱི་མིག་སྤྲིན་མི་གཤིས་འདིས། །
འཛུམ་མུལ་མུལ་དུ་བུ་ཕྲུག་སྡུག་གུ་བསླུ། །
དེ་སྟེ་སྐེད་མེད་སྒེག་མཛེས་ཁྱེད་སེམས་དེ། །
འཁྱོག་གོ་གཡོ་ཟོལ་སྟོན་ནོ་མཚོ་མོ་སྒྲོན། །
|